Udupi | ಪರ್ಯಾಯ ಶಿರೂರು ಮಠದ ಪಾರುಪತ್ಯೆದಾರ ರಾಜೀನಾಮೆ
ಶ್ರೀಶ ಭಟ್ರಲ್ಲಿ ಮಠದ ಹಣಕಾಸು ವ್ಯವಹಾರ ಮಾಡದಂತೆ ಮನವಿ
ಉಡುಪಿ, ನ.21: ಪರ್ಯಾಯ ಶಿರೂರು ಮಠದ ಸಾರ್ವಜನಿಕ ಸಂಪರ್ಕಾಧಿಕಾರಿ ಹಾಗೂ ಪಾರುಪತ್ಯೇದಾರ ಶ್ರೀಶ ಭಟ್ ತಮ್ಮ ವೈಯಕ್ತಿಕ ಕಾರಣಗಳಿಂದ ತಮ್ಮ ಹುದ್ದೆಗೆ ನ.9ರಂದು ರಾಜೀನಾಮೆ ನೀಡಿದ್ದು, ಅವರ ರಾಜೀನಾಮೆಯನ್ನು ಶಿರೂರು ಶ್ರೀವೇದವರ್ಧನ ತೀರ್ಥ ಸ್ವಾಮೀಜಿ ಅಂಗೀಕರಿಸಿದ್ದಾರೆ.
ಶಿರೂರು ಮಠದ ಸ್ವಾಮೀಜಿಗಳ ಸಂಚಾರ ಅವಧಿಯಲ್ಲಿ ಮತ್ತು ಈವರೆಗೆ ಮಠದ ಸಾರ್ವಜನಿಕ ಸಂಪರ್ಕಾಧಿಕಾರಿ ಹಾಗೂ ಪಾರುಪತ್ಯೇದಾರರಾಗಿ ಶ್ರೀಶ ಭಟ್ ಕರ್ತವ್ಯ ನಿರ್ವಹಿಸಿದ್ದು, ಅವರು ತಮ್ಮ ವೈಯಕ್ತಿಕ ಕಾರಣಗಳಿಂದ ತಮ್ಮ ಕರ್ತವ್ಯವನ್ನು ನಿರ್ವಹಿಸಲು ಅಸಮರ್ಥರೆಂದು ತಿಳಿಸಿ ರಾಜೀನಾಮೆ ನೀಡಿದ್ದಾರೆ ಎಂದು ಶೀರೂರು ಮಠದ ದಿವಾನ ಡಾ.ಉದಯ ಕುಮಾರ ಸರಳತ್ತಾಯ ತಿಳಿಸಿದ್ದಾರೆ.
ಇನ್ನು ಮುಂದೆ ಮಠಕ್ಕೆ ಸಂಬಂಧಿಸಿದ ಯಾವುದೇ ಹಣಕಾಸು ವ್ಯವಹಾರವನ್ನು ಈ ಹಿಂದಿನ ಸಾರ್ವಜನಿಕ ಸಂಪರ್ಕಾಧಿಕಾರಿ ಹಾಗೂ ಪಾರುಪತ್ಯೇದಾರ ಶ್ರೀಶ ಭಟ್ ಅವರಲ್ಲಿ ಮಾಡಬಾರದು ಎಂದು ಈ ಮೂಲಕ ಮನವಿ ಮಾಡುತ್ತಿದ್ದೇವೆ. ಹಣಕಾಸು ಮತ್ತು ಸೇವೆಯ ವಿಚಾರಕ್ಕೆ ಸಂಬಂಧಿಸಿದಂತೆ ಮಠದ ಸೇವಾ ಕಛೇರಿಯನ್ನು ಸಂಪರ್ಕಿಸಬೇಕು ಎಂದು ಅವರು ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.