ಚುನಾವಣಾ ಆಯೋಗದ ಹೊಸ ನಿರ್ದೇಶನ: ‘ಮೆಷಿನ್-ರೀಡಬಲ್ ಮತದಾರರ ಪಟ್ಟಿ’ಗೆ ಕಾಂಗ್ರೆಸ್ ಒತ್ತಾಯಿಸುತ್ತಾ ಬಂದಿದ್ದೇಕೆ?

ಚುನಾವಣಾ ಆಯೋಗವು ಗುರುವಾರ (ಅಕ್ಟೋಬರ್ 15) ಚುನಾವಣಾ ಪಟ್ಟಿಗಳ ಮತ್ತೊಂದು ಪರಿಷ್ಕರಣೆಗೆ ನಿರ್ದೇಶನ ಹೊರಡಿಸಿದೆ. ಮತದಾರರ ಪಟ್ಟಿಯ ವಿಶೇಷ ಸಮಗ್ರ ಪರಿಷ್ಕರಣೆ (SIR) ಪ್ರಕ್ರಿಯೆಯ ವಿರುದ್ಧ ಪ್ರತಿಭಟನೆಗಳು ಮುಂದುವರಿದಿರುವ ನಡುವೆಯೇ ಈ ಬೆಳವಣಿಗೆ ನಡೆದಿದೆ.

ಚುನಾವಣೆಗೆ ಸಿದ್ಧವಾಗಿರುವ ಪಂಜಾಬ್, ಉತ್ತರ ಪ್ರದೇಶ ಮತ್ತು ಮಣಿಪುರ ಸೇರಿದಂತೆ 17 ರಾಜ್ಯಗಳು ಹಾಗೂ ಕೇಂದ್ರಾಡಳಿತ ಪ್ರದೇಶಗಳ ಮತದಾರರ ಪಟ್ಟಿಯನ್ನು ವಿಶೇಷ ಸಂಕ್ಷಿಪ್ತ ಪರಿಷ್ಕರಣೆ (SSR) ಮೂಲಕ ಪರಿಷ್ಕರಿಸಲಾಗುವುದು ಎಂದು ನಿರ್ದೇಶನದಲ್ಲಿ ತಿಳಿಸಲಾಗಿದೆ. ಎಸ್ಎಸ್ಆರ್ ಪ್ರಕ್ರಿಯೆಯು ನಿಯಮಿತ ನವೀಕರಣಗಳನ್ನು ಒಳಗೊಂಡಿದ್ದು, ಹೊಸದಾಗಿ ಅರ್ಹರಾದ ಮತದಾರರನ್ನು ಸೇರಿಸುವುದು ಹಾಗೂ ನಿಧನರಾದವರು ಅಥವಾ ಸ್ಥಳಾಂತರಗೊಂಡವರ ಹೆಸರುಗಳನ್ನು ತೆಗೆದುಹಾಕುವುದು ಇದರ ಉದ್ದೇಶವಾಗಿದೆ. ಇದು ಎಸ್ಐಆರ್ ಪ್ರಕ್ರಿಯೆಗಿಂತ ಭಿನ್ನವಾಗಿದೆ. ಎಸ್ಎಸ್ಆರ್ನಲ್ಲಿ ಅಸ್ತಿತ್ವದಲ್ಲಿರುವ ಮತದಾರರ ಹೆಸರುಗಳು ಹೊಸ ಪಟ್ಟಿಗಳಲ್ಲಿ ಸ್ವಯಂಚಾಲಿತವಾಗಿ ಸೇರ್ಪಡೆಯಾಗುತ್ತವೆ ಮತ್ತು ಅವರು ಯಾವುದೇ ಹೆಚ್ಚುವರಿ ದಾಖಲೆಗಳನ್ನು ನೀಡಬೇಕಾಗಿಲ್ಲ.

