ವಾಮಂಜೂರು: ಅಣಬೆ ತಯಾರಿಕಾ ಘಟಕ ಮುಚ್ಚಲು ಆಗ್ರಹ

ವಾಮಂಜೂರು, ಜೂ.8: ಇಲ್ಲಿನ ತಿರುವೈಲ್ ವಾರ್ಡ್ ನಲ್ಲಿ ಸ್ಥಾಪಿಸಲಾಗಿರುವ ವೈಟ್ ಗ್ರೋ ಅಗ್ರಿ ಎನ್ಎಲ್ ಪಿ ಮಶೂಮ್ ಫ್ಯಾಕ್ಟರಿಯನ್ನು ಮುಚ್ಚಬೇಕೆಂದು ಆಗ್ರಹಿಸಿ ತಿರುವೈಲು ಗ್ರಾಮದ  200ಕ್ಕೂ ಹೆಚ್ಚಿನ ಕುಟುಂಬಗಳು ಅನಿರ್ದಿಷ್ಟ ಅವಧಿ ಮುಷ್ಕರವನ್ನು ಆರಂಭಿಸಿದ್ದಾರೆ.

ವಾಮಂಜೂರಿನಿಂದ ಅಣಬೆ ಫ್ಯಾಕ್ಟರಿಗೆ ಹೋಗುವ ದಾರಿಯಲ್ಲಿ ಟೆಂಟ್ ಹಾಕಿ ಗ್ರಾಮಸ್ಥರು ಧರಣಿ ಆರಂಭಿಸಿ ದ್ದಾರೆ. ಈ ವೇಳೆ ಸ್ಥಳೀಯ ಅಂಗಡಿ - ಮುಂಗಟ್ಟುಗಳ ಮಾಲಕರು ಸ್ವಯಂ ಪ್ರೇರಿತರಾಗಿ ಅಂಗಡಿಗಳನ್ನು ಮುಚ್ಚಿ ಧರಣಿಗೆ ಸಾತ್ ನೀಡಿದರೆ ಆಟೋ ಚಾಲಕರು ಸಂಚಾರವನ್ನು ಸ್ಥಗಿತಗೊಳಿಸಿ ಪ್ರತಿಭಟನೆಗೆ ಬೆಂಬಲ ನೀಡಿದರು.

ಧರಣಿ ನಿರತ ಸ್ಥಳಕ್ಕೆ ಬಂದ ಪೊಲೀಸರು ಧರಣಿ ನಿರತರನ್ನು ಮನವರಿಸಲು ಯತ್ನಿಸಿದರು. ಆದರೆ, ಯಾವುದಕ್ಕೂ ಬಗ್ಗದ ಪ್ರತಿಭಟನಾಕಾರರು ಜಿಲ್ಲಾಧಿಕಾರಿ ಸ್ಥಳಕ್ಕೆ ಬರಬೇಕೆಂದು ಪಟ್ಟು ಹಿಡಿದರು. ಈ ವೇಳೆ ಮಾಧ್ಯಮಗಳ ಜೊತೆ ಮಾತನಾಡಿದ ಧರಣಿ ಮುಷ್ಕರ ನಿರತರು, ಕೊರೊನ ಸಂದರ್ಭ ಇಲ್ಲಿ ಚಾಕಲೇಟ್ ತಯಾರಿಕಾ ಘಟಕ ಸ್ಥಾಪಿಸಲಾಗಿತ್ತು. ಆ ಬಳಿಕ ಇಲ್ಲಿ ಅಣಬೆ ಬೆಳೆಯಲು ಆರಂಭಿಸಿದ್ದಾರೆ. ಇದರಿಂದ ಬರುವ ದುರ್ನಾತದಿಂದ ವಾಮಂಜೂರು ವ್ಯಾಪ್ತಿಯಲ್ಲಿ ವಾಸಮಾಡಲು ಸಾಧ್ಯವಾಗುತ್ತಿಲ್ಲ ಎಂದು ದೂರಿದ್ದಾರೆ.

ಈ ಅಣಬೆ ತಯಾರಿಕಾ ಘಟಕದಿಂದ ಬರುತ್ತಿರುವ ವಿಷಪೂರಿತ ಗಾಳಿಯಿಂದಾಗಿ ನಮಗೆ ಬದುಕಲು ಸಾಧ್ಯವಿಲ್ಲ. ನಮ್ಮ ದೈನಂದಿನ ಚಟುವಟಿಕೆಗಳನ್ನು ನಡೆಸಲು ಸಾಧ್ಯವಾಗುತ್ತಿಲ್ಲ. ಪ್ರತಿ ಮನೆಯ ಒಬ್ಬರಲ್ಲಿ ಅಸ್ತಮಾ, ದಮ್ಮು, ಕೆಮ್ಮು , ಚರ್ಮರೋಗದಂತಹ ಕಾಯಿಲೆಗಳು ಕಾಣಿಸಿಕೊಳ್ಳುತ್ತಿದೆ ಎಂದು ಪ್ರತಿಭಟನಾ‌ನಿತರು ದೂರಿದ್ದಾರೆ.

