ಮಾಸ್ಕೋದ ಜನವಸತಿ ಕಟ್ಟಡದಲ್ಲಿ ಸ್ಫೋಟ: ಸೇನಾಧಿಕಾರಿ ಸಹಿತ ಇಬ್ಬರ ಸಾವು

ಮಾಸ್ಕೋ: ವಾಯವ್ಯ ಮಾಸ್ಕೋದ ವಸತಿ ಕಟ್ಟಡವೊಂದರಲ್ಲಿ ಸಂಭವಿಸಿದ ಸ್ಫೋಟದಲ್ಲಿ ಅರೆಸೇನಾ ಪಡೆಯ ಅಧಿಕಾರಿ ಅರ್ಮೆನ್ ಸರ್ಕಿಸ್ಯಾನ್ ಹಾಗೂ ಅವರ ಅಂಗರಕ್ಷಕ ಸಾವನ್ನಪ್ಪಿದ್ದು ಇತರ 3 ಮಂದಿ ಗಾಯಗೊಂಡಿರುವುದಾಗಿ ತುರ್ತು ಸೇವಾ ಅಧಿಕಾರಿಗಳನ್ನು ಉಲ್ಲೇಖಿಸಿ ರಶ್ಯದ ಸರ್ಕಾರಿ ಮಾಧ್ಯಮ `ತಾಸ್' ಸೋಮವಾರ ವರದಿ ಮಾಡಿದೆ.

ಸ್ಫೋಟದಿಂದ ಕಟ್ಟಡಕ್ಕೆ ತೀವ್ರ ಹಾನಿಯಾಗಿರುವ ವೀಡಿಯೊವನ್ನು ಸಾಮಾಜಿಕ ಮಾಧ್ಯಮಗಳು ಪ್ರಸಾರ ಮಾಡಿವೆ. ಉಕ್ರೇನ್ ಮೂಲದ ಸರ್ಕಿಸ್ಯಾನ್ ರಶ್ಯದ ಪರ ಹೋರಾಟ ನಡೆಸುವ `ಅರ್ಬಟ್ ಬಟಾಲಿಯನ್'ನ ಸ್ಥಾಪಕರಾಗಿದ್ದು ಇವರು ಮೋಸ್ಕಾವ ನದಿ ತೀರದಲ್ಲಿರುವ ಕಟ್ಟಡದಲ್ಲಿರುವ ತಮ್ಮ ಕಚೇರಿಯತ್ತ ಬರುತ್ತಿದ್ದಂತೆಯೇ ಬಾಂಬ್ ಸ್ಫೋಟಗೊಂಡಿದೆ. ಸರ್ಕಿಸ್ಯಾನ್ ಹಾಗೂ ಅವರ ಅಂಗರಕ್ಷಕ ಸಾವನ್ನಪ್ಪಿದ್ದು ಇತರ ಮೂವರು ಗಾಯಗೊಂಡಿದ್ದಾರೆ. ಇದು ಉಕ್ರೇನ್ ನಡೆಸಿದ ಯೋಜಿತ ಹತ್ಯೆ ಎಂದು ರಶ್ಯ ಆರೋಪಿಸಿದೆ.