ವಿಕಲಚೇತನರ ಉದ್ಯೋಗ ಮೇಳ ಯಶಸ್ವಿ: ಸಚಿವೆ ಡಾ.ಜಯಮಾಲಾ

ಬೆಂಗಳೂರು, ಫೆ.25: ವಿಕಲಚೇತನರಿಗಾಗಿ ಆಯೋಜಿಸಲಾಗಿರುವ ಈ ಉದ್ಯೋಗ ಮೇಳವು ಅತಂತ್ಯ ಯಶಸ್ವಿಯಾಗಿದೆ. 150 ಪ್ರತಿಷ್ಠಿತ ಕಂಪೆನಿಗಳು ಹಾಗೂ ಸುಮಾರು 6 ಸಾವಿರ ಮಂದಿ ನೋಂದಣಿ ಮಾಡಿಸಿಕೊಂಡಿದ್ದರು. ಈ ಪೈಕಿ 5 ಸಾವಿರ ಮಂದಿ ಭಾಗವಹಿಸಿದ್ದರು ಎಂದು ಮಹಿಳಾ ಮತ್ತು ಮಕ್ಕಳ ಕಲ್ಯಾಣ ಸಚಿವೆ ಡಾ.ಜಯಮಾಲಾ ತಿಳಿಸಿದರು.

ಸೋಮವಾರ ಕೋರಮಂಗಲದ ಕೆಎಸ್‌ಆರ್‌ಪಿ 4ನೇ ಬೆಟಾಲಿಯನ್ ಮೈದಾನದಲ್ಲಿ ಆಯೋಜಿಸಲಾಗಿದ್ದ ವಿಕಲಚೇತನರ ರಾಜ್ಯಮಟ್ಟದ ಉದ್ಯೋಗ ಮೇಳವನ್ನು ಉದ್ಘಾಟಿಸಿ ಅವರು ಮಾತನಾಡಿದರು.

ಈ ಉದ್ಯೋಗದ ಮೇಳದ ಯಶಸ್ಸಿಗಾಗಿ ಸುಮಾರು ಎರಡು ಸಾವಿರ ಸ್ವಯಂ ಸೇವಾ ಕಾರ್ಯಕರ್ತರು ವಿಕಲಚೇತನರಿಗೆ ಸಹಕರಿಸಲು ಭಾಗವಹಿಸಿದ್ದಾರೆ. ವಿಆರ್ ಯುವರ್ ವಾಯ್ಸಾ ಎಂಬ ಸಂಸ್ಥೆಯು ರಾಜ್ಯ ಸರಕಾರದ ಸಹಯೋಗದಲ್ಲಿ ಈ ಉದ್ಯೋಗ ಮೇಳವನ್ನು ಆಯೋಜಿಸಿದೆ ಎಂದು ಜಯಮಾಲಾ ಹೇಳಿದರು.

ಉದ್ಯೋಗ ಮೇಳದಲ್ಲಿ 599 ವಿಕಲಚೇತನರು ಅಂತಿಮ ಆಯ್ಕೆ ಆದರೆ, 2343 ಮಂದಿ ತಾತ್ಕಾಲಿಕ ಆಯ್ಕೆ ಆದರು. ವಿಕಲಚೇತನರ ಇಲಾಖೆಯ ಸಹಯೋಗದಲ್ಲಿ ಶಾಸ್ತ್ರಿ ಮೆಮೊರಿಯಲ್ ವಿಶೇಷ ಶಾಲೆಯ ವಿಜಯಲಕ್ಷ್ಮಿ ಎಲ್ಲ ಉದ್ಯೋಗ ಅರಸಿ ಬಂದವರಿಗೆ 6500 ತಿಂಡಿ, ಎಲ್ಲ ಸ್ವಯಂ ಸೇವಕರಿಗೆ ಮತ್ತು ಅಧಿಕಾರಿ, ಸಿಬ್ಬಂದಿಗಳು, ಉಪಾಧ್ಯಾಯರು, ಎಂ.ಆರ್.ಡಬ್ಲ್ಯೂಗಳು ಮತ್ತು ಬಂಧುಗಳಿಗೆ 2800 ಉತ್ತಮ ಊಟದ ವ್ಯವಸ್ಥೆ ಉಚಿತವಾಗಿ ಮಾಡಿದರು. 6 ಬಸ್ಸುಗಳನ್ನೂ ಇಂದಿನ ಮಟ್ಟಿಗೆ ಒದಗಿಸಿದ್ದರು.

