ವಾಯುಮಾಲಿನ್ಯ | ವಿಷಗಾಳಿಯಿಂದ ರಕ್ಷಣೆ ಹೇಗೆ? ಶ್ವಾಸಕೋಶ ತಜ್ಞರ ಮಹತ್ವದ ಸಲಹೆಗಳು ಇಲ್ಲಿವೆ

ವಾಯುಮಾಲಿನ್ಯವು ವಿಶೇಷವಾಗಿ ಚಳಿಗಾಲದ ತಿಂಗಳುಗಳಲ್ಲಿ ದೀರ್ಘಕಾಲದಿಂದ ಗಂಭೀರ ಕಳವಳಕ್ಕೆ ಕಾರಣವಾಗಿದೆ. ದೀಪಾವಳಿಯ ನಂತರ ವಿವಿಧ ಪ್ರಮುಖ ನಗರಗಳಲ್ಲಿ ವಾಯು ಗುಣಮಟ್ಟ ಸೂಚ್ಯಂಕ ಗಗನಕ್ಕೇರಿರುವ ಕಾರಣ ಜನರು ರಕ್ಷಣಾತ್ಮಕ ಕ್ರಮಗಳನ್ನು ತೆಗೆದುಕೊಳ್ಳುವುದು ಅನಿವಾರ್ಯವಾಗಿದೆ. ವಿಶೇಷವಾಗಿ ಈಗಾಗಲೇ ಆರೋಗ್ಯ ಸಮಸ್ಯೆಗಳಿಂದ ಬಳಲುತ್ತಿರುವವರು ಮತ್ತು ಮಕ್ಕಳು ಹೆಚ್ಚಿನ ಕಾಳಜಿ ವಹಿಸಬೇಕಾಗುತ್ತದೆ. ಬೆಂಗಳೂರಿನ ವಿಕ್ಟೋರಿಯಾ ಆಸ್ಪತ್ರೆಯಲ್ಲಿ ಇಎನ್ಟಿ ತಜ್ಞರು ಮತ್ತು ಸಹಾಯಕ ಪ್ರಾಧ್ಯಾಪಕರಾಗಿರುವ ಡಾ. ಚೈತನ್ಯ ವದ್ವ ಅವರು ಈ ಸಂದರ್ಭದಲ್ಲಿ ಉಸಿರಾಟದ ಆರೋಗ್ಯ ಕಾಪಾಡಿಕೊಳ್ಳಲು ಕೆಲವು ಸಲಹೆಗಳನ್ನು ನೀಡಿದ್ದಾರೆ.

ತೀವ್ರ ವಾಯುಮಾಲಿನ್ಯದ ಸಂದರ್ಭದಲ್ಲಿ ಉಸಿರಾಟದ ವ್ಯವಸ್ಥೆಯನ್ನು ರಕ್ಷಿಸಿಕೊಳ್ಳಲು ಹೊರಾಂಗಣ ಓಡಾಟ ಕಡಿಮೆ ಮಾಡುವುದು ಮತ್ತು N95 ಮಾಸ್ಕ್ ಬಳಸುವುದು ಅತ್ಯಂತ ಮುಖ್ಯವಾಗಿದೆ. ಗಾಳಿಯ ಗುಣಮಟ್ಟ ಸೂಚ್ಯಂಕ ಅಪಾಯಕಾರಿ ಮಟ್ಟದಲ್ಲಿದ್ದಾಗ ಸೂಕ್ಷ್ಮ ಧೂಳಿನ ಕಣಗಳು (PM2.5) ಶ್ವಾಸಕೋಶದ ಆಳಕ್ಕೆ ಸೇರಿ ಗಂಭೀರ ಸಮಸ್ಯೆ ಉಂಟುಮಾಡಬಹುದು.

ಡಾ. ಚೈತನ್ಯ ವದ್ವ ಅವರು ಈ ನಿಟ್ಟಿನಲ್ಲಿ ಉಸಿರಾಟದ ಆರೋಗ್ಯ ಕಾಪಾಡಿಕೊಳ್ಳಲು ಈ ಕೆಳಗಿನ ಸಲಹೆಗಳನ್ನು ನೀಡಿದ್ದಾರೆ.