ಮಾನ್ಯತೆ ಪಡೆದ ಎಲ್ಲ ರಾಜಕೀಯ ಪಕ್ಷಗಳಿಗೆ ಕರಡು ಮತ್ತು ಅಂತಿಮ ಪಟ್ಟಿಗಳ ಪ್ರತಿಗಳನ್ನು ಓದಲು ಸುಲಭವಾದ ಪಿಡಿಎಫ್ ಸ್ವರೂಪದಲ್ಲಿ ಒದಗಿಸುವುದಾಗಿ ತಿಳಿಸಿರುವ ನಿರ್ದೇಶನದ ಒಂದು ಭಾಗವನ್ನು ಕಾಂಗ್ರೆಸ್ ಪಕ್ಷ ಶುಕ್ರವಾರ ಮುನ್ನೆಲೆಗೆ ತಂದಿದೆ. “ಮತದಾರರ ಪಟ್ಟಿಯಲ್ಲಿ ಆಗುತ್ತಿರುವ ಅಕ್ರಮಗಳನ್ನು ಪತ್ತೆಹಚ್ಚಲು ಅನುಕೂಲವಾಗುವಂತೆ ರಾಹುಲ್ ಗಾಂಧಿ ಅವರು ನಿರಂತರವಾಗಿ ಮೆಷಿನ್-ರೀಡಬಲ್ ಡಿಜಿಟಲ್ ಮತದಾರರ ಪಟ್ಟಿಗೆ ಒತ್ತಾಯಿಸುತ್ತಿದ್ದರು” ಎಂದು ಪಕ್ಷದ ಅಧಿಕೃತ ಸಾಮಾಜಿಕ ಜಾಲತಾಣದ ಪೋಸ್ಟ್ ತಿಳಿಸಿದೆ. ಚುನಾವಣಾ ಆಯೋಗವು ಇದಕ್ಕೆ “ಸಂಪೂರ್ಣವಾಗಿ ಸಿದ್ಧವಿರಲಿಲ್ಲ”, ಆದರೆ ಈಗ “ಮಣಿಯಬೇಕಾಗಿ ಬಂದಿದೆ” ಎಂದು ಕಾಂಗ್ರೆಸ್ ಹೇಳಿದೆ.

►‘ಮೆಷಿನ್-ರೀಡಬಲ್’ ಎಂದರೆ ಏನು? :

ಹಿಂದೆ ಬರವಣಿಗೆಯ ರೂಪದಲ್ಲಿದ್ದ ಪಠ್ಯವನ್ನು ಡಿಜಿಟಲ್ ರೂಪಕ್ಕೆ ಬದಲಾಯಿಸಲು ಕೈಯಿಂದಲೇ ಡೇಟಾ ನಮೂದಿಸಬೇಕಾಗಿತ್ತು. ಈ ಕಷ್ಟಕರ ಪ್ರಕ್ರಿಯೆಯ ಜಾಗವನ್ನು ‘ಆಪ್ಟಿಕಲ್ ಕ್ಯಾರೆಕ್ಟರ್ ರೆಕಗ್ನಿಷನ್’ (OCR) ಎಂಬ ತಂತ್ರಜ್ಞಾನ ಆಕ್ರಮಿಸಿಕೊಂಡಿತು. ಇದು ಅಪಾರ ಪ್ರಮಾಣದ ಡೇಟಾವನ್ನು ವಿಶ್ಲೇಷಿಸಿ, ನಮೂನೆ ಗುರುತಿಸುವಿಕೆಯ ಮೂಲಕ ಕಂಪ್ಯೂಟರ್ ಅಕ್ಷರಗಳನ್ನು ಪತ್ತೆಹಚ್ಚಲು ನೆರವಾಗುತ್ತದೆ.

ಈ ಸಂದರ್ಭದಲ್ಲಿ, ಮತದಾರರ ಪಟ್ಟಿಯನ್ನು ಮೆಷಿನ್-ರೀಡಬಲ್ ಮಾಡುವುದರಿಂದ ಮತದಾರರ ಹೆಸರುಗಳು ಮತ್ತು ವಿವರಗಳನ್ನು ಹುಡುಕುವುದು ಸುಲಭವಾಗುತ್ತದೆ.

