ಬೆಂಗಳೂರು: 3 ಲಕ್ಷ ರೂ. ಮೌಲ್ಯದ ಸೀರೆ ಕಳವು

ಬೆಂಗಳೂರು, ಜು.30: ಗ್ರಾಹಕರ ಸೋಗಿನಲ್ಲಿ ಬಂದ ದಂಪತಿ ಸುಮಾರು 3 ಲಕ್ಷ ಮೌಲ್ಯದ ದುಬಾರಿ ಸೀರೆಗಳನ್ನು ಕಳ್ಳತನ ಮಾಡಿರುವ ಘಟನೆ ಇಲ್ಲಿನ ವಿದ್ಯಾರಣ್ಯಪುರ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ನಡೆದಿದೆ.

ನಗರದ ನಂಜಪ್ಪ ಸರ್ಕಲ್ ಬಳಿಯ ಸೀರೆ ಮಳಿಗೆಯಲ್ಲಿ ರವಿವಾರ ಮಧ್ಯಾಹ್ನ 2ರ ವೇಳೆ ಗ್ರಾಹಕರ ಸೋಗಿನಲ್ಲಿ ಸೀರೆ ಖರೀದಿಸಲು ಬಂದಿದ್ದ ದಂಪತಿ ಸಿಬ್ಬಂದಿಯ ಗಮನವನ್ನು ಬೇರೆಡೆ ಸೆಳೆದು 20 ದುಬಾರಿ ಸೀರೆಗಳನ್ನು ಕಳವು ಮಾಡಿದ್ದಾರೆ.

3 ಲಕ್ಷ ಮೌಲ್ಯದ 20 ಸೀರೆಗಳನ್ನು ಕದ್ದು ದಂಪತಿ ಪರಾರಿಯಾಗಿದ್ದಾರೆ. ಆರೋಪಿಗಳು ಆಂಧ್ರಪ್ರದೇಶ ನೋಂದಣಿಯ ಬೈಕ್‌ನಲ್ಲಿ ಬಂದಿದ್ದರು. ದಂಪತಿಯ ಕೈಚಳಕ ಸಿಸಿ ಕ್ಯಾಮರಾದಲ್ಲಿ ಸೆರೆಯಾಗಿದ್ದು, ವಿದ್ಯಾರಣ್ಯಪುರ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.