ರಾಜಕೀಯ ಸ್ವಾರ್ಥಕ್ಕಾಗಿ ಟಿಪ್ಪು ಕುರಿತು ಅಪಪ್ರಚಾರ: ಹಿರಿಯ ಚಿಂತಕ ಜಿ.ರಾಮಕೃಷ್ಣ

ಬೆಂಗಳೂರು, ಅ.23: ಬಿಜೆಪಿ ತನ್ನ ರಾಜಕೀಯ ಸ್ವಾರ್ಥಕ್ಕಾಗಿ ಮಹಾನ್ ಹೋರಾಟಗಾರ ಟಿಪ್ಪು ಸುಲ್ತಾನ್ ಕುರಿತು ಅಪಪ್ರಚಾರ ಮಾಡಲಾಗುತ್ತಿದೆ ಎಂದು ಹಿರಿಯ ಚಿಂತಕ ಡಾ.ಜಿ.ರಾಮಕೃಷ್ಣ ವಿಷಾದಿಸಿದರು.

ಕರ್ನಾಟಕ ರಾಜ್ಯ ಪತ್ರಾಗಾರ ಇಲಾಖೆ, ಸರಕಾರಿ ಕಲಾ ಕಾಲೇಜಿನ ಕನ್ನಡ ವಿಭಾಗ ನಗರದ ಬಾಪೂಜಿ ಸಭಾಂಗಣದಲ್ಲಿ ಆಯೋಜಿಸಿದ್ದ ‘ಚರಿತ್ರೆಯ ನಿರೂಪಣೆ: ವರ್ತಮಾನದ ಪ್ರವೃತ್ತಿಗಳು’ ಕುರಿತು ವಿಚಾರ ಸಂಕಿರಣವನ್ನು ಉದ್ಘಾಟಿಸಿ ಅವರು ಮಾತನಾಡಿದರು.

ಬಿಜೆಪಿ ಸೇರಿದಂತೆ ಸಂಘಪರಿವಾರ ಇತಿಹಾಸದ ಘಟನೆಗಳನ್ನು ತಮ್ಮ ಕೋಮುವಾದಿ ಸಿದ್ಧಾಂತಕ್ಕೆ ಪೂರಕವಾಗುವಂತೆ ಪರಿವರ್ತಿಸಿಕೊಳ್ಳುತ್ತಿವೆ. ಟಿಪ್ಪು ಸುಲ್ತಾನ್ ಕೇವಲ ಮುಸ್ಲಿಮ್ ಎಂಬ ಒಂದೇ ಕಾರಣಕ್ಕೆ ಆತನ ಎಲ್ಲ ಜನಪರ ಕೆಲಸಗಳನ್ನು ಮರೆ ಮಾಚಿ ಕೋಮುವಾದಿ ಬಣ್ಣ ಕಟ್ಟುತ್ತಿದ್ದಾರೆ. ಇದು ಅತ್ಯಂತ ಅಪಾಯಕಾರಿಯಾದ ಬೆಳವಣಿಗೆ ಎಂದು ಅವರು ಆತಂಕ ವ್ಯಕ್ತಪಡಿಸಿದರು.

ಇನ್ನೊಂದೆಡೆ ಕೆಲವು ಇತಿಹಾಸದ ಕೆಲವು ಮಹಾನ್ ನಾಯಕರ ಚಿಂತನೆಗಳನ್ನು ಕೇಸರಿ ಮಯಗೊಳಿಸಿ ಅನಗತ್ಯವಾಗಿ ವಿಜೃಂಭಿಸಲಾಗುತ್ತಿದೆ. ಛತ್ರಪತಿ ಶಿವಾಜಿಯ ಜನಪರ ಚಿಂತನೆಗಳನ್ನು ಮೂಲೆಗುಂಪು ಮಾಡಿ ಹಿಂದೂ ನಾಯಕನ ಪಟ್ಟ ಕಟ್ಟಲಾಗುತ್ತಿದೆ. ಹಾಗೆಯೇ ಸಾವಿರಾರು ಕೋಟಿ ರೂ.ಖರ್ಚು ಮಾಡಿ ಪ್ರತಿಮೆಯನ್ನು ಸ್ಥಾಪಿಸಿ ಅನಗತ್ಯವಾಗಿ ವೈಭವೀಕರಿಸಲಾಗುತ್ತಿದೆ ಎಂದು ಅವರು ಹೇಳಿದರು.

ಪ್ರಾಚೀನತೆಯ ವೈಭವೀಕರಣ: ಬ್ರಾಹ್ಮಣವಾದಿಗಳು ದೇಶದ ಜನತೆಯನ್ನು ಭಾವನಾತ್ಮಕವಾಗಿ ಕಟ್ಟಿಹಾಕುವಲ್ಲಿ ನಿಸ್ಸೀಮರಾಗಿದ್ದಾರೆ. ಪ್ರಪಂಚದಲ್ಲಿ ಯಾವುದೇ ಸಂಶೋಧನೆಗಳು ನಡೆದರೂ ನಮ್ಮ ವೇದಗಳಲ್ಲಿ ಈ ಸಂಶೋಧನೆಗಳ ಉಲ್ಲೇಖವಿದೆ. ಸಾವಿರಾರು ವರ್ಷಗಳ ಹಿಂದೆಯೇ ಅಂತರ್ ಗ್ರಹಗಳ ನಡುವೆ ಪ್ರಯಾಣ ಮಾಡಲಾಗುತ್ತಿತ್ತು. ಹೀಗೆ ಕಟ್ಟುಕತೆಗಳ ಮೂಲಕ ಜನತೆಯನ್ನು ವೈಜ್ಞಾನಿಕತೆಯತ್ತ ಹೋಗದಂತೆ ತಡೆಯಲಾಗುತ್ತಿದೆ ಎಂದು ಅವರು ವಿಷಾದಿಸಿದರು.

