ಆನ್‌ಲೈನ್ ಟ್ರೋಲ್‌ ಗಳ ವಿರುದ್ಧ ಸೈಬರ್ ಪೊಲೀಸರಿಗೆ ದೂರು ನೀಡಿದ ವಿಜಯ್‌–ರಶ್ಮಿಕಾ

ರಶ್ಮಿಕಾ ಮಂದಣ್ಣ ಒಂದು ವರ್ಷದವರೆಗೆ ಪ್ರತಿದಿನ ವಿಜಯ್ ಅವರನ್ನು ಮದುವೆಯಾಗುವಂತೆ ಕೇಳಿಕೊಂಡಿದ್ದಾಗಿ ಬಹಿರಂಗಪಡಿಸಿದ ಸಂಚಿಕೆಯು ಟೀಕೆ, ಅಪಹಾಸ್ಯದ ಅಲೆಯನ್ನು ಹುಟ್ಟುಹಾಕಿದೆ.

ಅಭಿಮಾನಿಗಳ ನಡುವೆ ‘ವಿರೋಷ್‌’ ಎಂದು ಪ್ರೀತಿಯಿಂದ ಕರೆಯಲಾಗುವ ನಟರಾದ ರಶ್ಮಿಕಾ ಮಂದಣ್ಣ ಮತ್ತು ವಿಜಯ್ ದೇವರಕೊಂಡ ಅವರು ಸೋಮವಾರ ಹೈದರಾಬಾದ್‌ ನ ಸೈಬರ್ ಕ್ರೈಮ್ ಅಧಿಕಾರಿಗಳಿಗೆ ಔಪಚಾರಿಕ ದೂರು ಸಲ್ಲಿಸಿದ್ದಾರೆ. ಸಾಮಾಜಿಕ ಮಾಧ್ಯಮ ವೇದಿಕೆಗಳಲ್ಲಿ ತಮ್ಮನ್ನು ಗುರಿಯಾಗಿಸಿಕೊಂಡು ನಕಲಿ ವಿಷಯ, ತಿರುಚಿದ ಸ್ಕ್ರೀನ್‌ಶಾಟ್‌ಗಳು, ಸೋಗು ಹಾಕುವಿಕೆ ಹಾಗೂ ಸಂಘಟಿತ ಆನ್‌ಲೈನ್ ಕಿರುಕುಳ ನೀಡುತ್ತಿರುವ ಬಗ್ಗೆ ತನಿಖೆ ನಡೆಸುವಂತೆ ಅವರು ಕೋರಿದ್ದಾರೆ.

ಅಕ್ಟೋಬರ್ 21ರಂದು ‘ಕಾಫಿ ವಿತ್ ಕರಣ್’ ಸೀಸನ್ 9ರಲ್ಲಿ ಕಾಣಿಸಿಕೊಂಡ ಬಳಿಕ ಈ ದೂರು ಸಲ್ಲಿಸಲಾಗಿದೆ. ಈ ಕಾರ್ಯಕ್ರಮದಲ್ಲಿ ದಂಪತಿ ಮೊದಲ ಬಾರಿಗೆ ತಮ್ಮ ಸಂಬಂಧ ಮತ್ತು ಮದುವೆಯ ಬಗ್ಗೆ ಬಹಿರಂಗವಾಗಿ ಮಾತನಾಡಿದ್ದರು. ಒಂದು ವರ್ಷದವರೆಗೆ ಪ್ರತಿದಿನ ವಿಜಯ್ ಅವರನ್ನು ಮದುವೆಯಾಗುವಂತೆ ಕೇಳಿಕೊಂಡಿದ್ದಾಗಿ ರಶ್ಮಿಕಾ ಬಹಿರಂಗಪಡಿಸಿದ ಸಂಚಿಕೆಯು ಟೀಕೆ ಮತ್ತು ಅಪಹಾಸ್ಯದ ಅಲೆಯನ್ನು ಹುಟ್ಟುಹಾಕಿದೆ.

ದಂಪತಿಯ ಖ್ಯಾತಿಗೆ ಹಾನಿ ಮಾಡುವ ಉದ್ದೇಶದಿಂದ ಕಟ್ಟುಕತೆಗಳನ್ನು ಸೃಷ್ಟಿಸಲಾಗಿದೆ ಎಂದು ಅವರ ತಂಡ ಆರೋಪಿಸಿದೆ.

