ಭಾರತ-ಯುಎಇ ವಿಮಾನಯಾನ ಸ್ಥಗಿತ ಜೂನ್ 14ರವರೆಗೆ ವಿಸ್ತರಣೆ

ದುಬೈ: ಭಾರತದಿಂದ ಯುಎಇಗೆ ಪ್ರಯಾಣಿಕರ ವಿಮಾನಗಳ ಸ್ಥಗಿತವನ್ನು ಜೂನ್ 14 ರವರೆಗೆ ಎಮಿರೇಟ್ಸ್ ವಿಸ್ತರಿಸಿದೆ ಎಂದು ವಿಮಾನಯಾನ ಸಂಸ್ಥೆ ರವಿವಾರ ಪ್ರಕಟಿಸಿದೆ.

ಕಳೆದ 14 ದಿನಗಳಲ್ಲಿ ಭಾರತದ ಮೂಲಕ ಹೊರಟ ಪ್ರಯಾಣಿಕರನ್ನು ಬೇರೆ ಯಾವುದೇ ಸ್ಥಳದಿಂದ ಯುಎಇಗೆ ಪ್ರಯಾಣಿಸಲು ಅವಕಾಶ ನೀಡುವುದಿಲ್ಲ ಎಂದು ಎಮಿರೇಟ್ಸ್ ತಿಳಿಸಿದೆ.

ಪರಿಷ್ಕೃತ ಪ್ರಕಟಿತ ಕೋವಿಡ್ -19 ಮಾರ್ಗಸೂಚಿಗಳನ್ನು‌ ಅನುಸರಿಸುವ ಯುಎಇ ಪ್ರಜೆಗಳು, ಯುಎಇ ಗೋಲ್ಡನ್ ವೀಸಾಗಳನ್ನು ಹೊಂದಿರುವವರು ಮತ್ತು ರಾಜತಾಂತ್ರಿಕ ಕಾರ್ಯಾಚರಣೆಗಳ ಸದಸ್ಯರ ಪ್ರಯಾಣಕ್ಕೆ ವಿನಾಯಿತಿ ನೀಡಲಾಗುವುದು ಎಂದು ವಿಮಾನಯಾನ ಸಂಸ್ಥೆ ತಿಳಿಸಿದೆ.

ಯುಎಇಯ ರಾಷ್ಟ್ರೀಯ ತುರ್ತು ಬಿಕ್ಕಟ್ಟು ಮತ್ತು ವಿಪತ್ತು ನಿರ್ವಹಣಾ ಪ್ರಾಧಿಕಾರ (ಎನ್‌ಸಿಇಎಂಎ) ಭಾರತದಿಂದ ಯುಎಇಗೆ ಪ್ರಯಾಣಿಕರ ಪ್ರವೇಶವನ್ನು ಅಮಾನತುಗೊಳಿಸುವುದನ್ನು ಮುಂದಿನ ಸೂಚನೆ ನೀಡುವವರೆಗೆ ವಿಸ್ತರಿಸಿದೆ.  ಇದು ಎ. 25 ರಿಂದ ಜಾರಿಗೆ ಬಂದಿತ್ತು.