ಭಾರತೀಯರಿಗೆ ಯುಎಸ್ ಗ್ರೀನ್ ಕಾರ್ಡ್ ಆತಂಕ: ಸೆಪ್ಟೆಂಬರ್ ಅಂತ್ಯಕ್ಕೂ ಮುನ್ನ EB-1 ವೀಸಾ ಲಭ್ಯತೆ ಸ್ಥಗಿತಗೊಳ್ಳುವ ಸಾಧ್ಯತೆ?

ಇಬಿ-1 (EB-1) ವಿಭಾಗದ ಮೂಲಕ ಅಮೆರಿಕದ ಗ್ರೀನ್ ಕಾರ್ಡ್ ನಿರೀಕ್ಷೆಯಲ್ಲಿರುವ ಭಾರತೀಯ ವೃತ್ತಿಪರರಿಗೆ ಹೊಸ ಆತಂಕ ಎದುರಾಗಿದೆ. ಪ್ರಸ್ತುತ ಹಣಕಾಸು ವರ್ಷಾಂತ್ಯವಾದ ಸೆಪ್ಟೆಂಬರ್ 30ರ ಒಳಗಾಗಿ ಭಾರತೀಯರಿಗೆ ನಿಗದಿಯಾಗಿರುವ ಇಬಿ-1 ವೀಸಾಗಳ ಸಂಖ್ಯೆ ಪೂರ್ಣಗೊಳ್ಳುವ ಸಾಧ್ಯತೆಯಿದೆ ಎಂದು ಅಮೆರಿಕದ ವಿದೇಶಾಂಗ ಇಲಾಖೆ ಎಚ್ಚರಿಸಿದೆ.

ಸೆಪ್ಟೆಂಬರ್ 2026 ರ ವೀಸಾ ಬುಲೆಟಿನ್‌ನಲ್ಲಿ ಈ ಎಚ್ಚರಿಕೆಯನ್ನು ನೀಡಲಾಗಿದೆ. ಭಾರತೀಯ ಅರ್ಜಿದಾರರಿಂದ ಬಂದಿರುವ ಹೆಚ್ಚಿನ ಬೇಡಿಕೆಯು ವೀಸಾಗಳ ಹಂಚಿಕೆಯ ಮೇಲೆ ತೀವ್ರ ಒತ್ತಡ ಹೇರಿದೆ. ಪ್ರಸ್ತುತ ಹಣಕಾಸು ವರ್ಷ ಮುಗಿಯುವ ಮೊದಲು ಲಭ್ಯವಿರುವ ವೀಸಾಗಳು ಮುಗಿದುಹೋದರೆ, ಇಬಿ-1 ವಿಭಾಗದ ವೀಸಾ ವಿತರಣೆಯನ್ನು ತಾತ್ಕಾಲಿಕವಾಗಿ ಸ್ಥಗಿತಗೊಳಿಸಬಹುದು ಎಂದು ವಿದೇಶಾಂಗ ಇಲಾಖೆ ಸೂಚಿಸಿದೆ.

ಇಬಿ-1 ವೀಸಾ ವಿಭಾಗದ ಮೇಲೆ ಒತ್ತಡ ಹೆಚ್ಚಾಗಲು ಕಾರಣವೇನು?

ಉದ್ಯೋಗ ಆಧಾರಿತ ಮೊದಲ ಆದ್ಯತೆಯ ಅಥವಾ ಇಬಿ-1 (EB-1) ವೀಸಾವನ್ನು ಅತ್ಯುನ್ನತ ಕೌಶಲ ಹೊಂದಿರುವ ಕಾರ್ಯನಿರ್ವಾಹಕರಿಗೆ ವಿನ್ಯಾಸಗೊಳಿಸಲಾಗಿದೆ. ಅಸಾಧಾರಣ ಸಾಮರ್ಥ್ಯವಿರುವ ವ್ಯಕ್ತಿಗಳು, ಅತ್ಯುತ್ತಮ ಪ್ರಾಧ್ಯಾಪಕರು, ಸಂಶೋಧಕರು ಹಾಗೂ ಕೆಲವು ಬಹುರಾಷ್ಟ್ರೀಯ ಕಂಪನಿಗಳ ಹಿರಿಯ ಅಧಿಕಾರಿಗಳು ಮತ್ತು ವ್ಯವಸ್ಥಾಪಕರು ಈ ವಿಭಾಗದ ವ್ಯಾಪ್ತಿಗೆ ಬರುತ್ತಾರೆ.

