ಉತ್ತರಾಖಂಡದ ಗಡಿಯಲ್ಲಿ ಚೀನಾದಿಂದ ಸೇನಾ ಗ್ರಾಮಗಳ ನಿರ್ಮಾಣ: ಉಪಗ್ರಹ ಚಿತ್ರಗಳಿಂದ ಬಹಿರಂಗ

ಹೊಸದಿಲ್ಲಿ: ಸಿಕ್ಕಿಂ, ಲಡಾಖ್ ಹಾಗೂ ಅರುಣಾಚಲ ಪ್ರದೇಶದ ಗಡಿ ಭಾಗದ ಪ್ರದೇಶಗಳಲ್ಲಿ ಅತಿಕ್ರಮಣ ಪ್ರಯತ್ನಗಳನ್ನು ನಡೆಸಿದ ಬಳಿಕ ಚೀನಿ ಸೇನೆಯು ಈಗ ಉತ್ತರಾಖಂಡದ ಗಡಿಭಾಗದುದ್ದಕ್ಕೂ ತನ್ನ ಮಿಲಿಟರಿ ಮೂಲಸೌಕರ್ಯವನ್ನು ಬಲಪಡಿಸುವ ಬಗ್ಗೆ ಗಮನಹರಿಸಿದೆ ಹಾಗೂ ಅಲ್ಲಿ ತನ್ನ ಸೇನಾ ವಸತಿ ಸಂಕೀರ್ಣಗಳನ್ನು ನಿರ್ಮಿಸಿರುವುದಾಗಿ ‘ ದಿ ಇಂಡಿಯಾಟುಡೇ’ ಸುದ್ದಿಜಾಲತಾಣ ವರದಿ ಮಾಡಿದೆ. 

ಉತ್ತರಾಖಂಡದ ಗಡಿಗೆ ನೇರವಾಗಿರುವ ತನ್ನ ಭೂಪ್ರದೇಶದಲ್ಲಿ ಚೀನಾವು ಸೇನಾ ಗ್ರಾಮಗಳನ್ನು ನಿರ್ಮಿಸಿರುವುದು ಉಪಗ್ರಹ ಚಿತ್ರಗಳಿಂದ ದೃಢಪಟ್ಟಿದೆ ಎಂದು ಇಂಡಿಯಾ ಟುಡೇ ವರದಿ ತಿಳಿಸಿದೆ.

ಉತ್ತರಕಾಶಿಯಲ್ಲಿರುವ ಪುಲಾಂ ಸುಮ್ದಾದಿಂದ 40 ಕಿ.ಮೀ. ದೂರದಲ್ಲಿರುವ ಚೀನಾದ ಗಡಿಭಾಗದಲ್ಲಿ 2022ರ ಎಪ್ರಿಲ್ ಹಾಗೂ ಮೇ ತಿಂಗಳ ನಡುವೆ ಇಂತಹ ರಚನೆಗಳು ನಿರ್ಮಾಣವಾಗಿರುವುದು ಕಂಡುಬಂದಿದೆ. ಉತ್ತರಾಖಂಡದ ಬಾರಾಹೋಟಿ ಪಟ್ಟಣಕ್ಕೆ ಪೂರ್ವದಲ್ಲಿರುವ ಇನ್ನೊಂದು ಪ್ರಾಂತದಲ್ಲಿ ಚೀನಿಯರ ಚಟುವಟಿಕೆ ಹೆಚ್ಚಿರುವುದು ಕಂಡುಬಂದಿದೆ.ಎಂದು ವರದಿ ತಿಳಿಸಿದೆ.

