ಅಮೆರಿಕದ ರಾಷ್ಟ್ರೀಯ ಸಾಲ 40 ಟ್ರಿಲಿಯನ್ ಡಾಲರ್ ದಾಟಿದೆ; ಈ ಮೊತ್ತ ಎಷ್ಟು ದೊಡ್ಡದು?

ವಾಷಿಂಗ್ಟನ್: ಅಮೆರಿಕದ ರಾಷ್ಟ್ರೀಯ ಸಾಲವು ಇದೇ ಮೊದಲ ಬಾರಿಗೆ 40 ಟ್ರಿಲಿಯನ್ ಡಾಲರ್ ಗಡಿ ದಾಟಿದೆ. ಐತಿಹಾಸಿಕವಾಗಿ ದೊಡ್ಡ ಪ್ರಮಾಣದ ಫೆಡರಲ್ ಬಜೆಟ್ ಕೊರತೆಗಳ ನಡುವೆಯೇ ಐದು ವರ್ಷಗಳಿಗಿಂತ ಕಡಿಮೆ ಅವಧಿಯಲ್ಲಿ ಸಾಲದ ಮೊತ್ತ ಸುಮಾರು ಮೂರನೇ ಒಂದು ಭಾಗದಷ್ಟು ಹೆಚ್ಚಾಗಿದೆ.

ನಿರಂತರ ಬಜೆಟ್ ಕೊರತೆ ಮತ್ತು ಹೆಚ್ಚುತ್ತಿರುವ ಬಡ್ಡಿ ಪಾವತಿಗಳ ಪರಿಣಾಮವಾಗಿ ಅಮೆರಿಕದ ಸಾಲದ ಹೊರೆ ಕೆಲವೇ ವರ್ಷಗಳ ಹಿಂದಿನ ಅಂದಾಜುಗಳಿಗಿಂತಲೂ ವೇಗವಾಗಿ ಏರುತ್ತಿದೆ. ಹಣಕಾಸು ಕಾವಲು ಸಂಸ್ಥೆ ಪೀಟರ್ ಜಿ. ಪೀಟರ್ಸನ್ ಫೌಂಡೇಶನ್ ಪ್ರಕಾರ, ರಾಷ್ಟ್ರೀಯ ಸಾಲಕ್ಕೆ ಪ್ರತಿದಿನ ಸುಮಾರು 7 ಬಿಲಿಯನ್ ಡಾಲರ್ ಸೇರುತ್ತಿದೆ.

40 ಟ್ರಿಲಿಯನ್ ಡಾಲರ್ ನಷ್ಟು ಬೃಹತ್ ಮೊತ್ತದ ಪ್ರಮಾಣವನ್ನು ಅರ್ಥ ಮಾಡಿಕೊಳ್ಳುವುದು ಕಷ್ಟ. ಕೆಲವು ಹೋಲಿಕೆಗಳ ಮೂಲಕ ಇದರ ಅಗಾಧತೆಯನ್ನು ಅರ್ಥ ಮಾಡಿಕೊಳ್ಳಬಹುದು.

►ಪ್ರತಿ ಅಮೆರಿಕ ಪ್ರಜೆಗೆ 117,000 ಡಾಲರ್ ಸಾಲ

ಜನಗಣತಿ ಬ್ಯೂರೊದ ಅಂಕಿಅಂಶಗಳ ಪ್ರಕಾರ, ಅಮೆರಿಕದ ಜನಸಂಖ್ಯೆ ಸುಮಾರು 343 ಮಿಲಿಯನ್. ಹೀಗಾಗಿ 40 ಟ್ರಿಲಿಯನ್ ಡಾಲರ್ ನ ಒಟ್ಟು ರಾಷ್ಟ್ರೀಯ ಸಾಲವನ್ನು ಪ್ರತಿಯೊಬ್ಬ ಅಮೆರಿಕನ್ನರ ನಡುವೆ ಸಮಾನವಾಗಿ ಹಂಚಿದರೆ, ಒಬ್ಬ ವ್ಯಕ್ತಿಯ ಪಾಲಿಗೆ ಸುಮಾರು 117,000 ಡಾಲರ್ ಬರಲಿದೆ.