ಹೊರಾಂಗಣದಲ್ಲಿ ಅನುಸರಿಸಬೇಕಾದ ಸುರಕ್ಷತಾ ಕ್ರಮಗಳು

• ಹೊರಗಿನ ತಿರುಗಾಟ ಕಡಿಮೆಗೊಳಿಸಿ: ಗಾಳಿಯ ಗುಣಮಟ್ಟ ತೀರಾ ಕಳಪೆಯಾಗಿದ್ದಾಗ ಅನವಶ್ಯಕವಾಗಿ ಮನೆಯಿಂದ ಹೊರಗೆ ಹೋಗಬೇಡಿ. ಮುಂಜಾನೆ ಮತ್ತು ಸಂಜೆಯ ವೇಳೆ ಮಾಲಿನ್ಯದ ಪ್ರಮಾಣ ಹೆಚ್ಚಿರುವುದರಿಂದ ಆ ಸಮಯದಲ್ಲಿ ಹೊರಗೆ ಓಡಾಡುವುದನ್ನು ತಪ್ಪಿಸಬೇಕು.

• N95 ಅಥವಾ N99 ಮಾಸ್ಕ್ ಧರಿಸಿ: ಹೊರಗೆ ಹೋಗಲೇಬೇಕಾದ ಅನಿವಾರ್ಯತೆ ಇದ್ದರೆ ಮುಖಕ್ಕೆ ಸರಿಯಾಗಿ ಹೊಂದಿಕೊಳ್ಳುವ N95 ಅಥವಾ N99 ಮಾಸ್ಕ್ ಧರಿಸಿ. ಸಾಮಾನ್ಯ ಬಟ್ಟೆಯ ಅಥವಾ ಸರ್ಜಿಕಲ್ ಮಾಸ್ಕ್ಗಳು ಸೂಕ್ಷ್ಮ ವಿಷಕಾರಿ ಕಣಗಳನ್ನು ತಡೆಯಲು ಸಮರ್ಥವಾಗಿರುವುದಿಲ್ಲ.

• ಹೊರಾಂಗಣ ವ್ಯಾಯಾಮ ನಿಲ್ಲಿಸಿ: ಮಾಲಿನ್ಯ ಹೆಚ್ಚಿರುವ ದಿನಗಳಲ್ಲಿ ಹೊರಗೆ ನಡೆಯುವುದು, ಜಾಗಿಂಗ್ ಅಥವಾ ಕಠಿಣ ವ್ಯಾಯಾಮಗಳನ್ನು ಮಾಡುವುದನ್ನು ನಿಲ್ಲಿಸಿ. ವ್ಯಾಯಾಮ ಮಾಡುವಾಗ ವೇಗವಾಗಿ ಮತ್ತು ದೀರ್ಘವಾಗಿ ಉಸಿರಾಡುವುದರಿಂದ ಹೆಚ್ಚಿನ ಪ್ರಮಾಣದಲ್ಲಿ ಕಲುಷಿತ ಗಾಳಿ ಶ್ವಾಸಕೋಶ ಸೇರುತ್ತದೆ. ಅದರ ಬದಲಾಗಿ ಮನೆಯೊಳಗೆ ಲಘು ವ್ಯಾಯಾಮ ಅಥವಾ ಯೋಗ ಮಾಡಿ.

►ಮನೆಯೊಳಗಿನ ಗಾಳಿಯನ್ನು ಸುರಕ್ಷಿತವಾಗಿರಿಸಿಕೊಳ್ಳಿ

ವಾಯುಮಾಲಿನ್ಯದ ಸಮಯದಲ್ಲಿ ಮನೆಯೊಳಗಿನ ಗಾಳಿಯೂ ಸುರಕ್ಷಿತವಾಗಿರುವಂತೆ ನೋಡಿಕೊಳ್ಳಬೇಕು. ಅದಕ್ಕಾಗಿ ವೈದ್ಯರು ನೀಡಿರುವ ಸಲಹೆಗಳು ಹೀಗಿವೆ:

• ಕಿಟಕಿ ಮತ್ತು ಬಾಗಿಲುಗಳನ್ನು ಮುಚ್ಚಿಡಿ: ಮಾಲಿನ್ಯ ತೀವ್ರವಾಗಿರುವ ಸಂದರ್ಭದಲ್ಲಿ ಹೊರಗಿನ ಹೊಗೆ ಮತ್ತು ಧೂಳು ಮನೆಯೊಳಗೆ ಬರದಂತೆ ಕಿಟಕಿ ಮತ್ತು ಬಾಗಿಲುಗಳನ್ನು ಭದ್ರವಾಗಿ ಮುಚ್ಚಿಡಿ.

