ಭಯೋತ್ಪಾದನೆಗೆ ಬೆಂಬಲ ನೀಡುವ ದೇಶಗಳ ಪಟ್ಟಿಯಿಂದ ಸಿರಿಯಾ ಹೊರಕ್ಕೆ: ಅಮೆರಿಕ

ವಾಶಿಂಗ್ಟನ್: ಅಮೆರಿಕವು ಸೋಮವಾರ ಸಿರಿಯಾವನ್ನು `ಭಯೋತ್ಪಾದನೆಗೆ ಬೆಂಬಲ ನೀಡುವ ದೇಶಗಳ' ಪಟ್ಟಿಯಿಂದ ತೆಗೆದುಹಾಕಿದೆ. ದಶಕಗಳಿಂದ ಜಾರಿಯಲ್ಲಿದ್ದ ಈ ಕ್ರಮದಿಂದ ತೀವ್ರ ಆರ್ಥಿಕ ನಿರ್ಬಂಧಗಳು ವಿಧಿಸಲ್ಪಟ್ಟಿದ್ದವು. ಈ ನಿರ್ಧಾರವು ಎರಡೂ ದೇಶಗಳ ನಡುವೆ ವೃದ್ಧಿಸುತ್ತಿರುವ ಬಾಂಧವ್ಯದ ಮತ್ತೊಂದು ಹೆಜ್ಜೆಯಾಗಿದೆ.

ಸಿರಿಯಾವನ್ನು ಅಂತರರಾಷ್ಟ್ರೀಯ ಭಯೋತ್ಪಾದನೆಯ ಕೃತ್ಯಗಳಿಂದ `ಸಂಪೂರ್ಣವಾಗಿ ದೂರವಿಡಲು ಅಧ್ಯಕ್ಷ ಅಹ್ಮದ್ ಅಲ್-ಶರಾ ಕೈಗೊಂಡ ಸಕಾರಾತ್ಮಕ ಕ್ರಮಗಳು ಮತ್ತು ನೀಡಿದ ಹೆಚ್ಚಿನ ಬದ್ಧತೆಗಳ ಗುರುತಿಸುವಿಕೆಯಾಗಿ ಈ ಕ್ರಮವನ್ನು ಕೈಗೊಳ್ಳಲಾಗಿದೆ ಎಂದು ಅಮೆರಿಕದ ವಿದೇಶಾಂಗ ಕಾರ್ಯದರ್ಶಿ ಮಾರ್ಕೊ ರೂಬಿಯೊ ಹೇಳಿಕೆಯಲ್ಲಿ ತಿಳಿಸಿದ್ದಾರೆ.

ಅಲ್-ಶರಾ ಈ ನಿರ್ಧಾರವನ್ನು ಸ್ವಾಗತಿಸಿದ್ದು ಸಿರಿಯಾ ತನ್ನ `ಅಭಿವೃದ್ಧಿ, ಪುನರ್ನಿರ್ಮಾಣ ಮತ್ತು ನಿರ್ಮಾಣದ ಕ್ಷೇತ್ರಕ್ಕೆ ಹೆಜ್ಜೆ ಇಡಲು, ತನ್ನ ನೋವಿನ ಭೂತಕಾಲದ ಪುಟವೊಂದನ್ನು ಹರಿದು ಹಾಕುತ್ತಿದೆ' ಎಂದು `ಎಕ್ಸ್'ನಲ್ಲಿ ಪೋಸ್ಟ್ ಮಾಡಿದ್ದಾರೆ.