ಮಂಗಳ ಗ್ರಹಕ್ಕಾಗಿ ನಿರ್ಮಾಣ, ಸೇನೆಗಾಗಿ ಪ್ರಯೋಗ; BITS ವಿದ್ಯಾರ್ಥಿಗಳ GPS ಮುಕ್ತ ಡ್ರೋನ್ ವ್ಯವಸ್ಥೆ

BITS ಹೈದರಾಬಾದ್ ನ ಇಬ್ಬರು ವಿದ್ಯಾರ್ಥಿಗಳು ಮಂಗಳ ಗ್ರಹದಲ್ಲಿ ಕಾರ್ಯನಿರ್ವಹಿಸಬಹುದಾದ GPS ಮುಕ್ತ ಡ್ರೋನ್ ಗಳಿಗಾಗಿ ನ್ಯಾವಿಗೇಶನ್ ತಂತ್ರಜ್ಞಾನವನ್ನು ಅಭಿವೃದ್ಧಿಪಡಿಸಿದ್ದಾರೆ. ಇದೀಗ ಭಾರತೀಯ ಸೇನೆ ಆ ತಂತ್ರಜ್ಞಾನದ ಪ್ರಾಯೋಗಿಕ ಬಳಕೆಯನ್ನು ಪರೀಕ್ಷಿಸುತ್ತಿದೆ.

GPS ಸಿಗ್ನಲ್ ಗಳು ಲಭ್ಯವಿಲ್ಲದ ಮಂಗಳ ಗ್ರಹದಲ್ಲಿ ಡ್ರೋನ್ ಗಳು ಹೇಗೆ ನ್ಯಾವಿಗೇಟ್ ಮಾಡುತ್ತವೆ ಎಂಬ ಪ್ರಶ್ನೆಗೆ ಉತ್ತರ ಹುಡುಕಲು ಪ್ರಯತ್ನಿಸಿದ ನಮನ್ ಕಾಸ್ಲಿವಾಲ್ ಮತ್ತು ಶಿವ್ ಪಾಟೀಲ್‌ ಗೆ ಯುದ್ಧಭೂಮಿಯ ಕಲ್ಪನೆಯೇ ಇರಲಿಲ್ಲ. ಆದರೆ ಇದೀಗ BITS ಹೈದರಾಬಾದ್ ನ ಈ ಇಬ್ಬರು ವಿದ್ಯಾರ್ಥಿಗಳು ಅಭಿವೃದ್ಧಿಪಡಿಸಿದ ಮಂಗಳ ಗ್ರಹದಲ್ಲಿ ಕಾರ್ಯನಿರ್ವಹಿಸಬಹುದಾದ ಡ್ರೋನ್ ಗಳ ನ್ಯಾವಿಗೇಶನ್ ತಂತ್ರಜ್ಞಾನವನ್ನು ಭಾರತೀಯ ಸೇನೆ ಪ್ರಾಯೋಗಿಕವಾಗಿ ಪರೀಕ್ಷಿಸಿದೆ.

ಭೂಮಿಯ ಮೇಲೆ ಲಭ್ಯವಿರುವಂತಹ GPS ಉಪಗ್ರಹ ಜಾಲವಿಲ್ಲದೆ, ಇಂತಹ ಡ್ರೋನ್ ಗಳಿಗೆ ತಮ್ಮ ಸ್ಥಾನವನ್ನು ನಿರ್ಧರಿಸಲು ಮತ್ತು ಸುತ್ತಮುತ್ತಲಿನ ಪ್ರದೇಶವನ್ನು ಗುರುತಿಸಲು ಪರ್ಯಾಯ ಮಾರ್ಗದ ಅಗತ್ಯವಿರುತ್ತದೆ. GPS ಸಿಗ್ನಲ್ ಗಳು ವಿಫಲವಾದಾಗ ಡ್ರೋನ್ ಗಳು ದಿಕ್ಕಿನ ಪ್ರಜ್ಞೆಯನ್ನು ಕಳೆದುಕೊಳ್ಳಬಹುದು. ಈ ಸವಾಲನ್ನು ಪರಿಹರಿಸಲು ವಿದ್ಯಾರ್ಥಿಗಳು ಸ್ಥಳೀಯ ಸಂಚರಣೆ ವ್ಯವಸ್ಥೆಯನ್ನು ಅಭಿವೃದ್ಧಿಪಡಿಸಿದ್ದಾರೆ. ಉಪಗ್ರಹ ಸಿಗ್ನಲ್ ಗಳು ಲಭ್ಯವಿಲ್ಲದಿದ್ದಾಗ ಅಥವಾ ಹಸ್ತಕ್ಷೇಪದಿಂದ ಅಡ್ಡಿಪಡಿಸಿದಾಗಲೂ ಡ್ರೋನ್ ಗಳು ಕಾರ್ಯನಿರ್ವಹಿಸಲು ಸಹಾಯ ಮಾಡುವುದು ಈ ವ್ಯವಸ್ಥೆಯ ಉದ್ದೇಶವಾಗಿದೆ.