ಜನವಸತಿ ಪ್ರದೇಶದಿಂದ ಈ ಫ್ಯಾಕ್ಟರಿಯನ್ನು ತೆರವು ಮಾಡಿಸುವಂತೆ ಗ್ರಾಮಸ್ಥರು ಕಳೆದ ಒಂದು ವರ್ಷಗಳಿಂದ ನಿರಂತರ ಧರಣಿ ಪ್ರತಿಭಟನೆಗಳನ್ನು ಮಾಡುತ್ತಾ ಬಂದಿದ್ದರೂ, ಜಿಲ್ಲಾಡಳಿತ ಅಥವಾ ಜನಪ್ರತಿನಿಧಿಗಳು ಜನರ ಸಮಸ್ಯೆ ಕುರಿತು ಕಿವಿ ಕೊಡುತ್ತಿಲ್ಲ ಎಂದು ಸಾರ್ವಜನಿಕರು ಅಸಮಾಧಾನ ವ್ಯಕ್ತಪಡಿಸಿದರು.

ಈ ಭಾಗದಲ್ಲಿ 200ಕ್ಕೂ ಹೆಚ್ಚು ಕುಟುಂಬಗಳು ವಾಸ ಮಾಡುತ್ತಿವೆ. ಅಣಬೆ ಘಟಕದಿಂದ ಹೊರಬರುವ ಮೀಥೆನ್ ಯುಕ್ತ ವಿಷ ಅನಿಲದಿಂದಾಗಿ ತೀವ್ರ ರೀತಿಯ ಆರೋಗ್ಯ ಸಮಸ್ಯೆಗಳು ಎದುರಾಗುತ್ತಿದ್ದು, ಅದರಲ್ಲೂ ಮಕ್ಕಳು ಮತ್ತು ವೃದ್ಧರು ಅನಾರೋಗ್ಯ ಪೀಡಿತರಾಗಿದ್ದಾರೆ ಎಂದು ದೂರಿದ್ದಾರೆ.

"ಪ್ರತಿಭಟನೆ ಮಾಡುವಾಗ ಸಂಸ್ಥೆಯವರು ಹೇಳುತ್ತಾರೆ, ಇದು ಈ ಘಟಕದಿಂದ ಬರುವ ದುರ್ನಾತಾಅಲ್ಲ. ತ್ಯಾಜ್ಯ ಸಂಸ್ಕರಣಾ ಘಟಕದಿಂದ ಬರುವ ದುರ್ವಾಸನೆ ಎಂದು ಸಮಜಾಯಿಷಿ ನಿಡುತ್ತಾರೆ. ಇಲ್ಲಿ ಹಂದಿ ಸಾಕಣೆಯನ್ನು ಮಾಡುತ್ತಾರೆ. ಅಧಿಕಾರಿಗಳು ಕೇವಲ ದಾಖಲೆ ಪತ್ರಗಳನ್ನು ಹಿಡಿದುಕೊಂಡು ಅವರ ಪರವಾಗಿ ವಾದಿಸುತ್ತಿದ್ದಾರೆ ಹೊರತು ಸ್ಥಳಕ್ಕೆ ಭೇಟಿ ನೀಡಿ ತಪಾಸಣೆ ಮಾಡಿ ಮಾತನಾಡುತ್ತಿಲ್ಲ".

- ಜಯಪ್ರಭಾ, ಸಾಮಾಜಿಕ ಕಾರ್ಯಕರ್ತೆ, ವಾಮಂಜೂರು

"ಮೂರು ವರ್ಷಗಳ ಹಿಂದೆ ಚಾಕಲೇಟ್ ಫ್ಯಾಕ್ಟರಿ ಎಂದು ಹೇಳಿಕೊಂಡು 1.92 ಎಕರೆ ನಿವೇಶನದಲ್ಲಿ ಈ ಫ್ಯಾಕ್ಟರಿ ಯನ್ನು ಆರಂಭಿಸಿದ್ದರು. ಈಗ ಅದನ್ನು 3ಎಕ್ರೆಗೆ ವಿಸ್ತರಿಸುತ್ತಿದ್ದಾರೆ. ಚುನಾವಣೆ ಬಂದಿದ್ದ ವೇಳೆ ಯಾರಿಗೂ ಇದರಿಂದ ವಾಸನೆ ಬರುತ್ತಿರಲಿಲ್ಲ. ಈಗ ಯಾಕೆ ಅದೆ ರೀತಿ ವಸಾನೆ ಬಾರದಂತೆ ಮಾಡಲು ಸಾಧ್ಯವಿಲ್ಲ. ಅವರಿಗೆ ಅಣಬೆ ಕೃಷಿ ಮಾಡಲೇಬೇಕೆಂದಿದ್ದರೆ ಬೇರೆಡೆ ಸ್ಥಳಾಂತರಿಸಿ ಮಾಡಲಿ".
- ಹೇಮಾ ರಾಘು ಸಾಲ್ಯಾನ್, ಮನಪಾ ಸದಸ್ಯೆ, ವಾಮಂಜೂರು