ಪೊಲೀಸ್ ಇಲಾಖೆಯ ಕೆ.ಎಸ್.ಆರ್.ಪಿ.ಯ ಹೆಚ್ಚುವರಿ ಮಹಾ ನಿರ್ದೇಶಕ ಭಾಸ್ಕರ್ ರಾವ್ ಉತ್ತಮ ಮೈದಾನ ಒದಗಿಸಿದರು. ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ಇಲಾಖೆಯ ಪ್ರಧಾನ ಕಾರ್ಯದರ್ಶಿ ಉಮಾ ಮಹದೇವನ್ ಮಾರ್ಗದರ್ಶನದಲ್ಲಿ ಅತ್ಯುತ್ತಮವಾಗಿ ವ್ಯವಸ್ಥೆ ಮಾಡಲಾಗಿತ್ತು.

ಇತರೇ ಸ್ವಯಂ ಸೇವಾಸಂಸ್ಥೆಗಳು 13 ಬಸ್ಸುಗಳು, ಸಂಜ್ಞಾ ಭಾಷಾ ತಜ್ಞರ ಸೇವೆ ಒದಗಿಸಿದರು. ಇಲಾಖೆಯ ವತಿಯಿಂದಲೂ ವಿಕಲಚೇತನರ ಭಾಗವಹಿಸುವಿಕೆ, ಪ್ರಚಾರ, ಎಲ್ಲ ಪತ್ರಿಕೆಯಲ್ಲಿ ಜಾಹೀರಾತುಗಳು, ಪಲಾನುಭವಿಗಳನ್ನು/ಆಕಾಂಕ್ಷಿಗಳನ್ನು ರಾಜ್ಯ ಮಟ್ಟದಿಂದ ಕರೆತಂದು ಪ್ರೋತ್ಸಾಹಿಸಲಾಯಿತು.

ಕುಡಿಯುವ ನೀರು, ಗಾಲಿ ಕುರ್ಚಿಯ ವ್ಯವಸ್ಥೆ, ಪೆಂಡಾಲ್ ವ್ಯವಸ್ಥೆ, ಸ್ವಯಂಸೇವಾ ಸಂಸ್ಥೆಗಳ ಸ್ಟಾಲ್‌ಗಳು, ಇಲಾಖೆಯ ಸ್ಟಾಲ್‌ಗಳು, ಸಂಜ್ಞಾ ಭಾಷಾ ತಜ್ಞರು, 150 ಕಂಪನಿಗಳ ಸುಸಜ್ಜಿತ ಸಂದರ್ಶನ ಕೊಠಡಿಗಳು, ಸ್ಥಳದಲ್ಲೇ ನೋಂದಣಿ ವ್ಯವಸ್ಥೆ, ಉದ್ಘಾಟನಾ ಕಾರ್ಯಕ್ರಮದ ವ್ಯವಸ್ಥೆ, ಸ್ವಯಂಸೇವಕರ ಬದ್ಧತೆ ಎದ್ದು ಕಾಣುತ್ತಿತ್ತು.

ವಿ ಆರ್ ಯುವರ್ ವಾಯ್ಸ್ ಅನ್ನು ಆನ್ ಲೈನ್ ಮೂಲಕವೇ ವ್ಯವಸ್ಥಿತ ನಿರ್ವಹಣೆ, ಬ್ಯಾಟರಿಚಾಲಿತ ವಾಹನಗಳ ವ್ಯವಸ್ಥೆ, ಬಸ್‌ಗಳ ಮೂಲಕ ಬೆಂಗಳೂರಿನ ವಿವಿಧ ಭಾಗಗಳಿಗೆ ಹಾಗೂ ಬಸ್ ನಿಲ್ದಾಣಕ್ಕೆ ಉಚಿತವಾಗಿ ಕಳಿಸುವಿಕೆ, ಇತ್ಯಾದಿ ಅತ್ಯುತ್ತಮ ವ್ಯವಸ್ಥೆಗಳಿಂದ ಎಲ್ಲವೂ ಅಚ್ಚುಕಟ್ಟಾಗಿ ನಡೆಯಿತು. ಈ ಕಾರ್ಯಕ್ರಮದಲ್ಲಿ ವಿಕಲಚೇತನರ ಸಬಲೀಕರಣ ಇಲಾಖೆಯ ನಿರ್ದೇಶಕ ಜಯವಿಭವ ಸ್ವಾಮಿ, ವಿ ಆರ್ ಯುವರ್ ವಾಯ್ಸ್ ನ ಖಾಸಿಮ್ ಬಸಿತ್ ಸೇರಿದಂತೆ ಇನ್ನಿತರರು ಪಾಲ್ಗೊಂಡಿದ್ದರು.