ಚುನಾವಣಾ ಆಯೋಗದ ನಿರ್ದೇಶನದ ಪ್ರಕಾರ, “ಚುನಾವಣಾ ನೋಂದಣಿ ಅಧಿಕಾರಿ (ERO), ಕರಡು ಮತ್ತು ಅಂತಿಮ ಪಟ್ಟಿ ಪ್ರಕಟಗೊಂಡ ತಕ್ಷಣ ಪ್ರತಿ ಮಾನ್ಯತೆ ಪಡೆದ ರಾಜಕೀಯ ಪಕ್ಷಕ್ಕೆ ಪ್ರತಿಯೊಂದು ಪ್ರತ್ಯೇಕ ಮತಗಟ್ಟೆಯ ಪಟ್ಟಿಯ ಎರಡು ಪ್ರತಿಗಳನ್ನು (ಒಂದು ಹಾರ್ಡ್ ಕಾಪಿ ಮತ್ತು ಓದಬಹುದಾದ ಪಿಡಿಎಫ್ ಸ್ವರೂಪದ ಒಂದು ಸಾಫ್ಟ್ ಕಾಪಿ) ಉಚಿತವಾಗಿ ಒದಗಿಸಬೇಕು.”

ಇದು 1960ರ ಮತದಾರರ ನೋಂದಣಿ ನಿಯಮಗಳ 11(c) ಮತ್ತು 22(c)ಗೆ ಅನುಗುಣವಾಗಿದೆ. ಕರಡು ಸಿದ್ಧಗೊಂಡ ನಂತರ, ‘ರಾಜ್ಯದಲ್ಲಿ ಚುನಾವಣಾ ಆಯೋಗದಿಂದ ಪ್ರತ್ಯೇಕ ಚಿಹ್ನೆಯನ್ನು ಕಾಯ್ದಿರಿಸಲಾಗಿರುವ’ ಪ್ರತಿಯೊಂದು ರಾಜಕೀಯ ಪಕ್ಷಕ್ಕೆ ಪಟ್ಟಿಯ ಪ್ರತಿ ಭಾಗದ ಎರಡು ಪ್ರತಿಗಳನ್ನು ಉಚಿತವಾಗಿ ನೀಡಬೇಕು ಎಂದು ನಿಯಮ 11(c) ಹೇಳುತ್ತದೆ. ಮತದಾರರ ಪಟ್ಟಿಯ ಅಂತಿಮ ಪ್ರಕಟಣೆಯ ನಂತರವೂ ಇದೇ ಪ್ರಕ್ರಿಯೆಯನ್ನು ಅನುಸರಿಸಬೇಕು ಎಂದು ನಿಯಮ 22(c) ಕಡ್ಡಾಯಗೊಳಿಸುತ್ತದೆ.

►ಇದು ಏಕೆ ಪ್ರಾಮುಖ್ಯತೆ ಪಡೆಯುತ್ತದೆ? :

ಇತ್ತೀಚಿನ ವರ್ಷಗಳಲ್ಲಿ ಮತದಾರರ ಪಟ್ಟಿಗಳನ್ನು ಮೆಷಿನ್-ರೀಡಬಲ್ ಮಾಡುವಂತೆ ಕಾಂಗ್ರೆಸ್ ಸತತವಾಗಿ ಆಗ್ರಹಿಸುತ್ತಿದೆ.

ಸದ್ಯಕ್ಕೆ, ಮತದಾರರ ಪಟ್ಟಿಗಳು ‘ಇಮೇಜ್ ಪಿಡಿಎಫ್’ (Image PDF) ರೂಪದಲ್ಲಿ ಲಭ್ಯವಿವೆ. ಅಂದರೆ, ಪಟ್ಟಿಗಳ ಚಿತ್ರಗಳನ್ನು ಸ್ಕ್ಯಾನ್ ಮಾಡಿ ಅಪ್ಲೋಡ್ ಮಾಡಲಾಗಿರುತ್ತದೆ. ‘ಓದಬಹುದಾದ ಪಿಡಿಎಫ್’ (Readable PDF) ಎಂದು ಉಲ್ಲೇಖಿಸಿರುವ ಚುನಾವಣಾ ಆಯೋಗದ ಹೊಸ ನಿರ್ದೇಶನವು ಈ ವ್ಯವಸ್ಥೆಯಲ್ಲಿ ಯಾವುದೇ ಬದಲಾವಣೆಯನ್ನು ತರುತ್ತದೆಯೇ ಎಂಬುದು ಇನ್ನೂ ಸ್ಪಷ್ಟವಾಗಿಲ್ಲ.