ಅಮೆರಿಕದ ಪ್ರಸ್ತುತ ರಾಷ್ಟ್ರೀಯ ಸಾಲವು 10 ವರ್ಷಗಳ ಹಿಂದಿನ ಮೊತ್ತಕ್ಕಿಂತ ಸರಿಸುಮಾರು ದುಪ್ಪಟ್ಟಾಗಿದೆ. 2016ರ ಆಗಸ್ಟ್ ನಲ್ಲಿ ಒಟ್ಟು ರಾಷ್ಟ್ರೀಯ ಸಾಲ 20 ಟ್ರಿಲಿಯನ್ ಡಾಲರ್ ಗಿಂತ ಸ್ವಲ್ಪ ಕಡಿಮೆಯಿತ್ತು. ಕಳೆದ ಒಂದು ದಶಕದಲ್ಲಿ ಅದು 40 ಟ್ರಿಲಿಯನ್ ಡಾಲರ್ ಗೆ ಏರಿದೆ.

‘ಈ ಪ್ರಮಾಣದಲ್ಲಿ ಸಮರ್ಥನೀಯವಲ್ಲದ ಸಾಲವು ಆರ್ಥಿಕತೆಯಾದ್ಯಂತ ಭಾರಿ ಪರಿಣಾಮಗಳನ್ನು ಬೀರುತ್ತದೆ. ಕೈಗೆಟುಕುವಿಕೆಯನ್ನು ಸುಧಾರಿಸುವ ಪ್ರಯತ್ನಗಳಿಗೆ ಅಡ್ಡಿಯಾಗುತ್ತದೆ. ಕಾನೂನು ರೂಪಿಸುವವರು ಕ್ರಮ ಕೈಗೊಳ್ಳದಿದ್ದರೆ ಅಪಾಯಕಾರಿ ಸಾಲದ ಸುರುಳಿಯ ಅಪಾಯ ಎದುರಾಗಬಹುದು’ ಎಂದು ಜವಾಬ್ದಾರಿಯುತ ಫೆಡರಲ್ ಬಜೆಟ್ ಸಮಿತಿಯ ಅಧ್ಯಕ್ಷೆ ಮಾಯಾ ಮ್ಯಾಕ್ಗುನಿಯಸ್ ಹೇಳಿದ್ದಾರೆ.

►ವಿಶ್ವದ 500 ಶ್ರೀಮಂತರ ಒಟ್ಟು ಸಂಪತ್ತಿಗಿಂತ ಮೂರು ಪಟ್ಟು

ಜೂನ್ ನಲ್ಲಿ ಸ್ಪೇಸ್ ಎಕ್ಸ್ ನ ಆರಂಭಿಕ ಸಾರ್ವಜನಿಕ ಕೊಡುಗೆ (IPO) ಬಳಿಕ ಉದ್ಯಮಿ ಎಲಾನ್ ಮಸ್ಕ್ ಅವರ ನಿವ್ವಳ ಮೌಲ್ಯ 1 ಟ್ರಿಲಿಯನ್ ಡಾಲರ್ ಗಿಂತ ಹೆಚ್ಚಾದಾಗ ಸುದ್ದಿಯಾಗಿತ್ತು. ಆದರೆ ವಿಶ್ವದ ಅತ್ಯಂತ ಶ್ರೀಮಂತ ವ್ಯಕ್ತಿಗಳ ಸಂಪತ್ತನ್ನು ಒಟ್ಟುಗೂಡಿಸಿದರೂ ಅಮೆರಿಕದ ರಾಷ್ಟ್ರೀಯ ಸಾಲದ ಸಮೀಪಕ್ಕೆ ಬರಲು ಸಾಧ್ಯವಿಲ್ಲ.

ಬ್ಲೂಮ್ಬರ್ಗ್ ಬಿಲಿಯನೇರ್ಸ್ ಸೂಚ್ಯಂಕದ ಪ್ರಕಾರ, ವಿಶ್ವದ 10 ಅತಿ ಶ್ರೀಮಂತ ವ್ಯಕ್ತಿಗಳ ಒಟ್ಟು ನಿವ್ವಳ ಮೌಲ್ಯ 2.7 ಟ್ರಿಲಿಯನ್ ಡಾಲರ್. ರಾಷ್ಟ್ರೀಯ ಸಾಲವು ಇದಕ್ಕಿಂತ ಸುಮಾರು 15 ಪಟ್ಟು ಹೆಚ್ಚು.

