ದಿಲ್ಲಿ ಓಪನ್: ಭೂಪತಿ-ಭಾಂಬ್ರಿಗೆ ಡಬಲ್ಸ್ ಕಿರೀಟ

ಹೊಸದಿಲ್ಲಿ, ಫೆ.20: ಗಾಯದ ಸಮಸ್ಯೆಯಿಂದ ಚೇತರಿಸಿಕೊಂಡು ಸಕ್ರಿಯ ಟೆನಿಸ್‌ಗೆ ಮರಳಿರುವ ಭಾರತದ ಹಿರಿಯ ಆಟಗಾರ ಮಹೇಶ್ ಭೂಪತಿ ಕಿರಿಯ ಆಟಗಾರ ಯೂಕಿ ಭಾಂಬ್ರಿ ಜೊತೆಗೂಡಿ ಮೂರು ವರ್ಷಗಳ ಬಳಿಕ ದಿಲ್ಲಿ ಓಪನ್ ಡಬಲ್ಸ್ ಪ್ರಶಸ್ತಿಯನ್ನು ಜಯಿಸಿದ್ದಾರೆ.

ಶನಿವಾರ ನಡೆದ ಡಬಲ್ಸ್ ಫೈನಲ್ ಪಂದ್ಯದಲ್ಲಿ ಅತ್ಯುತ್ತಮವಾಗಿ ಆಡಿದ ಭೂಪತಿ ಹಾಗೂ ಭಾಂಬ್ರಿ ಸ್ವದೇಶದ ಹಾಲಿ ಚಾಂಪಿಯನ್ ಸಾಕೇತ್ ಮೈನೇನಿ ಹಾಗೂ ಸನಮ್ ಸಿಂಗ್‌ರನ್ನು 6-3, 4-6, 10-5 ಸೆಟ್‌ಗಳ ಅಂತರದಿಂದ ಮಣಿಸಿದರು.

ಬೆಲ್ಜಿಯಂನ ಕಿಮ್ಮರ್ ಕಾಪೆಜನ್ಸ್‌ರನ್ನು ನೇರ ಸೆಟ್‌ಗಳಿಂದ ಮಣಿಸಿ ಸಿಂಗಲ್ಸ್ ಪ್ರಶಸ್ತಿಯನ್ನು ಜಯಿಸಿದ್ದ ಮೈನೇನಿಗೆ ಡಬಲ್ಸ್ ಪ್ರಶಸ್ತಿ ಜಯಿಸಲು ಸಾಧ್ಯವಾಗಲಿಲ್ಲ.

ಮಂಡಿನೋವಿಗೆ ಚಿಕಿತ್ಸೆ ಪಡೆಯುತ್ತಾ ಐಪಿಟಿಎಲ್ ಟೂರ್ನಿ ಆಯೋಜಿಸುವುದರಲ್ಲಿ ನಿರತರಾಗಿದ್ದ ಭೂಪತಿ ಕಳೆದ 2 ವರ್ಷಗಳಿಂದ ಸಕ್ರಿಯ ಟೆನಿಸ್‌ನಿಂದ ದೂರ ಉಳಿದಿದ್ದರು. ಭೂಪತಿ 2013ರ ಮಾರ್ಚ್‌ನಲ್ಲಿ ಕೊನೆಯ ಬಾರಿ ದುಬೈ ಓಪನ್ ಪ್ರಶಸ್ತಿಯನ್ನು ಜಯಿಸಿದ್ದರು.

ದಿಲ್ಲಿ ಓಪನ್‌ನ ಮಹಿಳೆಯರ ಸಿಂಗಲ್ಸ್ ಪ್ರಶಸ್ತಿ ಉಝ್ಬೆಕಿಸ್ತಾನದ ಸಬಿನಾ ಶರಿಪೋವಾ ಪಾಲಾಯಿತು. ಶನಿವಾರ ನಡೆದ ಸಿಂಗಲ್ಸ್ ಫೈನಲ್‌ನಲ್ಲಿ ಶರಿಪೋವಾ ಅವರು ಸರ್ಬಿಯದ ನೈನಾ ಸ್ಟೊಜಾಂಕೊವಿಕ್‌ರನ್ನು 3-6, 6-2, 6-4 ಸೆಟ್‌ಗಳ ಅಂತರದಿಂದ ಮಣಿಸಿದ್ದಾರೆ.