ಇತರ ಉದ್ಯೋಗ ಆಧಾರಿತ ವೀಸಾ ವಿಭಾಗಗಳಿಗೆ ಹೋಲಿಸಿದರೆ ದೀರ್ಘ ಕಾಯುವಿಕೆ ಇಲ್ಲದೆ ಶಾಶ್ವತ ನಿವಾಸ ಪಡೆಯಲು ಅವಕಾಶವಿರುವುದರಿಂದ, ಅರ್ಹ ಅರ್ಜಿದಾರರಿಗೆ ಈ ವಿಭಾಗವು ಯಾವಾಗಲೂ ಪ್ರಮುಖ ಆದ್ಯತೆಯಾಗಿದೆ.

ಆದರೆ ಭಾರತೀಯ ಅರ್ಜಿದಾರರಿಂದ ಬೇಡಿಕೆ ಗಣನೀಯವಾಗಿ ಹೆಚ್ಚಿರುವುದರಿಂದ, ವಾರ್ಷಿಕ ವೀಸಾ ಕೋಟಾ ಬೇಗನೆ ಮುಗಿಯುವ ಸಾಧ್ಯತೆಯಿದೆ ಎಂದು ವಿದೇಶಾಂಗ ಇಲಾಖೆ ಸೂಚಿಸಿದೆ.

ಸೆಪ್ಟೆಂಬರ್ ಬುಲೆಟಿನ್‌ನಲ್ಲಿ ಈ ಕುರಿತು ಸ್ಪಷ್ಟನೆ ನೀಡಿರುವ ಇಲಾಖೆಯು, "ಇಬಿ-1 ವಿಭಾಗದಲ್ಲಿ ಭಾರತೀಯ ಅರ್ಜಿದಾರರಿಂದ ಹೆಚ್ಚಿನ ಬೇಡಿಕೆ ಬಂದಿದೆ. ಹಣಕಾಸು ವರ್ಷ ಮುಗಿಯುವ ಮುನ್ನವೇ ಭಾರತದ ಕೋಟಾ ತಲುಪಿದರೆ, ಮುಂಬರುವ ವಾರಗಳಲ್ಲಿ ಈ ವಿಭಾಗದ ವೀಸಾ ವಿತರಣೆಯನ್ನು ತಾತ್ಕಾಲಿಕವಾಗಿ ಸ್ಥಗಿತಗೊಳಿಸಬೇಕಾಗಬಹುದು" ಎಂದು ತಿಳಿಸಿದೆ.

"ಈ ಪರಿಸ್ಥಿತಿಯನ್ನು ನಿರಂತರವಾಗಿ ಮೇಲ್ವಿಚಾರಣೆ ಮಾಡಲಾಗುತ್ತಿದ್ದು, ಅಗತ್ಯಕ್ಕೆ ಅನುಗುಣವಾಗಿ ಸೂಕ್ತ ಬದಲಾವಣೆಗಳನ್ನು ಮಾಡಲಾಗುವುದು" ಎಂದು ಇಲಾಖೆ ಹೇಳಿದೆ.

ಸೆಪ್ಟೆಂಬರ್ 30 ರ ಮೊದಲು ಲಭ್ಯವಿರುವ ವೀಸಾಗಳ ಸಂಖ್ಯೆ ಮುಗಿದುಹೋದರೆ, ಎಲ್ಲಾ ಹಂತಗಳನ್ನು ಪೂರ್ಣಗೊಳಿಸಿ ಸಿದ್ಧವಾಗಿರುವ ಅರ್ಜಿದಾರರು ತಾತ್ಕಾಲಿಕ ಕಾಯುವಿಕೆ ಎದುರಿಸಬೇಕಾಗುತ್ತದೆ.

ಭಾರತೀಯರಿಗೆ ಇಬಿ-1 ಕಟ್‌ಆಫ್ ದಿನಾಂಕ ಎಷ್ಟು?

