ಅಮೆರಿಕದ 540 ದಿನಗಳ ಕೆಲಸದ ಪರವಾನಗಿ ವಿಸ್ತರಣೆ ರದ್ದು; ಭಾರತೀಯ ಉದ್ಯೋಗಿಗಳಿಗೆ ಹಿನ್ನಡೆ!

2022ರ ಮೇನಲ್ಲಿ ಅಮೆರಿಕದ ಮಾಜಿ ಅಧ್ಯಕ್ಷ ಜೋ ಬಿಡೆನ್ ಅವರ ಅಧಿಕಾರಾವಧಿಯಲ್ಲಿ 540 ದಿನಗಳ ಸ್ವಯಂಚಾಲಿತ ವಿಸ್ತರಣೆಯನ್ನು ಪರಿಚಯಿಸಲಾಗಿತ್ತು. ನವೀಕರಣ ಅರ್ಜಿಗಳ ಬಾಕಿಯನ್ನು ಕಡಿಮೆ ಮಾಡುವುದು ಮತ್ತು ಪ್ರಕ್ರಿಯೆಯಲ್ಲಿನ ವಿಳಂಬದಿಂದ ಕಾರ್ಮಿಕರು ಕೆಲಸದ ಅಧಿಕಾರವನ್ನು ಕಳೆದುಕೊಳ್ಳುವುದನ್ನು ತಡೆಯುವುದು ಇದರ ಉದ್ದೇಶವಾಗಿತ್ತು.

ಅಮೆರಿಕದಲ್ಲಿ H-1B ಕಾರ್ಮಿಕರು ಮತ್ತು ಅವರ ಸಂಗಾತಿಗಳಿಗೆ ಹೊಸ ಹಿನ್ನಡೆಯಾಗಿದೆ. ಅನೇಕ ವರ್ಗಗಳ ವಲಸಿಗರಿಗೆ ಕೆಲಸದ ಪರವಾನಗಿಗಳ ಸ್ವಯಂಚಾಲಿತ 540 ದಿನಗಳ ವಿಸ್ತರಣೆಯನ್ನು ಅಮೆರಿಕ ಕೊನೆಗೊಳಿಸಿದೆ. ಈ ಕ್ರಮದಿಂದ ಭಾರತೀಯರು ಸೇರಿದಂತೆ ಸಾವಿರಾರು ವಿದೇಶಿ ಕಾರ್ಮಿಕರು ತಮ್ಮ ನವೀಕರಣ ಅರ್ಜಿಗಳು ಬಾಕಿ ಇರುವಾಗಲೇ ಕೆಲಸ ಮಾಡುವ ಅವಕಾಶ ಕಳೆದುಕೊಳ್ಳುವ ಸಾಧ್ಯತೆಯಿದೆ. ಅಮೆರಿಕದ ಪೌರತ್ವ ಮತ್ತು ವಲಸೆ ಸೇವೆಗಳ ಸಂಸ್ಥೆ (USCIS) ಈ ಬದಲಾವಣೆಯನ್ನು ದೃಢಪಡಿಸಿದೆ. ಕಳೆದ ವರ್ಷದ ಅಕ್ಟೋಬರ್ 30ರಂದು ಮಧ್ಯಂತರ ನಿಯಮದ ಮೂಲಕ ಪರಿಚಯಿಸಲಾಗಿದ್ದ ನೀತಿಯನ್ನು ಅಂತಿಮ ನಿಯಮದ ಮೂಲಕ ಅಧಿಕೃತಗೊಳಿಸಲಾಗಿದೆ.

2022ರ ಮೇನಲ್ಲಿ ಜೋ ಬಿಡೆನ್ ಅವರ ಆಡಳಿತಾವಧಿಯಲ್ಲಿ 540 ದಿನಗಳ ಸ್ವಯಂಚಾಲಿತ ವಿಸ್ತರಣೆಯನ್ನು ಪರಿಚಯಿಸಲಾಗಿತ್ತು. ನವೀಕರಣ ಅರ್ಜಿಗಳ ಬಾಕಿಯನ್ನು ಕಡಿಮೆ ಮಾಡುವುದು ಮತ್ತು ಪ್ರಕ್ರಿಯೆಯ ವಿಳಂಬದಿಂದಾಗಿ ಕಾರ್ಮಿಕರು ಕೆಲಸದ ಅಧಿಕಾರವನ್ನು ಕಳೆದುಕೊಳ್ಳುವುದನ್ನು ತಡೆಯುವುದು ಇದರ ಉದ್ದೇಶವಾಗಿತ್ತು. ಈ ಕ್ರಮವನ್ನು 2024ರ ಎಪ್ರಿಲ್ನಲ್ಲಿ ತಾತ್ಕಾಲಿಕವಾಗಿ ಮರುಪರಿಚಯಿಸಲಾಯಿತು. ಅದೇ ವರ್ಷದ ಡಿಸೆಂಬರ್ನಲ್ಲಿ ಇದರ ವಿಸ್ತರಣೆಯನ್ನು ಅನಿರ್ದಿಷ್ಟ ಅವಧಿಗೆ ಮುಂದುವರಿಸಲಾಯಿತು.

