ಟ್ರಂಪ್‌ ಗೆ ಇರಾನ್‌ ನಿಂದ ಬೆದರಿಕೆ; NATO ಶೃಂಗಸಭೆ ವೇಳೆ ಟರ್ಕಿಯಲ್ಲಿ ವಿಮಾನ ಬದಲಾವಣೆ ಮಾಡಿಸಿದ್ದ ಸೀಕ್ರೆಟ್ ಸರ್ವಿಸ್‌: ವರದಿ

ವಾಷಿಂಗ್ಟನ್: ಟರ್ಕಿ ಭೇಟಿಯ ವೇಳೆ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರನ್ನು ಗುರಿಯಾಗಿಸಿಕೊಂಡು ಇರಾನ್ ಬೆಂಬಲಿತ ಪಡೆಗಳಿಂದ ವಿಶ್ವಾಸಾರ್ಹ ಬೆದರಿಕೆ ಬಂದಿದೆ ಎಂಬ ಗುಪ್ತಚರ ಮಾಹಿತಿ ಲಭಿಸಿದ ಹಿನ್ನೆಲೆಯಲ್ಲಿ, ಅವರು ವಾಪಸಾಗುವ ವೇಳೆ ವಿಮಾನ ಬದಲಾಯಿಸುವಂತೆ ಸೀಕ್ರೆಟ್ ಸರ್ವಿಸ್ ಸೂಚಿಸಿತ್ತು ಎಂದು The New York Times ವರದಿ ಮಾಡಿದೆ.

ವರದಿಯ ಪ್ರಕಾರ, ಟ್ರಂಪ್ ಅವರು ಖತರ್‌ ಕೊಡುಗೆ ನೀಡಿದ್ದ ಹೊಸ ಬೋಯಿಂಗ್ 747-8 ವಿಮಾನದಲ್ಲಿ ಟರ್ಕಿಗೆ ತೆರಳಿದ್ದರು. ಅಲ್ಲಿದ್ದ ವೇಳೆ ಟ್ರಂಪ್ ಹಾಗೂ ಅವರು ಪ್ರಯಾಣಿಸುತ್ತಿದ್ದ ಯಾವುದೇ ವಿಮಾನವನ್ನು ಗುರಿಯಾಗಿಸಿಕೊಂಡು ದಾಳಿ ನಡೆಸುವ ಸಾಧ್ಯತೆ ಇದೆ ಎಂಬ ಮಾಹಿತಿ ಅಮೆರಿಕದ ಗುಪ್ತಚರ ಸಂಸ್ಥೆಗಳಿಗೆ ಲಭಿಸಿತ್ತು. ಈ ಹಿನ್ನೆಲೆಯಲ್ಲಿ ಸೀಕ್ರೆಟ್ ಸರ್ವಿಸ್ ಮಧ್ಯಪ್ರವೇಶಿಸಿ, ಹಿಂದಿರುಗುವ ಪ್ರಯಾಣಕ್ಕೆ ಹಳೆಯ ಏರ್ ಫೋರ್ಸ್ ಒನ್ ಬಳಸುವಂತೆ ಸೂಚಿಸಿತು.

ಅಧಿಕಾರಿಗಳ ಪ್ರಕಾರ, ಬೆದರಿಕೆ ಹೊಸ ಬೋಯಿಂಗ್ 747-8 ವಿಮಾನವನ್ನೇ ಗುರಿಯಾಗಿಸಿಕೊಂಡಿರಲಿಲ್ಲ. ಟ್ರಂಪ್ ಅಥವಾ ಅವರು ಪ್ರಯಾಣಿಸುತ್ತಿದ್ದ ಯಾವುದೇ ವಿಮಾನವನ್ನು ಗುರಿಯಾಗಿಸಬಹುದೆಂಬ ಮಾಹಿತಿ ಲಭಿಸಿತ್ತು.

