ದೋಷಪೂರಿತ ನೀರಿನ ಮೀಟರ್ ಸರಿಪಡಿಸದ ಹಿನ್ನೆಲೆ; ಬೆಂಗಳೂರಿನ ಜಲಮಂಡಳಿಗೆ 55 ಸಾವಿರ ರೂ.ದಂಡ

ಬೆಂಗಳೂರು, ಸೆ.5: ದೋಷದಿಂದ ಕೂಡಿರುವ ನೀರಿನ ಮೀಟರ್ ಅನ್ನು ಸರಿಪಡಿಸದೇ, ಒಳಚರಂಡಿ ಸಂಪರ್ಕವನ್ನು ಕಡಿತ ಮಾಡುವುದಾಗಿ ಮಹಿಳೆಯೊಬ್ಬರಿಗೆ ಬೆದರಿಕೆ ಹಾಕಿದ್ದ ಆರೋಪದ ಹಿನ್ನೆಲೆಯಲ್ಲಿ ಬೆಂಗಳೂರು ಜಲಮಂಡಳಿಗೆ ಗ್ರಾಹಕರ ಹಕ್ಕುಗಳ ನ್ಯಾಯಾಲಯ 50 ಸಾವಿರ ರೂ. ದಂಡ ವಿಧಿಸಿ ಆದೇಶಿಸಿದೆ.

ಮಹಿಳಾ ಗ್ರಾಹಕರು ನೀರಿನ ಸಂಪರ್ಕವನ್ನು ಪುನರ್ ಸ್ಥಾಪಿಸುವುದಕ್ಕಾಗಿ ನ್ಯಾಯಾಂಗ ಹೋರಾಟ ನಡೆಸಿದ್ದು, ಈ ಹಿನ್ನೆಲೆಯಲ್ಲಿ ಐದು ಸಾವಿರ ರೂಪಾಯಿ ಪರಿಹಾರವನ್ನು ನೀಡುವಂತೆ ಜಲಮಂಡಳಿಗೆ ಬೆಂಗಳೂರು ನಗರ 2ನೆ ಹೆಚ್ಚುವರಿ ಗ್ರಾಹಕರ ಹಕ್ಕುಗಳ ವೇದಿಕೆಯ ಅಧ್ಯಕ್ಷೆ ಎಂ.ಶೋಭಾ ಅವರ ನೇತೃತ್ವದ ತ್ರಿಸದಸ್ಯ ಪೀಠ ಈ ಆದೇಶ ನೀಡಿದೆ.

ದಂಡದ ಮೊತ್ತವನ್ನು ಆದೇಶ ಪ್ರತಿ ಸಿಕ್ಕ 30 ದಿನದಲ್ಲಿ ದೂರುದಾರರಿಗೆ ಪಾವತಿಸಲು ಸೂಚಿಸಿದೆ. ಅರಮನೆ ಗುಟ್ಟಹಳ್ಳಿಯ ನಿವಾಸಿಯಾದ ಬಿ. ಸದಾಶಿವಮ್ಮ(53) ಎಂಬುವರು ಜಲ ಮಂಡಳಿಯಿಂದ ನೀರಿನ ಸಂಪರ್ಕವನ್ನು ಪಡೆದುಕೊಂಡಿದ್ದರು. ಮೊದಲು ಪ್ರತಿ ತಿಂಗಳು ಕೇವಲ 100- 200 ರೂಪಾಯಿ ಬರುತ್ತಿದ್ದ ಬಿಲ್, ಏಕಾಏಕಿ 2 ಸಾವಿರದಿಂದ 3 ಸಾವಿರ ರೂಪಾಯಿ ಬರುತ್ತಿತ್ತು.

ಈ ಸಂಬಂಧ ಜಲಮಂಡಳಿಗೆ ಸದಾಶಿವಮ್ಮ ಅವರು 2018 ರಲ್ಲಿಯೇ ದೂರು ನೀಡಿ ಮೀಟರ್ ಸರಿಪಡಿಸುವಂತೆ ಕೋರಿದ್ದರು. ಜಲಮಂಡಳಿ ಅಧಿಕಾರಿಗಳು ಮನೆಗೆ ನೀರಿನ ಸಂಪರ್ಕವನ್ನು ಕಡಿತ ಮಾಡಿದ್ದಾರೆ. ಆದರೆ, ದೋಷಪೂರಿತ ನೀರಿನ ಮೀಟರ್ ಸರಿಪಡಿಸಲು ನಿರಾಕರಿಸಿದ್ದಾರೆ. ನೀರನ್ನು ಯಾವುದೇ ವಾಣಿಜ್ಯ ಉದ್ದೇಶಗಳಿಗೆ ಬಳಸದೆ ಕೇವಲ ಗೃಹ ಬಳಕೆಗೆ ಮಾತ್ರ ಉಪಯೋಗಿಸಲಾಗುತ್ತಿದೆ. ನೀರು ಸ್ಥಗಿತವಾಗಿ ತೀವ್ರ ತೊಂದರೆಯಾಗಿದೆ. ಹೀಗಾಗಿ, ನೀರಿನ ಸಂಪರ್ಕವನ್ನು ಪುನರ್ ಕಲ್ಪಿಸಿ, ಹೊಸ ಮೀಟರ್ ಅಳವಡಿಸಬೇಕು ಎಂದು ದೂರುದಾರ ಮಹಿಳೆ ಮತ್ತೊಂದು ಮನವಿ ಸಲ್ಲಿಸಿದ್ದರು. ಆದರೆ, ಜಲಮಂಡಳಿ ಅಧಿಕಾರಿಗಳು ಮಾತ್ರ ಈ ಬಗ್ಗೆ ಗಮನ ಹರಿಸಿರಲಿಲ್ಲ. ಈ ಹಿನ್ನೆಲೆಯಲ್ಲಿ ಗ್ರಾಹಕರ ಹಕ್ಕುಗಳ ಕೋರ್ಟ್‍ನ ಮೆಟ್ಟಿಲೇರಿದ್ದರು.