ಭಾರತದ ಹೆಸರಿಗೆ ಮಸಿ ಬಳಿಯಲು ಹೋಗಿ ಬಾಲ ಸುಟ್ಟುಕೊಂಡ ಪಾಕಿಸ್ತಾನ ರಕ್ಷಣಾ ಫೋರಂ!

ಹೊಸದಿಲ್ಲಿ, ನ.19: ಭಾರತ ವಿರೋಧಿ ಬರಹಗಳುಳ್ಳ ತಿರುಚಿದ ಚಿತ್ರವೊಂದನ್ನು ಟ್ವೀಟ್ ಮಾಡಿದ್ದಕ್ಕಾಗಿ ಪಾಕಿಸ್ತಾನ ರಕ್ಷಣಾ ಫೋರಂನ ಖಾತೆಯನ್ನು ಟ್ವಿಟರ್ ಅಮಾನತು ಮಾಡಿದೆ.

ಪಾಕಿಸ್ತಾನ ರಕ್ಷಣಾ ಫೋರಂನ ವೆರಿಫೈಡ್ ಟ್ವಿಟರ್ ಖಾತೆ @defencepk ಜಾಮಿಯಾ ಮಸೀದಿಯ ಮುಂದೆ ಕಾಗದವೊಂದನ್ನು ಹಿಡಿದು ನಿಂತುಕೊಂಡಿರುವ ಫೋಟೊವೊಂದನ್ನು ಟ್ವೀಟ್ ಮಾಡಿತ್ತು. ಈ ಕಾಗದದಲ್ಲಿ “ನಾನು ಭಾರತೀಯಳು. ಆದರೆ ನಾನು ಭಾರತವನ್ನು ದ್ವೇಷಿಸುತ್ತೇನೆ. ಏಕೆಂದರೆ ಭಾರತವು ನಾಗಾ, ಕಾಶ್ಮೀರಿಗಳು, ಮಣಿಪುರಿಗಳು, ಹೈದರಾಬಾದಿಗಳು, ಸಿಕ್ಕಿಂ, ಮಿಝೋರಾಮ್, ಗೋವನ್ನರು ಆಕ್ರಮಿಸಿಕೊಂಡಿರುವ ವಸಾಹತಾಗಿದೆ” ಎಂದು ಬರೆಯಲಾಗಿತ್ತು. ಆದರೆ ಸತ್ಯಾಂಶವೆಂದರೆ ಈ ಕಾಗದದಲ್ಲಿ “ನಾನು ಭಾರತದ ಪ್ರಜೆ, ನಮ್ಮ ಸಂವಿಧಾನದ ಜಾತ್ಯಾತೀತ ಮೌಲ್ಯಗಳೊಂದಿಗೆ ನಾನಿದ್ದೇನೆ” ಎಂದು ಬರೆಯಲಾಗಿತ್ತು. 

ಪಾಕಿಸ್ತಾನ ರಕ್ಷಣಾ ಫೋರಂ ಟ್ವೀಟ್ ಮಾಡಿದ್ದು, ತಿರುಚಿದ ಚಿತ್ರವಾಗಿತ್ತು. ಈ ಟ್ವೀಟ್ ವೈರಲ್ ಆಗುತ್ತಲೇ ಭಾರತೀಯ ಟ್ವಿಟರ್ ಬಳಕೆದಾರರು ಎಚ್ಚೆತ್ತುಕೊಂಡು ಟ್ವಿಟರ್ ಗೆ ದೂರು ನೀಡಿದ್ದರು. ಕೆಲ ಹೊತ್ತಿನ ನಂತರ ಪಾಕಿಸ್ತಾನ ರಕ್ಷಣಾ ಫೋರಂ ಟ್ವೀಟನ್ನು ಡಿಲಿಟ್ ಮಾಡಿದ್ದರೂ ಸಾವಿರಾರು ದೂರುಗಳು ಹಿನ್ನೆಲೆಯಲ್ಲಿ ಟ್ವಿಟರ್ ಪಾಕಿಸ್ತಾನ ರಕ್ಷಣಾ ಫೋರಂನ ಖಾತೆಯನ್ನು ಅಮಾನತು ಮಾಡಿದೆ.