ಆರಂಭದಲ್ಲಿ ವಿಮಾನ ಬದಲಾವಣೆಯನ್ನು ಶ್ವೇತಭವನವು ಸಾಮಾನ್ಯ ಆಡಳಿತಾತ್ಮಕ ಕ್ರಮ ಎಂದು ಹೇಳಿತ್ತು. ಟ್ರಂಪ್ ಕೂಡ ಬ್ರಿಟನ್‌ನಲ್ಲಿ ನೆಲೆಸಿರುವ ಅಮೆರಿಕದ ಸೈನಿಕ ಸಿಬ್ಬಂದಿಗೆ ಹೊಸ ವಿಮಾನವನ್ನು ವೀಕ್ಷಿಸಲು ಅವಕಾಶ ಕಲ್ಪಿಸುವ ಉದ್ದೇಶದಿಂದ ಈ ಕ್ರಮ ಕೈಗೊಳ್ಳಲಾಗಿದೆ ಎಂದು ಹೇಳಿದ್ದರು. ಆದರೆ, ನಂತರ ಅಧಿಕಾರಿಗಳು ಭದ್ರತಾ ಕಾರಣಗಳಿಂದಲೇ ಈ ನಿರ್ಧಾರ ತೆಗೆದುಕೊಳ್ಳಲಾಗಿತ್ತು ಎಂದು ತಿಳಿಸಿದ್ದಾರೆ.

ಈ ಘಟನೆಯ ಬಳಿಕ ಖತರ್‌ ದಾನ ಮಾಡಿರುವ ಬೋಯಿಂಗ್ 747-8 ವಿಮಾನದ ಭದ್ರತಾ ವ್ಯವಸ್ಥೆಗಳ ಕುರಿತು ಪ್ರಶ್ನೆಗಳನ್ನು ಹುಟ್ಟುಹಾಕಿವೆ. ಹಳೆಯ ಏರ್ ಫೋರ್ಸ್ ಒನ್‌ನಲ್ಲಿ ಇರುವ ಕೆಲವು ಸುಧಾರಿತ ರಕ್ಷಣಾ ವ್ಯವಸ್ಥೆಗಳು ಹೊಸ ವಿಮಾನದಲ್ಲಿ ಇನ್ನೂ ಅಳವಡಿಸಲಾಗಿಲ್ಲ ಎಂದು ವರದಿಯಲ್ಲಿ ಹೇಳಲಾಗಿದೆ.

ಇತ್ತೀಚೆಗೆ ಈ ಕುರಿತು ಪ್ರಶ್ನಿಸಿದಾಗ, ವಿಮಾನಕ್ಕೆ ಶೀಘ್ರದಲ್ಲೇ ಹೆಚ್ಚುವರಿ ಭದ್ರತಾ ವ್ಯವಸ್ಥೆಗಳನ್ನು ಅಳವಡಿಸಲಾಗುವುದು ಎಂದು ಟ್ರಂಪ್ ತಿಳಿಸಿದ್ದಾರೆ.

ಸುಮಾರು 14 ವರ್ಷ ಹಳೆಯದಾದ ಈ ಬೋಯಿಂಗ್ 747-8 ವಿಮಾನವನ್ನು ಅಧ್ಯಕ್ಷೀಯ ಸೇವೆಗೆ ಬಳಸುವ ಮೊದಲು ತ್ವರಿತ ಹಾಗೂ ದುಬಾರಿ ನವೀಕರಣಕ್ಕೆ ಒಳಪಡಿಸಲಾಗಿತ್ತು. ಈ ವರ್ಷದ ಕೊನೆಯಲ್ಲಿ ಹೆಚ್ಚುವರಿ ಸುಧಾರಣೆಗಳಿಗಾಗಿ ಸುಮಾರು ಒಂದು ತಿಂಗಳ ಕಾಲ ವಿಮಾನವನ್ನು ಸೇವೆಯಿಂದ ಹೊರಗಿಡಲಾಗುವುದು ಎಂದು ಶ್ವೇತಭವನ ತಿಳಿಸಿದೆ.

