ಸೈನಾ, ಸಾಯ್ ಪ್ರಣೀತ್‌ಗೆ ಥಾಯ್ಲೆಂಡ್ ಪ್ರಶಸ್ತಿ ಕನಸು
Update: 2017-05-29 17:51 GMT
ಬಾಂಕಾಕ್, ಮೇ 28: ಇಲ್ಲಿ ಮಂಗಳವಾರ ಆರಂಭವಾಗಲಿರುವ ಥಾಯ್ಲೆಂಡ್ ಗ್ರಾಂಡ್ ಪ್ರಿ ಗೋಲ್ಡ್ ಟೂರ್ನಮೆಂಟ್‌ನಲ್ಲಿ ಭಾರತದ ಸೈನಾ ನೆಹ್ವಾಲ್ ಮತ್ತು ಸಾಯ್ ಪ್ರಣೀತ್ ಪ್ರಶಸ್ತಿ ಗೆಲ್ಲುವ ನಿಟ್ಟಿನಲ್ಲಿ ಪ್ರಯತ್ನ ನಡೆಸಲಿದ್ದಾರೆ.
ಸುದೀರ್‌ಮನ್ ಕಪ್ ಮಿಕ್ಸೆಡ್ ಟೀಮ್ ಚಾಂಪಿಯನ್‌ಶಿಪ್‌ನಲ್ಲಿ ಪ್ರಶಸ್ತಿ ಕಳೆದುಕೊಂಡ ಬಳಿಕ ಇದೀಗ ಥಾಯ್ಲೆಂಡ್ ಓಪನ್‌ನಲ್ಲಿ ಪ್ರಶಸ್ತಿ ಗೆಲ್ಲುವ ಕನಸು ಕಾಣುತ್ತಿದ್ದಾರೆ.
ನಂ.2 ಸೈನಾ ಅವರು ಸ್ಲೋವಾಕಿಯಾದ ಮಾರ್ಟಿನಾ ರೆಪಿಸ್ಕಾ ಅವರನ್ನು ಎದುರಿಸುವ ಮೂಲಕ ಥಾಯ್ಲೆಂಡ್ ಓಪನ್‌ನಲ್ಲಿ ಅಭಿಯಾನ ಆರಂಭಿಸಲಿದ್ದಾರೆ.
ಒಂದು ವೇಳೆ ಸೈನಾ ಫೈನಲ್ ತಲುಪಿದರೆ ಅವರಿಗೆ ಮಾಜಿ ವಿಶ್ವ ಚಾಂಪಿಯನ್ ಹಾಗೂ ಅಗ್ರ ಶ್ರೇಯಾಂಕದ ರಚನಾಕ್ ಇಂಟನಾನ್ ಅವರ ಸವಾಲು ಎದುರಾಗುವ ಸಾಧ್ಯತೆ ಇದೆ.
ಸಿಂಗಾಪುರ ಓಪನ್ ಚಾಂಪಿಯನ್ ಆಗಿರುವ ಪ್ರಣೀತ್ ಇನ್ನೊಂದು ಪ್ರಶಸ್ತಿ ಗೆಲ್ಲುವ ಕಡೆಗೆ ನೋಡುತ್ತಿದ್ದಾರೆ.
ಸಿಂಗಾಪುರ ಓಪನ್‌ನಲ್ಲಿ ಪ್ರಣೀತ್ ಅವರು ಕೆ.ಶ್ರೀಕಾಂತ್‌ರನ್ನು ಮಣಿಸಿ ಕಿರೀಟ ಧರಿಸಿದ್ದರು. ಕಾಮನ್‌ವೆಲ್ತ್ ಗೇಮ್ಸ್‌ನಲ್ಲಿ ಕಂಚು ಜಯಿಸಿದ ಆರ್‌ಎಂವಿ ಗುರುಸಾಯ್‌ದತ್ತ್ ಗಾಯದಿಂದ ಚೇತರಿಸಿಕೊಂಡು ವಾಪಸಾಗಿದ್ದಾರೆ. ಗುರುಸಾಯ್‌ದತ್ತ್ ಅವರಿಗೆ ಇಂಡೋನೆಷ್ತಾದ ಪಾಂಜಿ ಅಹ್ಮದ್ ವೌಲಾನಾ ಸವಾಲು ನಿರೀಕ್ಷಿಸಲಾಗಿದೆ. ಕಾಮನ್‌ವೆಲ್ತ್ ಗೇಮ್ಸ್ ಚಾಂಪಿಯನ್ ಪಿ.ಕಶ್ಯಪ್ ಅವರಿಗೆ ಸ್ಲೊವೆಕಿಯಾದ ಮಿಲಾನ್ ಡ್ರಾಟ್ವಾ ಎದುರಾಳಿಯಾಗಿದ್ದಾರೆ.
ಈ ಟೂರ್ನಮೆಂಟ್‌ನಲ್ಲಿ ಭಾರತದ ಸೌರಭ್ ವರ್ಮ, ಜೋಶಿ ಸೋದರರಾದ ಪ್ರತುಲ್ ಮತ್ತು ಆದಿತ್ಯ,ಮುಂಬೈನ ಹರ್ಷೆಲ್ ದಾನಿ, ಶ್ರೇಯಾಂಶ್ ಜೈಸ್ವಾಲ್ ಮತ್ತು ರಾಹುಲ್ ಯಾದವ್ ಪುರುಷರ ಸಿಂಗಲ್ಸ್‌ನಲ್ಲಿ ಅಡಲಿದ್ಧಾರೆ.
ಮಹಿಳೆಯರ ಸಿಂಗಲ್ಸ್‌ನಲ್ಲಿ ರಾಷ್ಟ್ರೀಯ ಚಾಂಪಿಯನ್ ರಿತುಪರ್ಣ ದಾಸ್, ರುತ್ವಿಕಾ ಶಿವಾನಿ ಗಾದ್ರೆ, ರೇಶ್ಮಾ ಕಾರ್ತಿಕ್, ಸಾಯ್ ಚೌಕಾ, ಸೈಲಿ ರಾಣೆ, ಮತ್ತು ಶ್ರೀಕೃಷ್ಣ ಪ್ರಿಯಾ ಕುದ್ರಾವಳ್ಳಿ, ಡಬಲ್ಸ್‌ನಲ್ಲಿ ಜಕ್ಕಮ್‌ಪುಡಿ ಮೆಘಾನ ಮತ್ತು ಪೂರ್ವಿಶಾ ಎಸ್.ರಾಮ್, ಅರ್ಜುನ್ ಎಂ.ಆರ್ ಮತ್ತು ರಾಮಚಂದ್ರ ಶ್ಲೋಕ್, ಫ್ರಾನ್ಸಿಸ್ ಅಲ್ವಿನ್, ಕೆ.ತರುಣ್ ಭಾಗವಹಿಸಲಿದ್ದಾರೆ.