ಸೂಚ್ಯಂಕದಲ್ಲಿರುವ ವಿಶ್ವದ 500 ಅತಿ ಶ್ರೀಮಂತ ವ್ಯಕ್ತಿಗಳ ಒಟ್ಟು ನಿವ್ವಳ ಮೌಲ್ಯವೂ ಸುಮಾರು 13 ಟ್ರಿಲಿಯನ್ ಡಾಲರ್ ಮಾತ್ರ. ಹೀಗಾಗಿ ಅವರ ಒಟ್ಟು ಸಂಪತ್ತಿಗಿಂತ ಅಮೆರಿಕದ ರಾಷ್ಟ್ರೀಯ ಸಾಲವು ಸುಮಾರು 27 ಟ್ರಿಲಿಯನ್ ಡಾಲರ್‌ ಗೂ ಹೆಚ್ಚು.

ಇದುವರೆಗೆ ಗಣಿಗಾರಿಕೆ ಮಾಡಿದ ಎಲ್ಲ ಚಿನ್ನಕ್ಕಿಂತ ಹೆಚ್ಚು!

ವಿಶ್ವ ಚಿನ್ನ ಮಂಡಳಿಯ ಪ್ರಕಾರ, ಇತಿಹಾಸದುದ್ದಕ್ಕೂ ಸುಮಾರು 220,700 ಟನ್ ಚಿನ್ನವನ್ನು ಗಣಿಗಾರಿಕೆ ಮಾಡಲಾಗಿದೆ.

ಚಿನ್ನದ ಪ್ರಸ್ತುತ ಸ್ಪಾಟ್ ಬೆಲೆ ಪ್ರತಿ ಟ್ರಾಯ್ ಔನ್ಸ್ ಗೆ ಸುಮಾರು 4,600 ಡಾಲರ್ ಎಂದು ಪರಿಗಣಿಸಿದರೆ, ಇದುವರೆಗೆ ಗಣಿಗಾರಿಕೆ ಮಾಡಲಾದ ಎಲ್ಲ ಚಿನ್ನದ ಒಟ್ಟು ಮೌಲ್ಯ ಸುಮಾರು 33 ಟ್ರಿಲಿಯನ್. ಇದು ಅಮೆರಿಕದ ರಾಷ್ಟ್ರೀಯ ಸಾಲಕ್ಕಿಂತ ಸುಮಾರು 7 ಟ್ರಿಲಿಯನ್‌ ಡಾಲರ್‌ ಗೂ ಕಡಿಮೆ.

►7 Nvidia ಕಂಪೆನಿಗಳಿಗಿಂತ ಹೆಚ್ಚು

ವಿಶ್ವದ ಅತ್ಯಂತ ಮೌಲ್ಯಯುತ ಕಂಪೆನಿಯಾದ Nvidia, 5.2 ಟ್ರಿಲಿಯನ್ ಡಾಲರ್ ಗಿಂತ ಹೆಚ್ಚು ಮಾರುಕಟ್ಟೆ ಬಂಡವಾಳ ಹೊಂದಿದೆ. ಹೀಗಾಗಿ ಅಮೆರಿಕದ ಫೆಡರಲ್ ಸಾಲದ ಮೊತ್ತಕ್ಕೆ ಸಮನಾಗಲು ಏಳು Nvidia ಕಂಪೆನಿಗಳಿಗಿಂತಲೂ ಹೆಚ್ಚು ಬೇಕಾಗುತ್ತದೆ.

S&P 500 ಸೂಚ್ಯಂಕದಲ್ಲಿರುವ 11 ಅತಿ ಮೌಲ್ಯಯುತ ಕಂಪೆನಿಗಳ ಒಟ್ಟು ಮಾರುಕಟ್ಟೆ ಮೌಲ್ಯ ಸುಮಾರು 28 ಟ್ರಿಲಿಯನ್ ಡಾಲರ್. ಇದು ರಾಷ್ಟ್ರೀಯ ಸಾಲಕ್ಕಿಂತ 12 ಟ್ರಿಲಿಯನ್ ಡಾಲರ್ ಕಡಿಮೆ.

