ಮಗು ಜೊತೆಯಲ್ಲಿರುವಂತೆಯೇ ವ್ಯಕ್ತಿಗೆ ಲಾಠಿಯಿಂದ ನಿರ್ದಯವಾಗಿ ಥಳಿಸಿದ ಪೊಲೀಸರು: ಸಿಬ್ಬಂದಿ ಅಮಾನತು

ಲಕ್ನೋ: ಕೈಯ್ಯಲ್ಲಿ ಮಗುವನ್ನು ಹಿಡಿದುಕೊಂಡಿದ್ದ ವ್ಯಕ್ತಿಯೊಬ್ಬನಿಗೆ ಪೊಲೀಸ್ ಸಿಬ್ಬಂದಿಯೊಬ್ಬರು ನಿರ್ದಯವಾಗಿ ಲಾಠಿಯೇಟು ನೀಡುತ್ತಿರುವ ದೃಶ್ಯದ ವೀಡಿಯೋವೊಂದು ದೇಶಾದ್ಯಂತ ಆಕ್ರೋಶ ಮೂಡಿಸಿದೆ. ಈ ಘಟನೆ ಉತ್ತರ ಪ್ರದೇಶದ ಕಾನ್ಪುರ್ ನ ದೇಹತ್ ಎಂಬಲ್ಲಿ ಗುರುವಾರ ನಡೆದಿದೆ. ಈ ವೀಡಿಯೋದಲ್ಲಿ ಅಮಾನವೀಯವಾಗಿ ವರ್ತಿಸಿದ್ದ ಪೊಲಿಸ್ ಸಿಬ್ಬಂದಿಯನ್ನು ಅಮಾನತುಗೊಳಿಸಲಾಗಿದೆ.

ಸುಮಾರು ಒಂದು ನಿಮಿಷ ಅವಧಿಯ ಈ ವೀಡಿಯೋದಲ್ಲಿ ಸ್ಥಳೀಯ ಠಾಣೆಯ ಇನ್‍ಸ್ಪೆಕ್ಟರ್ ಮೊದಲು ಆ ವ್ಯಕ್ತಿಗೆ ಕೋಲಿನಿಂದ ಬಾರಿಸಿದ್ದಾರೆ. ನಂತರ ಇನ್ನೊಬ್ಬ ಪೊಲೀಸ್ ಸಿಬ್ಬಂದಿ ಆ ವ್ಯಕ್ತಿಯ ಕೈಯ್ಯಲ್ಲಿದ್ದ ಅಳುತ್ತಿರುವ ಮಗುವನ್ನು ಸೆಳೆಯಲು ಯತ್ನಿಸುವುದು ಕಾಣಿಸುತ್ತದೆ.

ದೇಹತ್‍ನ ಅಕ್ಬರ್‌ ಪುರ್ ಎಂಬಲ್ಲಿನ ಜಿಲ್ಲಾ ಆಸ್ಪತ್ರೆಯ ಸಮೀಪ ಈ ಘಟನೆ ನಡೆದಿದ್ದು ಆ ವ್ಯಕ್ತಿ ಮಗುವಿಗೆ ಏನೂ ಮಾಡಬೇಡಿ ಎಂದು ಅಂಗಲಾಚುತ್ತಿರುವುದು ಕೇಳಿಸುತ್ತದೆ. ಪೊಲೀಸರು ಬಲವಂತವಾಗಿ ಮಗುವನ್ನು ಸೆಳೆದಾಗ "ಮಗುವಿಗೆ ತಾಯಿ ಕೂಡ ಇಲ್ಲ" ಎಂದು ಆ ವ್ಯಕ್ತಿ ಹೇಳುತ್ತಾನೆ.

ಆದರೆ ಘಟನೆ ಕುರಿತು ಪ್ರತಿಕ್ರಿಯಿಸಿದ ಹಿರಿಯ ಪೊಲೀಸ್ ಅಧಿಕಾರಿಗಳು ಆ ವ್ಯಕ್ತಿಯ ವಿರುದ್ಧ ಸ್ವಲ್ಪ ಬಲಪ್ರಯೋಗ ನಡೆಸಲಾಗಿದೆ ಹಾಗೂ ಮಗುವನ್ನು ರಕ್ಷಿಸಲು ಪೊಲೀಸರು ಯತ್ನಿಸಿದ್ದಾರೆ ಎಂಬ ಸಬೂಬು ನೀಡಿದ್ದಾರೆ.

"ಕೆಲ ಜನರುಅರಾಜಕತೆ ಸೃಷ್ಟಿಸಲು ಯತ್ನಿಸಿ ಆಸ್ಪತ್ರೆಯ ಒಪಿಡಿ ಅನ್ನು ಮುಚ್ಚಿಸಲು ಹಾಗೂ ರೋಗಿಗಳಿಗೆ ಭೀತಿ ಹುಟ್ಟಿಸಲು ಯತ್ನಿಸಿದ್ದಾರೆ. ಆ ವ್ಯಕ್ತಿಯ ಸಹೋದರ ಈ ಆಸ್ಪತ್ರೆಯ ಉದ್ಯೋಗಿಯಾಗಿದ್ದು ಸದಾ ಉಪಟಳ ನಡೆಸುತ್ತಿದ್ದ ಹಾಗೂ ಪೊಲೀಸ್ ಇನ್‍ಸ್ಪೆಕ್ಟರ್ ಒಬ್ಬರ ಬೆರಳಿಗೆ ಕಚ್ಚಿದ್ದಾನೆ," ಎಂದು ಕಾನ್ಪುರ್ ದೇಹತ್‍ನ ಎಎಸ್‍ಪಿ ಘನಶ್ಯಾಮ್ ಚೌರಾಸಿಯಾ ಹೇಳಿದ್ದಾರೆ.

ನಂತರ ಪೊಲೀಸ್ ಇಲಾಖೆ ಸಂಬಂಧಿತ ಪೊಲೀಸ್ ಸಿಬ್ಬಂದಿಯನ್ನು ಅಮಾನತುಗೊಳಿಸಿದೆ.

कल्पना कीजिये ये किस प्रदेश की
'उत्तम' तस्वीर हो सकती है..? pic.twitter.com/GmfdoeKk9Y

— Srinivas BV (@srinivasiyc) December 9, 2021