2ನೇ ವಿಶ್ವ ಮಹಾಯುದ್ಧದ ಬಳಿಕ ಮೊದಲ ಬಾರಿ ವಿಂಬಲ್ಡನ್ ರದ್ದು
Update: 2020-04-01 18:10 GMT
ಲಂಡನ್, ಎ.1: ಜಾಗತಿಕ ಮಟ್ಟದಲ್ಲಿ ಪಸರಿಸಿರುವ ಕೊರೋನ ವೈರಸ್‌ನಿಂದಾಗಿ ಈ ವರ್ಷ ಆಲ್ ಇಂಗ್ಲೆಂಡ್ ಕ್ಲಬ್‌ನಲ್ಲಿ ನಡೆಯಬೇಕಾಗಿದ್ದ ಗ್ರಾನ್‌ಸ್ಲಾಮ್ ಟೂರ್ನಿಯನ್ನು ರದ್ದುಪಡಿಸಲಾಗಿದೆ ಎಂದು ವಿಂಬಲ್ಡನ್ ಆಯೋಜಕರು ಬುಧವಾರ ಘೋಷಿಸಿದರು. ಈ ಮೂಲಕ ಎರಡನೇ ವಿಶ್ವ ಮಹಾಯುದ್ಧದ ಬಳಿಕ ಮೊದಲ ಬಾರಿ ವಿಂಬಲ್ಡನ್ ಟೆನಿಸ್ ಟೂರ್ನಿ ರದ್ದಾಗಿದೆ.
‘‘ಕೋರೊನ ವೈರಸ್ ಸಾಂಕ್ರಾಮಿಕ ರೋಗಕ್ಕೆ ಸಂಬಂಧಿಸಿದ ಸಾರ್ವಜನಿಕ ಆರೋಗ್ಯ ಸಮಸ್ಯೆಗಳಿಂದಾಗಿ 2020ರ ವಿಂಬಲ್ಡನ್ ಚಾಂಪಿಯನ್‌ಶಿಪ್‌ನ್ನು ರದ್ದುಪಡಿಸಲು ಆಲ್ ಇಂಗ್ಲೆಂಡ್ ಲಾನ್ ಟೆನಿಸ್ ಚಾಂಪಿಯನ್‌ಶಿಪ್ ನಿರ್ಧರಿಸಿದೆ ಎಂದು ತಿಳಿಸಲು ವಿಷಾದಿಸುತ್ತೇವೆ. 134ನೇ ಆವೃತ್ತಿಯ ಚಾಂಪಿಯನ್‌ಶಿಪ್‌ನ್ನು ಈ ವರ್ಷದ ಬದಲಿಗೆ 2021ರ ಜೂನ್ 28ರಿಂದ ಜುಲೈ 11ರ ತನಕ ಆಯೋಜಿಸಲು ನಿಧರ್ರ್ರಿಸಲಾಗಿದೆ’’ ಎಂದು ವಿಂಬಲ್ಡನ್ ಸಂಘಟಕರು ಪ್ರಕಟನೆಯೊಂದರಲ್ಲಿ ತಿಳಿಸಿದ್ದಾರೆ.
ಫ್ರೆಂಚ್ ಓಪನ್ ಟೆನಿಸ್ ಟೂರ್ನಮೆಂಟ್ ವಿವಾದಾತ್ಮಕ ಸನ್ನಿವೇಶದಲ್ಲಿ ಮುಂದೂಡಲ್ಪಟ್ಟಿರುವುದು ಸೇರಿದಂತೆ ಜೂನ್ 7ರ ತನಕ ಎಲ್ಲ ಟೂರ್ನಿಗಳು ರದ್ದಾಗಿವೆ. ಇದೀಗ ಆಲ್ ಇಂಗ್ಲೆಂಡ್ ಕ್ಲಬ್‌ನಲ್ಲಿ ನಡೆಯಲಿರುವ ಏಕೈಕ ಹುಲ್ಲುಹಾಸಿನ ಗ್ರಾನ್‌ಸ್ಲಾಮ್ ಟೂರ್ನಮೆಂಟ್ ಕೂಡ ರದ್ದಾಗುವುದರೊಂದಿಗೆ ಈ ವರ್ಷ ಟೆನಿಸ್ ಪಾಲಿಗೆ ನಿರಾಶದಾಯಕ ವರ್ಷವಾಗಿ ಪರಿಣಮಿಸಿದೆ.
ದಕ್ಷಿಣ ಲಂಡನ್‌ನಲ್ಲಿ ಜೂ.29ರಿಂದ ಎರಡು ವಾರಗಳ ಕಾಲ ವಿಂಬಲ್ಡನ್ ಟೂರ್ನಿ ನಿಗದಿಯಾಗಿತ್ತು. ನೊವಾಕ್ ಜೊಕೊವಿಕ್ ಹಾಗೂ ಸಿಮೊನಾ ಹಾಲೆಪ್ ಕ್ರಮವಾಗಿ ಪುರುಷರ ಹಾಗೂ ಮಹಿಳಾ ಸಿಂಗಲ್ಸ್ ಪ್ರಶಸ್ತಿಯನ್ನು ತನ್ನಲ್ಲೇ ಉಳಿಸಿಕೊಳ್ಳಲು ಸಜ್ಜಾಗಿದ್ದರು.
