ಜೆರುಸಲೆಮ್‍ನಲ್ಲಿ ಶಾಶ್ವತ ರಾಯಭಾರ ಕಚೇರಿ ನಿರ್ಮಿಸಲು ಒಪ್ಪಂದಕ್ಕೆ ಅಮೆರಿಕ ಸಹಿ

ಜೆರುಸಲೆಮ್, ಜು.1: ಜೆರುಸಲೆಮ್‍ನಲ್ಲಿ ಹೊಸ ರಾಯಭಾರ ಕಚೇರಿ ಸಂಕೀರ್ಣವನ್ನು ನಿರ್ಮಿಸಲು ಅಮೆರಿಕ ಬುಧವಾರ ಒಪ್ಪಂದಕ್ಕೆ ಸಹಿ ಹಾಕಿದೆ. ಈ ಕ್ರಮವು ಎರಡೂ ದೇಶಗಳ ನಡುವಿನ `ಮುರಿಯಲಾಗದ ಮೈತ್ರಿ'ಯನ್ನು ಪ್ರತಿಬಿಂಬಿಸುತ್ತದೆ ಎಂದು ಇಸ್ರೇಲ್ ಹೇಳಿದೆ.

ಅಮೆರಿಕ ಅಧ್ಯಕ್ಷ ಟ್ರಂಪ್ ಅವರು ತಮ್ಮ ಮೊದಲ ಅವಧಿಯಲ್ಲಿ ಜೆರುಸಲೆಮ್ ಅನ್ನು ಇಸ್ರೇಲ್‍ನ ರಾಜಧಾನಿ ಎಂದು ಗುರುತಿಸಿದ್ದರು ಮತ್ತು ವಾಷಿಂಗ್ಟನ್‍ನ ರಾಜತಾಂತ್ರಿಕ ಕಾರ್ಯಾಚರಣೆಯನ್ನು ಟೆಲ್ ಅವಿವ್‍ನಿಂದ ಸ್ಥಳಾಂತರಿಸಲು ಆದೇಶಿಸಿದ್ದರು. ಆದರೆ ರಾಯಭಾರ ಕಚೇರಿಯ ಸೇವೆಗಳು ಜೆರುಸಲೆಮ್‍ನ ವಿವಿಧ ಸ್ಥಳಗಳಲ್ಲಿ ಹಂಚಿಹೋಗಿದ್ದವು.

ಟ್ರಂಪ್ ಅವರ ಈ ನಿರ್ಧಾರವು ದಶಕಗಳ ಅಮೆರಿಕ ವಿದೇಶಾಂಗ ನೀತಿಯನ್ನು ಮುರಿದಿತ್ತು. ಹಳೆಯ ನೀತಿಯ ಪ್ರಕಾರ, ಜೆರುಸಲೆಮ್‍ನ ಅಂತಿಮ ಸ್ಥಾನಮಾನವನ್ನು ಇಸ್ರೇಲಿಗಳು ಮತ್ತು ಫೆಲೆಸ್ತೀನೀಯರ ನಡುವಿನ ಮಾತುಕತೆಗಳ ಮೂಲಕ ನಿರ್ಧರಿಸಬೇಕಾಗಿತ್ತು.

ಇಸ್ರೇಲ್-ಫೆಲೆಸ್ತೀನ್ ಸಂಘರ್ಷದಲ್ಲಿ ಜೆರುಸಲೆಮ್ ದೀರ್ಘಕಾಲದಿಂದಲೂ ಅತ್ಯಂತ ವಿವಾದಿತ ನಗರಗಳಲ್ಲಿ ಒಂದಾಗಿದೆ. 1967 ರ ಅರಬ್-ಇಸ್ರೇಲ್ ಯುದ್ಧದ ಸಮಯದಲ್ಲಿ ಇಸ್ರೇಲ್ ಪೂರ್ವ ಜೆರುಸಲೆಮ್ ಅನ್ನು ವಶಪಡಿಸಿಕೊಂಡ ನಂತರ, ಅದು ಈ ನಗರವನ್ನು ತನ್ನ ಅವಿಭಜಿತ ರಾಜಧಾನಿ ಎಂದು ಘೋಷಿಸಿತು. ಆದರೆ ಈ ಹಕ್ಕನ್ನು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ವ್ಯಾಪಕವಾಗಿ ಅಂಗೀಕರಿಸಲಾಗಿಲ್ಲ. ಫೆಲೆಸ್ತೀನಿಯರು ಪೂರ್ವ ಜೆರುಸಲೆಮ್ ಅನ್ನು ತಮ್ಮ ಭವಿಷ್ಯದ ಫೆಲೆಸ್ತೀನ್ ದೇಶದ ರಾಜಧಾನಿಯನ್ನಾಗಿ ಮಾಡಲು ಬಯಸುತ್ತಿದ್ದಾರೆ.

ಜೆರುಸಲೆಮ್‍ನ ಸ್ಥಾನಮಾನವನ್ನು ಅಂತಾರಾಷ್ಟ್ರೀಯ ಕಾನೂನು ಮತ್ತು ಸಂಬಂಧಿತ ವಿಶ್ವಸಂಸ್ಥೆಯ ನಿರ್ಣಯಗಳಿಗೆ ಅನುಗುಣವಾಗಿ ಶಾಂತಿ ಮಾತುಕತೆಗಳ ಮೂಲಕ ಬಗೆಹರಿಸಬೇಕು ಎಂದು ಪ್ರತಿಪಾದಿಸುತ್ತಿರುವ ಹೆಚ್ಚಿನ ದೇಶಗಳು ಟೆಲ್ ಅವಿವ್‍ನಲ್ಲಿ ತಮ್ಮ ರಾಯಭಾರ ಕಚೇರಿಗಳನ್ನು ಸ್ಥಾಪಿಸಿವೆ.