ಕೋಟೇಶ್ವರ: 40 ವರ್ಷದಿಂದಿದ್ದ ಚೇತನಾ ರಿಕ್ಷಾ ನಿಲ್ದಾಣ ತೆರವುಗೊಳಿಸಲು ಹೈಕೋರ್ಟ್‌ನಿಂದ ಆದೇಶ

ಕುಂದಾಪುರ, ಜು.15: ತಾಲೂಕಿನ ಕೋಟೇಶ್ವರ ಕೋಟಿಲಿಂಗೇಶ್ವರ ದೇವಸ್ಥಾನದ ರಥಬೀದಿಯಲ್ಲಿ ಸುಮಾರು 40 ವರ್ಷಗಳಿಂದ ಸಾರ್ವಜನಿಕರಿಗೆ ಸೇವೆ ನೀಡುತ್ತಿದ್ದ ‘ಚೇತನಾ ರಿಕ್ಷಾ ನಿಲ್ದಾಣ’ವನ್ನು ತೆರವು ಗೊಳಿಸಲು ಹೈಕೋರ್ಟ್ ಆದೇಶಿಸಿದ್ದು, ಅದರಂತೆ ಮಂಗಳವಾರ ಕುಂದಾಪುರ ಪೊಲೀಸರು ಮತ್ತು ಕೋಟೇಶ್ವರ ಗ್ರಾಮ ಪಂಚಾಯಿತಿ ನೇತೃತ್ವ ದಲ್ಲಿ ಜಂಟಿ ತೆರವು ಕಾರ್ಯಚಾರಣೆ ನಡೆದಿದ್ದು ರಿಕ್ಷಾ ಚಾಲಕರು ಅತಂತ್ರ ಸ್ಥಿತಿಯಲ್ಲಿದ್ದಾರೆ.

ಕೋಟೇಶ್ವರ ರಥಬೀದಿಯಲ್ಲಿನ ರಿಕ್ಷಾ ನಿಲ್ದಾಣದ ಪಕ್ಕದಲ್ಲಿರುವ ಖಾಸಗಿ ಕಟ್ಟಡವೊಂದರಲ್ಲಿ ವ್ಯಾಪಾರ ವಹಿವಾಟು ನಡೆಸಲು ಹಾಗೂ ಅಲ್ಲಿಗೆ ಬರುವ ಗ್ರಾಹಕರಿಗೆ ರಿಕ್ಷಾ ನಿಲ್ದಾಣದಿಂದ ತೊಂದರೆಯಾಗುತ್ತಿದೆ ಎಂದು ಆರೋಪಿಸಿ ಕಟ್ಟಡದ ಮಾಲಕರು ಹೈಕೋರ್ಟ್ ಮೇಟ್ಟಿಲೇರಿದ್ದರು. ಕೋಟೇಶ್ವರ ಗ್ರಾಮ ಪಂಚಾಯಿತಿಗೆ ಈ ಆಟೋ ನಿಲ್ದಾಣವನ್ನು ತೆರವುಗೊಳಿಸಲು ನ್ಯಾಯಾಲಯ ಆದೇಶ ನೀಡಿತ್ತು.

ಅದರಂತೆ ಒಂದೆರಡು ತಿಂಗಳ ಹಿಂದೆ ಗ್ರಾ.ಪಂ ಪಿಡಿಓ ಸ್ಥಳವನ್ನು ಪರಿಶೀಲಿಸಿ ಕೋರ್ಟ್ ಆದೇಶದ ಸೂಚನೆಯ ನಾಮಫಲಕವನ್ನು ಅಳವಡಿಸಿ ರಿಕ್ಷಾ ಚಾಲಕರಿಗೆ ನೋಟಿಸ್ ಜಾರಿ ಮಾಡಿದ್ದರು. ಇದರ ನಡುವೆಯೂ ಅದೇ ರಿಕ್ಷಾ ನಿಲ್ದಾಣದಲ್ಲಿಯೇ ರಿಕ್ಷಾ ನಿಲ್ಲುತ್ತಿತ್ತು. ಪುನಃ ಕಟ್ಟಡ ಮಾಲಕರು ಹೈಕೋರ್ಟ್ ಮೊರೆ ಹೋಗಿದ್ದರಿಂದ ಕುಂದಾಪುರ ಪೊಲೀಸ್ ಅಧಿಕಾರಿಗಳಿಗೆ ಹಾಗೂ ಪಂಚಾಯಿತಿಗೆ ರಿಕ್ಷಾ ನಿಲ್ದಾಣವನ್ನು ತೆರವುಗೊಳಿಸಲು ಸೂಚಿಸಿ ಕೋರ್ಟ್ ಎಚ್ಚರಿಕೆ ನೀಡಿತ್ತು.

