ಪುತ್ತೂರು: ಹೊನಲು ಬೆಳಕಿನ ಕೋಟಿ ಚೆನ್ನಯ ಜೋಡುಕರೆ ಕಂಬಳ ಫಲಿತಾಂಶ

ಪುತ್ತೂರು: ಪುತ್ತೂರಿನ ಮಹತೋಭಾರ ಶ್ರೀ ಮಹಾಲಿಂಗೇಶ್ವರ ದೇವಳದ ಮುಂಭಾಗದಲ್ಲಿನ ದೇವರ ಮಾರು ಗದ್ದೆಯಲ್ಲಿ ಶನಿವಾರ ಮತ್ತು ರವಿವಾರ ನಡೆದ 31ನೇ ವರ್ಷದ ಹೊನಲು ಬೆಳಕಿನ ಕೋಟಿ-ಚೆನ್ನಯ ಜೋಡುಕರೆ ಕಂಬಳ ಕೂಟದಲ್ಲಿ ಒಟ್ಟು 187 ಜೋಡಿ ಕೋಣಗಳು ಭಾಗವಹಿಸಿದ್ದು, ಕನೆಹಲಗೆ ವಿಭಾಗದಲ್ಲಿ ಬೋಳಾರ ತ್ರಿಶಾಲ್ ಕೆ.ಪೂಜಾರಿಯವರು ಕೋಣಗಳು, ಹಗ್ಗ ಹಿರಿಯ ವಿಭಾಗದಲ್ಲಿ ನಂದಳಿಕೆ ಶ್ರೀಕಾಂತ್ ಭಟ್ ಅವರ ಕೋಣಗಳು ಮತ್ತು ನೇಗಿಲು ಹಿರಿಯ ವಿಭಾಗದಲ್ಲಿ ನಕ್ರೆ ಮಹೋದರ ನಿವಾಸದ ಇಶಾನಿ ತುಕ್ರ ಭಂಡಾರಿ ಅವರ ಕೋಣಗಳು ಪ್ರಥಮ ಸ್ಥಾನ ಪಡೆದು 2 ಪವನ್ ಚಿನ್ನದ ಬಹುಮಾನದೊಂದಿಗೆ ಕೋಟಿ-ಚೆನ್ನಯ ಟ್ರೋಫಿ ಪಡೆದುಕೊಂಡಿವೆ.

ಕಂಬಳ ಫಲಿತಾಂಶ

ಕನೆಹಲಗೆ ವಿಭಾಗ : ಕನಹಲಗೆ ವಿಭಾಗದಲ್ಲಿ ಒಟ್ಟು 6 ಜತೆ ಕೋಣಗಳು ಭಾಗವಹಿಸಿದ್ದು, ಬೈಂದೂರಿನ ಮಹೇಶ್ ಪೂಜಾರಿ ಅವರು ಓಡಿಸಿದ ಬೋಳಾರ ತ್ರಿಶಾಲ್ ಕೆ ಪೂಜಾರಿ ಅವರ ಕೋಣಗಳು ಆರೂವರೆ ಕೋಲು ನಿಶಾನಿಗೆ ನೀರು ಹಾಯಿಸುವ ಮೂಲಕ ಪ್ರಥಮ ಬಹುಮಾನ ಪಡೆದುಕೊಂಡಿದೆ.

ಹಗ್ಗ ಹಿರಿಯ ವಿಭಾಗ: 15ಜತೆ ಕೋಣಗಳು ಭಾಗವಹಿಸಿದ್ದ ಹಗ್ಗ ಹಿರಿಯ ವಿಭಾಗದಲ್ಲಿ ಬೈಂದೂರಿನ ಮಂಜುನಾಥ ಗೌಡ ಅವರು ಓಡಿಸಿದ ನಂದಳಿಕೆ ಶ್ರೀಕಾಂತ್ ಭಟ್ ಅವರ ಕೋಣಗಳು (ಪ್ರ) ಮತ್ತು ಬಾರಾಡಿ ನತೇಶ್ ಅವರು ಓಡಿಸಿದ ನೂಜಿಪ್ಪಾಡಿಯ ಡಾ.ಪ್ರವೀಣ್ ಹೊಳ್ಳ ಅವರ ಕೋಣಗಳು (ದ್ವಿ) ಬಹುಮಾನ ಪಡೆದಿವೆ.

