25 ವರ್ಷಗಳ ಬಳಿಕ ರಿಲೀಸ್ ಆಗಲಿದೆ ಶಾರುಕ್ ಚಿತ್ರ!

ಬಾಲಿವುಡ್ ಬಾದ್‌ಶಹಾ ಶಾರುಕ್ ಖಾನ್ ಬಾಲಿವುಡ್‌ಗೆ ಆಗಮಿಸುವ ಮುಂಚೆ ಟಿವಿ ನಟರಾಗಿಯೂ ಗಮನಸೆಳೆದಿದ್ದರು. ಅವರು ಅಭಿನಯಿಸಿದ್ದ ಸರ್ಕಸ್,ಫೌಝಿ ಟಿವಿ ಧಾರಾವಾಹಿಗಳು ಭಾರತೀಯರ ಮನೆಮಾತಾಗಿದ್ದವು. ಆದರೆ ಅವರು ಅಹಮಾಕ್ ಎಂಬ ಕಿರು ಟಿವಿ ಧಾರಾವಾಹಿಯಲ್ಲೂ ನಟಿಸಿದ್ದರೆಂಬುದು ಅನೇಕರಿಗೆ ತಿಳಿದಿಲ್ಲ. ಆದರೆ ಈ ಧಾರಾವಾಹಿಯನ್ನು ಒಂದು ಪೂರ್ಣಪ್ರಮಾಣದ ಚಿತ್ರವಾಗಿ ಬೆಳ್ಳಿತೆರೆಗೆ ಅಪ್ಪಳಿಸಲಿದೆ. ಸದ್ಯದಲ್ಲೇ ನಡೆಯಲಿರುವ ಜಿಯೋ ಮಾಮಿ ಮುಂಬೈ ಚಲನಚಿತ್ರೋತ್ಸವದಲ್ಲಿ ಅಹಮಾಕ್ ಪ್ರದರ್ಶನಗೊಳ್ಳಲಿದೆ. ಅಂದಹಾಗೆ ಅಹಮಾಕ್ 1991ರಲ್ಲಿ ದೂರದರ್ಶನದಲ್ಲಿ ಧಾರಾವಾಹಿಯಾಗಿ ಪ್ರಸಾರಗೊಂಡಿತ್ತು. ಆ ಕಾಲದ ಜನಪ್ರಿಯ ಟಿವಿ ತಾರೆ ಮೀತಾ ವಸಿಷ್ಠ್, ಈ ಟೆಲಿಸಿರೀಯಲ್‌ನಲ್ಲಿ ನಾಯಕಿಯಾಗಿ ಅಭಿನಯಿಸಿದ್ದರು. ಧಾರಾವಾಹಿಯಾಗಿ ಪ್ರಸಾರವಾದ ಬಳಿಕ ನಿರ್ಮಾಪಕರು ಅಹಮಾಕ್‌ನ್ನು ಚಲನಚಿತ್ರವಾಗಿ ಪರಿವರ್ತಿಸಿದರು. ಅದು 1992ರ ನ್ಯೂಯಾರ್ಕ್ ಚಲನಚಿತ್ರೋತ್ಸವದಲ್ಲೂ ಪ್ರದರ್ಶಿತವಾಗಿತ್ತು. ಆದಾಗ್ಯೂ ಅದು ಈ ತನಕ ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಿರಲಿಲ್ಲ. ವಿಶ್ವಪ್ರಸಿದ್ಧ ಕಥೆಗಾರ ಫಿಯೋದೊರ್ ದೊಸ್ತೊವ್‌ಸ್ಕಿಯವರ ‘ ದಿ ಇಡಿಯಟ್’ ಕಾದಂಬರಿಯನ್ನು ಅಹಮಾಕ್ ಆಧರಿಸಿದೆ. ಈ ಟಿವಿ ಧಾರಾವಾಹಿಗೆ ಕತ್ತರಿ ಪ್ರಯೋಗಿಸದೆಯೇ ನಾಲ್ಕು ತಾಸುಗಳ ಪೂರ್ಣ ಪ್ರಮಾಣದ ಚಿತ್ರವಾಗಿ ಅದು ಪ್ರದರ್ಶನಗೊಳ್ಳಲಿದೆ.