ಹೊಸ ಬೋಯಿಂಗ್ 747-8 ಅಧ್ಯಕ್ಷರ ಪ್ರಯಾಣಕ್ಕೆ ಸುರಕ್ಷಿತವಾಗಿದ್ದು, ಈ ವರ್ಷದ ಕೊನೆಯಲ್ಲಿ ಅದಕ್ಕೆ ಹೆಚ್ಚುವರಿ ಭದ್ರತಾ ವ್ಯವಸ್ಥೆಗಳು ಹಾಗೂ ಇತರ ತಾಂತ್ರಿಕ ನವೀಕರಣಗಳನ್ನು ಅಳವಡಿಸಲಾಗುವುದು. ಈ ಕೆಲಸಕ್ಕಾಗಿ ಸುಮಾರು ಒಂದು ತಿಂಗಳ ಕಾಲ ವಿಮಾನವನ್ನು ಸೇವೆಯಿಂದ ಹೊರಗಿಡಲಾಗುವುದು. ಆ ಅವಧಿಯಲ್ಲಿ ಅಧ್ಯಕ್ಷರು ಹಳೆಯ ಏರ್ ಫೋರ್ಸ್ ಒನ್‌ನಲ್ಲೇ ಪ್ರಯಾಣಿಸಲಿದ್ದಾರೆ ಎಂದು ಶ್ವೇತಭವನದ ಪತ್ರಿಕಾ ಕಾರ್ಯದರ್ಶಿ ಕ್ಯಾರೋಲಿನ್ ಲೀವಿಟ್ ತಿಳಿಸಿದ್ದಾರೆ.

►ಇಸ್ರೇಲ್ ನೀಡಿದ್ದ ಮಾಹಿತಿಗಿಂತ ಭಿನ್ನ

ಟರ್ಕಿ ಭೇಟಿಯ ವೇಳೆ ಲಭಿಸಿದ ಬೆದರಿಕೆ, ಟ್ರಂಪ್ ಅವರನ್ನು ಗುರಿಯಾಗಿಸಿಕೊಂಡು ಇರಾನ್ ಸಂಚು ರೂಪಿಸುತ್ತಿದೆ ಎಂದು ಇಸ್ರೇಲ್ ಹಂಚಿಕೊಂಡಿದ್ದ ಪ್ರತ್ಯೇಕ ಗುಪ್ತಚರ ಮಾಹಿತಿಯಿಂದ ಭಿನ್ನವಾಗಿದೆ ಎಂದು ವರದಿಯಲ್ಲಿ ತಿಳಿಸಲಾಗಿದೆ.

ಇಸ್ರೇಲ್ ನೀಡಿದ್ದ ಮಾಹಿತಿಯ ಉದ್ದೇಶ ಇರಾನ್ ವಿರುದ್ಧ ಅಮೆರಿಕದ ಮಿಲಿಟರಿ ಕ್ರಮವನ್ನು ಮತ್ತಷ್ಟು ಬಲಪಡಿಸುವುದಾಗಿರಬಹುದು ಎಂಬ ಅನುಮಾನವನ್ನು ಕೆಲವು ಅಮೆರಿಕದ ಅಧಿಕಾರಿಗಳು ವ್ಯಕ್ತಪಡಿಸಿದ್ದಾರೆ ಎಂದು ವರದಿಯಲ್ಲಿ ಉಲ್ಲೇಖಿಸಲಾಗಿದೆ.

ಟ್ರಂಪ್ ಅವರ ಟರ್ಕಿ ಭೇಟಿಯ ಸಂದರ್ಭದಲ್ಲೇ ಅಮೆರಿಕವು ಇರಾನ್ ವಿರುದ್ಧದ ದಾಳಿಗಳನ್ನು ಪುನರಾರಂಭಿಸಿತ್ತು. ಇದರಿಂದ ಎರಡೂ ದೇಶಗಳ ನಡುವಿನ ಉದ್ವಿಗ್ನತೆ ಮತ್ತಷ್ಟು ಹೆಚ್ಚಾಗಿತ್ತು.

