ಬೆಂಗಳೂರು | ಪ್ರಯಾಣಿಕರಿಂದು ದುಪ್ಪಟ್ಟು ದರ ವಸೂಲಿ ಆರೋಪ: 312 ಆಟೊಗಳು ಜಪ್ತಿ
Update: 2022-10-25 21:00 IST
ಬೆಂಗಳೂರು, ಅ.25: ದೀಪಾವಳಿ ಹಬ್ಬದ ಸಂದರ್ಭದಲ್ಲಿ ಪ್ರಯಾಣಿಕರಿಂದ ದುಪ್ಪಟ್ಟು ಪ್ರಯಾಣ ದರ ವಸೂಲಿ ಒಳಗೊಂಡತೆಸಂಚಾರ ನಿಯಮ ಉಲ್ಲಂಘನೆ ಮಾಡಿದ ಆರೋಪದಡಿ ನಗರ ಸಂಚಾರ ಪೊಲೀಸರು 312 ಆಟೊಗಳನ್ನು ಜಪ್ತಿ ಮಾಡಿದ್ದಾರೆ.
ನಿನ್ನೆ ನಗರದ 44 ಸಂಚಾರ ಠಾಣೆಗಳ ವ್ಯಾಪ್ತಿಯಲ್ಲಿ ದಿಢೀರ್ ಕಾರ್ಯಾಚರಣೆ ನಡೆಸಿದ ಪೊಲೀಸರು, ಆಟೊ ಚಾಲಕರಿಗೆ ಬಿಸಿ ಮುಟ್ಟಿಸಿದರು. ಪ್ರಯಾಣಿಕರಂತೆ ಮಫ್ತಿಯಲ್ಲಿ ಆಟೊ ಏರಿದ ಪೊಲೀಸರು, ದುಪ್ಪಟ್ಟು ದರ ವಸೂಲಿ ಮಾಡಿ ಸಾರ್ವಜನಿಕರನ್ನು ಶೋಷಿಸುತ್ತಿದ್ದ 312 ಚಾಲಕರ ಆಟೋಗಳನ್ನು ಜಪ್ತಿ ಮಾಡಿದರು.
ಅದೇ ರೀತಿ, ಪ್ರಯಾಣಿಕರು ಕರೆದ ಸ್ಥಳಕ್ಕೆ ಹೋಗಲು ನಿರಾಕರಿಸಿದ 270 ಚಾಲಕರ ವಾಹನಗಳನ್ನು ವಶಕ್ಕೆ ತೆಗೆದುಕೊಂಡರು. ಇತರೆ ಸಂಚಾರ ನಿಯಮ ಉಲ್ಲಂಘನೆ ಸಂಬಂಧ 532 ಪ್ರಕರಣ ದಾಖಲಿಸಿದರು. ಒಟ್ಟಾರೆ 1,114 ಮಂದಿ ಆಟೋ ಚಾಲಕರ ವಿರುದ್ಧ ಪ್ರಕರಣ ದಾಖಲಿಸಿ, ಪೊಲೀಸರು ದಂಡ ವಿಧಿಸಿದರು.