ವಿಶ್ವಕಪ್ ವೇಳಾಪಟ್ಟಿ ಟೀಕಿಸಿದ ಜರ್ಮನಿ ಕೋಚ್; FIFA ವಿರುದ್ಧ ಗಂಭೀರ ಆರೋಪ

ಜರ್ಮನಿ ಶನಿವಾರದವರೆಗೂ ಕಾದ ನಂತರ ನಾಕೌಟ್ ಹಂತದಲ್ಲಿ ತಮ್ಮ ಎದುರಾಳಿ ಯಾರು ಎನ್ನುವುದನ್ನು ತಿಳಿದುಕೊಳ್ಳುತ್ತದೆ. ಆದರೆ ಸೋಮವಾರವೇ ಫಾಕ್ಸ್ಬರೊದಲ್ಲಿ ನಾಕೌಟ್ ಪಂದ್ಯವನ್ನು ಆಡಬೇಕಾಗುತ್ತದೆ.

ತಮ್ಮ 32ರ ಹಂತದ ನಾಕೌಟ್ ಪಂದ್ಯಕ್ಕೆ ತಯಾರಿಗಾಗಿ ಸಮಯ ಕಡಿಮೆಯಾಗಿದೆ ಎಂದು ಜರ್ಮನಿಯ ಕೋಚ್ ಜೂಲಿಯನ್ ನಾಗೆಲ್ಸ್ಮನ್ ಬುಧವಾರ ಹೇಳಿದ್ದಾರೆ. ವಿಶ್ವಕಪ್ ನಲ್ಲಿ ಗುಂಪು ವಿಜೇತರಾಗಿದ್ದರೂ ತಮ್ಮ ತಂಡ ಅನನುಕೂಲಕರ ಸ್ಥಿತಿಯಲ್ಲಿದೆ ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.

ನಾಲ್ಕು ಬಾರಿಯ ಚಾಂಪಿಯನ್ ಜರ್ಮನಿ, ಗುರುವಾರ ಈಕ್ವೆಡಾರ್ ವಿರುದ್ಧದ ತನ್ನ ಅಂತಿಮ ಗುಂಪು ‘ಇ’ ಪಂದ್ಯವನ್ನು ಆಡುವ ಮೊದಲೇ 32ರ ಹಂತಕ್ಕೆ ಪ್ರವೇಶಿಸಿದೆ. ಆದರೆ ನಾಕೌಟ್ ಹಂತದಲ್ಲಿ ಯಾರ ವಿರುದ್ಧ ಆಡಬೇಕಾಗುತ್ತದೆ ಎಂಬುದು ಕೇವಲ 48 ಗಂಟೆಗಳ ಮುಂಚೆಯಷ್ಟೇ ತಿಳಿಯುವಂತೆ ರೂಪಿಸಲಾಗಿರುವ ವಿಶ್ವಕಪ್ ವೇಳಾಪಟ್ಟಿ ತಮಗೆ ಅನನುಕೂಲ ಉಂಟು ಮಾಡಿದೆ ಎಂದು ಜರ್ಮನಿ ಹೇಳಿದೆ.

ಇತರ ಏಳು ಗುಂಪು ವಿಜೇತರಂತೆ ಜರ್ಮನಿಯೂ ಶನಿವಾರದವರೆಗೂ ಕಾದ ನಂತರವೇ ತನ್ನ ಎದುರಾಳಿ ಯಾರು ಎನ್ನುವುದನ್ನು ತಿಳಿದುಕೊಳ್ಳಲಿದೆ. ಆದರೆ ಸೋಮವಾರವೇ ಫಾಕ್ಸ್ಬರೊದಲ್ಲಿ ತನ್ನ ಮುಂದಿನ ಪಂದ್ಯವನ್ನು ಆಡಬೇಕಾಗಿದೆ.

“ಗುಂಪಿನಲ್ಲಿ ಅಗ್ರಸ್ಥಾನದಲ್ಲಿದ್ದರೂ ನಮಗೆ ಶಿಕ್ಷೆ ದೊರೆತಂತಾಗಿದೆ ಎಂದು ಭಾವಿಸುತ್ತೇನೆ. ಎಲ್ಲಾ ಲೆಕ್ಕಾಚಾರಗಳನ್ನು ಹಾಕಿ ನೋಡಿದರೂ ಮತ್ತು ಎಲ್ಲವೂ ಹೇಗೆ ಕೆಲಸ ಮಾಡುತ್ತದೆ ಎಂದು ಗಮನಿಸಿದರೆ ಇದು ಸಂಕೀರ್ಣ ಸ್ಥಿತಿಯಾಗಿದೆ. ಹೆಚ್ಚು ತಂಡಗಳನ್ನು ಸೇರಿಸಿದಷ್ಟೂ ಪಂದ್ಯಾವಳಿ ಇನ್ನಷ್ಟು ಸಂಕೀರ್ಣವಾಗುತ್ತ ಹೋಗುತ್ತದೆ” ಎಂದು ಅವರು ಹೇಳಿದ್ದಾರೆ.

