ಕೆಳ ಸಮುದಾಯಗಳು ಸಂಘಟಿತರಾಗಲು ಇದು ಸಕಾಲ : ಪ್ರೊ.ಎಸ್.ಜಿ.ಸಿದ್ದರಾಮಯ್ಯ

ಬೆಂಗಳೂರು: ಸಾಮಾಜಿಕ, ಆರ್ಥಿಕ ಸಮೀಕ್ಷಾ (ಜಾತಿಗಣತಿ) ವರದಿಯ ವಿರುದ್ಧ ಸಮಾಜದಲ್ಲಿ ಬೊಬ್ಬೆ ಎದ್ದಿರುವ ಈ ದಿನಗಳಲ್ಲಿ ಕೆಳ ಸಮುದಾಯದ ಜನರು ಹೆಚ್ಚು ಸಂಘಟಿತರಾಗುವ ಅಗತ್ಯ ಇದ್ದು, ಎಲ್ಲರೂ ಒಂದುಗೂಡಲು ಇದು ಸಕಾಲ ಎಂದು ಸಂಸ್ಕೃತಿ ಚಿಂತಕ ಪ್ರೊ.ಎಸ್. ಜಿ.ಸಿದ್ದರಾಮಯ್ಯ ಅವರು ಇಂದಿಲ್ಲಿ ಸಲಹೆ ನೀಡಿದ್ದಾರೆ.

ಶುಕ್ರವಾರ ನಗರದ ಸಂಸ ಬಯಲು ರಂಗಮಂದಿರದಲ್ಲಿ ‘ಅಂಕ ಸಂಸ್ಥೆ’ ಮತ್ತು ಚಿರಂತ ಟ್ರಸ್ಟ್ ಸಂಯುಕ್ತಾಶ್ರಯದಲ್ಲಿ ಹಮ್ಮಿಕೊಂಡಿದ್ದ ‘ಅಂಬೇಡ್ಕರ್ ಹಾಡಿನ ಹಣತೆ ಹಾಗೂ ಅಂಕ ಚಿರಂತ’, ಅಂಬೇಡ್ಕರ್ ಪ್ರಶಸ್ತಿ ಪ್ರದಾನ ಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡಿದ ಅವರು, ಶೋಷಿತ, ದಮನಿತ ಸಮುದಾಯಗಳು ಹಿಂದಿಗಿಂತಲೂ ಇಂದು ಹೆಚ್ಚು ಸಂಘಟಿತರಾಗುವ ಅಗತ್ಯವಿದೆ ಎಂದು ಅಭಿಪ್ರಾಯಪಟ್ಟರು.

ಸಾಮಾಜಿಕ, ಆರ್ಥಿಕ ಸಮೀಕ್ಷಾ ವರದಿಯ ಬಗ್ಗೆ ಮೇಲ್ಜಾತಿಯವರ ನಡವಳಿಕೆ ಜಾತಿಯ ಅಹಂಕಾರದ ಪ್ರತೀಕವಾಗಿದೆ. ಇದನ್ನು ತಳ ಸಮುದಾಯದವರು ಅರ್ಥ ಮಾಡಿಕೊಳ್ಳಬೇಕು ಎಂದ ಅವರು, ಸಂವಿಧಾನ ಶಿಲ್ಪಿ ಡಾ.ಅಂಬೇಡ್ಕರ್ ಅವರ ತತ್ವಗಳು ಬಹುತ್ವ ಭಾರತದ ಪ್ರತೀಕ. ಇಂದು ಆ ಬಹುತ್ವವನ್ನು ಉಳಿಸಿಕೊಳ್ಳುವ ಮೂಲಕ ಬಹು ಸಂಸ್ಕೃತಿ, ಬಹುಧರ್ಮದ ಭಾರತವನ್ನು ಗೌರವಿಸಬೇಕಿದೆ ಎಂದು ಹೇಳಿದರು.