ವಿರೋಷ್ ತಂಡವು ದೂರಿನ ಸ್ವರೂಪವನ್ನು ವಿವರಿಸುವ ಹೇಳಿಕೆಯನ್ನು ಬಿಡುಗಡೆ ಮಾಡಿದೆ. ಸಾಮಾಜಿಕ ಮಾಧ್ಯಮ ವೇದಿಕೆಗಳಲ್ಲಿನ ನಿರ್ದಿಷ್ಟ ಪೋಸ್ಟ್‌ಗಳು ಮತ್ತು ಡಿಜಿಟಲ್ ವಿಷಯಗಳನ್ನು ದೂರಿನಲ್ಲಿ ಗುರುತಿಸಲಾಗಿದೆ. ಸುಳ್ಳು ನಿರೂಪಣೆಗಳು, ಕಲ್ಪಿತ ವಿಷಯ, ತಿರುಚಿದ ಸ್ಕ್ರೀನ್‌ಶಾಟ್‌ಗಳು, ಸೋಗು ಹಾಕುವಿಕೆ ಮತ್ತು ಉದ್ದೇಶಪೂರ್ವಕ ಕಿರುಕುಳದ ನಿದರ್ಶನಗಳನ್ನು ಗುರುತಿಸಲಾಗಿದೆ ಎಂದು ತಂಡ ಆರೋಪಿಸಿದೆ. ಸಂಬಂಧಿತ ಲಿಂಕ್‌ಗಳು ಮತ್ತು ಪೂರಕ ಪುರಾವೆಗಳನ್ನು ಪರಿಶೀಲನೆಗಾಗಿ ಅಧಿಕಾರಿಗಳಿಗೆ ಸಲ್ಲಿಸಲಾಗಿದೆ ಎಂದು ತಿಳಿಸಿದೆ.

“ನಾವು ವಾಕ್‌ಸ್ವಾತಂತ್ರ್ಯ, ವೈಯಕ್ತಿಕ ಅಭಿಪ್ರಾಯಗಳು ಮತ್ತು ಟೀಕೆ ವ್ಯಕ್ತಪಡಿಸುವ ಹಕ್ಕನ್ನು ಸಂಪೂರ್ಣವಾಗಿ ಗೌರವಿಸುತ್ತೇವೆ. ಆದರೆ ಅಭಿಪ್ರಾಯ ವ್ಯಕ್ತಪಡಿಸುವುದಕ್ಕೂ ಕಲ್ಪಿತ, ತಿರುಚಿದ ಅಥವಾ ವಾಸ್ತವಾಂಶಗಳನ್ನು ತಪ್ಪಾಗಿ ಬಿಂಬಿಸುವ ವಿಷಯಗಳನ್ನು ಸತ್ಯವೆಂಬಂತೆ ಪ್ರಸ್ತುತಪಡಿಸುವುದಕ್ಕೂ ಸ್ಪಷ್ಟ ವ್ಯತ್ಯಾಸವಿದೆ” ಎಂದು ಹೇಳಿಕೆಯಲ್ಲಿ ತಿಳಿಸಲಾಗಿದೆ.

ಇದರ ಹಿಂದೆ ಸಂಘಟಿತ ಅಥವಾ ಹಣ ಪಾವತಿಸಿ ನಡೆಸಿದ ಅಭಿಯಾನಗಳು ಇರುವ ಬಗ್ಗೆ ತನಿಖೆ ನಡೆಸುವಂತೆ ನಟರ ತಂಡ ಅಧಿಕಾರಿಗಳನ್ನು ಒತ್ತಾಯಿಸಿದೆ. “ಈ ವಿಷಯದ ಬಗ್ಗೆ ಕಾನೂನಿನ ಪ್ರಕಾರ ತನಿಖೆ ನಡೆಯಲಿದೆ ಮತ್ತು ಸಾಕ್ಷ್ಯಗಳ ಮೂಲಕ ಸಾಬೀತಾಗುವ ಸಂಘಟಿತ ಅಥವಾ ಹಣ ಪಾವತಿಸಿ ನಡೆಸಿದ ಅಭಿಯಾನಗಳು ಸೇರಿದಂತೆ, ದಾರಿತಪ್ಪಿಸುವ ನಿರೂಪಣೆಗಳನ್ನು ಉದ್ದೇಶಪೂರ್ವಕವಾಗಿ ಸೃಷ್ಟಿಸಿ ಹರಡುವ ಕೃತ್ಯಗಳನ್ನು ಸೂಕ್ತವಾಗಿ ನಿಭಾಯಿಸಲಾಗುತ್ತದೆ ಎಂದು ನಾವು ಭಾವಿಸುತ್ತೇವೆ” ಎಂದು ತಂಡ ಹೇಳಿದೆ.

