ಅಭಿಷೇಕ್ ಶರ್ಮಾ ಸ್ಫೋಟಕ ಶತಕದ ಅಬ್ಬರಕ್ಕೆ ನಲುಗಿದ ನ್ಯೂಝಿಲೆಂಡ್; ಭಾರತಕ್ಕೆ ಸರಣಿ ಕಿರೀಟ

ವೆಲ್ಲಿಂಗ್ಟನ್: ಅಭಿಷೇಕ್ ಶರ್ಮಾ ಅವರ ಸಿಕ್ಸರ್‌ ಗಳ ಸುರಿಮಳೆ, ಪುಟಿದೆದ್ದ ವೈಭವ್ ಸೂರ್ಯವಂಶಿ, ನ್ಯೂಝಿಲೆಂಡ್ ಬೌಲರ್‌ ಗಳನ್ನು ಕಂಗೆಡಿಸಿದ ಈ ಜೋಡಿಯ ಅಬ್ಬರಕ್ಕೆ ಆತಿಥೇಯರು ತತ್ತರಿಸಿದರು. ಮೂರನೇ ಟಿ20 ಪಂದ್ಯದಲ್ಲಿ ನ್ಯೂಝಿಲೆಂಡ್ ವಿರುದ್ಧ 6 ವಿಕೆಟ್‌ ಗಳ ಭರ್ಜರಿ ಗೆಲುವು ಸಾಧಿಸಿದ ಭಾರತ, ಐದು ಪಂದ್ಯಗಳ ಸರಣಿಯನ್ನು ಇನ್ನೂ ಎರಡು ಪಂದ್ಯಗಳು ಬಾಕಿ ಇರುವಾಗಲೇ 3–0 ಅಂತರದಲ್ಲಿ ತನ್ನದಾಗಿಸಿಕೊಂಡಿತು.

ನ್ಯೂಝಿಲೆಂಡ್ ನೀಡಿದ್ದ 199 ರನ್‌ ಗಳ ಗುರಿಯನ್ನು ಭಾರತ ಕೇವಲ 13.2 ಓವರ್‌ ಗಳಲ್ಲಿ ನಾಲ್ಕು ವಿಕೆಟ್ ಕಳೆದುಕೊಂಡು ತಲುಪಿತು. ಇನ್ನೂ 40 ಎಸೆತಗಳು ಬಾಕಿ ಇದ್ದವು. ಅಭಿಷೇಕ್ ಶರ್ಮಾ ಅವರ ಸ್ಫೋಟಕ ಶತಕ ಭಾರತದ ಗೆಲುವನ್ನು ಸುಲಭವಾಗಿಸಿತು.

► 38 ಎಸೆತಗಳಲ್ಲಿ 113 ರನ್!

ಅಭಿಷೇಕ್ ಶರ್ಮಾ ಬ್ಯಾಟ್‌ನಿಂದ ಸಿಡಿದ ರನ್‌ ಗಳ ಪ್ರವಾಹ ನ್ಯೂಝಿಲೆಂಡ್ ಬೌಲರ್‌ ಗಳ ಬೆವರಿಳಿಸಿತು. ಕೇವಲ 38 ಎಸೆತಗಳನ್ನು ಎದುರಿಸಿದ ಅವರು 9 ಬೌಂಡರಿ ಹಾಗೂ 11 ಸಿಕ್ಸರ್‌ ಗಳ ನೆರವಿನಿಂದ 113 ರನ್ ಗಳಿಸಿದರು. 35 ಎಸೆತಗಳಲ್ಲೇ ಶತಕ ಪೂರೈಸಿದ ಅಭಿಷೇಕ್, ಟಿ20 ಅಂತರರಾಷ್ಟ್ರೀಯ ಕ್ರಿಕೆಟ್‌ ನಲ್ಲಿ ತಮ್ಮ ಅಬ್ಬರವನ್ನು ಮತ್ತೊಮ್ಮೆ ಪ್ರದರ್ಶಿಸಿದರು. ಪಂದ್ಯಶ್ರೇಷ್ಠ ಗೌರವವೂ ಅವರ ಪಾಲಾಯಿತು.

