ಪೈಲಟ್ ಆಗುವ ಕನಸು ನನಸಾಗಿಸಿದ ಕ್ಯಾಪ್ಟನ್ ಹನಿಯಾ ಹನೀಫ್ ಬ್ಯಾರಿ

ಮಂಗಳೂರು, ಮೇ 16: ವಿಮಾನಯಾನ ಎಂದರೆ ಈಗಲೂ ಹಲವರ ಪಾಲಿಗೆ ದೊಡ್ಡ ಅಚ್ಚರಿ. ಅದರಲ್ಲೂ ವಿಮಾನ ಹಾರಿಸೋದು ಅಂದರೆ ಭಾರೀ ರೋಮಾಂಚನಕಾರಿ. ಪೈಲಟ್ ಆಗೋದು ಅಂದ್ರೆ ಸಾಮಾನ್ಯ ಮಾತಲ್ಲ. ಶೈಕ್ಷಣಿಕ ಅರ್ಹತೆ, ಕಠಿಣ ತರಬೇತಿ, ದೈಹಿಕ ಸಾಮರ್ಥ್ಯ ಎಷ್ಟು ಮುಖ್ಯವೋ, ಮಾನಸಿಕ ದೃಢತೆ ಅಷ್ಟೇ ಪ್ರಧಾನ. ಪೈಲಟ್ ಆಗುವುದೆಂದರೆ ಸಾಹಸದ ಕೆಲಸ. ಮಂಗಳೂರಿನ ಹನಿಯಾ ಹನೀಫ್ ಎಂಬ ಯುವತಿಯೊಬ್ಬರು ಅಂತಹದೊಂದು ಸಾಧನೆ ಮಾಡಿದ್ದಾರೆ. ಕಠಿಣ ಪರಿಶ್ರಮ, ನಿರಂತರ ಪ್ರಯತ್ನದ ಮೂಲಕ ಇದೀಗ ಕಮರ್ಷಿಯಲ್ ಪೈಲಟ್ ಲೈಸೆನ್ಸ್ ಪಡೆದಿರುವ ಹನಿಯಾ ಅಧಿಕೃತ ಪೈಲಟ್ ಆಗಿದ್ದಾರೆ. 

ಮೂಲತಃ ಕಾಪುನವರಾದ ಈಗ ಮಂಗಳೂರಿನ ಪಾಂಡೇಶ್ವರ ನಿವಾಸಿ ಮುಹಮ್ಮದ್ ಹನೀಫ್ ಹಾಗೂ ನಾಝಿಯಾ ದಂಪತಿಯ ನಾಲ್ವರು ಮಕ್ಕಳಲ್ಲಿ ಮೊದಲಿನವರು ಹನಿಯಾ. 

ಡಾಕ್ಟರ್, ಇಂಜಿನಿಯರ್ ಆಗಲು ಬಯಸುವವರೇ ಹೆಚ್ಚಿರುವ ನಮ್ಮ ನಡುವೆ, ಎಳವೆಯಿಂದಲೇ ಆಕಾಶದಲ್ಲಿ ಹಾರಾಡುವ ಕನಸು ಕಂಡು ಬೆಳೆದವರು ಹನಿಯಾ. ಬಾಲ್ಯದ ದಿನಗಳನ್ನು ದುಬೈನಲ್ಲಿ ಕಳೆದಿದ್ದರಿಂದ ಇವರು, 9ನೇ ತರಗತಿವರೆಗೂ ದುಬೈನ ‘ದಿ ಇಂಡಿಯನ್ ಹೈಸ್ಕೂಲ್’ನಲ್ಲಿ ಕಲಿತರು. ಆನಂತರ ಮಂಗಳೂರಿನ ಲೂರ್ಡ್ಸ್ ಸೆಂಟ್ರಲ್ ಸ್ಕೂಲ್‌ನಲ್ಲಿ ಹತ್ತನೇ ತರಗತಿ ಹಾಗೂ ಪಿಯು ಶಿಕ್ಷಣವನ್ನು ಮಹೇಶ್ ಪದವಿ ಪೂರ್ವ ಕಾಲೇಜಿನಲ್ಲಿ ಮುಗಿಸಿದರು. 