ಇತಿಹಾಸಕಾರರಿಗೆ ಶಿಸ್ತೇ ಮುಖ್ಯ: ಪ್ರಪಂಚದ ಹಲವು ಇತಿಹಾಸ ತಜ್ಞರು ಇತಿಹಾಸ ಕ್ಷೇತ್ರವನ್ನು ಅತ್ಯಂತ ಶಿಸ್ತಿನಿಂದ, ತರ್ಕಬದ್ಧವಾಗಿ ಕಟ್ಟಿಕೊಂಡು ಬಂದಿದ್ದರು. ಆದರೆ, ಸಂಘಪರಿವಾರ ಇತಿಹಾಸವನ್ನು ತಮ್ಮ ಸ್ವಾರ್ಥಕ್ಕೆ ಬೇಕಾದಂತಹ ಅಸ್ತ್ರಗಳನ್ನಾಗಿ ಪರಿವರ್ತಿಸಿಕೊಂಡರು. ಇಂತಹ ಕಠಿಣ ಸ್ಥಿತಿಯಲ್ಲಿ ಇತಿಹಾಸದ ಕುರಿತು ಪ್ರೀತಿ ಇರುವವರು ಸಂಘಪರಿವಾರದ ಷಡ್ಯಂತ್ರಗಳನ್ನು ತಮ್ಮ ಶಿಸ್ತು ಬದ್ಧ ಅಧ್ಯಯನಗಳಿಂದ ಬಯಲು ಮಾಡಬೇಕು ಎಂದು ಅವರು ಆಶಿಸಿದರು.

ಕಾರ್ಯಕ್ರಮದಲ್ಲಿ ಕರ್ನಾಟಕ ರಾಜ್ಯ ಪತ್ರಾಗಾರ ಇಲಾಖೆಯ ಉಪ ನಿರ್ದೇಶಕಿ ಅಂಬುಲಾಕ್ಷಿ, ಸರಕಾರಿ ಕಲಾ ಕಾಲೇಜಿನ ಪ್ರಾಂಶುಪಾಲ ಪ್ರೊ.ಕೆ.ಎಂ.ವೆಂಕಟಶಾಮಿರೆಡ್ಡಿ ಹಾಗೂ ನಾಟಕಕಾರ ಕೆ.ವೈ.ನಾರಾಯಣಸ್ವಾಮಿ ಮತ್ತಿತರರಿದ್ದರು.

ಬ್ರಾಹ್ಮಣವಾದಿಗಳು ಮುಸ್ಲಿಮರನ್ನು ಹೊರಗಿನಿಂದ ಬಂದವರು ಎಂದು ಬಿಂಬಿಸುವ ಮೂಲಕ ಜನತೆಯಲ್ಲಿ ಒಡಕನ್ನುಂಟು ಮಾಡುತ್ತಿದ್ದಾರೆ. ಆದರೆ, ಇದಕ್ಕಿಂತ ಮೊದಲೇ ದೇಶಕ್ಕೆ ಹೊರಗಿನಿಂದ ಬಂದವರು ಆರ್ಯರಾಗಿರುವ ಬ್ರಾಹ್ಮಣರಾಗಿದ್ದಾರೆ. ಋಗ್ವೇದದಲ್ಲಿ ಕುದುರೆಗಳ ಪ್ರಸ್ತಾಪ ಹೆಚ್ಚು ಬರುತ್ತದೆ. ಆದರೆ, ಸಿಂದೂ ನಾಗರಿಕತೆಯಲ್ಲಿ ಎಲ್ಲಿಯೂ ಕುದುರೆಗಳ ಪ್ರಸ್ತಾಪವಿಲ್ಲ. ಬದಲಾಗಿ ಹಸು, ಎತ್ತು, ಎಮ್ಮೆ, ಸೇರಿದಂತೆ ಹಲವು ಪ್ರಾಣಿಗಳ ಪ್ರಸ್ತಾಪ ಬರುತ್ತದೆ. ಈ ಹಿನ್ನೆಲೆಯಲ್ಲಿ ಗಮನಿಸುವುದಾದರೆ ಋಗ್ವೇದದ ಪ್ರತಿಪಾದಕರಾದ ಆರ್ಯರು ಹೊರಗಿನಿಂದ ಬಂದಿದ್ದಾರೆ ಎಂಬುದು ಖಚಿತವಾಗಿದೆ.
 -ಡಾ.ಜಿ.ರಾಮಕೃಷ್ಣ, ಹಿರಿಯ ಚಿಂತಕ