ಇರಾನ್ ವಿರುದ್ಧದ ಆರ್ಥಿಕ ಕಾರ್ಯಾಚರಣೆಗೆ ಚೀನಾದ ನೆರವು ಕೋರಿದ ಡೊನಾಲ್ಡ್‌ ಟ್ರಂಪ್

ವಾಶಿಂಗ್ಟನ್: ಹಾರ್ಮುಝ್ ಜಲಸಂಧಿಯನ್ನು ಮತ್ತೆ ತೆರೆಯಲು ಮತ್ತು ಸಂಘರ್ಷವನ್ನು ಅಂತ್ಯಗೊಳಿಸಲು ನಡೆದ ಮಾತುಕತೆಗಳು ವಿಫಲವಾದ ನಂತರ, ಇರಾನ್ ಅನ್ನು ಆರ್ಥಿಕವಾಗಿ ಪ್ರತ್ಯೇಕಿಸುವ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಪ್ರಯತ್ನಕ್ಕೆ ಬೆಂಬಲ ನೀಡುವಂತೆ ಅಮೆರಿಕದ ಖಜಾನೆ ಕಾರ್ಯದರ್ಶಿ ಸ್ಕಾಟ್ ಬೆಸೆಂಟ್ ಚೀನಾವನ್ನು ಒತ್ತಾಯಿಸಿದ್ದಾರೆ.

ಗಲ್ಫ್ ಪ್ರದೇಶವು ಚೀನಾದ ಇಂಧನ ಆಮದಿನ ಪ್ರಮುಖ ಮೂಲವಾಗಿರುವುದರಿಂದ, ಅಲ್ಲಿ ಸ್ಥಿರತೆಯನ್ನು ಮರುಸ್ಥಾಪಿಸುವುದು ಚೀನಾದ ಸ್ವಂತ ಹಿತಾಸಕ್ತಿಯಾಗಿದೆ. ಆದ್ದರಿಂದ ಈ ಯೋಜನೆಯೊಂದಿಗೆ ಕೈಜೋಡಿಸುವುದು ಅವರಿಗೆ ದೊಡ್ಡ ಉಪಕಾರವಾಗಲಿದೆ ಎಂದು ಬೆಸೆಂಟ್ ಹೇಳಿದ್ದಾರೆ.

ಅಮೆರಿಕದ ಈ ಹೊಸ ಅಭಿಯಾನವು ಮಿತ್ರರಾಷ್ಟ್ರಗಳು ಮತ್ತು ಎದುರಾಳಿಗಳು ಇವೆರಡರಲ್ಲಿ ಯಾವುದಾದರೂ ಒಂದನ್ನು ಆಯ್ಕೆ ಮಾಡಿಕೊಳ್ಳುವಂತೆ ಒತ್ತಾಯಿಸುತ್ತದೆ. ಇದು ಜಗತ್ತಿನ ಇತಿಹಾಸದಲ್ಲೇ ಅತ್ಯಂತ ಸಂಘಟಿತವಾದ ಆರ್ಥಿಕ ದಿಗ್ಬಂಧನವಾಗಲಿದೆ. ನಾವು ದೇಶಗಳ ಬಳಿ ಹೋಗಿ ನೀವು ನಮ್ಮೊಂದಿಗಿದ್ದೀರಾ ಅಥವಾ ನಮ್ಮ ವಿರುದ್ಧವಾಗಿದ್ದೀರಾ ಎಂದು ಕೇಳುತ್ತಿದ್ದೇವೆ ಎಂದು ಬೆಸೆಂಟ್ ಹೇಳಿದ್ದಾರೆ.

ಸೌದಿ ಅರೇಬಿಯಾ ಮತ್ತು ಯುಎಇ ನೇತೃತ್ವದ ಗಲ್ಫ್ ದೇಶಗಳು ಜುಲೈನಲ್ಲಿ ಚೀನಾದ ಒಟ್ಟು ಕಚ್ಚಾ ತೈಲ ಆಮದಿನ ಶೇಕಡಾ 27.6 ರಷ್ಟನ್ನು ಪೂರೈಸಿವೆ.

ಚೀನಾವು ಇರಾನ್‍ನ ಅತಿದೊಡ್ಡ ತೈಲ ಖರೀದಿದಾರನಾಗಿದ್ದು 2025ರಲ್ಲಿ ಇರಾನ್‍ನ ಒಟ್ಟು ತೈಲ ರಫ್ತಿನ ಶೇಕಡಾ 80 ಕ್ಕಿಂತ ಹೆಚ್ಚಿನದನ್ನು ಖರೀದಿಸಿದೆ. ಚೀನಾ ತನ್ನ ವ್ಯಾಪಾರ, ಹಣಕಾಸು ಜಾಲಗಳು, ತಂತ್ರಜ್ಞಾನ ವರ್ಗಾವಣೆ ಮತ್ತು ದ್ವಿ-ಬಳಕೆಯ ವ್ಯಾಪಾರದ ಮೂಲಕ ಜಾಗತಿಕ ನಿರ್ಬಂಧಗಳ ಪ್ರಭಾವವನ್ನು ಕಡಿಮೆ ಮಾಡಲು ಇರಾನ್‍ಗೆ ಸಹಾಯ ಮಾಡಿದೆ ಎಂದು ಅಮೆರಿಕ-ಚೀನಾ ಆರ್ಥಿಕ ಮತ್ತು ಭದ್ರತಾ ಪರಿಶೀಲನಾ ಆಯೋಗದ ವರದಿಯು ಆರೋಪಿಸಿದೆ. ಚೀನಾ ಈ ಆರೋಪಗಳನ್ನು ನಿರಾಕರಿಸಿದೆ.

ಇರಾನ್ ವಿರುದ್ಧ `ಒನ್-ಟೂ ಪಂಚ್'

ಅಮೆರಿಕದ ನಿರ್ಬಂಧಗಳ ಸಂಪೂರ್ಣ ವಿವರಗಳನ್ನು ಸೋಮವಾರದ ಪತ್ರಿಕಾಗೋಷ್ಠಿಯಲ್ಲಿ ತಿಳಿಸಲಾಗುವುದು. ಇದು ಒನ್-ಟೂ ಪಂಚ್ ಇದ್ದಂತೆ. ನಾವು ಈಗಾಗಲೇ ಇರಾನ್ ಮೇಲೆ ದಿಗ್ಬಂಧನ ಹೇರಿದ್ದೇವೆ ಮತ್ತು ಇತಿಹಾಸದಲ್ಲೇ ಅತ್ಯಂತ ಕಠಿಣ ನಿರ್ಬಂಧಗಳನ್ನು ಹೇರಲಿದ್ದೇವೆ. ಗರಿಷ್ಠ ಆರ್ಥಿಕ ಒತ್ತಡವು ಮತ್ತೊಂದು ಪ್ರಮುಖ ಮಿಲಿಟರಿ ಕಾರ್ಯಾಚರಣೆಯ ಅಗತ್ಯವನ್ನು ಕಡಿಮೆ ಮಾಡುತ್ತದೆ ' ಎಂದು ಬೆಸೆಂಟ್ ಹೇಳಿದ್ದಾರೆ.