ಆರಂಭಿಕ ಪಂದ್ಯದಲ್ಲಿ ಜರ್ಮನಿ ಕುರಾಕಾವೊ ತಂಡವನ್ನು 7–1 ಅಂತರದಿಂದ ಸೋಲಿಸಿತ್ತು. ನಂತರ ಐವರಿ ಕೋಸ್ಟ್ ತಂಡವನ್ನು 2–1 ಅಂತರದಿಂದ ಮಣಿಸಿತ್ತು. 2014ರಲ್ಲಿ ವಿಶ್ವಕಪ್ ಗೆದ್ದ ಬಳಿಕ ಮೊದಲ ಬಾರಿಗೆ ಜರ್ಮನಿ ಗುಂಪು ಹಂತ ದಾಟಿ ಮುನ್ನಡೆ ಖಚಿತಪಡಿಸಿಕೊಂಡಿದೆ. 48 ತಂಡಗಳ ಹೊಸ ಸ್ವರೂಪದ ಪಂದ್ಯಾವಳಿಯಲ್ಲಿ 32ರ ಹಂತದಲ್ಲಿ ಯಾವುದೇ ತಂಡವನ್ನು ಎದುರಿಸಬೇಕಾದರೂ ಸಿದ್ಧತೆಗೆ ಅತ್ಯಂತ ಕಡಿಮೆ ಸಮಯ ಸಿಗುತ್ತದೆ.

“ಶನಿವಾರ ತಡರಾತ್ರಿ ನಮಗೆ ನಾಕೌಟ್ ಹಂತದಲ್ಲಿ ಯಾರ ವಿರುದ್ಧ ಆಡುತ್ತೇವೆ ಎನ್ನುವುದು ತಿಳಿಯುತ್ತದೆ. ಹಾಗಿದ್ದರೂ ನಾವು ಸಿದ್ಧತೆ ಮಾಡಿಕೊಂಡಿದ್ದೇವೆ. ಯಾರು ನಮ್ಮ ಎದುರಾಳಿಯಾಗಿ ಬರಬಹುದು ಎಂಬುದನ್ನು ಗಮನದಲ್ಲಿಟ್ಟುಕೊಂಡು ತಯಾರಿ ನಡೆಸಿದ್ದೇವೆ. ರವಿವಾರ ನಾವು ತುಂಬಾ ಬಿಗಿಯಾದ ತಯಾರಿ ನಡೆಸುವುದಿಲ್ಲ. ಏಕೆಂದರೆ ಅದು ನಮ್ಮ ಕೊನೆಯ ತರಬೇತಿ ಅವಧಿಯಾಗಿದ್ದು, ಮುಂದೆ ಏನು ಬೇಕಾದರೂ ಬದಲಾಗಬಹುದು” ಎಂದು ನಾಗೆಲ್ಸ್ಮನ್ ಹೇಳಿದ್ದಾರೆ.

“ಸ್ವಲ್ಪ ಸಮಯದ ಒತ್ತಡವಿದೆ. ಆದರೆ ತರಬೇತುದಾರರಾಗಿ ನಾವೆಲ್ಲರೂ ಇನ್ನೂ ಹೆಚ್ಚಿನ ಅನುಭವ ಹೊಂದಿಲ್ಲ. ಅಗತ್ಯ ಬಿದ್ದರೆ ರಾತ್ರಿಯಿಡೀ ಕುಳಿತು ಕೆಲಸ ಮಾಡುತ್ತೇವೆ” ಎಂದು 38 ವರ್ಷದ ತರಬೇತುದಾರ ಹೇಳಿದ್ದಾರೆ.

ಗ್ರೂಪ್ ‘ಇ’ಯಲ್ಲಿ ಜರ್ಮನಿ ತನ್ನ ಕೊನೆಯ ಪಂದ್ಯವನ್ನು ಇಂದು ಮಧ್ಯರಾತ್ರಿ (ಭಾರತೀಯ ಕಾಲಮಾನ) ಈಕ್ವೆಡಾರ್ ವಿರುದ್ಧ ಆಡಲಿದೆ. ಈಕ್ವೆಡಾರ್ ತನ್ನ ಮೊದಲ ಪಂದ್ಯದಲ್ಲಿ ಕುರಾಕಾವೊ ವಿರುದ್ಧ ಡ್ರಾ ಸಾಧಿಸಿದ್ದು, ನಂತರ ಐವರಿ ಕೋಸ್ಟ್ ವಿರುದ್ಧ 0–1 ಅಂತರದಿಂದ ಸೋತಿದೆ. ಹೀಗಾಗಿ ತಂಡದ ಖಾತೆಯಲ್ಲಿ ಕೇವಲ ಒಂದು ಅಂಕವಿದೆ.

“ನಾವು ಇನ್ನೂ ಉತ್ತಮ ಪ್ರದರ್ಶನ ನೀಡುವ ಸಾಮರ್ಥ್ಯ ಹೊಂದಿದ್ದೇವೆ. ನಮ್ಮ ಫಿನಿಶಿಂಗ್ನಲ್ಲಿ ಸಮಸ್ಯೆ ಇತ್ತು. ಅದೇ ನಾವು ಎದುರಿಸುತ್ತಿರುವ ದೊಡ್ಡ ಸವಾಲು. ಮುಂದಿನ ಪಂದ್ಯ ದೊಡ್ಡ ಅವಕಾಶ. ನಾವು ವಿಫಲಗೊಳ್ಳಲು ಹೆದರುವುದಿಲ್ಲ. ನಿಮ್ಮ ಎಲ್ಲಾ ಪ್ರಯತ್ನವನ್ನು ನೀಡಿದ ನಂತರ ಇನ್ನೇನೂ ಮಾಡಲು ಸಾಧ್ಯವಿಲ್ಲ. ನಮಗೆ ಇನ್ನೂ ಅವಕಾಶವಿದೆ ಎಂಬ ವಿಶ್ವಾಸ ನನಗಿದೆ” ಎಂದು ಈಕ್ವೆಡಾರ್ ತರಬೇತುದಾರ ಸೆಬಾಸ್ಟಿಯನ್ ಬೆಕಾಸೆಸ್ ಹೇಳಿದ್ದಾರೆ.