ಪಿಯು ಬಳಿಕ ಮೈಸೂರಿನ ಒರಿಯಂಟ್ ಫ್ಲೈಟ್ಸ್ ಏವಿಯೇಷನ್ ಅಕಾಡಮಿ ಯಲ್ಲಿ ಪೈಲಟ್ ತರಬೇತಿಗೆ ಸೇರಿ ಮೂರೂವರೆ ವರ್ಷ ತರಬೇತಿ ಪಡೆದು, ತನ್ನ 21ನೇ ವಯಸ್ಸಿನಲ್ಲಿ ಯಶಸ್ವಿಯಾಗಿ ಕಮರ್ಶಿಯಲ್ ಪೈಲಟ್ ಪರವಾನಿಗೆಯನ್ನು ಹನಿಯಾ ತನ್ನದಾಗಿಸಿಕೊಂಡಿದ್ದಾರೆ. ಒಟ್ಟು 206 ತಾಸುಗಳ ಕಾಲ ವಿಮಾನ ಹಾರಾಟ ನಡೆಸಿದ ಬಳಿಕ ಫಸ್ಟ್ ಕ್ಯಾಪ್ಟನ್ ಆಗಿದ್ದಾರೆ.

ಕಲಿಕೆಯ ವೇಳೆ ತನಗೆ ಎದುರಾದ ಸವಾಲುಗಳನ್ನು ‘ವಾರ್ತಾಭಾರತಿ’ ಜೊತೆ ನೆನಪಿಸಿಕೊಂಡ ಹನಿಯಾ, ಕೋವಿಡ್ ಸಂದರ್ಭದಲ್ಲಿ ಪ್ರಾಯೋಗಿಕ ಕಲಿಕೆಗೆ ಆದಂತಹ ತೊಡಕುಗಳು, ಆ ಬಳಿಕ ಪ್ರವಾಹ ಮತ್ತು ಹವಾಮಾನ ವೈಪರೀತ್ಯದಿಂದಾಗಿ ಕಲಿಕೆಗೆ ಅಡ್ಡಿಯಾದ ಸಂದರ್ಭಗಳನ್ನು ಸ್ಮರಿಸಿದರು.

‘ಸಣ್ಣ ವಯಸ್ಸಿನಲ್ಲೇ ನಾನು ಪೈಲಟ್ ಆಗುತ್ತೇನೆ ಎಂದು ಹೇಳುತ್ತಿದ್ದಳು. ಅದಕ್ಕೆ ನನ್ನ ಪತಿ ಬೆನ್ನೆಲುಬಾಗಿ ನಿಂತರು. ಮಗಳ ಆಸೆಯಂತೆ ಓದಿಸುತ್ತೇನೆ ಎಂದು ಅವಳ ಕಲಿಕೆಗೆ ಹೆಚ್ಚು ಪ್ರೋತ್ಸಾಹ ನೀಡಿದರು’ ಎನ್ನುತ್ತಾರೆ ಹನಿಯಾ ತಾಯಿ ನಾಝಿಯಾ.

ಪೈಲಟ್ ಶಿಕ್ಷಣಕ್ಕೆ ಹೊರತಾಗಿ ದಿನಪತ್ರಿಕೆ ಹಾಗೂ ಕಾದಂಬರಿಗಳನ್ನು ಓದುವುದು, ಸಮಕಾಲೀನ ವಿಷಯಗಳು, ಚಿತ್ರಕಲೆ ಹನಿಯಾರ ಇಷ್ಟದ ವಿಷಯಗಳು. ಅವರ ಈ ಎಲ್ಲಾ ಸಾಧನೆಯ ಹಿಂದೆ ಅವರ ಹಾಗೂ ಪೋಷಕರ ಅವಿರತ ಶ್ರಮವಿದೆ. ವಿಮಾನಯಾನ ಸಂಸ್ಥೆಯಲ್ಲೇ ಉದ್ಯೋಗದ ನಿರೀಕ್ಷೆಯಲ್ಲಿರುವ ಅವರು, ಬೋಯಿಂಗ್, ಏರ್ಬಸ್ ಹಾರಾಟದ ಪರವಾನಿಗೆಗಾಗಿ ವಿಶೇಷ ತರಬೇತಿ ಪಡೆಯಲಿದ್ದಾರೆ.

ಇವರ ಈ ಸಾಧನೆಯನ್ನು ಗುರುತಿಸಿ ಬ್ಯಾರಿ ಸಾಹಿತ್ಯ ಅಕಾಡಮಿ, ಬ್ಯಾರಿ ನಿಖಾ ಹೆಲ್ಪ್‌ಲೈನ್, ಟ್ಯಾಲೆಂಟ್ ರಿಸರ್ಚ್ ಫೌಂಡೇಶನ್ ಹಾಗೂ ಇನ್ನಿತರ ಹಲವು ಸಂಘ ಸಂಸ್ಥೆಗಳು ಅಭಿನಂದಿಸಿವೆ.