►340ಕ್ಕೂ ಹೆಚ್ಚು ಅಂತರರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣಗಳು

ಯುರೋಪಿಯನ್ ಬಾಹ್ಯಾಕಾಶ ಸಂಸ್ಥೆಯ ಅಂದಾಜಿನ ಪ್ರಕಾರ, ಅಂತರರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣಕ್ಕೆ ಸುಮಾರು 117 ಬಿಲಿಯನ್ ಡಾಲರ್ ವೆಚ್ಚವಾಗಿದೆ.

ಈ ಮೊತ್ತವನ್ನು ಆಧಾರವಾಗಿಟ್ಟುಕೊಂಡರೆ, 40 ಟ್ರಿಲಿಯನ್ ಡಾಲರ್ ರಾಷ್ಟ್ರೀಯ ಸಾಲದ ಮೌಲ್ಯಕ್ಕೆ ಸಮನಾಗಲು ಸುಮಾರು 340 ಅಂತರರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣಗಳ ವೆಚ್ಚ ಬೇಕಾಗುತ್ತದೆ.

►ಅಮೆರಿಕದ ಆರ್ಥಿಕತೆಗಿಂತ ದೊಡ್ಡದು

ಅಮೆರಿಕದ ಫೆಡರಲ್ ಸಾಲವು ದೇಶದಲ್ಲಿ ಒಂದು ವರ್ಷದಲ್ಲಿ ಉತ್ಪಾದನೆಯಾಗುವ ಎಲ್ಲ ಸರಕು ಮತ್ತು ಸೇವೆಗಳ ಒಟ್ಟು ಮೌಲ್ಯಕ್ಕಿಂತಲೂ ಹೆಚ್ಚಾಗಿದೆ.

ಬ್ಯೂರೊ ಆಫ್ ಎಕನಾಮಿಕ್ ಅನಾಲಿಸಿಸ್ ನ ಅಂಕಿಅಂಶಗಳ ಪ್ರಕಾರ, 2026ರ ಎರಡನೇ ತ್ರೈಮಾಸಿಕದಲ್ಲಿ ಅಮೆರಿಕದ ಒಟ್ಟು ದೇಶೀಯ ಉತ್ಪನ್ನ (GDP) 32 ಟ್ರಿಲಿಯನ್ ಡಾಲರ್ ಗಿಂತ ಹೆಚ್ಚು ಇತ್ತು.

ಸಾಲವನ್ನು GDPಗೆ ಹೋಲಿಸುವುದು ವಿವಿಧ ದೇಶಗಳ ಸಾಲದ ಹೊರೆಗಳನ್ನು ಹೋಲಿಸಲು ನೆರವಾಗುತ್ತದೆ. ಅಮೆರಿಕದ ಸಾಲ–GDP ಅನುಪಾತ ಸುಮಾರು 123%ರಷ್ಟಿದ್ದು, ಇದು ದಾಖಲೆಯ ಗರಿಷ್ಠ ಮಟ್ಟದ ಸಮೀಪದಲ್ಲಿದೆ. ಈ ಅನುಪಾತವು 2012ರಲ್ಲಿ ಮೊದಲ ಬಾರಿಗೆ 100% ದಾಟಿತ್ತು.

ಅಂತರರಾಷ್ಟ್ರೀಯ ಹಣಕಾಸು ನಿಧಿಯ (IMF) ಅಂಕಿಅಂಶಗಳ ಪ್ರಕಾರ, ಅಮೆರಿಕದ ಸಾಲದ ಹೊರೆ ವಿಶ್ವದ ಅತಿ ಹೆಚ್ಚಿನ ಸಾಲ–GDP ಅನುಪಾತ ಹೊಂದಿರುವ ದೇಶಗಳ ಮೊದಲ 10ರಲ್ಲಿದೆ. ಅಮೆರಿಕಕ್ಕಿಂತ ಹೆಚ್ಚಿನ ಸಾಲ–GDP ಅನುಪಾತ ಹೊಂದಿರುವ ದೇಶಗಳು ಜಪಾನ್, ಸಿಂಗಾಪುರ, ಸುಡಾನ್, ಬಹ್ರೇನ್, ಇಟಲಿ, ಗ್ರೀಸ್, ಸೆನೆಗಲ್ ಮತ್ತು ಮಾಲ್ಡೀವ್ಸ್.