ಕಳೆದ ಆಗಸ್ಟ್ನಲ್ಲಿ, ಲೋಕಸಭೆಯ ವಿರೋಧ ಪಕ್ಷದ ನಾಯಕ ರಾಹುಲ್ ಗಾಂಧಿ ಅವರು ಪತ್ರಿಕಾಗೋಷ್ಠಿ ನಡೆಸಿ, ಬೆಂಗಳೂರು ಸೆಂಟ್ರಲ್ ಲೋಕಸಭಾ ಕ್ಷೇತ್ರದ ಮಹದೇವಪುರ ವಿಧಾನಸಭಾ ಕ್ಷೇತ್ರದಲ್ಲಿ ಮತದಾರರ ಪಟ್ಟಿಗೆ ನಕಲಿ ಮತದಾರರ ಹೆಸರುಗಳನ್ನು ಸೇರಿಸಲಾಗಿದೆ ಎಂದು ಆರೋಪಿಸಿದ್ದರು.

ಕಾಂಗ್ರೆಸ್ ವಕ್ತಾರ ಪವನ್ ಖೇರಾ ಅವರು ‘ದಿ ಇಂಡಿಯನ್ ಎಕ್ಸ್ಪ್ರೆಸ್’ ಪತ್ರಿಕೆಯಲ್ಲಿ ಬರೆಯುತ್ತಾ, “ಇಡೀ ದೇಶದ ಮತದಾರರ ಪಟ್ಟಿಯನ್ನು ಆಡಿಟ್ ಮಾಡಲು ಇರುವ ಏಕೈಕ ಮಾರ್ಗವೆಂದರೆ ಈ ಪ್ರಕ್ರಿಯೆಯನ್ನು ಸ್ವಯಂಚಾಲಿತಗೊಳಿಸುವುದು. ನಮಗೆ ಎಲ್ಲ ಕ್ಷೇತ್ರಗಳ ಡಿಜಿಟಲ್/ಮೆಷಿನ್-ರೀಡಬಲ್ ಮತದಾರರ ಪಟ್ಟಿಗಳು ಬೇಕಾಗುತ್ತವೆ. ಆಗ, ಯಾವುದೇ ಪಕ್ಷಪಾತವಿಲ್ಲದ ಕಂಪ್ಯೂಟರ್ ಪ್ರೋಗ್ರಾಂ ಮತದಾರರ ಪಟ್ಟಿಗಳನ್ನು ಕ್ಷೇತ್ರದಿಂದ ಕ್ಷೇತ್ರಕ್ಕೆ ವಿಶ್ಲೇಷಿಸಿ, ಅವುಗಳ ನಿಖರತೆಯ ಬಗ್ಗೆ ನಂಬಲರ್ಹ ವರದಿಯನ್ನು ನೀಡಬಲ್ಲದು” ಎಂದಿದ್ದರು.

2018ರಲ್ಲಿ ಕಾಂಗ್ರೆಸ್ ನಾಯಕರು ಹಾಗೂ ಮಧ್ಯಪ್ರದೇಶದ ಮಾಜಿ ಮುಖ್ಯಮಂತ್ರಿ ಕಮಲ್ ನಾಥ್ ಮತ್ತು ಕಾಂಗ್ರೆಸ್ ನಾಯಕ ಸಚಿನ್ ಪೈಲಟ್ ಅವರು ಚುನಾವಣೆಗೆ ಸಂಬಂಧಿಸಿದ ಈ ವಿಷಯಗಳು ಸೇರಿದಂತೆ ಇತರ ಪ್ರಕ್ರಿಯೆಗಳಿಗೆ ಸಂಬಂಧಿಸಿದ ವಿಚಾರಗಳನ್ನು ಸುಪ್ರೀಂ ಕೋರ್ಟ್ಗೆ ಕೊಂಡೊಯ್ದಿದ್ದರು.