ಅವರ ಸಂಶೋಧನೆಯ ಸಂದರ್ಭದಲ್ಲಿ ಭಾರತೀಯ ಸೇನಾಧಿಕಾರಿಯೊಬ್ಬರು ಈ ತಂತ್ರಜ್ಞಾನಕ್ಕೆ ಭಿನ್ನವಾದ ಮತ್ತು ಹೆಚ್ಚು ತಕ್ಷಣದ ಬಳಕೆಯ ಸಾಧ್ಯತೆಯನ್ನು ಗುರುತಿಸಿದರು. GPS ಸಿಗ್ನಲ್ ಗಳನ್ನು ಉದ್ದೇಶಪೂರ್ವಕವಾಗಿ ಜಾಮ್ ಮಾಡಿದ ಅಥವಾ ಅಡ್ಡಿಪಡಿಸಿದ ಪರಿಸರದಲ್ಲಿ ಮಿಲಿಟರಿ ಡ್ರೋನ್ ಗಳು ನ್ಯಾವಿಗೇಟ್ ಮಾಡಲು ಈ ತಂತ್ರಜ್ಞಾನ ನೆರವಾಗಬಹುದು ಎಂಬುದನ್ನು ಅವರು ಗಮನಿಸಿದರು. ಸೇನಾಧಿಕಾರಿಯೊಂದಿಗಿನ ಸಂಭಾಷಣೆಯು ವಿದ್ಯಾರ್ಥಿಗಳು ತಮ್ಮ ದೃಶ್ಯ ಆಧಾರಿತ ಸಂಚರಣೆ ತಂತ್ರಜ್ಞಾನವನ್ನು (Vision-based Navigation Technology) ಭೂಮಿಯ ಮೇಲಿನ ಮಿಲಿಟರಿ ಬಳಕೆಗೆ ಹೇಗೆ ಅಳವಡಿಸಿಕೊಳ್ಳಬಹುದು ಎಂಬುದನ್ನು ಅನ್ವೇಷಿಸಲು ಪ್ರೇರೇಪಿಸಿತು. ಅಂತಿಮವಾಗಿ, ಅವರ ಸ್ಟಾರ್ಟಪ್ ಬೀಜಾನ್ ಅಭಿವೃದ್ಧಿಪಡಿಸಿದ ಬೀಜಾನ್ ಸ್ವಾಯತ್ತ ಸಂಚರಣೆ ಮಾಡ್ಯೂಲ್ (Beijan Autonomous Navigation Module) ರೂಪುಗೊಂಡಿತು. ಅಂದಿನಿಂದ ಈ ತಂತ್ರಜ್ಞಾನವನ್ನು ಸಿಕಂದರಾಬಾದ್ ಮತ್ತು ಲೇಹ್ ಸೇರಿದಂತೆ ಮಿಲಿಟರಿ ಸ್ಥಳಗಳಲ್ಲಿ ಪರೀಕ್ಷಿಸಲಾಗಿದ್ದು, ಭಾರತೀಯ ಸೇನೆಯ ದಕ್ಷಿಣ ಕಮಾಂಡ್ ಮುಂದೆಯೂ ಪ್ರದರ್ಶಿಸಲಾಗಿದೆ.

ಬೀಜಾನ್ ನ CEO ಮತ್ತು ಸಹ ಸಂಸ್ಥಾಪಕ ನಮನ್ ಅವರ ಪ್ರಕಾರ, ಹೆಚ್ಚಿನ ಕ್ಷೇತ್ರ ಪರೀಕ್ಷೆಗಾಗಿ ಮೂರು ಮಾಡ್ಯೂಲ್ ಗಳನ್ನು ಪೋಖ್ರಾನ್ಗೆ ತೆಗೆದುಕೊಂಡು ಹೋಗಲಾಗಿದೆ. ಇತರ ಎಂಟು ಮಿಲಿಟರಿ ಘಟಕಗಳ ಅಧಿಕಾರಿಗಳೂ ಈ ತಂತ್ರಜ್ಞಾನದ ಬಗ್ಗೆ ಆಸಕ್ತಿ ವ್ಯಕ್ತಪಡಿಸಿದ್ದಾರೆ.