40 ಜತೆ ಕೋಣಗಳು ಪಾಲ್ಗೊಂಡಿದ್ದ ನೇಗಿಲು ಹಿರಿಯ ವಿಭಾಗದಲ್ಲಿ ಮೊಳ ಆದೀಶ್ ಪೂಜಾರಿ ಅವರು ಓಡಿಸಿದ ನಕ್ರೆ ಮಹೋದರ ನಿವಾಸಿ ಇಶಾನಿ ತುಕ್ರ ಭಂಡಾರಿ ಅವರ ಕೋಣಗಳು (ಪ್ರ), ಮತ್ತು ಬೈಂದೂರು ಮಂಜುನಾಥ ಗೌಡ ಅವರು ಓಡಿಸಿದ ಇರುವೈಲು ಪಾಣಿಲ ಬೀಡ ಪೂಜಾರಿ ಅವರ ಕೋಣಗಳು (ದ್ವಿ) ಬಹುಮಾನ ಗಳಿಸಿವೆ.

4 ಜತೆ ಕೋಣಗಳು ಭಾಗವಹಿಸಿದ್ದ ಅಡ್ಡ ಹಲಗೆ ವಿಭಾಗದಲ್ಲಿ ಭಟ್ಕಳದ ಹರೀಶ್ ಅವರು ಓಡಿಸಿದ ನಾರಾವಿಯ ಯುವರಾಜ್ ಜೈನ್ ಅವರ ಕೋಣಗಳು (ಪ್ರ), ಮತ್ತು ಸಾವ್ಯ ಗಂಗಯ್ಯ ಪೂಜಾರಿ ಅವರು ಓಡಿಸಿದ ಬೋಳಾರ ತ್ರಿಶಾಲ್.ಕೆಪೂಜಾರಿ ಅವರ ಕೋಣಗಳು (ದ್ವಿ) ಪ್ರಶಸ್ತಿ ಪಡೆದುಕೊಂಡಿವೆ.

25ಜತೆ ಕೋಣಗಳು ಪಾಲ್ಗೊಂಡ ಹಗ್ಗ ಕಿರಿಯ ವಿಭಾಗದಲ್ಲಿ ಭಟ್ಕಳದ ಶಂಕರ್ ಅವರು ಓಡಿಸಿದ ಸುರತ್ಕಲ್ ಪಾಂಚಜನ್ಯ ಯೋಗೀಶ್ ಪೂಜಾರಿ ಅವರ ಕೋಣಗಳು (ಪ್ರ), ಹಾಗೂ ಬೈಂದೂರಿನ ಮಂಜುನಾಥ ಗೌಡ ಅವರು ಓಡಿಸಿದ ನೂಜಿಪ್ಪಾಡಿ ಚಂದ್ರಶೇಖರ ಹೊಳ್ಳ ಅವರ ಕೋಣಗಳು (ದ್ವಿ) ಬಹುಮಾನ ಪಡೆದಿವೆ.

97 ಜತೆ ಕೋಣಗಳು ಭಾಗವಹಿಸಿದ್ದ ನೇಗಿಲು ಕಿರಿಯ ವಿಭಾಗದಲ್ಲಿ ಮಾಸ್ತಕಟ್ಟೆ ಸ್ವರೂಪ್ ಅವರು ಓಡಿಸಿದ ಮುನಿಯಾಲ್ ಉದಯಕುಮಾರ್ ಶೆಟ್ಟಿ ಅವರ ಕೋಣಗಳು ಮತ್ತು ಉಜಿರೆಹೊಸಮನೆ ಸ್ಪಂದನ ಶೆಟ್ಟಿ ಅವರು ಓಡಿಸಿದ ಉಡುಪಿಯ ಬ್ರಹ್ಮಗಿರಿ ಪ್ರಥಮ ಗಣನಾಥ ಹೆಗ್ಡೆ ಅವರ ಕೋಣಗಳು 11.56 ಸೆಕೆಂಡರ್‍ಗಳಲ್ಲಿ ಗುರಿಮುಟ್ಟುವ ಮೂಲಕ ಸಮಾನ ಸಾಧನೆ ದಾಖಲಿಸಿವೆ.