ಆ ಸಮಯದಲ್ಲಿ ‘ದಿ ಇಂಡಿಯನ್ ಎಕ್ಸ್ಪ್ರೆಸ್’ ವರದಿ ಮಾಡಿದಂತೆ, ನ್ಯಾಯಮೂರ್ತಿಗಳಾದ ಎ.ಕೆ. ಸಿಕ್ರಿ ಮತ್ತು ಅಶೋಕ್ ಭೂಷಣ್ ಅವರಿದ್ದ ಪೀಠವು, “ಅರ್ಜಿದಾರರಿಗೆ ನೀಡಲಾದ ಕರಡು ಮತದಾರರ ಪಟ್ಟಿಯ ಸ್ವರೂಪವು ಚುನಾವಣಾ ಕೈಪಿಡಿಯಲ್ಲಿರುವ ಅಗತ್ಯಗಳನ್ನು ಪೂರೈಸುತ್ತದೆ ಎಂಬ ಅಭಿಪ್ರಾಯಕ್ಕೆ ನಾವು ಬಂದಿದ್ದೇವೆ” ಎಂದು ಹೇಳಿ ಅರ್ಜಿಗಳನ್ನು ವಜಾಗೊಳಿಸಿತ್ತು. ಕರಡು ಮತದಾರರ ಪಟ್ಟಿಯ ಪಠ್ಯ (Text) ಆವೃತ್ತಿಯನ್ನು ನೀಡಬೇಕೆಂಬ ತಮ್ಮ ಬೇಡಿಕೆಗೆ ಬೆಂಬಲವಾಗಿ ಕಮಲ್ ನಾಥ್ ಅವರು 2016ರ ಚುನಾವಣಾ ಕೈಪಿಡಿಯ ಅಧ್ಯಾಯ XIರ 11.2.2.2 ವಿಭಾಗವನ್ನು ಉಲ್ಲೇಖಿಸಿದ್ದರು.

‘ವೆಬ್ಸೈಟ್ನಲ್ಲಿ ಕರಡು ಪಟ್ಟಿಯನ್ನು ಹಾಕುವುದು’ ಕುರಿತು ತಿಳಿಸುವ ಈ ವಿಭಾಗವು, “ಹೆಚ್ಚುವರಿಯಾಗಿ, ಕರಡು ಪಟ್ಟಿಯನ್ನು ಅದೇ ದಿನ ಮುಖ್ಯ ಚುನಾವಣಾಧಿಕಾರಿಯ ವೆಬ್ಸೈಟ್ನಲ್ಲಿ ಪಿಡಿಎಫ್ ಸ್ವರೂಪದಲ್ಲಿ ಸಾರ್ವಜನಿಕರಿಗೆ ಲಭ್ಯವಾಗುವಂತೆ ಪ್ರಕಟಿಸಬೇಕು. ಕರಡು ಪಟ್ಟಿಯನ್ನು ವೆಬ್ಸೈಟ್ನಲ್ಲಿ ಪಠ್ಯ ರೂಪದಲ್ಲಿ ಪ್ರಕಟಿಸಬೇಕು ಮತ್ತು ಮತದಾರರ ವಿವರಗಳ ಮುಂದೆ ಯಾವುದೇ ಛಾಯಾಚಿತ್ರಗಳು ಕಾಣಿಸಬಾರದು. ಬದಲಿಗೆ, ಛಾಯಾಚಿತ್ರಕ್ಕಾಗಿ ಮೀಸಲಾದ ಜಾಗದಲ್ಲಿ ‘ಫೋಟೋ ಲಭ್ಯವಿದೆಯೇ ಅಥವಾ ಇಲ್ಲವೇ’ ಎಂಬುದನ್ನು ಸೂಚಿಸಬೇಕು” ಎಂದು ಹೇಳುತ್ತದೆ.