►ಮುಂದಿನ ಐದು ದೊಡ್ಡ ಆರ್ಥಿಕತೆಗಳ ಒಟ್ಟು GDPಗಿಂತಲೂ ಹೆಚ್ಚು

ಅಮೆರಿಕದ ನಂತರದ ಐದು ಅತಿ ದೊಡ್ಡ ಆರ್ಥಿಕತೆಗಳಾದ ಚೀನಾ, ಜರ್ಮನಿ, ಜಪಾನ್, ಬ್ರಿಟನ್ ಮತ್ತು ಭಾರತದ GDPಯನ್ನು ಒಟ್ಟುಗೂಡಿಸಿದರೂ ಅದು ಅಮೆರಿಕದ ರಾಷ್ಟ್ರೀಯ ಸಾಲಕ್ಕಿಂತ ಕಡಿಮೆ.

ವಿಶ್ವಬ್ಯಾಂಕ್ ನ ಅಂಕಿಅಂಶಗಳ ಪ್ರಕಾರ, ಈ ಐದು ದೇಶಗಳ ಒಟ್ಟು GDP ಸುಮಾರು 37 ಟ್ರಿಲಿಯನ್ ಡಾಲರ್. ಇದು ಅಮೆರಿಕದ ಒಟ್ಟು ಸಾಲದ ಹೊರೆಗಿಂತ ಸುಮಾರು 3 ಟ್ರಿಲಿಯನ್ ಡಾಲರ್ ಕಡಿಮೆ.

►ಒಟ್ಟು ಅಮೆರಿಕದ ಕುಟುಂಬಗಳ ಒಟ್ಟು ಸಾಲಕ್ಕಿಂತ ಎರಡು ಪಟ್ಟು

ಫೆಡರಲ್ ರಿಸರ್ವ್ ಬ್ಯಾಂಕ್ ಆಫ್ ನ್ಯೂಯಾರ್ಕ್ ಪ್ರಕಾರ, ಅಡಮಾನ, ವಾಹನ ಸಾಲ, ಕ್ರೆಡಿಟ್ ಕಾರ್ಡ್ ಸಾಲ ಮತ್ತು ವಿದ್ಯಾರ್ಥಿ ಸಾಲ ಸೇರಿದಂತೆ ಅಮೆರಿಕದ ಕುಟುಂಬಗಳ ಒಟ್ಟು ಸಾಲವು 2026ರ ಎರಡನೇ ತ್ರೈಮಾಸಿಕದಲ್ಲಿ ಸುಮಾರು 19 ಟ್ರಿಲಿಯನ್ ಡಾಲರ್ ಆಗಿತ್ತು. ಇದು ಅಮೆರಿಕದ ಸರಕಾರದ ಒಟ್ಟು ಸಾಲದ ಅರ್ಧದಷ್ಟಾಗಿದೆ.

ನ್ಯೂಯಾರ್ಕ್ ಫೆಡ್ ಪ್ರಕಾರ, ಇದೇ ಅವಧಿಯಲ್ಲಿ ಅಮೆರಿಕದ ಒಟ್ಟು ಕ್ರೆಡಿಟ್ ಕಾರ್ಡ್ ಸಾಲ 1.26 ಟ್ರಿಲಿಯನ್ ಡಾಲರ್ ಗೆ ತಲುಪಿದೆ. ಹೀಗಾಗಿ ಅಮೆರಿಕದ ರಾಷ್ಟ್ರೀಯ ಸಾಲವು ದೇಶದ ಎಲ್ಲ ಬಾಕಿ ಇರುವ ಕ್ರೆಡಿಟ್ ಕಾರ್ಡ್ ಸಾಲಕ್ಕಿಂತ ಸುಮಾರು 32 ಪಟ್ಟು ಹೆಚ್ಚಾಗಿದೆ.