• ಏರ್ ಪ್ಯೂರಿಫೈಯರ್ ಬಳಸಿ: ಸಾಧ್ಯವಾದರೆ ಮನೆಯೊಳಗೆ HEPA ಫಿಲ್ಟರ್ ಹೊಂದಿರುವ ಏರ್ ಪ್ಯೂರಿಫೈಯರ್ ಬಳಸಿ. ವಿಶೇಷವಾಗಿ ಮಲಗುವ ಕೋಣೆಯಲ್ಲಿ ಇದನ್ನು ಬಳಸುವುದರಿಂದ ರಾತ್ರಿ ವೇಳೆ ಶುದ್ಧ ಗಾಳಿ ಸೇವಿಸಲು ಸಹಾಯವಾಗುತ್ತದೆ.

• ಒಳಾಂಗಣ ಹೊಗೆಯನ್ನು ತಪ್ಪಿಸಿ: ಮನೆಯೊಳಗೆ ಧೂಪ, ಅಗರಬತ್ತಿ, ಮೇಣದಬತ್ತಿ ಅಥವಾ ಸೊಳ್ಳೆಬತ್ತಿಗಳನ್ನು ಹಚ್ಚುವುದನ್ನು ಕಡಿಮೆ ಮಾಡಿ. ಧೂಮಪಾನವನ್ನು ಸಂಪೂರ್ಣವಾಗಿ ನಿಷೇಧಿಸಿ ಮತ್ತು ಅಡುಗೆ ಮಾಡುವಾಗ ಎಕ್ಸಾಸ್ಟ್ ಫ್ಯಾನ್ ಬಳಸಿ.

►ಆರೋಗ್ಯ ಮತ್ತು ಆಹಾರ ಕ್ರಮಗಳಿಗೂ ಗಮನ ನೀಡಿ

ವಾಯುಮಾಲಿನ್ಯದ ಸಂದರ್ಭದಲ್ಲಿ ಆರೋಗ್ಯ ಮತ್ತು ಆಹಾರ ಕ್ರಮಗಳ ಬಗ್ಗೆಯೂ ಗಮನಹರಿಸಬೇಕಾಗುತ್ತದೆ.

• ಹೆಚ್ಚು ನೀರು ಕುಡಿಯಿರಿ: ದೇಹದಲ್ಲಿ ನೀರಿನಂಶವನ್ನು ಕಾಪಾಡಿಕೊಳ್ಳುವುದರಿಂದ ಉಸಿರಾಟದ ನಾಳಗಳಲ್ಲಿರುವ ಕಫ ತೆಳುವಾಗಿ, ಶ್ವಾಸಕೋಶದೊಳಗೆ ಸೇರಿದ ಕಲ್ಮಶಗಳು ಸುಲಭವಾಗಿ ಹೊರಹೋಗಲು ಸಹಾಯವಾಗುತ್ತದೆ.

• ಪೌಷ್ಟಿಕ ಆಹಾರ ಸೇವಿಸಿ: ವಿಟಮಿನ್ ಸಿ, ವಿಟಮಿನ್ ಇ ಮತ್ತು ಆ್ಯಂಟಿಆಕ್ಸಿಡೆಂಟ್ ಗಳು ಹೆಚ್ಚಿರುವ ನೆಲ್ಲಿಕಾಯಿ, ಕಿತ್ತಳೆ, ಹಸಿರು ಸೊಪ್ಪುಗಳು, ಅರಿಶಿನ, ಶುಂಠಿ ಮತ್ತು ಬಾದಾಮಿಯನ್ನು ಆಹಾರದಲ್ಲಿ ಸೇರಿಸಿ. ಇವು ಮಾಲಿನ್ಯದಿಂದ ಶ್ವಾಸಕೋಶಕ್ಕೆ ಆಗುವ ಉರಿಯೂತವನ್ನು ಕಡಿಮೆ ಮಾಡಲು ನೆರವಾಗುತ್ತವೆ.

• ಉಸಿರಾಟದ ವ್ಯಾಯಾಮ ಮತ್ತು ಹಬೆ: ಮನೆಯೊಳಗಿನ ಶುದ್ಧ ವಾತಾವರಣದಲ್ಲಿ ಪ್ರಾಣಾಯಾಮ ಅಥವಾ ದೀರ್ಘ ಉಸಿರಾಟದ ಅಭ್ಯಾಸ ಮಾಡಿ. ಮೂಗು ಮತ್ತು ಗಂಟಲಿನ ಕಿರಿಕಿರಿಯನ್ನು ಕಡಿಮೆ ಮಾಡಲು ಬಿಸಿ ನೀರಿನ ಹಬೆ ತೆಗೆದುಕೊಳ್ಳುವುದು ತಾತ್ಕಾಲಿಕವಾಗಿ ಆರಾಮ ನೀಡುತ್ತದೆ.