ಉತ್ತರಖಂಡಕ್ಕೆ ತಾಗಿಕೊಂಡಿರುವ ಚೀನಾ ಗಡಿಯಲ್ಲಿ ಈವರೆಗೆ ಯಾವುದೇ ಸೇನಾ ಉದ್ವಿಗ್ನತೆ ವರದಿಯಾಗಿರಲಿಲ್ಲ. ಇದೀಗ ಆ ಪ್ರದೇಶದ ಗಡಿಭಾಗದಲ್ಲಿಯೂ ಚೀನಾ ತನ್ನ ಚಟುವಟಿಕೆಗಳನ್ನು ಹೆಚ್ಚಿಸಿರುವುದು ಗಮನಾರ್ಹವೆಂಬುದು ವರದಿ ತಿಳಿಸಿದೆ.

ಈ ಸೇನಾಗ್ರಾಮದಲ್ಲಿರುವ ಕಟ್ಟಡ, ನಿರ್ಮಾಣಗಳನ್ನು ಅತ್ಯಂತ ತ್ವರಿತ ಗತಿಯಲ್ಲಿ ನಿರ್ಮಿಸಲಾಗಿದೆಯೆಂಬುದು ಉಪಗ್ರಹಚಿತ್ರಗಳ ವಿಶ್ಲೇಷಣೆಯಿಂದ ತಿಳಿದುಬರುತ್ತದೆ. ಕೇವಲ ಒಂದೇ ತಿಂಗಳಲ್ಲಿ ಅಲ್ಲಿ 100ಕ್ಕೂ ಅಧಿಕ ರಚನೆಗಳನ್ನು ನಿರ್ಮಿಸಲಾಗಿದೆಯೆಂದು ವರದಿ ಹೇಳಿದೆ.

ಈ ಗಡಿ ಗ್ರಾಮಗಳಲ್ಲಿ ವಸತಿಸಂಕೀರ್ಣಗಳನ್ನು ಪ್ರಾಥಮಿಕವಾಗಿ ಸೇನಾ ಉದ್ದೇಶಕ್ಕಾಗಿಯೇ ನಿರ್ಮಿಸಲಾಗಿದೆಯೆಂಬುದು ಭಾರತೀಯ ಸೇನಾ ಮೂಲಗಳು ತಿಳಿಸಿವೆ. ಗಡಿಭಾಗದಲ್ಲಿ ಸೇನಾ ಪಡೆಗಳ ನಿಯೋಜನೆಯನ್ನು ಹೆಚ್ಚಿಸಿದಲ್ಲಿ ಅವುಗಳ ವಾಸ್ತವ್ಯಕ್ಕೆ ಅವಕಾಶ ನೀಡುವ ಸಾಮರ್ಥ್ಯವನ್ನು ಈ ವಸತಿ ಸಂಕೀರ್ಣಗಳು ಹೊಂದಿವೆ ಎಂದು ವರದಿ ತಿಳಿಸಿದೆ.

ತನ್ನ ಗಡಿಪ್ರದೇಶಗಳ ಸಮೀಪ ಮಾದರಿ ಸಂಯೋಜಿತ ಗ್ರಾಮಗಳನ್ನು ಸ್ಥಾಪಿಸುವ ಪರಿಪಾಠವನ್ನು ಚೀನಾದ ಪೀಪಲ್ಸ್ ಲೀಬರೇಶನ್ ಆರ್ಮಿ (ಪಿಎಲ್ಎ) ದೀರ್ಘಕಾಲದಿಂದ ಅನುಸರಿಸುತ್ತಾ ಬಂದಿದೆ.

ವಿಶೇಷವಾಗಿ ಪೂರ್ವ ಲಡಾಖ್ ಹಾಗೂ ಸಿಕ್ಕಿಂ ಹಾಗೂ ಅರುಣಾಚಲ ಪ್ರದೇಶಕ್ಕೆ ತಾಗಿಕೊಂಡಿರುವ ಗಡಿಭಾಗಗಳಲ್ಲಿಯೂ ಚೀನಾವು ಈ ಮೊದಲು ಸೇನಾ ಗ್ರಾಮಗಳನ್ನು ನಿರ್ಮಿಸಿದ್ದಾಗಿ ವರದಿಯು ಗಮನಸೆಳೆದಿದೆ.