ಲಲಿತ ಕಲಾ ಅಕಾಡೆಮಿಯ ಮಾಜಿ ಅಧ್ಯಕ್ಷ ಎಂ.ಎಸ್.ಮೂರ್ತಿ, ‘ದಲಿತರ ಏಳ್ಗೆಯಲ್ಲಿ ದಲಿತೇತರ ಪಾತ್ರ ಕುರಿತು ಉಪನ್ಯಾಸ ನೀಡಿ, ಜನಪದ ಸಂಸ್ಕೃತಿ ಈಗಿನ ಅಕ್ಷರ ಸಂಸ್ಕೃತಿಗಿಂತ ಮಿಗಿಲು. ಅಕ್ಷರ ಸಂಸ್ಕೃತಿ ಸಮಾಜವನ್ನು ಸಂಕುಚಿತ ಭಾವವನ್ನು ಹೆಚ್ಚಿಸುತ್ತಿದೆ. ಜನಪದ ಸಂಸ್ಕೃತಿ ಎಲ್ಲರನ್ನೂ ಒಳಗೊಳ್ಳುತಿತ್ತು. ನಾವಿಂದು ಆ ಸಂಸ್ಕೃತಿಯತ್ತ  ಮರಳಬೇಕಿದೆ ಎಂದು ಹೇಳಿದರು.

ಅಧ್ಯಕ್ಷತೆ ವಹಿಸಿದ್ದ ಜಾನಪದ ಅಕಾಡೆಮಿಯ ಅಧ್ಯಕ್ಷ ಗೊಲ್ಲಹಳ್ಳಿ ಶಿವಪ್ರಸಾದ್ ಮಾತನಾಡಿ, ಜಾತಿ ಅನ್ನೋದು ಶುದ್ಧ ಸುಳ್ಳು. ಜಾತಿ ಪರಂಪರೆಯಿಂದ ಬಂದಿದ್ದಲ್ಲ ನಾವೇ ಸೃಷ್ಟಿಸಿಕೊಂಡಿದ್ದು. ಅದನ್ನು ತಿರಸ್ಕರಿಸಿ ನಾವು ಮನುಷ್ಯರಾಗಬೇಕು. ಸಮಾಜವನ್ನು ಒಡೆಯುವವರ ನಡುವೆ ನಾವು ಪದ, ಹಾಡು, ಸಾಹಿತ್ಯದ ಮೂಲಕ ಸಮಾಜವನ್ನು ಕಟ್ಟುವತ್ತ ಆದ್ಯ ಗಮನ ನೀಡಬೇಕು ಎಂದರು.

ಈ ಸಂದರ್ಭದಲ್ಲಿ ಪತ್ರಕರ್ತ ರಾಜು ಮಳವಳ್ಳಿ, ಡಿಂಗ್ರಿ ನರಸಪ್ಪ, ಸಿ.ಕೆ.ಗುಂಡಣ್ಣ, ಕೆಂಪಮ್ಮ ಕಾರ್ಕಹಳ್ಳಿ, ಬಂಡ್ಲಳ್ಳಿ ವಿಜಯಕುಮಾರ್, ಎನ್.ಮುನಿಸ್ವಾಮಿ, ಹುಲಿಕುಂಟೆ ಮೂರ್ತಿ, ಟಿ.ಲಕ್ಷ್ಮೀನಾರಾಯಣ, ನರೇಂದ್ರಬಾಬು, ಮಾಲೂರು ಆನಂದ್, ನಾಗರಾಜು ಪಾವಗಡ ಮತ್ತಿತರರಿಗೆ ಡಾ.ಅಂಬೇಡ್ಕರ್ ಪ್ರಶಸ್ತಿ ನೀಡಿ ಗೌರವಿಸಲಾಯಿತು.

ಈ ವೇಳೆ ಅಂಕ ಸಂಸ್ಥೆ ಅಧ್ಯಕ್ಷ ಸಬ್ಬನಹಳ್ಳಿ ರಾಜು, ಚಿರಂತನ ಟ್ರಸ್ಟ್ ಅಧ್ಯಕ್ಷ ಭಾರತೀಪುರ ಶಂಕರ್, ಕನ್ನಡ ಮತ್ತು ಸಂಸ್ಕೃತಿ ಇಲಾಖೆಯ ಜಂಟಿ ನಿರ್ದೇಶಕ ಅಶೋಕ್ ಛಲವಾದಿ ಸೇರಿದಂತೆ ಇನ್ನಿತರರು ಹಾಜರಿದ್ದರು.