ʼವಾರ್ತಾಭಾರತಿʼ ಪಾರದರ್ಶಕ, ಸಮತೋಲಿತ, ಜವಾಬ್ದಾರಿಯುತ ಸುದ್ದಿ ಪ್ರಸಾರ ಮಾಡುತ್ತಿದೆ: ಎಂ.ಇ. ಮೂಳೂರು, ಮಿಲಾನೋ ಆಪ್ಟಿಕ್ ಗ್ರೂಪ್

ಮಂಗಳೂರು: 24ನೇ ವರ್ಷಕ್ಕೆ ಪ್ರವೇಶಿಸುತ್ತಿರುವ ನಮ್ಮ ಹೆಮ್ಮೆಯ ವಾರ್ತಾಭಾರತಿಗೆ ಹೃತ್ಪೂರ್ವಕ ಅಭಿನಂದನೆಗಳು. ಕಳೆದ ಎರಡುವರೆ ದಶಕಗಳಿಂದ ಈ ಪತ್ರಿಕೆಯು ಪಾರದರ್ಶಕ, ಸಮತೋಲಿತ ಹಾಗೂ ಜವಾಬ್ದಾರಿಯುತ ಸುದ್ದಿಗಳ ಪ್ರಸಾರದ ಮೂಲಕ ಓದುಗರ ವಿಶ್ವಾಸ ಮತ್ತು ಗೌರವವನ್ನು ಗಳಿಸಿದೆ. ಸತ್ಯಾಂಶ ಗಳನ್ನು ಯಾವುದೇ ಪೂರ್ವಾಗ್ರಹವಿಲ್ಲದೆ, ಅತ್ಯಂತ ಸೂಕ್ಷ್ಮತೆ ಮತ್ತು ಜವಾಬ್ದಾರಿಯಿಂದ ಜನರಿಗೆ ತಲುಪಿಸುವಲ್ಲಿ ಪತ್ರಿಕೆಯು ತೋರಿಸಿರುವ ಬದ್ಧತೆ ನಿಜಕ್ಕೂ ಶ್ಲಾಘನೀಯ.

ಇಂದಿನ ಸಂದರ್ಭದಲ್ಲಿ ಕೆಲವು ಮಾಧ್ಯಮಗಳು ತಮ್ಮದೇ ಆದ ವಿಧಾನಗಳು ಮತ್ತು ವರದಿ ಶೈಲಿಗಳ ಮೂಲಕ ಸಾಮಾಜಿಕ ಅಶಾಂತಿ, ಧಾರ್ಮಿಕ ಧ್ರುವೀಕರಣ, ಪರಸ್ಪರ ಅವಿಶ್ವಾಸ ಹಾಗೂ ಸಮಾಜದಲ್ಲಿ ವಿಭಜನೆಯ ಮನೋಭಾವವನ್ನು ಹೆಚ್ಚಿಸುವಂತಹ ವಾತಾವರಣ ನಾವು ಕಾಣುತ್ತಿದ್ದೇವೆ. ಇಂತಹ ಸವಾಲಿನ ಪರಿಸ್ಥಿತಿಯಲ್ಲಿಯೂ, ನಮ್ಮ ಪ್ರದೇಶದಲ್ಲಿ ಸಾಮಾಜಿಕ ಒಳಗೊಳ್ಳುವಿಕೆ, ಪರಸ್ಪರ ಗೌರವ, ವಿಶ್ವಾಸ ಮತ್ತು ಸೌಹಾರ್ದತೆಯನ್ನು ಬೆಳೆಸಲು ಈ ಪತ್ರಿಕೆಯು ತನ್ನ ಕೈಲಾದಷ್ಟು ಪ್ರಾಮಾಣಿಕ ಪ್ರಯತ್ನ ಮಾಡುತ್ತಿರುವುದು ಅತ್ಯಂತ ಪ್ರಶಂಸನೀಯ. ಸಾಮಾಜಿಕ, ಸಾಂಪ್ರದಾಯಿಕ ಮತ್ತು ಜಾತೀಯತೆಯ ಈ ರೋಗಗಳನ್ನು ನಿಯಂತ್ರಸಲು ಮಾಧ್ಯಮ ಯಾವ ಪಾತ್ರವಹಿಸಬಹುದು ಎಂಬುವುದಕ್ಕೆ ನಮ್ಮ ವಾರ್ತಾಭಾರತಿ ಒಂದು ಅಪರೂಪದ ಉತ್ತಮ ಉದಾಹರಣೆ.

