ರಾಜ್ಯದಲ್ಲಿ ಶಬ್ದಮಾಲಿನ್ಯ ಅಳೆಯಲು ಅಗತ್ಯ ಉಪಕರಣ ಒದಗಿಸಲು ಹೈಕೋರ್ಟ್ ಸೂಚನೆ

ಬೆಂಗಳೂರು, ಡಿ.21: ರಾಜ್ಯದಲ್ಲಿನ ಶಬ್ದಮಾಲಿನ್ಯ ಅಳೆಯಲು ಮಾಲಿನ್ಯ ನಿಯಂತ್ರಣ ಮಂಡಳಿ ಬಳಿ ಇರುವುದೇ 234 ಉಪಕರಣಗಳು ಎಂಬ ಹೇಳಿಕೆಗೆ ಅಸಮಾಧಾನ ವ್ಯಕ್ತಪಡಿಸಿರುವ ಹೈಕೋರ್ಟ್, ಮಾಲಿನ್ಯ ಅಳೆಯಲು ಅಗತ್ಯ ಪ್ರಮಾಣದಲ್ಲಿ ಉಪಕರಣಗಳನ್ನು ಒದಗಿಸುವಂತೆ ರಾಜ್ಯ ಸರಕಾರಕ್ಕೆ ನಿರ್ದೇಶಿಸಿದೆ.

ಈ ಕುರಿತು ವಿವಿಧ ಸಂಘಟನೆಗಳು ಸಲ್ಲಿಸಿರುವ ಸಾರ್ವಜನಿಕ ಹಿತಾಸಕ್ತಿ ಅರ್ಜಿಗಳನ್ನು ಮುಖ್ಯ ನ್ಯಾಯಮೂರ್ತಿ ಎ.ಎಸ್. ಓಕ ನೇತೃತ್ವದ ವಿಭಾಗೀಯ ಪೀಠ ವಿಚಾರಣೆ ನಡೆಸಿತು. ಕೆಲ ಕಾಲ ವಾದ ಪ್ರತಿವಾದ ಆಲಿಸಿದ, ರಾಜ್ಯದಲ್ಲಿನ ಶಬ್ದಮಾಲಿನ್ಯ ಅಳೆಯಲು ಮಾಲಿನ್ಯ ನಿಯಂತ್ರಣ ಮಂಡಳಿ ಬಳಿ ಕೇವಲ 234 ನಾಯ್ಸ್ ಮೀಟರ್ ಗಳಿವೆ ಎನ್ನಲಾಗಿದೆ. ಇಷ್ಟು ಕಡಿಮೆ ಸಂಖ್ಯೆ ಉಪಕರಣಗಳು ರಾಜ್ಯದಲ್ಲಿನ ಶಬ್ದಮಾಲಿನ್ಯ ಅಳೆಯಲು ಸಾಕಾಗುವುದಿಲ್ಲ.

ಶಬ್ದಮಾಲಿನ್ಯ ತಡೆ ಕಾಯ್ದೆ ಜಾರಿಯಾದ 20 ವರ್ಷಗಳ ನಂತರವೂ ಸೂಕ್ತ ಪ್ರಮಾಣದಲ್ಲಿ ಉಪಕರಣಗಳನ್ನು ಹೊಂದಿರುವುದು ಸರಿಯಲ್ಲ. ಹೀಗಾಗಿ ರಾಜ್ಯ ಸರಕಾರ ಶಬ್ದಮಾಲಿನ್ಯ ಅಳೆಯಲು ಕೂಡಲೇ ಅಗತ್ಯ ಪ್ರಮಾಣದಲ್ಲಿ ನಾಯ್ಸ್ ಮೀಟರ್ ಗಳನ್ನು ಖರೀದಿಸಬೇಕು ಎಂದು ನಿರ್ದೇಶಿಸಿ, ವಿಚಾರಣೆಯನ್ನು ಜನವರಿ 21ಕ್ಕೆ ಮುಂದೂಡಿತು.

ಇದಕ್ಕೂ ಮುನ್ನ ಮಾಲಿನ್ಯ ನಿಯಂತ್ರಣ ಮಂಡಳಿ ಪರ ವಕೀಲರು ಪೀಠಕ್ಕೆ ವಿವರಿಸಿ, ಮಂಡಳಿ ಬಳಿ ಒಟ್ಟು 234 ನಾಯ್ಸ್ ಮೀಟರ್‍ಗಳಿವೆ. ಅವುಗಳಲ್ಲಿ ಈಗಾಗಲೇ 108 ಮೀಟರ್ ಗಳನ್ನು ಶಬ್ದಮಾಲಿನ್ಯ ಅಳೆಯಲು ಪೊಲೀಸರು ಮತ್ತಿತರೆ ಅಧಿಕಾರಿಗಳಿಗೆ ನೀಡಲಾಗಿದೆ. ಉಳಿದಂತೆ 126 ಮೀಟರ್ ಗಳ ಮಂಡಳಿಯಲ್ಲೇ ಇವೆ ಎಂದರು.

ಇದಕ್ಕೆ ಪ್ರತಿಕ್ರಿಯಿಸಿದ ಪೀಠ, ಬೆಳಗಾವಿಯಲ್ಲಿ ಎಷ್ಟು ಮೀಟರ್ ಗಳನ್ನು ಅಳವಡಿಸಿದ್ದೀರಿ ಎಂದು ಪ್ರಶ್ನಿಸಿತು. ಸರಕಾರಿ ವಕೀಲರು ಉತ್ತರಿಸಿ ಬೆಳಗಾವಿಯನ್ನು ನಾಲ್ಕು ವಿಭಾಗಗಳಾಗಿ ವಿಂಡಗಿಸಿ, ನಾಲ್ಕು ಕಡೆ ಮೀಟರ್ ಅಳವಡಿಸಲಾಗಿದೆ ಎಂದರು. ಅಷ್ಟು ದೊಡ್ಡ ನಗರಕ್ಕೆ 4 ಮೀಟರ್ ಸಾಕಾಗುತ್ತವೆಯೇ ಎಂದು ಪ್ರಶ್ನಿಸಿತು. ಜತೆಗೆ ದೊಡ್ಡ ನಗರ ಪ್ರದೇಶಗಳಲ್ಲಿ ಕಡಿಮೆ ಉಪಕರಣಗಳನ್ನು ಅಳವಡಿಸಿ ಸ್ಪಷ್ಟ ಅಂಕಿ ಅಂಶ ಪಡೆಯಲು ಸಾಧ್ಯವಾಗದು. ಹೀಗಾಗಿ ಅಗತ್ಯ ಪ್ರಮಾಣದಲ್ಲಿ ಮೀಟರ್ ಅಳವಡಿಸಬೇಕಿದೆ ಎಂದಿತು.