ಹೊಸ ನಿಯಮವು ಹಲವು ವರ್ಗಗಳ ಅರ್ಜಿದಾರರಿಗೆ ಸ್ವಯಂಚಾಲಿತ ವಿಸ್ತರಣೆಯನ್ನು ಕೊನೆಗೊಳಿಸುತ್ತದೆ. ಇದರಲ್ಲಿ ವಲಸೆ ಸ್ಥಾನಮಾನ ಹೊಂದಾಣಿಕೆಗೆ ಅರ್ಜಿ ಸಲ್ಲಿಸಿರುವವರು, H-4 ಸಂಗಾತಿಗಳು, ಆಶ್ರಯಕ್ಕಾಗಿ ಅರ್ಜಿ ಸಲ್ಲಿಸಿರುವವರು, ನಿರಾಶ್ರಿತರು, ಆಶ್ರಯ ಪಡೆದವರು ಮತ್ತು ತಾತ್ಕಾಲಿಕ ಸಂರಕ್ಷಿತ ಸ್ಥಾನಮಾನದ (TPS) ಫಲಾನುಭವಿಗಳು ಸೇರಿದ್ದಾರೆ.

ಈ ಬದಲಾವಣೆಯು ಅಮೆರಿಕದಲ್ಲಿ ಕೆಲಸ ಮಾಡಲು ಉದ್ಯೋಗಾಧಿಕಾರವನ್ನು ಅವಲಂಬಿಸಿರುವ H-1B ವೀಸಾದಾರರ H-4 ಸಂಗಾತಿಗಳ ಮೇಲೂ ಪರಿಣಾಮ ಬೀರಬಹುದು. ಅವರ ನವೀಕರಣ ಅರ್ಜಿಗಳು ಅನುಮೋದನೆಗೊಳ್ಳುವ ಮೊದಲು ಈಗಿರುವ ಉದ್ಯೋಗಾಧಿಕಾರ ದಾಖಲೆಗಳು (EAD) ಅವಧಿ ಮುಗಿದರೆ, ಹೊಸ ಅನುಮತಿ ದೊರೆಯುವವರೆಗೆ ಅವರು ಕೆಲಸ ನಿಲ್ಲಿಸಬೇಕಾಗಬಹುದು.

ಆದರೆ, ಈ ಕ್ರಮವು ಎಲ್ಲ ವಿದೇಶಿ ಕಾರ್ಮಿಕರ ಮೇಲೂ ಪರಿಣಾಮ ಬೀರುವುದಿಲ್ಲ. ತಮ್ಮ ಉದ್ಯೋಗಾಧಿಕಾರ ದಾಖಲೆಗಳ ವಿಸ್ತರಣೆಗೆ ಅರ್ಜಿ ಸಲ್ಲಿಸುವ STEM (ವಿಜ್ಞಾನ, ತಂತ್ರಜ್ಞಾನ, ಎಂಜಿನಿಯರಿಂಗ್ ಮತ್ತು ಗಣಿತ) ವಿಭಾಗದ F-1 ವಿದ್ಯಾರ್ಥಿಗಳು 180 ದಿನಗಳ ಸ್ವಯಂಚಾಲಿತ ವಿಸ್ತರಣೆಗೆ ಅರ್ಹರಾಗಿರುವುದನ್ನು ಮುಂದುವರಿಸುತ್ತಾರೆ. ಆದರೆ, ಅವರು ತಮ್ಮ ಅರ್ಜಿಗಳನ್ನು ನಿಗದಿತ ಸಮಯದೊಳಗೆ ಸಲ್ಲಿಸಬೇಕು. I ಮತ್ತು E ವರ್ಗದ ವೀಸಾಗಳನ್ನು ಹೊಂದಿರುವವರ ಸಂಗಾತಿಗಳು ತಮ್ಮ ವಲಸೆ ಸ್ಥಾನಮಾನಕ್ಕೆ ಅನುಗುಣವಾಗಿ ಕೆಲಸ ಮಾಡುವ ಅಧಿಕಾರ ಹೊಂದಿರುತ್ತಾರೆ. ಅವರಿಗೆ EAD ಅಗತ್ಯವಿರುವುದಿಲ್ಲ.

►ವೀಸಾ ವಿಸ್ತರಣೆ ಪರಿಶೀಲನೆಗೆ ಕಠಿಣ ನಿಯಮದ ಪ್ರಸ್ತಾವ

ಪ್ರತ್ಯೇಕವಾಗಿ, ಟ್ರಂಪ್ ಆಡಳಿತವು H-1B ಉದ್ಯೋಗಿಗಳು ಸೇರಿದಂತೆ ವಿದೇಶಿ ವೃತ್ತಿಪರರಿಗೆ ವೀಸಾ ನವೀಕರಣವನ್ನು ಹೆಚ್ಚು ಕಠಿಣಗೊಳಿಸುವ ಮತ್ತೊಂದು ಬದಲಾವಣೆಯನ್ನು ಪ್ರಸ್ತಾಪಿಸಿದೆ. ಕೆಲವು ವಲಸೆರಹಿತ ಕಾರ್ಮಿಕರ ವಿಸ್ತರಣಾ ಅರ್ಜಿಗಳನ್ನು ಪರಿಶೀಲಿಸುವಾಗ ಹಿಂದಿನ ಅನುಮೋದನೆಗಳಿಗೆ ಮಹತ್ವ ನೀಡುವ ದೀರ್ಘಕಾಲದ ಪದ್ಧತಿಯನ್ನು ಕೊನೆಗೊಳಿಸುವುದು ಈ ಪ್ರಸ್ತಾವದ ಉದ್ದೇಶವಾಗಿದೆ.