ಸೆಪ್ಟೆಂಬರ್ ತಿಂಗಳ ವೀಸಾ ಪಟ್ಟಿಯ ಪ್ರಕಾರ, ಭಾರತೀಯರಿಗೆ ಇಬಿ-1 ನ 'ಅಂತಿಮ ಕ್ರಮದ ದಿನಾಂಕ' 2022 ಅಕ್ಟೋಬರ್ 15 ಆಗಿದೆ. ವೀಸಾಗಳ ಲಭ್ಯತೆಯ ಆಧಾರದ ಮೇಲೆ ಯಾವ ಅರ್ಜಿದಾರರ ಗ್ರೀನ್ ಕಾರ್ಡ್ ಅರ್ಜಿಗೆ ಅಂತಿಮ ಅನುಮೋದನೆ ನೀಡಬಹುದು ಎಂಬುದನ್ನು ಈ ದಿನಾಂಕ ನಿರ್ಧರಿಸುತ್ತದೆ.

ಭಾರತೀಯ ಅರ್ಜಿದಾರರು ಗ್ರೀನ್ ಕಾರ್ಡ್ ಅನುಮೋದನೆ ಪಡೆಯಲು ತಮ್ಮ 'ಆದ್ಯತೆಯ ದಿನಾಂಕ' (Priority Date) ಪ್ರಕಟಿತ ಕಟ್‌ಆಫ್‌ಗಿಂತ ಹಿಂದಿನದಾಗಿರಬೇಕು.

ಅರ್ಜಿ ಸಲ್ಲಿಸುವ ದಿನಾಂಕದ ಕಟ್‌ಆಫ್ (Dates-for-filing) ಇತ್ತೀಚಿನದ್ದಾಗಿದ್ದು, ಇಬಿ-1 ಭಾರತೀಯ ವಿಭಾಗಕ್ಕೆ 2023 ಡಿಸೆಂಬರ್ 1 ಆಗಿದೆ. ಅರ್ಜಿ ಸಲ್ಲಿಸಲು ಅರ್ಹತೆ ಪಡೆಯುವುದರಿಂದ ತಕ್ಷಣವೇ ಗ್ರೀನ್ ಕಾರ್ಡ್ ಸಿಗುತ್ತದೆ ಎಂದರ್ಥವಲ್ಲ. ಅಂತಿಮ ಅನುಮೋದನೆಯು ವೀಸಾ ಸಂಖ್ಯೆಗಳ ಲಭ್ಯತೆಯ ಮೇಲೆಯೇ ಅವಲಂಬಿತವಾಗಿರುತ್ತದೆ.

ಇಬಿ-1 ವೀಸಾ ಕೋಟಾ ಮುಗಿದುಹೋದರೆ ಏನಾಗುತ್ತದೆ?

ಸೆಪ್ಟೆಂಬರ್ 30 ರೊಳಗೆ ಭಾರತದ ಇಬಿ-1 ಕೋಟಾ ಪೂರ್ಣಗೊಂಡರೆ, ಈ ಪ್ರಸ್ತುತ ಹಣಕಾಸು ವರ್ಷದ ಉಳಿದ ದಿನಗಳಿಗೆ ಈ ವಿಭಾಗವನ್ನು 'ಲಭ್ಯವಿಲ್ಲ' ಎಂದು ಗುರುತಿಸಲಾಗುತ್ತದೆ.

ಇದರರ್ಥ ಅರ್ಜಿದಾರರ ಗ್ರೀನ್ ಕಾರ್ಡ್ ಅರ್ಜಿಯನ್ನು ಕಾಯಂ ಆಗಿ ತಿರಸ್ಕರಿಸಲಾಗಿದೆ ಎಂದಲ್ಲ. ವೀಸಾ ಸಂಖ್ಯೆಗಳ ತಾತ್ಕಾಲಿಕ ಕೊರತೆ ಮಾತ್ರ ಉಂಟಾಗುತ್ತದೆ. ಹೊಸ ಹಣಕಾಸು ವರ್ಷದಲ್ಲಿ ಹೊಸ ವೀಸಾ ಕೋಟಾ ಬಿಡುಗಡೆಯಾದಾಗ ಅಥವಾ ವಿದೇಶಾಂಗ ಇಲಾಖೆ ನಿಯಮಗಳನ್ನು ಸರಿಹೊಂದಿಸಿದಾಗ ವೀಸಾ ಲಭ್ಯತೆ ಮತ್ತೆ ತೆರೆದುಕೊಳ್ಳುತ್ತದೆ.