ಈ ಹಿನ್ನೆಲೆಯಲ್ಲಿ ಕುಂದಾಪುರ ವೃತ್ತ ನೀರಿಕ್ಷಕ ಜಯರಾಮ ಡಿ. ಗೌಡ, ಪಿಎಸ್‌ಐಗಳಾದ ನಂಜಾ ನಾಯ್ಕ್ ಅನೂಪ್ ಕುಮಾರ್, ಸುಧಾಪ್ರಭು, ಕೋಟೇಶ್ವರ ಗ್ರಾಮ ಪಂಚಾಯಿತಿ ಪಿಡಿಒ ದಿನೇಶ ನಾಯ್ಕ್ ಮೊದಲಾದವರು ಕಾರ್ಯಾ ಚಾರಣೆಯಲ್ಲಿ ಭಾಗಿಯಾಗಿ ರಿಕ್ಷಾ ನಿಲ್ದಾಣದ ನಾಮಫಲಕಗಳನ್ನು ತೆರವುಗೊಳಿಸಿ ನೋ ಪಾರ್ಕಿಂಗ್ ಬೋರ್ಡ್‌ ಗಳನ್ನು ಅಳವಡಿಸಿ ಚಾಲಕರಿಗೆ ಮಾಹಿತಿ ನೀಡಿದರು.

ಧಾರ್ಮಿಕ ದತ್ತಿ ಇಲಾಖೆಗೊಳಪಡುವ ಸ್ಥಳದಲ್ಲಿ ಕಳೆದ 40 ವರ್ಷಗಳಿಂದ ಸಾರ್ವಜನಿಕರಿಗೆ ಆಟೋ ಸೇವೆಯನ್ನು ನೀಡುತ್ತಿದ್ದೆವೆ. ಇಲ್ಲಿಯ ತನಕ ನಾವು ಯಾರಿಗೂ ತೊಂದರೆ ನೀಡಿಲ್ಲ. 2003ನೇ ಇಸವಿಯಲ್ಲಿ ಚೇತನಾ ರಿಕ್ಷಾ ನಿಲ್ದಾಣವನ್ನು ದೇವಳದ ಅಂದಿನ ಆಡಳಿತ ಧರ್ಮದರ್ಶಿಯಾಗಿದ್ದ ಹಾಗೂ ಪ್ರಸ್ತುತ ಧರ್ಮದರ್ಶಿಗಳಾಗಿರುವ ಗೋಪಾಲ ಶೆಟ್ಟಿ ಮಾರ್ಕೋಡು ಮತ್ತು ಕುಂದಾಪುರ ಪೊಲೀಸ್ ಠಾಣೆಯ ಅಂದಿನ ವೃತ್ತ ನೀರಿಕ್ಷಕರಾಗಿದ್ದ ಶೇಖರಪ್ಪ ಹಾಗೂ ಇನ್ನಿತರ ಮುಖ್ಯ ಅತಿಥಿಗಳು ಉದ್ಘಾಟಿಸಿದ್ದರು.

ನ್ಯಾಯಾಲಯದ ಆದೇಶದ ನೆಪದಲ್ಲಿ ಇದೀಗ ತೆರವಿಗೆ ಬಂದಿದ್ದಾರೆ. ಯಾವ ಅಧಿಕಾರಿಗಳಿಗೂ ನಾವು ಅಡ್ಡಿ ಪಡಿಸದೇ ನ್ಯಾಯಾಲಯದ ಆದೇಶಕ್ಕೆ ತಲೆ ಬಾಗಿದ್ದೆವೆ. ಆದರೆ ಕಳೆದ 40 ವರ್ಷಗಳಿಂದ ಸೇವೆ ನೀಡುತ್ತಿದ್ದ ಈ ಘಟನೆಯಿಂದ 21 ಕುಟುಂಬಗಳು ದಾರಿ ಮೇಲೆ ಬೀಳುವಂತಾಗಿದೆ. ಸಂಬಂಧಪಟ್ಟ ಇಲಾಖೆಗಳು ಹಾಗೂ ಅಧಿಕಾರಿಗಳು ನಮ್ಮ ರಿಕ್ಷಾ ನಿಲ್ದಾಣ ಕ್ಕೊಂದು ಸೂಕ್ತ ವ್ಯವಸ್ಥೆ ಮಾಡಬೇಕೆಂದು ರಿಕ್ಷಾ ಚಾಲಕರು ಆಗ್ರಹಿಸಿದ್ದಾರೆ.