ಸಮಾಜದ ವಿವಿಧ ವರ್ಗಗಳು ಮತ್ತು ಸಮುದಾಯಗಳ ನಡುವೆ ಸೇತುವೆಯಾಗಿ ಕಾರ್ಯನಿರ್ವಹಿಸುವ ಮೂಲಕ ಜಾತ್ಯತೀತತೆ, ಶಾಂತಿ, ಸೌಹಾರ್ದತೆ ಮತ್ತು ಪರಸ್ಪರ ಸಹಬಾಳ್ವೆಯ ಮೌಲ್ಯಗಳನ್ನು ಬಲಪಡಿಸುವಲ್ಲಿ ಈ ಪತ್ರಿಕೆಯ ಪಾತ್ರ ಮಹತ್ವದ್ದಾಗಿದೆ. ಜವಾಬ್ದಾರಿಯುತ ಪತ್ರಿಕೋದ್ಯಮಕ್ಕೆ ಇಂದು ಹಿಂದೆಂದಿಗಿಂತಲೂ ಹೆಚ್ಚಿನ ಅಗತ್ಯವಿರುವ ಸಂದರ್ಭದಲ್ಲಿ, ಇಂತಹ ಸಕಾರಾತ್ಮಕ ಮತ್ತು ಸಮನ್ವಯದ ಧೋರಣೆಯನ್ನು ಹೊಂದಿರುವ ಮಾಧ್ಯಮ ಸಂಸ್ಥೆಗಳು ಸಮಾಜಕ್ಕೆ ಅತ್ಯಂತ ಅಗತ್ಯ.

ಈ ಸ್ಮರಣೀಯ ಸಂದರ್ಭದಲ್ಲಿ, ಪತ್ರಿಕೆಯ ಸಮಸ್ತ ಬಳಗದ ಸಮರ್ಪಣೆ, ಪರಿಶ್ರಮ ಹಾಗೂ ಸಮಾಜದ ಒಳಿತಿಗಾಗಿ ನೀಡುತ್ತಿರುವ ಅಮೂಲ್ಯ ಸೇವೆಯನ್ನು ಹೃತ್ಪೂರ್ವಕವಾಗಿ ಅಭಿನಂದಿಸುತ್ತೇನೆ.

ಈ ಪತ್ರಿಕೆಯ ಉತ್ತಮ ಕಾರ್ಯವನ್ನು ಇನ್ನಷ್ಟು ಬಲಪಡಿಸಲು ಎಲ್ಲಾ ಓದುಗರು, ಹಿತೈಷಿಗಳು, ಸಂಘ-ಸಂಸ್ಥೆಗಳು ಹಾಗೂ ಸಮಾಜದ ಪ್ರತಿಯೊಬ್ಬರೂ ತಮ್ಮ ಸಂಪೂರ್ಣ ಬೆಂಬಲ ಮತ್ತು ಪ್ರೋತ್ಸಾಹವನ್ನು ನೀಡಬೇಕೆಂದು ಹೃತ್ಪೂರ್ವಕವಾಗಿ ಮನವಿ ಮಾಡುತ್ತೇನೆ.

ಈ ಪತ್ರಿಕೆಯು ಮುಂದಿನ ದಿನಗಳಲ್ಲಿಯೂ ಸತ್ಯ, ನ್ಯಾಯ, ಶಾಂತಿ, ಸೌಹಾರ್ದತೆ ಮತ್ತು ಸಾಮಾಜಿಕ ಸಾಮರಸ್ಯದ ಧ್ವನಿಯಾಗಿ ಇನ್ನೂ ಹಲವು ದಶಕಗಳ ಕಾಲ ಯಶಸ್ವಿಯಾಗಿ ಮುನ್ನಡೆದು, ನಮ್ಮ ಸಮಾಜದಲ್ಲಿ ಪರಸ್ಪರ ವಿಶ್ವಾಸ ಮತ್ತು ಸಹಬಾಳ್ವೆಯನ್ನು ಮತ್ತಷ್ಟು ಗಟ್ಟಿಗೊಳಿಸುವ ಸಮೃದ್ಧ ಭಾರತಿಯ, ಸೌಹಾರ್ದ ಭಾರತಿಯ, ಸುಶಾಂತ ಭಾರತಿಯ ಮುನ್ನುಡಿಯ ಧ್ವನಿಯಾಗಿ ಇನ್ನಷ್ಟು ಬೆಳೆಯಲಿ.

-ಎಂ ಇ ಮೂಳೂರು, ಮಿಲಾನೋ ಆಪ್ಟಿಕ್ ಗ್ರೂಪ್