►ಮಕ್ಕಳು, ವೃದ್ಧರು ಮತ್ತು ಗರ್ಭಿಣಿಯರು ಹೆಚ್ಚಿನ ಎಚ್ಚರಿಕೆ ವಹಿಸಿ

ವೈದ್ಯರ ಪ್ರಕಾರ, ವಾಯುಮಾಲಿನ್ಯದ ಸಂದರ್ಭದಲ್ಲಿ ಸೂಕ್ಷ್ಮ ವರ್ಗದವರ ಬಗ್ಗೆ ಹೆಚ್ಚಿನ ಕಾಳಜಿ ವಹಿಸಬೇಕಾಗುತ್ತದೆ. ಮಕ್ಕಳು, ವೃದ್ಧರು, ಗರ್ಭಿಣಿಯರು ಮತ್ತು ಈಗಾಗಲೇ ಅಸ್ತಮಾ, ಸಿಒಪಿಡಿ ಅಥವಾ ಹೃದಯ ಸಂಬಂಧಿ ಕಾಯಿಲೆಗಳಿಂದ ಬಳಲುತ್ತಿರುವವರು ಮಾಲಿನ್ಯಕ್ಕೆ ಬೇಗನೆ ತುತ್ತಾಗುತ್ತಾರೆ. ಇವರು ತಮ್ಮ ನಿಯಮಿತ ಔಷಧಿಗಳನ್ನು ತಪ್ಪದೆ ತೆಗೆದುಕೊಳ್ಳಬೇಕು ಮತ್ತು ಇನ್ಹೇಲರ್ ಗಳನ್ನು ಸದಾ ಜೊತೆಗಿಟ್ಟುಕೊಳ್ಳಬೇಕು.

ನಿರಂತರ ಕೆಮ್ಮು, ಉಸಿರಾಟದ ತೊಂದರೆ, ಎದೆಯಲ್ಲಿ ಬಿಗಿತ, ಗಂಟಲು ನೋವು ಅಥವಾ ಉಸಿರಾಡುವಾಗ ಸೀಟಿಯಂತಹ ಶಬ್ದ ಕಂಡುಬಂದರೆ ನಿರ್ಲಕ್ಷಿಸದೆ ತಕ್ಷಣ ವೈದ್ಯರನ್ನು ಭೇಟಿ ಮಾಡಬೇಕು.

ಮಕ್ಕಳಿಗೆ ಆರೋಗ್ಯಕರ ಅಭ್ಯಾಸಗಳನ್ನು ಪ್ರೋತ್ಸಾಹಿಸುವುದು ಮುಖ್ಯ. ಕೆಲವು ನಡವಳಿಕೆಗಳನ್ನು ತಪ್ಪಿಸಲು ಮಕ್ಕಳಿಗೆ ತಿಳಿಸುವುದರಿಂದ ಮಾಲಿನ್ಯಕ್ಕೆ ಒಡ್ಡಿಕೊಳ್ಳುವುದನ್ನು ಗಮನಾರ್ಹವಾಗಿ ಕಡಿಮೆ ಮಾಡಬಹುದು.

• ಭಾರಿ ದಟ್ಟಣೆ ಇರುವ ಪ್ರದೇಶಗಳನ್ನು ತಪ್ಪಿಸಿ: ಸಾಧ್ಯವಾದರೆ, ವಾಹನಗಳ ಹೊಗೆಯು ವಾಯುಮಾಲಿನ್ಯದ ಗಮನಾರ್ಹ ಮೂಲವಾಗಬಹುದಾದ ಜನನಿಬಿಡ ರಸ್ತೆಗಳ ಬಳಿ ನಡೆಯುವುದು, ಸೈಕ್ಲಿಂಗ್ ಮಾಡುವುದು ಅಥವಾ ಆಟವಾಡುವುದನ್ನು ತಪ್ಪಿಸಿ.

• ಹೊಗೆ ಆವರಿಸಿರುವ ಪ್ರದೇಶಗಳಿಂದ ದೂರವಿರಿ: ಕಾಡಿನ ಬೆಂಕಿಯಿಂದ ಅಥವಾ ಇತರ ಮೂಲಗಳಿಂದ ಹೊಗೆ ಆವರಿಸಿರುವ ಪ್ರದೇಶಗಳಲ್ಲಿ ಮಕ್ಕಳು ಹೆಚ್ಚು ಸಮಯ ಕಳೆಯದಂತೆ ಗಮನಿಸಿ.