ಜೀವನದಲ್ಲಿ ಪೈಲಟ್ ಆಗಬೇಕು ಅನ್ನುವುದು ನನ್ನ ಕನಸಾಗಿತ್ತು. ನನ್ನ ತಂದೆಯವರಿಗೂ ಅದೇ ಬಯಕೆಯಿತ್ತು. ಪೈಲೆಟ್ ತರಬೇತಿ ಅನ್ನುವುದು ಎಲ್ಲರಿಗೂ ಮಾಡಬಹುದಾದ ವೃತ್ತಿ ಅಲ್ಲ, ಅದರಲ್ಲೂ ಮಹಿಳೆಯರಿಗಂತೂ ಈ ರಂಗದಲ್ಲಿ ಪ್ರೋತ್ಸಾಹ ನೀಡಲು ಪೋಷಕರು ಬಹಳ ಹಿಂಜರಿಯುತ್ತಾರೆ. ಆದರೆ ನನಗೆ ನನ್ನ ಪೋಷಕರಿಂದ ಸಿಕ್ಕಿದ ಬೆಂಬಲ ಹಾಗೂ ಪ್ರೋತ್ಸಾಹ ನನ್ನನ್ನು ಇಲ್ಲಿಯವರೆಗೆ ತಲುಪುವಂತೆ ಮಾಡಿದೆ. ನನ್ನ ಅಜ್ಜಂದಿರಾದ ಕೆ.ಎಂ.ಕೋಡಿ ಅಬ್ದುಲ್ ರಹ್ಮಾನ್ ಬ್ಯಾರಿ, ಕಾಪು ಉಸ್ಮಾನ್ ಬ್ಯಾರಿ, ಕರ್ನಿರೆ ಸೋದರರು, ಡಾ.ಕಾಪು ಮುಹಮ್ಮದ್, ಸೈಯದ್ ಮುಹಮ್ಮದ್ ಬ್ಯಾರಿ ಸೋದರರು ನನ್ನ ಬೆಂಬಲಕ್ಕೆ ನಿಂತು ತುಂಬು ಪ್ರೋತ್ಸಾಹ ನೀಡಿದ್ದಾರೆ. ಯುವಜನರು ಅದರಲ್ಲೂ ವಿಶೇಷವಾಗಿ ವಿದ್ಯಾರ್ಥಿನಿಯರು ಈ ಕ್ಷೇತ್ರಕ್ಕೆ ಹೆಚ್ಚಾಗಿ ಬರಬೇಕು, ಅದಕ್ಕೆ ಎಲ್ಲಾ ಪೋಷಕರು ಪ್ರೋತ್ಸಾಹ, ಸಹಕಾರ ನೀಡಬೇಕು.

ಹನಿಯಾ ಹನೀಫ್
 

ಮಗಳ ಕಲಿಕೆಗೆ ಬೇಕಾದ ಎಲ್ಲಾ ಅನುಕೂಲತೆಗಳನ್ನು ಒದಗಿಸಿದ್ದೇವೆ. ಪಿಯುಸಿ ಕಲಿಯುತ್ತಿದ್ದಾಗಲೇ ತನ್ನ ಆಸಕ್ತಿಯಿಂದಲೇ ಪೈಲಟ್ ತರಬೇತಿಗೆ ಸೇರಲು ಬೇಕಾದ ಪೂರ್ವ ಸಿದ್ಧತೆಗಳನ್ನು ಮಾಡಿಕೊಂಡಿದ್ದಾಳೆ. ಪಿಯುಸಿ ನಂತರ ಪೈಲಟ್ ಕೋರ್ಸ್ ಸೇರಿಸದಿದ್ದರೆ ಶಿಕ್ಷಣ ಮುಂದುವರಿಸಲ್ಲ ಎಂದು ಹೇಳಿದ್ದಳು. ಹಾಗಾಗಿ ಅವಳ ಕನಸು ನನಸಾಗಲಿ ಎಂದು ಪೈಲಟ್ ತರಬೇತಿಗೆ ಸೇರಿಸಿದೆವು.

ಹನೀಫ್, ಹನಿಯಾರ ತಂದೆ