“ಮಂಗಳ ಗ್ರಹದಲ್ಲಿ ಕಾರ್ಯನಿರ್ವಹಿಸುವ ಡ್ರೋನ್ ಗಳಿಗಾಗಿ ಸಂಚರಣೆ ವ್ಯವಸ್ಥೆಯನ್ನು ಅಭಿವೃದ್ಧಿಪಡಿಸುವುದು ನಮ್ಮ ಮೊದಲ ಗುರಿಯಾಗಿತ್ತು. ಸೇನಾಧಿಕಾರಿಯೊಬ್ಬರು ಈ ತಂತ್ರಜ್ಞಾನದ ಸಂಭಾವ್ಯ ಬಳಕೆಯನ್ನು, ವಿಶೇಷವಾಗಿ ಉಪಗ್ರಹ ಆಧಾರಿತ ಸಂಚರಣೆ ವ್ಯವಸ್ಥೆ ಲಭ್ಯವಿಲ್ಲದ ಅಥವಾ ಉದ್ದೇಶಪೂರ್ವಕವಾಗಿ ಅಡ್ಡಿಪಡಿಸಲಾದ ಪ್ರದೇಶಗಳಲ್ಲಿ ಬಳಸುವ ಸಾಧ್ಯತೆಯನ್ನು ಎತ್ತಿ ತೋರಿಸಿದ ನಂತರ, ತಂತ್ರಜ್ಞಾನವು ಹೆಚ್ಚು ತಕ್ಷಣದ ಉಪಯೋಗದತ್ತ ಸಾಗಿತು” ಎಂದು ನಮನ್ ಹೇಳಿರುವುದಾಗಿ ಇಂಡಿಯಾ ಟುಡೆ ವರದಿ ಮಾಡಿದೆ.

ಬೀಜಾನ್ ಸ್ವಾಯತ್ತ ನ್ಯಾವಿಗೇಶನ್ ಮಾಡ್ಯೂಲ್, ಡ್ರೋನ್ ನಲ್ಲಿ ಅಳವಡಿಸಲಾಗಿರುವ ಕ್ಯಾಮೆರಾಗಳು ಸೆರೆಹಿಡಿಯುವ ದೃಶ್ಯ ಮಾಹಿತಿಯನ್ನು ಅವಲಂಬಿಸಿರುವ ಪರ್ಯಾಯ ಸಂಚರಣೆ ವ್ಯವಸ್ಥೆಯಾಗಿ ಕಾರ್ಯನಿರ್ವಹಿಸುತ್ತದೆ. ಉಪಗ್ರಹ ಆಧಾರಿತ ಸ್ಥಾನ ನಿರ್ಧಾರ ವ್ಯವಸ್ಥೆಯನ್ನೇ ಸಂಪೂರ್ಣವಾಗಿ ಅವಲಂಬಿಸುವ ಬದಲು, ಈ ವ್ಯವಸ್ಥೆಯು ಚಲನೆಯನ್ನು ಅಂದಾಜಿಸಲು ಮತ್ತು ಸಂಚರಣೆ ನಿರ್ಧಾರಗಳಿಗೆ ನೆರವಾಗಲು ಸುತ್ತಮುತ್ತಲಿನ ಪರಿಸರದ ದೃಶ್ಯ ಮಾಹಿತಿಯನ್ನು ಸಂಸ್ಕರಿಸುತ್ತದೆ.

“ಹೀಗೆ ಬೀಜಾನ್ ತನ್ನದೇ ಆದ ಸ್ವಾಮ್ಯದ ದೃಶ್ಯ ಸಂಚರಣೆ ಸಾಫ್ಟ್ವೇರ್ ಅಭಿವೃದ್ಧಿಪಡಿಸಿದ್ದು, ಸಣ್ಣ ಮತ್ತು ಹಗುರವಾದ ಹಾರ್ಡ್ವೇರ್ನಲ್ಲಿ ಕಾರ್ಯನಿರ್ವಹಿಸುವಂತೆ ಅದನ್ನು ಅತ್ಯುತ್ತಮಗೊಳಿಸಿದೆ” ಎಂದು ನಮನ್ ಹೇಳಿರುವುದಾಗಿ ವರದಿಯಾಗಿದೆ.

ಕಾರ್ಯನಿರ್ವಹಿಸುವ ಮಾದರಿಯನ್ನು (Working Prototype) ನಿರ್ಮಿಸುವುದು ಕೇವಲ ಆರಂಭವಾಗಿತ್ತು. ಆದರೆ ಕ್ಷೇತ್ರಮಟ್ಟದ ಪರಿಸ್ಥಿತಿಗಳಲ್ಲಿ ತಂತ್ರಜ್ಞಾನವನ್ನು ವಿಶ್ವಾಸಾರ್ಹ ವ್ಯವಸ್ಥೆಯಾಗಿ ರೂಪಿಸುವುದು ದೊಡ್ಡ ಸವಾಲಾಗಿತ್ತು. ಅದರ ವಿಶ್ವಾಸಾರ್ಹತೆ, ನಿಖರತೆ ಮತ್ತು ಸ್ಥಿರತೆಯನ್ನು ಸುಧಾರಿಸಬೇಕಾಗಿತ್ತು. ಲೇಹ್ನಂತಹ ಸ್ಥಳಗಳಲ್ಲಿ ನಡೆಸಿದ ಪ್ರಯೋಗಗಳ ಸಂದರ್ಭದಲ್ಲಿ ಕಠಿಣ ಭೂಪ್ರದೇಶ ಮತ್ತು ಪರಿಸರದ ಸ್ಥಿತಿಗಳು ಸವಾಲೊಡ್ಡಿದ್ದವು.