ರಾಜಧಾನಿಯಲ್ಲಿ ದೀಪಾವಳಿ ಪಟಾಕಿ ಮಾಲಿನ್ಯ ಶೇ.46.7ರಷ್ಟು ಕಡಿಮೆ
Update: 2020-11-18 22:34 IST
ಬೆಂಗಳೂರು, ನ.18: ರಾಜಧಾನಿಯಲ್ಲಿ ಈ ಬಾರಿ ದೀಪಾವಳಿ ಪಟಾಕಿ ಮಾಲಿನ್ಯ ಶೇ.46.7ರಷ್ಟು ಕಡಿಮೆಯಾಗಿರುವುದು ಕರ್ನಾಟಕ ರಾಜ್ಯ ಮಾಲಿನ್ಯ ನಿಯಂತ್ರಣ ಮಂಡಳಿ ನಡೆಸಿದ ಈ ಸಮೀಕ್ಷೆಯಿಂದ ತಿಳಿದುಬಂದಿದೆ.
ಈ ಹಿಂದಿನ ವರ್ಷಗಳಿಗೆ ಹೋಲಿಸಿದರೆ, ವಾಯು ಗುಣಮಟ್ಟ ಸೂಚ್ಯಂಕದಲ್ಲಿ ಶೇ. 30.34 ರಷ್ಟು ಇಳಿಕೆ ಕಂಡುಬಂದಿದೆ. ಎಕ್ಯೂಐ 51-100ರ ಒಳಗಿದ್ದರೆ ತೃಪ್ತಿಕರ ಎಂದು ಪರಿಗಣಿಸಲಾಗುತ್ತದೆ. ಅದರಂತೆ ಎಸ್ಜಿ ಹಳ್ಳಿ(39), ಜಯನಗರ 5ನೇ ಬ್ಲಾಕ್ (44), ಮತ್ತು ಸೆಂಟ್ರಲ್ ಸಿಲ್ಕ್ ಬೋರ್ಡ್ (43)ನಲ್ಲಿ ಉತ್ತಮ ಎನಿಸಿದೆ.
ಕೆಎಸ್ಪಿಸಿಬಿ ನಗರದಲ್ಲಿ ನಿರಂತರವಾಗಿ 10 ರೌಂಡಪ್ ಶಬ್ದ ಮಾಲಿನ್ಯ ಅಂದಾಜಿಸುವ ಕೇಂದ್ರಗಳನ್ನು ಸ್ಥಾಪಿಸಿತ್ತು ಮತ್ತು ಈ ಅವಧಿಯಲ್ಲಿ ದಿನದ ಇಪ್ಪತ್ನಾಲ್ಕು ಗಂಟೆಗಳ ಕಾಲವೂ ಮೇಲ್ವಿಚಾರಣೆ ನಡೆಸಿತು. ಕೆಎಸ್ಪಿಸಿಬಿ ಮಾಹಿತಿಯ ಪ್ರಕಾರ, ನವೆಂಬರ್ 9 ಅನ್ನು (ವರ್ಷದ ಸಾಮಾನ್ಯ ದಿನ) ಪರಿಗಣಿಸುವಾಗ, ಏಳು ಸ್ಥಳಗಳ ಪೈಕಿ ನಾಲ್ಕರಲ್ಲಿ ಪರಿಸ್ಥಿತಿ ಮಧ್ಯಮ ಪ್ರಮಾಣದಲ್ಲಿತ್ತು. ಪಶುವೈದ್ಯಕೀಯ ಆಸ್ಪತ್ರೆ, ಹೆಬ್ಬಾಳ, ಜಯನಗರ 5 ನೇ ಬ್ಲಾಕ್, ಕವಿಕಾ, ಮೈಸೂರು ರಸ್ತೆ ಮತ್ತು ನಿಮ್ಹಾನ್ಸ್, ಸಿಟಿ ರೈಲ್ವೆ ನಿಲ್ದಾಣ ಮತ್ತು ಸೆಂಟ್ರಲ್ ಸಿಲ್ಕ್ ಬೋರ್ಡ್ಗಳಲ್ಲಿ ಮಾಲಿನ್ಯ ಪ್ರಮಾಣ ತೃಪ್ತಿಕರವಾಗಿದೆ.
ದೀಪಾವಳಿ ಸಮಯದಲ್ಲಿ (ನವೆಂಬರ್ 14-16), ಸಿಟಿ ರೈಲ್ವೆ ನಿಲ್ದಾಣದಲ್ಲಿ ಎಕ್ಯೂಐ ಮೌಲ್ಯ 77, ಪಶುವೈದ್ಯಕೀಯ ಕಾಲೇಜು, ಹೆಬ್ಬಾಳ (64), ಕವಿಕಾ, ಮೈಸೂರು ರಸ್ತೆ (62), ಮತ್ತು ನಿಮ್ಹಾನ್ಸ್ (61) ರಷ್ಟು ಪಟಾಕಿ ಮಾಲಿನ್ಯ ದಾಖಲಾಗಿದೆ.