ಇರಾನ್ ದಾಳಿಯಿಂದ ಮಧ್ಯಪ್ರಾಚ್ಯದಲ್ಲಿನ ಅಮೆರಿಕದ 26 ತಾಣಗಳಿಗೆ ಹಾನಿ: ವರದಿ
115ಕ್ಕೂ ಹೆಚ್ಚು ದಾಳಿಗಳಲ್ಲಿ ಮಿಲಿಟರಿ ನೆಲೆಗಳು, ಕಟ್ಟಡಗಳಿಗೆ ಹಾನಿ; ಶತಕೋಟಿ ಡಾಲರ್ ನಷ್ಟ
Photo Credit : X
ಟೆಹರಾನ್: ಇರಾನ್ ಅಥವಾ ಇರಾನ್ ಬೆಂಬಲಿತ ಗುಂಪುಗಳು ಮಧ್ಯಪ್ರಾಚ್ಯದಲ್ಲಿರುವ ಅಮೆರಿಕದ ಮಿಲಿಟರಿ ನೆಲೆಗಳು ಹಾಗೂ ಇತರ ತಾಣಗಳ ಮೇಲೆ ನಡೆಸಿದ 115ಕ್ಕೂ ಹೆಚ್ಚು ದಾಳಿಗಳಿಂದ 26 ತಾಣಗಳಿಗೆ ಹಾನಿಯಾಗಿದೆ ಎಂದು ಅಸೋಸಿಯೇಟೆಡ್ ಪ್ರೆಸ್ (AP) ಸುದ್ದಿ ಸಂಸ್ಥೆಯ ವಿಶ್ಲೇಷಣೆ ತಿಳಿಸಿದೆ.
ಅ. 31ರಂದು ಪ್ರಕಟವಾದ ವಿಶ್ಲೇಷಣೆಯ ಪ್ರಕಾರ, ಆಗಸ್ಟ್ ವರೆಗೆ ನಡೆದ ದಾಳಿಗಳಲ್ಲಿ ಅಮೆರಿಕದ ಮಿಲಿಟರಿ ನೆಲೆಗಳು ಮತ್ತು ಅಮೆರಿಕದ ಆಸ್ತಿಗಳಿರುವ ಇತರ ತಾಣಗಳು ಹಾನಿಗೊಳಗಾಗಿವೆ. ಉಪಗ್ರಹ ಚಿತ್ರಗಳ ವಿಶ್ಲೇಷಣೆಯ ಪ್ರಕಾರ, ಇರಾನ್ ಮೊದಲು ಅಮೆರಿಕದ ನೆಲೆಗಳಲ್ಲಿರುವ ರಡಾರ್ ಮತ್ತು ದಾಳಿ ಪತ್ತೆ ವ್ಯವಸ್ಥೆಗಳನ್ನು ಗುರಿಯಾಗಿಸಿಕೊಂಡಿದೆ. ಬಳಿಕ ವಿಮಾನಗಳು ಮತ್ತು ಕಟ್ಟಡಗಳ ಮೇಲೆ ದಾಳಿ ನಡೆಸಿದೆ.
ಫೆಬ್ರವರಿಯಲ್ಲಿ ಅಮೆರಿಕ ಮತ್ತು ಇಸ್ರೇಲ್ ಯುದ್ಧ ಆರಂಭಿಸಿದ ಬಳಿಕ ಕುವೈತ್ ನ ಅಲಿ ಅಲ್-ಸಲೇಮ್ ವಾಯುನೆಲೆಯ ಮೇಲೆ ಕನಿಷ್ಠ 30 ಬಾರಿ ದಾಳಿ ನಡೆದಿದೆ. ಈ ದಾಳಿಗಳಿಂದ ಕನಿಷ್ಠ 15 ವಿಮಾನ ಹ್ಯಾಂಗರ್ ಗಳು, ಹಲವು ಗೋದಾಮುಗಳು ಹಾಗೂ ವಸತಿ ಪ್ರದೇಶದ ಸಮೀಪವಿದ್ದ 10 ಕಟ್ಟಡಗಳು ಹಾನಿಗೀಡಾಗಿವೆ ಅಥವಾ ನಾಶವಾಗಿವೆ ಎಂದು ವಿಶ್ಲೇಷಣೆ ತಿಳಿಸಿದೆ.
ಇರಾನ್ ನಡೆಸಿದ ದಾಳಿಗಳಿಂದ ಅಮೆರಿಕದ ಉಪಕರಣಗಳಿಗೆ ಶತಕೋಟಿ ಡಾಲರ್ ಮೌಲ್ಯದ ಹಾನಿಯಾಗಿದೆ ಎಂದು ಎಪಿ ವರದಿ ಮಾಡಿದೆ.