ಸಿರಿಯ: ಸರಕಾರಿ ಪಡೆಗಳ ದಾಳಿಗೆ 12 ನಾಗರಿಕರು ಬಲಿ

ಡಮಾಸ್ಕಸ್ (ಸಿರಿಯ), ಮೇ 27: ವಾಯುವ್ಯ ಸಿರಿಯದಲ್ಲಿರುವ ಬಂಡುಕೋರರ ನೆಲೆಯೊಂದರ ಮೇಲೆ ಸರಕಾರಿ ಪಡೆಗಳು ರವಿವಾರ ನಡೆಸಿದ ವಾಯುದಾಳಿಯಲ್ಲಿ 12 ನಾಗರಿಕರು ಪ್ರಾಣ ಕಳೆದುಕೊಂಡಿದ್ದಾರೆ ಎಂದು ಸಿರಿಯ ಮಾನವಹಕ್ಕುಗಳ ವೀಕ್ಷಣಾಲಯ ತಿಳಿಸಿದೆ.

ಇದ್ಲಿಬ್ ಪ್ರಾಂತದ ಮಾರೆಟ್ ಅಲ್-ನೂಮನ್ ಪಟ್ಟಣದ ಮಾರುಕಟ್ಟೆಯೊಂದರ ಮೇಲೆ ನಡೆದ ದಾಳಿಯಲ್ಲಿ ನಾಲ್ವರು ನಾಗರಿಕರು ಮೃತಪಟ್ಟಿದ್ದು, ಮೃತರಲ್ಲಿ ಚಿಕ್ಕ ಹೆಣ್ಣುಮಗುವೊಂದು ಸೇರಿದೆ.

ಇದ್ಲಿಬ್‌ನ ಇತರೆಡೆಗಳಲ್ಲಿ ಸರಕಾರಿ ಪಡೆಗಳು ನಡೆಸಿದ ವಾಯು ದಾಳಿಯಲ್ಲಿ ಇತರ 8 ನಾಗರಿಕರು ಪ್ರಾಣ ಕಳೆದುಕೊಂಡಿದ್ದಾರೆ.

ಕಳೆದ ವರ್ಷದ ಸೆಪ್ಟಂಬರ್‌ನಲ್ಲಿ ನಡೆದ ಬಫರ್ ರೆನ್ (ಸುರಕ್ಷಾ ವಲಯ) ಒಪ್ಪಂದದ ಪ್ರಕಾರ, ಸರಕಾರಿ ಪಡೆಗಳು ಇದ್ಲಿಬ್ ಮೇಲೆ ದಾಳಿ ನಡೆಸುವಂತಿಲ್ಲ. ಆದರೆ, ಎಪ್ರಿಲ್‌ನಿಂದ ಸರಕಾರಿ ಪಡೆಗಳು ಮತ್ತು ರಶ್ಯದ ಪಡೆಗಳು ವಾಯು ದಾಳಿಯನ್ನು ಹೆಚ್ಚಿಸಿವೆ.