ಇಬಿ-2 ವಿಭಾಗದ ವೀಸಾ ಲಭ್ಯವಿಲ್ಲ

ಉದ್ಯೋಗ ಆಧಾರಿತ ಇತರ ವಿಭಾಗಗಳಲ್ಲಿ ಕಾಯುತ್ತಿರುವ ಭಾರತೀಯರಿಗೆ ಈಗಾಗಲೇ ಸಂಕಷ್ಟ ಎದುರಾಗಿದ್ದು, ಇದರ ಬೆನ್ನಲ್ಲೇ ಇಬಿ-1 ಕುರಿತ ಎಚ್ಚರಿಕೆ ಹೊರಬಿದ್ದಿದೆ. ಸ್ನಾತಕೋತ್ತರ ಪದವಿ ಹಾಗೂ ವಿಶೇಷ ಸಾಮರ್ಥ್ಯ ಹೊಂದಿರುವ ವೃತ್ತಿಪರರನ್ನು ಒಳಗೊಳ್ಳುವ ಇಬಿ-2 (EB-2) ವಿಭಾಗವು ಸೆಪ್ಟೆಂಬರ್ ಬುಲೆಟಿನ್‌ನಲ್ಲಿ ಭಾರತೀಯರಿಗೆ 'ಲಭ್ಯವಿಲ್ಲ' ಎಂದು ಪಟ್ಟಿ ಮಾಡಲಾಗಿದೆ. ಆಗಸ್ಟ್ ತಿಂಗಳಿನಲ್ಲೂ ಈ ವಿಭಾಗ ಲಭ್ಯವಿರಲಿಲ್ಲ.

ಇಬಿ-2 ಭಾರತೀಯ ವಿಭಾಗಕ್ಕೆ ಅರ್ಜಿ ಸಲ್ಲಿಸುವ ಕಟ್‌ ಆಫ್ ದಿನಾಂಕ 2015 ಜನವರಿ 15 ಆಗಿದೆ.

ಇಬಿ-3 (EB-3) ವಿಭಾಗದಲ್ಲೂ ಕಾಯುವಿಕೆ ಪಟ್ಟಿ ಅತ್ಯಂತ ದೀರ್ಘವಾಗಿದೆ. ಭಾರತೀಯ ಅರ್ಜಿದಾರರಿಗೆ ಇದರ ಅಂತಿಮ ಕ್ರಮದ ದಿನಾಂಕ ಜನವರಿ 1, 2014 ರಲ್ಲೇ ಉಳಿದಿದ್ದು, ಅರ್ಜಿ ಸಲ್ಲಿಸುವ ಕಟ್‌ಆಫ್ ದಿನಾಂಕ ಜನವರಿ 15, 2015 ಆಗಿದೆ.

ಪ್ರತ್ಯೇಕ ಕಟ್‌ಆಫ್ ಪಟ್ಟಿ ಹೊಂದಿಲ್ಲದ ಇತರ ದೇಶಗಳಿಗೆ ಹೋಲಿಸಿದರೆ ಭಾರತೀಯರ ಕಾಯುವಿಕೆಯ ಅಂತರ ಸ್ಪಷ್ಟವಾಗಿ ತಿಳಿಯುತ್ತದೆ. ಸೆಪ್ಟೆಂಬರ್ ತಿಂಗಳಿಗೆ ಆ ದೇಶಗಳ ಇಬಿ-3 ಅಂತಿಮ ಕ್ರಮದ ದಿನಾಂಕ 2024 ಸೆಪ್ಟೆಂಬರ್ 1,ಆಗಿದೆ.

