ಯೆಮೆನ್‌ ನಲ್ಲಿ ಮತ್ತೆ ಸಂಘರ್ಷ | ಹೌತಿಗಳಿಂದ ಸೌದಿ ಬೆಂಬಲಿತ ಸರ್ಕಾರಿ ಪಡೆಗಳ ಮೇಲೆ ದಾಳಿ

ತೈಝ್: ಯೆಮೆನ್‌ ನಲ್ಲಿ ಸಂಘರ್ಷ ಮತ್ತೆ ತೀವ್ರಗೊಂಡಿದ್ದು, ಸೌದಿ ಅರೇಬಿಯ ಬೆಂಬಲಿತ ಸರ್ಕಾರಿ ಪಡೆಗಳು ಮತ್ತು ಹೌತಿ ಬಂಡುಕೋರರ ನಡುವೆ ಭೀಕರ ಕಾಳಗ ನಡೆಯುತ್ತಿದೆ. ತೈಝ್ ನಗರದ ಸುತ್ತಮುತ್ತ ಫಿರಂಗಿ ಹಾಗೂ ವೈಮಾನಿಕ ದಾಳಿಗಳು ಮುಂದುವರಿದಿದ್ದು, ಭಾರೀ ಮತ್ತು ಮಧ್ಯಮ ಶ್ರೇಣಿಯ ಶಸ್ತ್ರಾಸ್ತ್ರಗಳನ್ನು ಬಳಸಲಾಗುತ್ತಿದೆ ಎಂದು ‘Aljazeera’ ವರದಿ ಮಾಡಿದೆ.

ದಕ್ಷಿಣ ಯೆಮೆನ್‌ ನ ಲಾಜ್ ಪ್ರಾಂತ್ಯದಲ್ಲಿರುವ ಅಲ್-ಮಕತ್ರಾ ಕೋಟೆಯ ಮೇಲೆ ಹೌತಿಗಳು ದಾಳಿ ನಡೆಸಿದ್ದಾರೆ ಎಂದು ಮಿಲಿಟರಿ ಮೂಲವೊಂದು ತಿಳಿಸಿದೆ. ಶುಕ್ರವಾರ ಸಂಜೆಯಿಂದಲೇ ಹೌತಿಗಳ ಮಿಲಿಟರಿ ಚಲನವಲನ ಮತ್ತು ದಾಳಿಯ ಸಿದ್ಧತೆಗಳು ಕಂಡುಬಂದಿದ್ದವು. ಶನಿವಾರ ಸ್ಥಳೀಯ ಕಾಲಮಾನ ಬೆಳಿಗ್ಗೆ ಸುಮಾರು 2 ಗಂಟೆಗೆ ದಾಳಿ ಆರಂಭವಾಯಿತು ಎಂದು ಮೂಲಗಳು ಹೇಳಿವೆ.

ಇದಕ್ಕೂ ಮುನ್ನ ಗುರುವಾರ ಸಂಜೆ ಹೌತಿಗಳು ಕೋಟೆಯ ಮೇಲೆ ವಿಚಕ್ಷಣ ಡ್ರೋನ್ ಹಾರಿಸಿದ್ದರು. ದಾಳಿ ಆರಂಭವಾಗುವ ಮುನ್ನ ಸರ್ಕಾರಿ ಪಡೆಗಳು ಅದನ್ನು ಹೊಡೆದುರುಳಿಸಲು ಪ್ರಯತ್ನಿಸಿದ್ದವು ಎಂದು ಮೂಲಗಳು ತಿಳಿಸಿವೆ.

ತೈಝ್ ಗವರ್ನರೇಟ್‌ ನಲ್ಲಿ 24 ಗಂಟೆಗಳ ಅವಧಿಯಲ್ಲಿ ಹೌತಿಗಳು 21 ‘ಅಪರಾಧ ಮತ್ತು ಉಲ್ಲಂಘನೆ’ಗಳನ್ನು ಎಸಗಿದ್ದಾರೆ ಎಂದು ಯೆಮೆನ್ ನೆಟ್‌ವರ್ಕ್ ಫಾರ್ ರೈಟ್ಸ್ ಅಂಡ್ ಫ್ರೀಡಮ್ಸ್ ಆರೋಪಿಸಿದೆ. ಯೆಮೆನ್ ಸರ್ಕಾರಿ ಸುದ್ದಿ ಸಂಸ್ಥೆ ಸಬಾ ಈ ಕುರಿತು ವರದಿ ಮಾಡಿದೆ.

ವಸತಿ ಪ್ರದೇಶಗಳ ಮೇಲೆ ಸುಮಾರು 213 ಪ್ರಕ್ಷೇಪಕಗಳನ್ನು ಹಾರಿಸಿರುವುದು ಆರೋಪಿತ ಉಲ್ಲಂಘನೆಗಳಲ್ಲಿ ಸೇರಿದೆ. ಶೆಲ್ ದಾಳಿ ಮತ್ತು ಸ್ನೈಪರ್‌ ಗಳ ಗುಂಡಿನ ದಾಳಿಯಿಂದ ಸಾವು-ನೋವು ಸಂಭವಿಸಿದೆ. ಅಪಹರಣ, ಅಪರಿಚಿತ ಸ್ಥಳಗಳಲ್ಲಿ ಬಂಧನ, ಮನೆಗಳ ಮೇಲೆ ದಾಳಿ, ಲೂಟಿ ಹಾಗೂ ವಸತಿ ಪ್ರದೇಶಗಳು ಮತ್ತು ಸಾರ್ವಜನಿಕ ರಸ್ತೆಗಳನ್ನು ಗುರಿಯಾಗಿಸಿಕೊಂಡು ದಾಳಿ ನಡೆಸಿದ ಆರೋಪಗಳೂ ಇವೆ ಎಂದು ಎನ್‌ಜಿಒ ತಿಳಿಸಿದೆ.

ಯೆಮೆನ್‌ ನ ಸಾದಾ ಗವರ್ನರೇಟ್‌ ನ ಅಲ್-ಸೇಲಂ, ಕೆತಾಫ್ ಮತ್ತು ಅಲ್-ಬಕಾ ಜಿಲ್ಲೆಗಳನ್ನು ಗುರಿಯಾಗಿಸಿಕೊಂಡು ಮತ್ತೆ ವೈಮಾನಿಕ ದಾಳಿಗಳು ನಡೆದಿವೆ ಎಂದು ಹೌತಿ ಪರ ಮಾಧ್ಯಮಗಳು ವರದಿ ಮಾಡಿವೆ. ಈ ಕುರಿತು ‘Aljazeera’ ವರದಿ ಮಾಡಿದೆ.

ಯೆಮೆನ್‌ ನ ವಿವಿಧ ಭಾಗಗಳಲ್ಲಿ ಸಂಘರ್ಷ ಮುಂದುವರಿದಿರುವುದು ನಾಗರಿಕರ ಸುರಕ್ಷತೆ ಹಾಗೂ ಮೂಲಸೌಕರ್ಯಗಳ ರಕ್ಷಣೆಯ ಬಗ್ಗೆ ಕಳವಳ ಮೂಡಿಸಿದೆ.