ಇದಕ್ಕೆ ಪ್ರತಿಕ್ರಿಯಿಸಿದ್ದ ಚುನಾವಣಾ ಆಯೋಗವು, ವೆಬ್ಸೈಟ್ನಲ್ಲಿ ಮತದಾರರ ಪಟ್ಟಿಯನ್ನು ಪಠ್ಯ ರೂಪದಲ್ಲೇ ಹಾಕಲಾಗಿದೆ ಮತ್ತು ವೆಬ್ಸೈಟ್ನಲ್ಲಿರುವ ಚಿತ್ರಗಳೂ ಪಠ್ಯ ರೂಪದಲ್ಲೇ ಇವೆ ಎಂದು ತಿಳಿಸಿತ್ತು. “ಮತದಾರರ ಗೌಪ್ಯತೆಯ ಹಿತದೃಷ್ಟಿಯಿಂದ ರಾಜಕೀಯ ಪಕ್ಷಗಳಿಗೆ ಮತದಾರರ ಪಟ್ಟಿಯ ಪ್ರತಿಗಳನ್ನು ಸ್ಕ್ಯಾನ್ ಮಾಡಬಹುದಾದ (scannable) ಪಠ್ಯ ರೂಪದಲ್ಲಿ ನೀಡದಿರಲು ಜಾಗರೂಕತೆಯ ನಿರ್ಧಾರ ತೆಗೆದುಕೊಳ್ಳಲಾಗಿದೆ” ಎಂದು ಸ್ಪಷ್ಟಪಡಿಸಿತ್ತು.

ನಿಯಮಗಳನ್ನು ಪರಿಶೀಲಿಸಿದ ನಂತರ ನ್ಯಾಯಾಲಯವು, “ಮುಖ್ಯ ಚುನಾವಣಾಧಿಕಾರಿಯ ವೆಬ್ಸೈಟ್ನಲ್ಲಿ ಕರಡು ಮತದಾರರ ಪಟ್ಟಿಯನ್ನು ‘ಹುಡುಕಬಹುದಾದ (Searchable) ಪಿಡಿಎಫ್’ ರೂಪದಲ್ಲಿ ಪ್ರಕಟಿಸಬೇಕು ಎಂದು ಈ ವಿಭಾಗವು ಎಲ್ಲಿಯೂ ಹೇಳುವುದಿಲ್ಲ. ಆದ್ದರಿಂದ, ಕರಡು ಮತದಾರರ ಪಟ್ಟಿಯನ್ನು ವೆಬ್ಸೈಟ್ನಲ್ಲಿ ‘ಸರ್ಚೇಬಲ್ ಮೋಡ್’ನಲ್ಲಿ ಹಾಕಬೇಕೆಂದು ಅರ್ಜಿದಾರರು ಹಕ್ಕಾಗಿ ಪ್ರತಿಪಾದಿಸಲು ಸಾಧ್ಯವಿಲ್ಲ. ಇದನ್ನು ಕೇವಲ ‘ಟೆಕ್ಸ್ಟ್ ಮೋಡ್’ನಲ್ಲಿ ಇರಿಸಬೇಕಾಗುತ್ತದೆ ಮತ್ತು ನಿಯಮದಲ್ಲಿ ಹಾಗೆಯೇ ನಿಗದಿಪಡಿಸಲಾಗಿದೆ” ಎಂದು ತೀರ್ಪು ನೀಡಿತ್ತು.

ಅರ್ಜಿದಾರರು ಬಯಸಿದರೆ, “ಅವರು ಸ್ವಂತ ಪ್ರಯತ್ನದಿಂದ ‘ಸರ್ಚೇಬಲ್ ಮೋಡ್’ಗೆ ಪರಿವರ್ತಿಸಿಕೊಳ್ಳಬಹುದು” ಎಂದು ನ್ಯಾಯಾಲಯ ಹೇಳಿತ್ತು.