NATO ಶೃಂಗಸಭೆಯ ವೇಳೆ ತಮ್ಮ ವಿರುದ್ಧದ ಬೆದರಿಕೆಗಳ ಬಗ್ಗೆ ಪ್ರತಿಕ್ರಿಯಿಸಿದ್ದ ಟ್ರಂಪ್, "ಇರಾನ್ ಬೆಂಬಲಿತ ಶಕ್ತಿಗಳು ಅಮೆರಿಕದ ನಾಯಕನನ್ನು ಹತ್ಯೆ ಮಾಡಲು ಬಯಸುತ್ತಿವೆ. ಅವರ ಪ್ರಮುಖ ಗುರಿಗಳಲ್ಲಿ ನಾನೂ ಒಬ್ಬನಾಗಿದ್ದೇನೆ. ಇದುವರೆಗೆ ಅದೃಷ್ಟ ನನ್ನ ಪರವಾಗಿದೆ. ಆದರೆ ಅದು ಎಷ್ಟು ಕಾಲ ಇರುತ್ತದೆ ಎಂಬುದು ಗೊತ್ತಿಲ್ಲ" ಎಂದು ಹೇಳಿದ್ದಾರೆ.

►ಬೆದರಿಕೆ ಮಟ್ಟ ಅಭೂತಪೂರ್ವ

ಹಿರಿಯ ಅಮೆರಿಕದ ನಾಯಕರ ವಿರುದ್ಧದ ಬೆದರಿಕೆಗಳು ಅಭೂತಪೂರ್ವ ಮಟ್ಟ ತಲುಪಿವೆ ಎಂದು ಸೀಕ್ರೆಟ್ ಸರ್ವಿಸ್ ನಿರ್ದೇಶಕ ಸೀನ್ ಕರನ್ ಹೇಳಿದ್ದಾರೆ.

"ನನ್ನ 24 ವರ್ಷಗಳ ವೃತ್ತಿಜೀವನದಲ್ಲಿ ಇಷ್ಟೊಂದು ಪ್ರಮಾಣದ ಬೆದರಿಕೆಗಳನ್ನು ನಾನು ನೋಡಿಲ್ಲ. ಪರಿಸ್ಥಿತಿ ಅತ್ಯಂತ ಅಸ್ಥಿರವಾಗಿದೆ. ನಮ್ಮ ಸಿಬ್ಬಂದಿ ಮಾತ್ರವಲ್ಲ, ಸ್ಥಳೀಯ ಕಾನೂನು ಜಾರಿ ಸಂಸ್ಥೆಗಳಿಗೂ ಇದು ದೊಡ್ಡ ಸವಾಲಾಗಿದೆ. ಬೆದರಿಕೆಯ ಪ್ರಮಾಣ ನಾನು ಕಂಡಿರುವ ಮಟ್ಟದಲ್ಲಿ ಅತ್ಯಧಿಕವಾಗಿದೆ" ಎಂದು ಅವರು ಹೇಳಿದ್ದಾರೆ.

ಕರನ್ ಈ ಹಿಂದೆ ಟ್ರಂಪ್ ಅವರ ಭದ್ರತಾ ತಂಡವನ್ನು ಮುನ್ನಡೆಸಿದ್ದರು. 2024ರ ಜುಲೈನಲ್ಲಿ ಪೆನ್ಸಿಲ್ವೇನಿಯಾದ ಬಟ್ಲರ್‌ ನಲ್ಲಿ ನಡೆದ ಚುನಾವಣಾ ಪ್ರಚಾರ ಸಭೆಯಲ್ಲಿ ಟ್ರಂಪ್ ಮೇಲಿನ ಹತ್ಯೆಯ ಯತ್ನದ ವೇಳೆ ಅವರನ್ನು ರಕ್ಷಿಸಿದ್ದ ಏಜೆಂಟ್‌ಗಳಲ್ಲೂ ಅವರು ಒಬ್ಬರಾಗಿದ್ದರು.