ವಾರ್ತಾಭಾರತಿ ಹೆಸರಲ್ಲಿ ನಕಲಿ ವೆಬ್ ಸೈಟ್ ಸೃಷ್ಟಿ, ಸುಳ್ಳು ಸುದ್ದಿ ಪ್ರಸಾರ: ಎಫ್ ಐ ಆರ್ ದಾಖಲು
ಮಂಗಳೂರು: ವಾರ್ತಾಭಾರತಿ ಹೆಸರಲ್ಲಿ ನಕಲಿ ವೆಬ್ ಸೈಟ್ ಸೃಷ್ಟಿಸಿ ಸುಳ್ಳು ಸುದ್ದಿ ಪ್ರಸಾರ ಮಾಡಿರುವ ಪ್ರಕರಣದಲ್ಲಿ ನಗರದ ಸೈಬರ್ ಠಾಣೆಯಲ್ಲಿ ಮಂಗಳವಾರ ಎಫ್ ಐ ಆರ್ ದಾಖಲಾಗಿದೆ.
ವಾರ್ತಾಭಾರತಿ ಮಾಧ್ಯಮ ಸಮೂಹದ ಕನ್ನಡ ವೆಬ್ ಸೈಟ್ varthabharati.in ಹೆಸರಲ್ಲಿ ಕಾರ್ಯಾಚರಿಸುತ್ತಿದೆ. ಇದೀಗ ವಾರ್ತಾಭಾರತಿ ವೆಬ್ ಸೈಟ್ ನ ವ್ಯಾಪಕ ಜನಪ್ರಿಯತೆ ಹಾಗು ವಿಶ್ವಾಸಾರ್ಹತೆಯನ್ನು ದುರುಪಯೋಗಪಡಿಸಿಕೊಂಡು ಹೆಸರಿನ ಸ್ಪೆಲ್ಲಿಂಗ್ ನಲ್ಲಿ ಅಲ್ಪ ಸ್ವಲ್ಪ ಬದಲಾವಣೆ ಮಾಡಿಕೊಂಡು ವೆಬ್ ಸೈಟ್ ನ ಹೆಸರು ವಾರ್ತಾಭಾರತಿ ವೆಬ್ ಸೈಟ್ ಎಂಬಂತೆಯೇ ಕಾಣುವ ಹಾಗೆ ನಕಲಿ ವೆಬ್ ಸೈಟ್ ಒಂದನ್ನು ದುಷ್ಕರ್ಮಿಗಳು ಸೃಷ್ಟಿಸಿರುವುದು ಸೋಮವಾರ ಸೆಪ್ಟೆಂಬರ್ 5, 2022 ರಂದು ತಿಳಿದು ಬಂದಿತ್ತು.
ಈ ಬಗ್ಗೆ ಮಂಗಳೂರು ಪೊಲೀಸ್ ಆಯುಕ್ತ ಶಶಿ ಕುಮಾರ್ ಅವರಿಗೆ ಸೋಮವಾರ ರಾತ್ರಿ ದೂರು ಸಲ್ಲಿಸಿತ್ತು. ಇದೀಗ ಆಯುಕ್ತರ ಸೂಚನೆ ಪ್ರಕಾರ ನಗರದ ಸೈಬರ್, ಆರ್ಥಿಕ ಹಾಗು ನಾರ್ಕೋಟಿಕ್ಸ್ ಅಪರಾಧಗಳ ಪೊಲೀಸ್ ಠಾಣೆಯಲ್ಲಿ ಎಫ್ ಐ ಆರ್ ದಾಖಲಿಸಿಕೊಂಡು ತನಿಖೆ ನಡೆಸಲಾಗುತ್ತಿದೆ.
ಇದನ್ನೂ ಓದಿ: ಓದುಗರೇ, ನಕಲಿ ವೆಬ್ ಸೈಟ್ ಬಗ್ಗೆ ಎಚ್ಚರ !