15 ವರ್ಷದ ವೈಭವ್ ಸೂರ್ಯವಂಶಿ ಕೂಡ ಆರಂಭದಿಂದಲೇ ಸಿಡಿಲಬ್ಬರದ ಆಟವಾಡಿದರು. ಕೇವಲ 19 ಎಸೆತಗಳಲ್ಲಿ ನಾಲ್ಕು ಬೌಂಡರಿ, ನಾಲ್ಕು ಸಿಕ್ಸರ್‌ ಗಳ ಸಹಿತ 45 ರನ್ ಗಳಿಸಿದರು. ಅಭಿಷೇಕ್ ಮತ್ತು ವೈಭವ್ ಮೊದಲ ವಿಕೆಟ್‌ ಗೆ ಕೇವಲ 7.1 ಓವರ್‌ ಗಳಲ್ಲಿ 133 ರನ್ ಸೇರಿಸಿ ನ್ಯೂಝಿಲೆಂಡ್ ಬೌಲರ್‌ ಗಳ ಲೆಕ್ಕಾಚಾರವನ್ನೇ ಬುಡಮೇಲು ಮಾಡಿದರು.

ಪವರ್‌ ಪ್ಲೇ ನ ಆರು ಓವರ್‌ ಗಳಲ್ಲಿ ಈ ಜೋಡಿ 118 ರನ್ ಕಲೆಹಾಕಿತು. ಟಿ20 ಅಂತರರಾಷ್ಟ್ರೀಯ ಕ್ರಿಕೆಟ್‌ ನಲ್ಲಿ ಪೂರ್ಣ ಸದಸ್ಯ ರಾಷ್ಟ್ರವೊಂದರ ತಂಡ ಪವರ್‌ ಪ್ಲೇ ನಲ್ಲಿ ಗಳಿಸಿದ ದಾಖಲೆಯ ಮೊತ್ತ ಇದಾಗಿದೆ.

ವೈಭವ್ ಔಟಾದ ಬಳಿಕವೂ ಅಭಿಷೇಕ್ ಸಿಕ್ಸರ್‌ ಗಳ ಸುರಿಮಳೆ ನಿಲ್ಲಿಸಲಿಲ್ಲ. ತಂಡದ ಮೊತ್ತ 178 ರನ್ ಆಗಿದ್ದಾಗ ಅವರ ಸ್ಫೋಟಕ ಇನ್ನಿಂಗ್ಸ್ ಅಂತ್ಯಗೊಂಡಿತು. ಬಳಿಕ ಸಂಜು ಸ್ಯಾಮ್ಸನ್ 18 ರನ್ ಗಳಿಸಿದರೆ, ನಾಯಕ ಶ್ರೇಯಸ್ ಅಯ್ಯರ್ 5 ರನ್ ಗಳಿಸಿ ನಿರ್ಗಮಿಸಿದರು. ತಿಲಕ್ ವರ್ಮಾ ಮತ್ತು ನಮನ್ ಧೀರ್ ತಂಡವನ್ನು ಗೆಲುವಿನ ದಡ ಸೇರಿಸಿದರು.

ನ್ಯೂಝಿಲೆಂಡ್ ಪರ ಕೈಲ್ ಜೇಮಿಸನ್ ಎರಡು ವಿಕೆಟ್ ಪಡೆದರು. ಮ್ಯಾಥ್ಯೂ ಫಿಶರ್ ಮತ್ತು ನಾಯಕ ಮಿಚೆಲ್ ಸ್ಯಾಂಟ್ನರ್ ತಲಾ ಒಂದು ವಿಕೆಟ್ ಕಬಳಿಸಿದರು.

► ಮಿಚೆಲ್ ಹೋರಾಟ ವ್ಯರ್ಥ

ಇದಕ್ಕೂ ಮೊದಲು ಟಾಸ್ ಗೆದ್ದ ಭಾರತದ ನಾಯಕ ಶ್ರೇಯಸ್ ಅಯ್ಯರ್ ಬೌಲಿಂಗ್ ಆಯ್ಕೆ ಮಾಡಿಕೊಂಡರು. ಆರಂಭದಲ್ಲಿ ವಿಕೆಟ್ ಕಳೆದುಕೊಂಡರೂ ಡೇರಿಲ್ ಮಿಚೆಲ್ ಅವರ ಅಜೇಯ 89 ರನ್‌ ಗಳ ನೆರವಿನಿಂದ ನ್ಯೂಝಿಲೆಂಡ್ 20 ಓವರ್‌ ಗಳಲ್ಲಿ ಮೂರು ವಿಕೆಟ್‌ ಗೆ 198 ರನ್ ಗಳಿಸಿತು. ಫಿನ್ ಅಲೆನ್ ಮತ್ತು ಬೆವನ್ ಜಾಕೋಬ್ಸ್ ಕೂಡ ತಂಡದ ಮೊತ್ತ ಹೆಚ್ಚಿಸಲು ನೆರವಾದರು.

