‘ಯೆ ದಿಲ್ ಹೈ ಮುಷ್ಕಿಲ್’ಗೆ ವದಂತಿಗಳ ಕಾಟ
ರಣಬೀರ್ಕಪೂರ್, ಐಶ್ವರ್ಯಾ ರೈ ಹಾಗೂ ಅನುಷ್ಕಾ ಶರ್ಮಾ ಅಭಿನಯದ ‘ಯೆ ದಿಲ್ ಹೈ ಮುಷ್ಕಿಲ್’ಬಿಡುಗಡೆಗೆ ಸಮೀಪಿಸುತ್ತಿರುವಂತೆಯೇ, ಚಿತ್ರದ ಬಗ್ಗೆ ಪ್ರತಿ ದಿನ ಒಂದಲ್ಲ ಒಂದು ವದಂತಿ ಸೃಷ್ಟಿಯಾಗುತ್ತಿವೆ.
ನಿರ್ದೇಶಕ ಕರಣ್ ಜೋಹರ್ ವಿರೋಧದ ಹೊರತಾಗಿಯೂ ಸೆನ್ಸಾರ್ ಮಂಡಳಿಯು ಐಶ್ವರ್ಯಾ ರೈ ಹಾಗೂ ರಣಬೀರ್ ಕಪೂರ್ ಜೊತೆಯಾಗಿ ಅಭಿನಯಿಸಿದ ಕೆಲವು ದೃಶ್ಯಗಳಿಗೆ ಕತ್ತರಿ ಪ್ರಯೋಗಿಸಿದೆಯೆಂಬ ಬಲವಾದ ವದಂತಿಗಳು ಬಾಲಿವುಡ್ ವಲಯದಲ್ಲಿ ಕಾಡ್ಗಿಚ್ಚಿನಂತೆ ಹರಿದಾಡುತ್ತಿದ್ದವು.
ಆದರೆ ಚಿತ್ರದ ನಿರ್ಮಾಪಕರಾದ ‘ಧರ್ಮಾ ಪ್ರೊಡಕ್ಷನ್ಸ್’ ಈ ವದಂತಿಗಳಿಗೆ ಸಾರಾಸಗಟಾಗಿ ನಿರಾಕರಿಸಿದೆ. ಯಾವುದೇ ಕಟ್ ಇಲ್ಲದೆ ಚಿತ್ರಕ್ಕೆ ಸೆನ್ಸಾರ್ ಮಂಡಳಿ ಹಸಿರುನಿಶಾನೆ ತೋರಿಸಿದೆಯೆಂದು ಅದು ಸ್ಪಷ್ಟಪಡಿಸಿದೆ. ಅಷ್ಟೇ ಅಲ್ಲದೆ ಚಿತ್ರವು ಅಕ್ಟೋಬರ್ 28ರಂದು ಬಿಡುಗಡೆಯಾಗಲಿದೆಯೆಂದು ಹೇಳಿದೆ.
ಇದಕ್ಕೂ ಮೊದಲು ಚಿತ್ರದಲ್ಲಿ ಪಾಕ್ ನಟ ಫಾವದ್ ಖಾನ್ ಅಭಿನಯದ ದೃಶ್ಯಗಳನ್ನು ತೆಗೆದುಹಾಕಿ, ಅವರ ಜಾಗದಲ್ಲಿ ಸೈಫ್ ಅಲಿ ಖಾನ್ ಅವರನ್ನು ಹಾಕಿಕೊಂಡು ಕರಣ್ಜೋಹರ್ ರೀಶೂಟ್ ಮಾಡಿದ್ದಾರೆಂಬ ಗಾಸಿಪ್ಗಳು ಕೂಡಾ ಹರಿದಾಡಿದ್ದವು. ಉರಿ ದಾಳಿಯ ಬಳಿಕ ಪಾಕ್ ನಟರು ಅಭಿನಯಿಸಿರುವ ಚಿತ್ರಗಳಿಗೆ ತಡೆಯೊಡ್ಡುವುದಾಗಿ ರಾಜ್ಠಾಕ್ರೆಯ ಎಂಎನ್ಎಸ್ ಪಕ್ಷ ಬೆದರಿಕೆ ಹಾಕಿದ ಹಿನ್ನೆಲೆಯಲ್ಲಿ ಕರಣ್ ಈ ಬದಲಾವಣೆ ಮಾಡಿದರೆಂದು ಹೇಳಲಾಗಿತ್ತು. ಆದರೆ ಚಿತ್ರ ತಂಡವೂ ಈ ವದಂತಿಯನ್ನೂ ನಿರಾಕರಿಸಿದ್ದು, ಫಾವದ್ ಚಿತ್ರದಲ್ಲಿರುವುದನ್ನು ದೃಢೀಕರಿಸಿದೆ.