ಕೃಷಿ ಕಾಯ್ದೆಗಳ ರದ್ದತಿಗಾಗಿ ನಡೆದ ರೈತರ ಹೋರಾಟ ಬಿಜೆಪಿ ಸರ್ಕಾರವನ್ನೇ ಅಲುಗಾಡಿಸಿತು: ದರ್ಶನ್ ಪಾಲ್

ಬೆಂಗಳೂರು: ಎರಡು ವರ್ಷಗಳ ಹಿಂದೆ ದೆಹಲಿ ಒಳಗೊಂಡು, ದೆಹಲಿ ಗಡಿಭಾಗ ಮತ್ತು ಇತರೆ ರಾಜ್ಯಗಳಲ್ಲಿ ನಡೆಸಿದ ರೈತರ ಹೋರಾಟವು ಕೇಂದ್ರ ಸರಕಾರವನ್ನು ಅಲುಗಾಡಿಸಿದ ಹೋರಾಟ ಅದು. ರೈತ ವಿರೋಧಿಯಾಗಿದ್ದ ಮೂರು ಕೃಷಿಕಾಯ್ದೆಗಳನ್ನು ರದ್ದುಗೊಳಿಸಿದ ಹೋರಾಟ ಅದಾಗಿತ್ತು. ಈ ಹೋರಾಟ ರೈತರ ಒಗ್ಗಟ್ಟಿನ ಶಕ್ತಿಯನ್ನು ಪ್ರದರ್ಶಿಸಿತು. ಸಮರಶೀಲ ಹೋರಾಟದಿಂದ ಕೇಂದ್ರದ ಬಿಜೆಪಿ ಸರ್ಕಾರವನ್ನೇ ನಡುಗುವಂತೆ ಮಾಡಿತು ಎಂದು ದರ್ಶನ್ ಪಾಲ್ ಹೇಳಿದರು.

ಇಂದು (ಫೆಬ್ರವರಿ 16) ಸಂಯುಕ್ತ ಹೋರಾಟ ಕರ್ನಾಟಕ  ವತಿಯಿಂದ ಹಮ್ಮಿಕೊಂಡ ಸಮಸ್ತ ಜನ ಚಳುವಳಿಗಳ ಸಂಯುಕ್ತ ದನಿಯಾಗಿ ʻಜನಾಗ್ರಹ ಸಮಾವೇಶʼವನ್ನು ಉದ್ದೇಶಿಸಿ ರೈತ ಸಂಘಟನೆಯ ರಾಷ್ಟ್ರೀಯ ಹೋರಾಟಗಾರ, ಮುಖಂಡ ದರ್ಶನ್ ಪಾಲ್ ಮಾತನಾಡಿ, ಕೃಷಿ ಕಾಯ್ದೆಗಳ ರದ್ದತಿ ಆಗ್ರಹಿಸಿ ರೈತರು ನಡೆಸಿದ ಹೋರಾಟದಲ್ಲಿ 740 ಜನ ರೈತರು ಮರಣಹೊಂದಿದರು. ಹೋರಾಟವನ್ನು ಹತ್ತಿಕ್ಕಲು ಲಖಿಂಪುರಿ ಹಳ್ಳಿ ಸೇರಿದಂತೆ ಹಲವೆಡೆ ರೈತರ ಮೇಲೆ ಕಗ್ಗೊಲೆ ನಡೆಯಿತು. 2023 ಹಾಗೂ 2024 ನಮಗೆ ಮಹತ್ವದ ದಿನಗಳಾಗಿವೆ. ಚುನಾವಣೆಗಳಲ್ಲಿ ಸರಕಾರಗಳನ್ನು ಸೋಲಿಸಬೇಕು. ರೈತರಷ್ಟೆ ಅಲ್ಲದೆ ಎಲ್ಲರನ್ನು ಒಳಗೊಂಡ ಜನಪ್ರವಾಹದ ಹೋರಾಟ ರೂಪಗೊಳ್ಳಲಿದೆ ಎಂದು ಹೇಳಿದರು.

