ಕಬಡ್ಡಿಯಿಂದ ದೈಹಿಕ, ಮಾನಸಿಕ ಆರೋಗ್ಯ ವರ್ಧನೆ: ಶಾಸಕ ಕಿರಣ್ ಕುಮಾರ್ ಕೊಡ್ಗಿ

ಕುಂದಾಪುರ, ನ.9: ಕಬಡ್ಡಿಗೆ ಭಾರತದಲ್ಲಿ ವಿಫುಲ ಅವಕಾಶವಿದೆ. ದೈಹಿಕ, ಮಾನಸಿಕ ಆರೋಗ್ಯ ವರ್ಧನೆ ಜತೆಗೆ, ಸಾಮಾಜಿಕ ಒಗ್ಗೂಡುವಿಕೆಗೆ ಕಬಡ್ಡಿ ಸಹಕಾರಿ. ಇಂದಿನ ಯುವಕರಲ್ಲಿ ಕ್ರೀಡಾ ಪರಂಪರೆ, ಶಕ್ತಿ ಕಡಿಮೆಯಾಗುತ್ತಿದೆ. ಸರಕಾರ, ಸಮಾಜದ ಹಿರಿಯರು ನಮ್ಮ ಪರಂಪರೆ ಉಳಿಸುವ ಕೆಲಸ ಮಾಡಬೇಕು. ಕುಂದಾಪುರದ ಗಾಂಧಿ ಮೈದಾನದಲ್ಲಿ ಸುಸಜ್ಜಿತ ಕಬಡ್ಡಿ ಒಳಾಂಗಣ ಆಗುತ್ತಿದ್ದು, ಶೀಘ್ರದಲ್ಲಿ ಪೂರ್ಣಗೊಳ್ಳಲಿದೆ ಎಂದು ಕುಂದಾಪುರ ಶಾಸಕ ಎ. ಕಿರಣ್ ಕುಮಾರ್ ಕೊಡ್ಗಿ ಹೇಳಿದ್ದಾರೆ.

ಖಾರ್ವಿಕೇರಿಯ ಫ್ರೆಂಡ್ಸ್ ಮಧ್ಯಕೇರಿ ಆಶ್ರಯದಲ್ಲಿ ದೀಪಾವಳಿ ಪ್ರಯುಕ್ತ ಖಾರ್ವಿಕೇರಿಯಲ್ಲಿ ಅಖಿಲ ಕರ್ನಾಟಕ ಕೊಂಕಣ ಖಾರ್ವಿ ಸಮಾಜ ಬಾಂಧವರ ರಾಜ್ಯ ಮಟ್ಟದ ಹಾಗೂ ಮಂಗಳೂರು ವಿವಿ ಮಟ್ಟದ ಆಹ್ವಾನಿತ ತಂಡಗಳ ನಡುವೆ ಶುಕ್ರವಾರ ರಾತ್ರಿ ಆಯೋಜಿಸಲಾದ ಹೊನಲು ಬೆಳಕಿನ 50 ನೇ ವರ್ಷದ ಕಬಡ್ಡಿ ಪಂದ್ಯಾಟದಲ್ಲಿ ಅವರು ಮಾತನಾಡುತಿದ್ದರು.

ಪಂದ್ಯಾಟವನ್ನು ಉಡುಪಿ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಹರಿರಾಂ ಶಂಕರ್ ಉದ್ಘಾಟಿಸಿದರು. ಕ್ರೀಡಾಂಗಣ ಉದ್ಘಾಟಿಸಿ ಮೊಳಹಳ್ಳಿಯ ಜಯರತ್ನ ಚಾರಿಟೇಬಲ್ ಟ್ರಸ್ಟ್ ಅಧ್ಯಕ್ಷ ದಿನೇಶ್ ಹೆಗ್ಡೆ ಮೊಳಹಳ್ಳಿ ಮಾತನಾಡಿದರು. ಉದ್ಯಮಿ ರಾಘವೇಂದ್ರ ಖಾರ್ವಿ ಮಂಗಳೂರು ಬೆಳಕಿನ ವ್ಯವಸ್ಥೆಗೆ ಚಾಲನೆ ನೀಡಿದರು.