2025ರಲ್ಲಿ, ‘ಅಸೋಸಿಯೇಷನ್ ಫಾರ್ ಡೆಮಾಕ್ರಟಿಕ್ ರೈಟ್ಸ್’ (ADR) ಎಂಬ ಎನ್ಜಿಒ ಸೇರಿದಂತೆ ಇತರ ಅರ್ಜಿದಾರರು ಪ್ರಸ್ತುತ ನಡೆಯುತ್ತಿರುವ ಎಸ್ಐಆರ್ ಪ್ರಕ್ರಿಯೆಯ ಸಿಂಧುತ್ವವನ್ನು ಪ್ರಶ್ನಿಸಿದಾಗ ಸುಪ್ರೀಂ ಕೋರ್ಟ್ ಮತ್ತೊಮ್ಮೆ ಈ ವಿಷಯವನ್ನು ಪರಿಶೀಲಿಸಿತು. 2003ರ ಮತದಾರರ ಪಟ್ಟಿಯನ್ನು ಮೆಷಿನ್-ರೀಡಬಲ್ ರೂಪದಲ್ಲಿ ನೀಡಲು ಚುನಾವಣಾ ಆಯೋಗ ನಿರಾಕರಿಸುತ್ತಿದೆ ಎಂದು ಅರ್ಜಿದಾರರು ಹೇಳಿದ್ದರು. ಗಮನಿಸಬೇಕಾದ ಸಂಗತಿಯೆಂದರೆ, ಕೊನೆಯದಾಗಿ ಎಸ್ಐಆರ್ ಪ್ರಕ್ರಿಯೆ 2002ರಿಂದ 2004ರವರೆಗೆ ನಡೆದಿತ್ತು.

ಆ ಬಾರಿಯೂ ನ್ಯಾಯಾಲಯವು ಡೇಟಾ ಮೈನಿಂಗ್ ಮತ್ತು ಗೌಪ್ಯತೆಯ ಕುರಿತು ಕಳವಳ ವ್ಯಕ್ತಪಡಿಸಿತು. “ಯಾವುದೇ ವ್ಯಕ್ತಿ ಅಥವಾ ಸಂಸ್ಥೆಯು ವ್ಯಾಪಕವಾಗಿ ಲಭ್ಯವಿರುವ ಡೇಟಾವನ್ನು ವಿಶ್ಲೇಷಿಸಿ ಬಳಸಿಕೊಳ್ಳಲು ಇದು ಅವಕಾಶ ನೀಡುತ್ತದೆ. ಆ ಮಟ್ಟಿಗೆ ಇದು ವ್ಯಕ್ತಿಗತ ಗೌಪ್ಯತೆ ಮತ್ತು ಭಾರತೀಯ ನಾಗರಿಕರ ಡೇಟಾದ ಸಾಮೂಹಿಕ ರಕ್ಷಣೆಯ ವಿಷಯಗಳನ್ನು ಹುಟ್ಟುಹಾಕುತ್ತದೆ. ಇದು ಕೇವಲ ಇಬ್ಬರ ನಡುವಿನ ವಿವಾದವಲ್ಲ. ಇದು ಬಹುಮುಖಿ ಪರಿಣಾಮಗಳನ್ನು ಹೊಂದಿದೆ” ಎಂದು ನ್ಯಾಯಮೂರ್ತಿ ಜೋಯ್ಮಲ್ಯ ಬಾಗ್ಚಿ ಅಭಿಪ್ರಾಯಪಟ್ಟಿದ್ದರು.

ಮೇ 2026ರಲ್ಲಿ ನೀಡಿದ ತನ್ನ ತೀರ್ಪಿನಲ್ಲಿ ನ್ಯಾಯಾಲಯವು ಎಸ್ಐಆರ್ ಪ್ರಕ್ರಿಯೆಯನ್ನು ಎತ್ತಿಹಿಡಿಯಿತು.

ಸೌಜನ್ಯ: indianexpress.com