ಬಿಬಿಸಿ ಮೇಲೆ ದಾಳಿ ನಡೆದಿದೆ. ಮೋದಿ, ಷಾ, ಆದಾನಿಯವರನ್ನು ಪ್ರಶ್ನಿಸಿದರೆ ದೇಶದ್ರೋಹ ಎಂದೆನ್ನುತ್ತಾರೆ. ಅವರ ಬಗ್ಗೆ ಮಾತನಾಡಿದರೆ ಜೈಲಗಟ್ಟುತ್ತಾರೆ. ಇದು ಸರ್ವಾಧಿಕಾರಿ ಸರಕಾರವಾಗಿದೆ. ಹಾಗಾಗಿ ಈ ಸರಕಾರಗಳನ್ನು ಸೋಲಿಸಲು ಪಣ ತೊಡಬೇಕಿದೆ. ಅದಕ್ಕಾಗಿ ಬಲವಾದ ಜನಾಂದೋಲನ ನಡಯಬೇಕು  ಎಂದು ಕರೆ ನೀಡಿದರು.

ಕರ್ನಾಟಕ ಪ್ರಾಂತ ರೈತ ಸಂಘ(ಕೆ ಪಿ ಆರ್ ಎಸ್) ರಾಜ್ಯ ಅಧ್ಯಕ್ಷ ಜಿ.ಸಿ. ಬಯ್ಯಾರೆಡ್ಡಿ ಮಾತನಾಡಿ, ಸರಕಾರಗಳು ರೈತರ ಜೊತೆ ಚಲ್ಲಾಟವಾಡುತ್ತಿವೆ. ಜನರ ಸಂಕಷ್ಟಗಳಿಗೆ ಸ್ಪಂದಿಸದ ಸರಕಾರ ಜನರ ಪಾಲಿಗೆ ಇದ್ದೂ ಇಲ್ಲದಂತಾಗಿದೆ. ಜನರ ಬಾಳಿಗೆ ಕಂಟಕವಾಗಿದೆ. ಈ ಬಾರಿಯ ಚುನಾವಣೆಯಲ್ಲಿ ರೈತರು ಪ್ರಮುಖ ಪಾತ್ರ ವಹಿಸಲಿದ್ದಾರೆ. ಕಾರ್ಮಿಕರು, ವಿದ್ಯಾರ್ಥಿ, ಯುವಜನರು, ಮಹಿಳೆಯರು, ಕೂಲಿಕಾರರ ಜೊತೆಗೂಡಿ ಜನವಿರೋಧಿ ಸರಕಾರಗಳನ್ನು ಸೋಲಿಸಲಿದ್ದಾರೆ ಎಂದರು.

ಕರ್ನಾಟಕ ರಾಜ್ಯ ರೈತ ಸಂಘ(ಕೆ ಆರ್ ಆರ್ ಎಸ್)ದ ಅಧ್ಯಕ್ಷ ಬಡಗಲಪುರ ನಾಗೇಂದ್ರ ಜನಾಗ್ರಹ ಸಮಾವೇಶದ 12 ಹಕ್ಕೋತ್ತಾಯಗಳನ್ನು ಮಂಡಿಸಿದರು. ಕಾರ್ಯಕ್ರಮದಲ್ಲಿ ಎಚ್.ಆರ್. ಬಸವರಾಜಪ್ಪ, ನೂರ್ ಶ್ರೀಧರ್, ದೇವಿ, ಮಾವಳ್ಳಿ ಶಂಕರ್, ಜಿ.ಎನ್. ನಾಗರಾಜ್, ಡಾ. ಸಿದ್ದನಗೌಡ ಪಾಟೀಲ್, ಎಚ್.ಪಿ. ಶಿವಪ್ರಕಾಶ್, ಗುರುಪ್ರಸಾದ್ ಕೆರೆಗೋಡು, ಕುಮಾರ್ ಸಮತಳ, ಚಾಮರಸ ಮಾಲೀಪಾಟೀಲ್, ಡಿ.ಎಚ್ ಪೂಜಾರ್ ಸೇರಿದಂತೆ ವಿವಿಧ ಸಂಘಟನೆಗಳ ಮುಖಂಡರು, ರೈತ ಹೋರಾಟಗಾರರು ಭಾಗವಹಿಸಿದ್ದರು.