Udupi | ಜಿಲ್ಲೆಯಲ್ಲಿ ಅತ್ಯಧಿಕ 7.3ಸೆ.ಮೀ. ಮಳೆ : ಮರ ಬಿದ್ದು 4 ಮನೆಗಳಿಗೆ ಹಾನಿ

ಉಡುಪಿ : ಉಡುಪಿ ಜಿಲ್ಲೆಯಲ್ಲಿ ಈ ಬಾರಿ 24 ಗಂಟೆಗಳ ಅವಧಿಯ ಅತ್ಯಧಿಕ ಮಳೆ ಸೋಮವಾರ ಸುರಿದಿದೆ. ಇಂದು ಬೆಳಗ್ಗೆ 8:30ಕ್ಕೆ ಮುಕ್ತಾಯಗೊಂಡಂತೆ ಹಿಂದಿನ 24 ಗಂಟೆಗಳಲ್ಲಿ ಉಡುಪಿ ಜಿಲ್ಲೆಯಲ್ಲಿ 7.36 ಸೆ.ಮೀ. ಮಳೆ ಸುರಿದಿದೆ. ಜಿಲ್ಲೆಯಲ್ಲಿ ದಿನದ ಅತ್ಯಧಿಕ ಮಳೆ ಹೆಬ್ರಿಯಲ್ಲಿ 8.5ಸೆ.ಮೀ. ಬಿದ್ದಿದೆ.

ಮಳೆ ಕೊರತೆ, ಬರದ ಕೂಗಿನ ನಡುವೆ ಕಳೆದೆರಡು ದಿನಗಳಲ್ಲಿ ಜಿಲ್ಲೆಯಲ್ಲಿ ಮಳೆ ವೇಗವನ್ನು ಪಡೆದುಕೊಳ್ಳುತ್ತಿದೆ. ಇಂದು ಸಹ ಅಪರಾಹ್ನದ ಬಳಿಕ ಮಳೆ ಬಿರುಸು ಪಡೆದುಕೊಳ್ಳುತ್ತಿದೆ. ಆದರೆ ನಿರೀಕ್ಷಿತ ಮಟ್ಟದಲ್ಲಿ ಗಾಳಿ- ಗುಡುಗುಗಳೊಂದಿಗೆ ಬಿರುಸಿನ ಮಳೆ ಸುರಿಯುತ್ತಿಲ್ಲ.

ಇಂದು ಕಾರ್ಕಳದಲ್ಲಿ 83.1ಮಿ.ಮೀ. ಮಳೆಯಾದರೆ, ಕುಂದಾಪುರದಲ್ಲಿ 66.4, ಉಡುಪಿಯಲ್ಲಿ 85.4, ಬೈಂದೂರಿನಲ್ಲಿ 69.9, ಬ್ರಹ್ಮಾವರದಲ್ಲಿ 62.2, ಕಾಪುವಿನಲ್ಲಿ 61.8, ಹೆಬ್ರಿಯಲ್ಲಿ 85.0 ಮಿ.ಮೀ. ಮಳೆಯಾದ ಬಗ್ಗೆ ವರದಿಗಳು ಬಂದಿವೆ.

ನಾಲ್ಕು ಮನೆಗಳಿಗೆ ಹಾನಿ :

ಗಾಳಿ-ಮಳೆಯಿಂದಾಗಿ ಜಿಲ್ಲೆಯ ನಾಲ್ಕು ಮನೆಗಳಿಗೆ ಹಾನಿಯಾದ ವರದಿಯೂ ಇಲ್ಲಿಗೆ ಬಂದಿದೆ. ಅಲ್ಲಲ್ಲಿ ಮರಗಳು ಬಿದ್ದು ಮನೆಗೆ ಹಾನಿಯಾದರೆ, ವಿದ್ಯುತ್ ಕಂಬ ಬಿದ್ದು ಕೆಲವು ಗ್ರಾಮಗಳಲ್ಲಿ ವಿದ್ಯುತ್ ವ್ಯತ್ಯಯ ಉಂಟಾಗಿರುವ ಮಾಹಿತಿಗಳೂ ಬಂದಿವೆ.

ಬ್ರಹ್ಮಾವರ ತಾಲೂಕು ಕೋಟತಟ್ಟು ಗ್ರಾಮದ ರಾಮ ಬಂಗೇರ ಎಂಬವರ ಮನೆಯ ಜಾನುವಾರು ಕೊಟ್ಟಿಗೆಯ ಮೇಲೆ ಮರ ಬಿದ್ದು ಸುಮಾರು 50 ಸಾವಿರದಷ್ಟು ನಷ್ಟವಾಗಿದೆ. ಕುಂದಾಪುರ ತಾಲೂಕು ಕರ್ಕುಂಜೆ ಗ್ರಾಮದ ಮಂಜು ಎಂಬವರ ಮನೆ ಮೇಲೆ ಮರ ಬಿದ್ದು 40,000 ರೂ. ನಷ್ಟವಾಗಿದೆ.

ಇನ್ನು ಬೈಂದೂರಿನ ನಾರಾಯಣ ಎಂಬವರ ಮನೆ ಮೇಲೆ ಮರ ಬಿದ್ದು ಭಾಗಶ: ಹಾನಿಯಾಗಿದ್ದು 50,000ದಷ್ಟು ನಷ್ಟವಾದರೆ, ಕಾಪು ತಾಲೂಕಿನ ಮಜೂರು ಗ್ರಾಮದ ಪುಷ್ಪ ಮೂಲ್ಯ ಅವರ ಮನೆಯ ಮೇಲೆ ಮರ ಬಿದ್ದು ಸುಮಾರು 40ಸಾವಿರ ನಷ್ಟದ ಅಂದಾಜು ಮಾಡಲಾಗಿದೆ.