►ನಿವೃತ್ತಿ ಉಳಿತಾಯದ ಒಟ್ಟು ಮೌಲ್ಯದ ಶೇ 85ರಷ್ಟು

ಇನ್ವೆಸ್ಟ್ಮೆಂಟ್ ಕಂಪೆನಿ ಇನ್ಸ್ಟಿಟ್ಯೂಟ್ ಪ್ರಕಾರ, 2026ರ ಮೊದಲ ಮೂರು ತಿಂಗಳಲ್ಲಿ ಅಮೆರಿಕದ ಜನರ ನಿವೃತ್ತಿಗಾಗಿ ಉಳಿತಾಯ ಮಾಡಿರುವ ಹಣ ಮತ್ತು ಹೂಡಿಕೆಗಳ ಒಟ್ಟು ಮೌಲ್ಯ 47.6 ಟ್ರಿಲಿಯನ್ ಡಾಲರ್ ಆಗಿತ್ತು.

ಇದಕ್ಕೆ ಹೋಲಿಸಿದರೆ, ಅಮೆರಿಕದ 40 ಟ್ರಿಲಿಯನ್ ಡಾಲರ್ ರಾಷ್ಟ್ರೀಯ ಸಾಲವು ನಿವೃತ್ತಿ ಉಳಿತಾಯ ಮತ್ತು ಹೂಡಿಕೆಗಳ ಒಟ್ಟು ಮೌಲ್ಯದ ಶೇ. 85ರಷ್ಟಿದೆ.

►ದಿನಕ್ಕೆ 1 ಬಿಲಿಯನ್ ಡಾಲರ್ ಪಾವತಿಸಿದರೂ 110 ವರ್ಷ

40 ಟ್ರಿಲಿಯನ್ ಡಾಲರ್ ಎಂದರೆ 1 ಬಿಲಿಯನ್ ಡಾಲರ್ ಗಿಂತ 40,000 ಪಟ್ಟು ಹೆಚ್ಚು. ಹಾಗೆಯೇ 1 ಮಿಲಿಯನ್ ಡಾಲರ್ ಗಿಂತ 40 ಮಿಲಿಯನ್ ಪಟ್ಟು ಹೆಚ್ಚು.

ಅಮೆರಿಕವು ಪ್ರತಿದಿನ 1 ಬಿಲಿಯನ್ ಡಾಲರ್ ನಷ್ಟು ಸಾಲವನ್ನು ತೀರಿಸುತ್ತಾ ಹೋದರೂ, 40 ಟ್ರಿಲಿಯನ್ ಡಾಲರ್ ಸಂಪೂರ್ಣ ಸಾಲವನ್ನು ತೀರಿಸಲು ಸುಮಾರು 110 ವರ್ಷ ಬೇಕಾಗುತ್ತದೆ. ಪ್ರತಿದಿನ 1 ಮಿಲಿಯನ್ ಡಾಲರ್ ಪಾವತಿಸಿದರೆ ಸಾಲ ತೀರಿಸಲು ಸುಮಾರು 110,000 ವರ್ಷಗಳು ಬೇಕಾಗುತ್ತವೆ.

ಹೀಗಾಗಿ 40 ಟ್ರಿಲಿಯನ್ ಡಾಲರ್ ಎಂಬ ಮೊತ್ತವು ಅಮೆರಿಕದ ಆರ್ಥಿಕತೆಯ ಗಾತ್ರ, ಕುಟುಂಬಗಳ ಸಾಲ, ನಿವೃತ್ತಿ ಉಳಿತಾಯ, ಚಿನ್ನದ ಒಟ್ಟು ಮೌಲ್ಯ ಹಾಗೂ ವಿಶ್ವದ ಶ್ರೀಮಂತ ವ್ಯಕ್ತಿಗಳು ಮತ್ತು ಪ್ರಮುಖ ಕಂಪೆನಿಗಳ ಒಟ್ಟು ಸಂಪತ್ತಿನೊಂದಿಗೆ ಹೋಲಿಸಿದಾಗಲೂ ಅಸಾಧಾರಣವಾಗಿ ದೊಡ್ಡದಾಗಿದೆ.

ಸೌಜನ್ಯ: cnn.com