"ಜನರ ಒಳಿತಿಗಾಗಿ ಕೆಲಸ ಮಾಡುವ ರಿಕ್ಷಾ ಚಾಲಕರು ಹಾಗೂ ಅವರ ಕುಟುಂಬಕ್ಕೆ ಅನ್ಯಾಯವಾಗಿದೆ. ಅವರಿಗೆ ಸೂಕ್ತ ನ್ಯಾಯ ಒದಗಿಸುವ ನಿಟ್ಟಿನಲ್ಲಿ ಹಾಗೂ ಧಾರ್ಮಿಕ ದತ್ತಿ ಇಲಾಖೆಗೊಳಪಟ್ಟ ದೇವಸ್ಥಾನಕ್ಕೊಳಪಟ್ಟ ಭೂಮಿ ಖಾಸಗಿಯವರು ಒತ್ತುವರಿ ಮಾಡಿಕೊಂಡಿದ್ದು ಅದನ್ನು ವಾಪಾಸ್ ಪಡೆಯಲು ಇಲಾಖೆ ಕ್ರಮವಹಿಸಲು ಆಗ್ರಹಿಸಿ ನಾಗರಿಕರೊಡಗೂಡಿ ಪ್ರತಿಭಟಿಸಲು ಮತ್ತು ಕಾನೂನು ಹೋರಾಟ ನಡೆಸಲು ತೀರ್ಮಾನಿಸಲಾಗಿದೆ".

-ಅಶೋಕ್ ಪೂಜಾರಿ ಬೀಜಾಡಿ, ಸಾಮಾಜಿಕ ಕಾರ್ಯಕರ್ತ

ಧಾರ್ಮಿಕ ದತ್ತಿ ಇಲಾಖೆಗೆ ಸಂಬಂಧಪಟ್ಟ ಕೋಟೇಶ್ವರ ಕೋಟಿಲಿಂಗೇಶ್ವರ ದೇವಸ್ಥಾನದ ರಥಬೀದಿಯಲ್ಲಿ ಕೆಲವು ಖಾಸಗಿ ವ್ಯಕ್ತಿಗಳು ರಥಬೀದಿಯನ್ನು ಒತ್ತುವರಿ ಮಾಡಿಕೊಂಡು ಅಕ್ರಮವಾಗಿ ಕಟ್ಟಡವನ್ನು ನಿರ್ಮಿಸಿದ್ದಾರೆ. ಇದರಿಂದ ದೇವಳದ ರಥೋತ್ಸವದ ಸಂದರ್ಭದಲ್ಲಿ ಸಾಕಷ್ಟು ತೊಂದರೆಯಾಗುತ್ತಿದೆ. ಈ ಕುರಿತು 2005ರಲ್ಲಿ ದೇವಳದ ಆಡಳಿತ ಮಂಡಳಿಯು ಒತ್ತುವರಿಯಾದ ಜಾಗವನ್ನು ತೆರವುಗೊಳಿಸಲು ಹೈಕೋರ್ಟ್ ಮೇಟ್ಟಿಲಿರಿತ್ತು. ಹೈಕೋರ್ಟ್ ಸೂಕ್ತ ಮಾರ್ಗದರ್ಶನ ನೀಡಿ ಒತ್ತುವರಿಯಾದ ಜಾಗಗಳನ್ನು ತೆರವುಗೊಳಿಸಲು ಕುಂದಾಪುರದ ತಹಶೀಲ್ದಾರ್‌ಗೆ ಆದೇಶ ನೀಡಿತ್ತು. ಅದರೂ ಕೂಡ ಇಲ್ಲಿಯ ತನಕ ನ್ಯಾಯಾಲಯದ ಆದೇಶ ಪಾಲನೆಯಾಗಿಲ್ಲ. ಇದೀಗ ಸಾಮಾನ್ಯ ರಿಕ್ಷಾ ಚಾಲಕರನ್ನು ಅದೇ ಒತ್ತುವರಿ ಮಾಡಿಕೊಂಡವರು ಕೆಲವೊಂದು ನೆಪವೊಡ್ಡಿ ತೆರವು ಗೊಳಿಸಿದ್ದು ದುರಂತ. ಒತ್ತುವರಿಯಾದ ಜಾಗವನ್ನು ಸಂಬಂಧಪಟ್ಟವರು ತುರ್ತು ಕ್ರಮಕೈಗೊಂಡು ತೆರವುಗೊಳಿಸಬೇಕು".

-ಶೇಖರ ಮಠದಬೆಟ್ಟು ಕೋಟೇಶ್ವರ, ಸಾಮಾಜಿಕ ಕಾರ್ಯಕರ್ತ.