• ಆ್ಯಂಟಿಆಕ್ಸಿಡೆಂಟ್ ಗಳಿರುವ ಹಣ್ಣುಗಳನ್ನು ಸೇವಿಸಿ: ಹಣ್ಣುಗಳು, ಹಸಿರು ಸೊಪ್ಪುಗಳು ಮತ್ತು ಸಿಟ್ರಸ್ ಹಣ್ಣುಗಳಂತಹ ಆಹಾರಗಳು ಆ್ಯಂಟಿಆಕ್ಸಿಡೆಂಟ್ ಗಳಿಂದ ಸಮೃದ್ಧವಾಗಿವೆ. ಇವು ಮಾಲಿನ್ಯಕಾರಕಗಳ ಹಾನಿಕಾರಕ ಪರಿಣಾಮಗಳನ್ನು ತಟಸ್ಥಗೊಳಿಸಲು ಸಹಾಯ ಮಾಡುತ್ತವೆ.

• ರೋಗನಿರೋಧಕ ಶಕ್ತಿ ಹೆಚ್ಚಿಸಿ: ವಿಟಮಿನ್ ಸಿ, ಇ ಮತ್ತು ಡಿ ಹಾಗೂ ಒಮೆಗಾ-3 ಕೊಬ್ಬಿನಾಮ್ಲಗಳಿಂದ ಸಮೃದ್ಧವಾಗಿರುವ ಆಹಾರಗಳು ರೋಗನಿರೋಧಕ ಶಕ್ತಿಯನ್ನು ಹೆಚ್ಚಿಸಲು ಸಹಾಯ ಮಾಡುತ್ತವೆ. ಮಾಲಿನ್ಯದಿಂದ ಉಂಟಾಗುವ ಸೋಂಕುಗಳ ವಿರುದ್ಧ ಹೋರಾಡಲು ದೇಹವನ್ನು ಸಜ್ಜುಗೊಳಿಸುತ್ತವೆ.

►ವೈದ್ಯಕೀಯ ಸಲಹೆ ಯಾವಾಗ ಪಡೆಯಬೇಕು?

ಮಾಲಿನ್ಯಕ್ಕೆ ಒಡ್ಡಿಕೊಂಡಾಗ ಕಾಣಿಸಿಕೊಳ್ಳುವ ಅನೇಕ ಲಕ್ಷಣಗಳು ತಾತ್ಕಾಲಿಕವಾಗಿದ್ದರೂ, ಕೆಲವರಿಗೆ ವೈದ್ಯಕೀಯ ಆರೈಕೆಯ ಅಗತ್ಯವಿರಬಹುದು.

• ನಿರಂತರ ಕೆಮ್ಮು: ಕಲುಷಿತ ಪ್ರದೇಶಗಳನ್ನು ತಪ್ಪಿಸಿದ ನಂತರವೂ ಮಗುವಿಗೆ ನಿರಂತರ ಕೆಮ್ಮು ಇದ್ದರೆ, ಅದು ಗಂಭೀರ ಆರೋಗ್ಯ ಸಮಸ್ಯೆಯ ಲಕ್ಷಣವಾಗಿರಬಹುದು.

• ಉಸಿರಾಟದ ಸಮಸ್ಯೆ ಅಥವಾ ಆಯಾಸ: ಅಲ್ಪಾವಧಿಯ ಚಟುವಟಿಕೆಯ ನಂತರ ಉಸಿರಾಟದ ತೊಂದರೆ ಅಥವಾ ಅಸಾಮಾನ್ಯವಾಗಿ ದಣಿದ ಭಾವನೆ ಕಾಣಿಸಿಕೊಂಡರೆ, ವಾಯುಮಾಲಿನ್ಯವು ಮಗುವಿನ ಆರೋಗ್ಯದ ಮೇಲೆ ನಕಾರಾತ್ಮಕ ಪರಿಣಾಮ ಬೀರುತ್ತಿದೆ ಎಂಬುದನ್ನು ಸೂಚಿಸಬಹುದು.

• ಉಬ್ಬಸ ಅಥವಾ ಎದೆಬಿಗಿತ: ಮಗುವಿಗೆ ಉಬ್ಬಸ ಅಥವಾ ಎದೆಬಿಗಿತ ಕಂಡುಬಂದರೆ, ವಿಶೇಷವಾಗಿ ಹೊರಾಂಗಣ ಚಟುವಟಿಕೆಗಳ ನಂತರ ವೈದ್ಯರನ್ನು ಸಂಪರ್ಕಿಸುವುದು ಒಳ್ಳೆಯದು.