ಖಾರ್ವಿಕೇರಿಯ ಶ್ರೀಮಹಾಕಾಳಿ ದೇವಸ್ಥಾನದ ಅಧ್ಯಕ್ಷ ಪ್ರಕಾಶ್ ಆರ್. ಖಾರ್ವಿ ಅಧ್ಯಕ್ಷತೆ ವಹಿಸಿದ್ದರು. ವಿವಿಧ ರಂಗದ ಸಾಧಕರಾದ ಸಮಾಜ ಸೇವೆಯಲ್ಲಿ ರವಿ ಕಟಪಾಡಿ, ಸುಜನ್ ಶೆಟ್ಟಿ, ಶಿಲ್ಪಾ ಹಾಗೂ ಶಿಕ್ಷಣ ಸೇವೆಯಲ್ಲಿ ಆನಂದ ಪೂಜಾರಿ ಇರ್ವತ್ತೂರು ಅವರನ್ನು ಸಮ್ಮಾನಿಸಲಾಯಿತು.

ಸ್ವರ್ಣ ಜುವೆಲ್ಲರ್ಸ್‌ನ ಗುಜ್ಜಾಡಿ ದೀಪಕ್ ನಾಯಕ್, ನ್ಯೂ ಮೆಡಿಕಲ್ ಆಸ್ಪತ್ರೆ ಮುಖ್ಯಸ್ಥ ಡಾ.ರಂಜನ್ ಆರ್.ಶೆಟ್ಟಿ, ಉದ್ಯಮಿಗಳಾದ ಸಹನಾ ಗ್ರೂಪ್ಸ್‌ನ ಸುರೇಂದ್ರ ಶೆಟ್ಟಿ, ಎಂ.ಬಾಲಾಜಿ, ಗಣೇಶ್ ರಾವ್, ಆನಂದ್ ಎಲ್.ಖಾರ್ವಿ, ಮುಕ್ತಾರ್, ಶಫಿ ತಮಿಳುನಾಡು, ತಿಮ್ಮಪ್ಪ ಖಾರ್ವಿ, ಮಂಜುನಾಥ ಆಸ್ಪತ್ರೆಯ ಆಡಳಿತ ಸದಸ್ಯೆ ಪ್ರತಿಮಾ ಕುಲಾಲ್, ಓಕ್ ವುಡ್ ಇಂಡಿಯನ್ ಸ್ಕೂಲ್‌ನ ಆಡಳಿತ ನಿರ್ದೇಶಕಿ ನೀತಾ ಅಭಿನಂದನ್ ಶೆಟ್ಟಿ, ಮತ್ತಿತರರು ಉಪಸ್ಥಿತರಿದ್ದರು.

ಫ್ರೆಂಡ್ಸ್ ಮಧ್ಯಕೇರಿ ಅಧ್ಯಕ್ಷ ಗುರುಪ್ರಸಾದ್ ಖಾರ್ವಿ ಪ್ರಸ್ತಾವಿಸಿ, ಸ್ವಾಗತಿಸಿದರು. ಸುಧೀರ್ ಖಾರ್ವಿ ಪರಿಚಯಿಸಿ, ರೀತು ಖಾರ್ವಿ ಅಭಿನಂದನಾ ಪತ್ರ ವಾಚಿಸಿದರು. ಪತ್ರಕರ್ತ ರಾಜೇಶ್ ಕೆ.ಸಿ. ಕಾರ್ಯಕ್ರಮ ನಿರೂಪಿಸಿದರು. ಆಕಾಶ್ ಖಾರ್ವಿ ವಂದಿಸಿದರು.