ಸಂಭಾವ್ಯ ಕಾನೂನುಬಾಹಿರ ವಿಷಯವನ್ನು ಪ್ರಕಟಿಸಿದ ಅಥವಾ ಮರುಹಂಚಿಕೆ ಮಾಡಿದ ಪ್ರತಿಯೊಂದು ಗುರುತಿಸಲಾದ ನಿದರ್ಶನವನ್ನೂ ಪ್ರತ್ಯೇಕವಾಗಿ ಪರಿಶೀಲಿಸಬಹುದು. ಅಗತ್ಯವಿರುವ ಕಡೆ ಕಾನೂನು ಪರಿಹಾರಗಳನ್ನು ಪಡೆಯಲಾಗುವುದು ಎಂದು ಹೇಳಿಕೆಯಲ್ಲಿ ಎಚ್ಚರಿಸಲಾಗಿದೆ.

‘ಕಾಫಿ ವಿತ್ ಕರಣ್’ ಸಂಚಿಕೆ ಪ್ರಸಾರವಾದ ಬಳಿಕದ ದಿನಗಳಲ್ಲಿ, “ನನ್ನನ್ನು 100 ಬಾರಿ ಕೇಳಿ” ಎಂಬ ವಿವಾಹದ ಕುರಿತ ಹೇಳಿಕೆಯನ್ನು ಮುಂದಿಟ್ಟುಕೊಂಡು ವಿಜಯ್ ದೇವರಕೊಂಡ ಅವರನ್ನು ಟೀಕಿಸುವ ಪೋಸ್ಟ್‌ಗಳಿಂದ ಸಾಮಾಜಿಕ ಮಾಧ್ಯಮಗಳು ತುಂಬಿದ್ದವು. ದಂಪತಿಯ ಸಂಬಂಧದ ಬಗ್ಗೆ ಹಲವು ಖಾತೆಗಳು ಕೃತ್ರಿಮ ನಿರೂಪಣೆಗಳನ್ನು ಸೃಷ್ಟಿಸುತ್ತಿವೆ ಎಂದು ಆರೋಪಿಸಲಾಗಿದೆ. 2026ರ ಫೆಬ್ರವರಿಯಲ್ಲಿ ಅವರ ವಿವಾಹವಾದ ಎಂಟು ತಿಂಗಳ ಬಳಿಕ ಹರಡಿದ್ದ ಆಧಾರರಹಿತ ವಿಚ್ಛೇದನದ ವದಂತಿಗಳೂ ಇವುಗಳಲ್ಲಿ ಸೇರಿವೆ.

ರಶ್ಮಿಕಾ ಮಂದಣ್ಣ ಮೊದಲಿಗೆ ಈ ಬಗ್ಗೆ ಪ್ರತಿಕ್ರಿಯಿಸಿದ್ದರು. ಸಾಮಾಜಿಕ ಮಾಧ್ಯಮದಲ್ಲಿ ಸುದೀರ್ಘ ಹೇಳಿಕೆ ಪ್ರಕಟಿಸಿದ್ದ ಅವರು, ತಮ್ಮ ನಿರ್ಧಾರವನ್ನು ಗೌರವಿಸುವಂತೆ ಮತ್ತು ದಾರಿತಪ್ಪಿಸುವ ನಿರೂಪಣೆಗಳನ್ನು ನಂಬುವುದನ್ನು ನಿಲ್ಲಿಸುವಂತೆ ಜನರನ್ನು ಒತ್ತಾಯಿಸಿದ್ದರು. ಬಳಿಕ ವಿಜಯ್ ದೇವರಕೊಂಡ ಅವರು ತಮ್ಮ ಪತ್ನಿ ತಮ್ಮ ಜೀವನದ ಅತ್ಯಂತ ಸುಂದರವಾದ ಭಾಗಗಳಲ್ಲಿ ಒಬ್ಬರು ಎಂದು ಬಣ್ಣಿಸುವ ಇನ್‌ಸ್ಟಾಗ್ರಾಂ ಪೋಸ್ಟ್ ಪ್ರಕಟಿಸಿದ್ದರು.