ಭಾರತೀಯ ಅರ್ಜಿದಾರರು ಇಷ್ಟೊಂದು ದೀರ್ಘ ಕಾಯುವಿಕೆ ಎದುರಿಸಲು ಕಾರಣವೇನು?:

ಹೆಚ್ಚಿನ ಬೇಡಿಕೆ ಮತ್ತು ಅಮೆರಿಕದ ವಲಸೆ ನಿಯಮಗಳ ಮಿತಿಯೇ ಈ ಸಮಸ್ಯೆಗೆ ಮುಖ್ಯ ಕಾರಣ. 2026 ರ ಹಣಕಾಸು ವರ್ಷಕ್ಕೆ ಜಗತ್ತಿನಾದ್ಯಂತ ನೀಡಲಾಗುವ ಒಟ್ಟು ಉದ್ಯೋಗ ಆಧಾರಿತ ವೀಸಾಗಳ ಮಿತಿ 1,86,317 ಆಗಿದೆ.

ಅಮೆರಿಕದ ನಿಯಮಾವಳಿ ಪ್ರಕಾರ ಪ್ರತಿಯೊಂದು ದೇಶಕ್ಕೆ ಶೇಕಡಾ 7 ರಷ್ಟು ಮಾತ್ರ ವೀಸಾ ಹಂಚಿಕೆ ಮಿತಿಯಿದ್ದು, ಅದರಂತೆ ಭಾರತಕ್ಕೆ ಸುಮಾರು 28,862 ವೀಸಾಗಳು ಮಾತ್ರ ಸಿಗಲಿವೆ.

ತಂತ್ರಜ್ಞಾನ ಮತ್ತು ಇತರ ವಿಶಿಷ್ಟ ಕ್ಷೇತ್ರಗಳಲ್ಲಿ ಕಾರ್ಯನಿರ್ವಹಿಸುತ್ತಿರುವ ಭಾರತೀಯ ಉದ್ಯೋಗಿ ಅರ್ಜಿದಾರರ ಸಂಖ್ಯೆ ಅತ್ಯಂತ ದೊಡ್ಡದಾಗಿದೆ. ಲಭ್ಯವಿರುವ ವೀಸಾ ಕೋಟಾಗಿಂತ ಅರ್ಜಿದಾರರ ಸಂಖ್ಯೆ ಅತಿ ಹೆಚ್ಚಾಗಿರುವುದರಿಂದ, ದೇಶವಾರು ಮಿತಿಗಳ ಕಾರಣದಿಂದ ಭಾರತೀಯರು ಸುದೀರ್ಘ ವರ್ಷಗಳ ಕಾಲ ಕಾಯಬೇಕಾಗಿ ಬಂದಿದೆ.

ಇಬಿ-2 ಮತ್ತು ಇಬಿ-3 ವಿಭಾಗಗಳಲ್ಲಿ ದೀರ್ಘ ಕಾಯುವಿಕೆಯಲ್ಲಿದ್ದ ಅರ್ಜಿದಾರರು ವೇಗವಾಗಿ ಗ್ರೀನ್ ಕಾರ್ಡ್ ಪಡೆಯಲು ಇಬಿ-1 ವಿಭಾಗಕ್ಕೆ ಬದಲಾಗುತ್ತಿರುವುದು ಸಹ ಈ ವಿಭಾಗದ ಮೇಲೆ ಹೆಚ್ಚುವರಿ ಒತ್ತಡಕ್ಕೆ ಕಾರಣವಾಗಿದೆ.

ಇತರ ವಿಭಾಗಗಳಲ್ಲಿ ಈಗಾಗಲೇ ವರ್ಷಗಟ್ಟಲೆ ಕಾಯುತ್ತಿರುವ ಸಾವಿರಾರು ಭಾರತೀಯರಿಗೆ ಮತ್ತೊಂದು ವಿಭಾಗದಲ್ಲೂ ತಾತ್ಕಾಲಿಕ ತಡೆ ಉಂಟಾಗುವ ಸಾಧ್ಯತೆ ಎದುರಾಗಿದ್ದು, ಸೆಪ್ಟೆಂಬರ್ ತಿಂಗಳ ಕೊನೆಯ ವಾರಗಳು ಅತ್ಯಂತ ನಿರ್ಣಾಯಕವಾಗಿವೆ.

ಕೃಪೆ: firstpost.com