ಪ್ರಸ್ತಾಪಿತ ಚೌಕಟ್ಟಿನಡಿ USCIS ಅಧಿಕಾರಿಗಳು ಹಿಂದಿನ ನಿರ್ಧಾರಗಳನ್ನು ಆಧರಿಸುವ ಬದಲು ಪ್ರತಿ ವಿಸ್ತರಣಾ ಅರ್ಜಿಯ ಅರ್ಹತೆಯನ್ನು ಪ್ರತ್ಯೇಕವಾಗಿ ಪರಿಶೀಲಿಸಲಿದ್ದಾರೆ. ಇದರಿಂದ ಈ ಹಿಂದೆ ವೀಸಾ ಅನುಮೋದನೆ ಪಡೆದಿದ್ದ ಅರ್ಜಿದಾರರೂ ಹೆಚ್ಚಿನ ಪರಿಶೀಲನೆಗೆ ಒಳಗಾಗಬಹುದು. ಅವರು ಹೆಚ್ಚುವರಿ ಸಾಕ್ಷ್ಯ ಮತ್ತು ದಾಖಲೆಗಳನ್ನು ಸಲ್ಲಿಸಬೇಕಾಗಬಹುದು. ಇದರಿಂದ ಪ್ರಕ್ರಿಯೆಗೆ ಹೆಚ್ಚು ಸಮಯ ಹಿಡಿಯುವ ಸಾಧ್ಯತೆಯಿದ್ದು, ವೆಚ್ಚವೂ ಹೆಚ್ಚಬಹುದು.

ಪ್ರಸ್ತಾಪಿತ ನಿಯಮದ ಕುರಿತು ಗೃಹ ಭದ್ರತಾ ಇಲಾಖೆಯು ನವೆಂಬರ್ 13ರವರೆಗೆ ಸಾರ್ವಜನಿಕರಿಂದ ಅಭಿಪ್ರಾಯಗಳನ್ನು ಆಹ್ವಾನಿಸಿದೆ.

ಈ ನಡುವೆ, 540 ದಿನಗಳ ಸ್ವಯಂಚಾಲಿತ ಕೆಲಸದ ಪರವಾನಗಿ ವಿಸ್ತರಣೆಯನ್ನು ರದ್ದುಗೊಳಿಸುವ ಆಡಳಿತದ ನಿರ್ಧಾರವನ್ನು ಅಧಿಕೃತಗೊಳಿಸಿರುವುದನ್ನು ಶ್ವೇತಭವನದ ಮಾಜಿ ಸಲಹೆಗಾರ ಹಾಗೂ ವಲಸೆ ವಕೀಲ ಅಜಯ್ ಜೈನ್ ಭೂಟೋರಿಯಾ ಟೀಕಿಸಿದ್ದಾರೆ. ಈ ಬದಲಾವಣೆಯು ಕಾನೂನುಬದ್ಧ ವಲಸಿಗರು ಮತ್ತು ಅಮೆರಿಕದಲ್ಲಿ ಜೀವನೋಪಾಯಕ್ಕಾಗಿ ಉದ್ಯೋಗಾಧಿಕಾರವನ್ನು ಅವಲಂಬಿಸಿರುವ ಕುಟುಂಬಗಳಿಗೆ ಹಾನಿ ಮಾಡುತ್ತದೆ ಎಂದು ಅವರು ಹೇಳಿದ್ದಾರೆ.

ಈ ಎರಡೂ ಕ್ರಮಗಳಿಂದ ಅಮೆರಿಕದಲ್ಲಿರುವ ವಿದೇಶಿ ವೃತ್ತಿಪರರು ಮತ್ತು ಅವರ ಕುಟುಂಬಗಳಲ್ಲಿ ಹೆಚ್ಚುವರಿ ಅನಿಶ್ಚಿತತೆ ಉಂಟಾಗಬಹುದು. ವಿಶೇಷವಾಗಿ, ತಮ್ಮ ಉದ್ಯೋಗ ಮತ್ತು ವಲಸೆ ಸ್ಥಾನಮಾನವನ್ನು ಕಾಪಾಡಿಕೊಳ್ಳಲು ಸಮಯಕ್ಕೆ ಸರಿಯಾಗಿ ನವೀಕರಣವಾಗುವುದನ್ನು ಅವಲಂಬಿಸಿರುವವರಿಗೆ ಈ ಬದಲಾವಣೆಗಳು ಸಮಸ್ಯೆ ಉಂಟುಮಾಡಬಹುದು.