ಭಾರತದ ಬೌಲರ್‌ ಗಳು ಆರಂಭದಲ್ಲಿ ದುಬಾರಿಯಾದರೂ, ಅಂತಿಮ ಓವರ್‌ ಗಳಲ್ಲಿ ಪರಿಣಾಮಕಾರಿ ದಾಳಿ ನಡೆಸಿದರು. ಪ್ರಿನ್ಸ್ ಯಾದವ್, ಅರ್ಷದೀಪ್ ಸಿಂಗ್ ಮತ್ತು ನಿತೀಶ್ ಕುಮಾರ್ ರೆಡ್ಡಿ ನಿಖರವಾದ ಯಾರ್ಕರ್‌ ಗಳನ್ನು ಎಸೆದು ನ್ಯೂಝಿಲೆಂಡ್ ತಂಡವನ್ನು 200 ರನ್‌ ಗಳ ಗಡಿ ದಾಟದಂತೆ ತಡೆದರು.

► ಓಪನರ್ ಗಳ ಆಟಕ್ಕೆ ಅಯ್ಯರ್ ಮೆಚ್ಚುಗೆ

ಪಂದ್ಯದ ಬಳಿಕ ಮಾತನಾಡಿದ ಶ್ರೇಯಸ್ ಅಯ್ಯರ್, ಅಭಿಷೇಕ್ ಮತ್ತು ವೈಭವ್ ಅವರ ಬ್ಯಾಟಿಂಗ್ ಪ್ರದರ್ಶನವನ್ನು ಮುಕ್ತಕಂಠದಿಂದ ಶ್ಲಾಘಿಸಿದರು. ತಾವು ಮತ್ತು ಸಂಜು ಸ್ಯಾಮ್ಸನ್ ಬ್ಯಾಟಿಂಗ್‌ ಗೆ ಇಳಿದಾಗಲೂ ಚೆಂಡು ಸ್ವಿಂಗ್ ಆಗುತ್ತಿತ್ತು. ಅಂತಹ ಪರಿಸ್ಥಿತಿಯಲ್ಲಿ ಓಪನರ್‌ ಗಳು ಆಡಿದ ರೀತಿ ಅಸಾಧಾರಣವಾಗಿತ್ತು ಎಂದು ಹೇಳಿದರು.

ನಿರ್ಭೀತವಾಗಿ ಆಡುವ ಮನಸ್ಥಿತಿ ವಿದೇಶಿ ನೆಲದಲ್ಲಿ ಎದುರಾಗುವ ಸವಾಲುಗಳನ್ನು ನಿಭಾಯಿಸಲು ನೆರವಾಗುತ್ತದೆ ಎಂದ ಅವರು, ಉಳಿದ ಎರಡು ಪಂದ್ಯಗಳಲ್ಲಿಯೂ ಓಪನರ್‌ ಗಳು ಇದೇ ಲಯ ಮುಂದುವರಿಸುವ ವಿಶ್ವಾಸ ವ್ಯಕ್ತಪಡಿಸಿದರು. ಪ್ರಯಾಣದ ಆಯಾಸ ಮತ್ತು ಜೆಟ್‌ ಲ್ಯಾಗ್ ನಡುವೆಯೂ ತಂಡ ಉತ್ತಮ ಪ್ರದರ್ಶನ ನೀಡಿರುವುದು ಸಂತೋಷ ತಂದಿದೆ ಎಂದರು.

ಬೌಲಿಂಗ್‌ ನಲ್ಲಿ ಹಾರ್ಡ್ ಲೆಂಗ್ತ್ ಮತ್ತು ಪೂರ್ಣ ಪ್ರಮಾಣದ ಎಸೆತಗಳಲ್ಲಿ ರನ್‌ ಗಳು ಹೆಚ್ಚಾಗಿ ಸೋರಿಕೆಯಾಗುತ್ತಿದ್ದವು. ಹೀಗಾಗಿ ಬೌಲರ್‌ ಗಳಿಗೆ ಯಾರ್ಕರ್‌ ಗಳನ್ನು ಗುರಿಯಾಗಿಸಲು ಸೂಚಿಸಲಾಯಿತು. ಇದರಿಂದ ನ್ಯೂಝಿಲೆಂಡ್ ತಂಡವನ್ನು 200 ರನ್‌ ಗಳೊಳಗೆ ನಿಯಂತ್ರಿಸಲು ಸಾಧ್ಯವಾಯಿತು ಎಂದು ತಿಳಿಸಿದರು.