ಇಡೀ ವಿಶ್ವವೇ ಕೋವಿಡ್-19ರಿಂದ ಬಾಧಿತವಾಗಿರುವ ಹಿನ್ನೆಲೆಯಲ್ಲಿ ಟೂರ್ನಮೆಂಟ್ ರದ್ದಾಗಿದೆ. ವಿಂಬಲ್ಡನ್ ಮುಖ್ಯಸ್ಥರು ಹಾಗೂ ಗೇಮ್ಸ್ ಆಡಳಿತ ಮಂಡಳಿಯು ಮಂಗಳವಾರ ನಡೆಸಿದ ಸಭೆಯಲ್ಲಿ ಟೂರ್ನಿಯನ್ನು ರದ್ದುಪಡಿಸುವ ಕುರಿತು ಮಾತುಕತೆ ನಡೆದಿದೆ.
ಪ್ರೇಕ್ಷಕರಿಲ್ಲದೆ ಗ್ರಾನ್‌ಸ್ಲಾಮ್ ಟೂರ್ನಮೆಂಟ್ ನಡೆಸುವ ಸಾಧ್ಯತೆಯ ಕುರಿತು ಆಯೋಜಕರು ಈ ಹಿಂದೆಯೇ ನಿರಾಕರಿಸಿದ್ದರು. ಟೂರ್ನಿಯನ್ನು ಮುಂದೂಡುವುದರಿಂದಲೂ ತನ್ನದೇ ಆದ ಸಮಸ್ಯೆ ಆಗುವ ಸಾಧ್ಯತೆಯಿದೆ. ಯಾವುದೇ ನಿರ್ಧಾರಕ್ಕೆ ಮೊದಲು ಇನ್ನಷ್ಟು ಸಮಯ ಕಾಯಬೇಕೆಂದು ಮೂರು ಬಾರಿಯ ವಿಂಬಲ್ಡನ್ ಚಾಂಪಿಯನ್ ಬೊರಿಸ್ ಬೆಕೆರ್ ಮಂಗಳವಾರ ವಿನಂತಿಸಿದ್ದರು.
‘‘ವಿಂಬಲ್ಡನ್ ಕುರಿತು ಯಾವುದೇ ನಿರ್ಧಾರ ಕೈಗೊಳ್ಳುವ ಮೊದಲು ಎಪ್ರಿಲ್ ಅಂತ್ಯದ ತನಕ ಕಾಯುವ ವಿಶ್ವಾಸ ನನಗಿದೆ. ಜುಲೈ ಮೊದಲ ವಾರ ಟೂರ್ನಿ ನಿಗದಿಯಾಗಿದೆ...ತಾಳ್ಮೆ ಅತ್ಯಂತ ಮುಖ್ಯ’’ ಎಂದು ಬೆಕೆರ್ ಟ್ವೀಟ್ ಮಾಡಿದ್ದರು.
ಈ ವರ್ಷದ ವಿಂಬಲ್ಡನ್ ಟೂರ್ನಿ ರದ್ದುಗೊಂಡಿರುವ ಹಿನ್ನೆಲೆಯಲ್ಲಿ ಟೆನಿಸ್ ಲೋಕದ ದಿಗ್ಗಜ ರೋಜರ್ ಫೆಡರರ್, ಸೆರೆನಾ ವಿಲಿಯಮ್ಸ್ ಹಾಗೂ ವೀನಸ್ ವಿಲಿಯಮ್ಸ್ ಅವರ ಕೊನೆಯ ಬಾರಿ ಆಲ್ ಇಂಗ್ಲೆಂಡ್ ಕ್ಲಬ್‌ನಲ್ಲಿ ಆಡುವ ಕನಸು ಭಗ್ನವಾಗಿದೆ. 2021ರ ವಿಂಬಲ್ಡನ್ ಚಾಂಪಿಯನ್ ವೇಳೆಗೆ ಫೆಡರರ್ ಹಾಗೂ ಸೆರೆನಾಗೆ 40 ವರ್ಷ ಪ್ರಾಯವಾಗುತ್ತದೆ. ವೀನಸ್ ಮುಂದಿನ ವರ್ಷ 41ನೇ ವಯಸ್ಸಿಗೆ ಕಾಲಿಡುತ್ತಾರೆ. ಕಳೆದ ವರ್ಷ ಹಾಲೆಪ್ ವಿರುದ್ಧ ಸೋಲನುಭವಿಸಿರುವ ಸೆರೆನಾ, 23 ಗ್ರಾನ್‌ಸ್ಲಾಮ್ ಸಿಂಗಲ್ಸ್ ಪ್ರಶಸ್ತಿಯನ್ನು ಜಯಿಸಿದ್ದು, ಮಾರ್ಗರೆಟ್ ಕೋರ್ಟ್ ಅವರ ದಾಖಲೆಯನ್ನು ಮುರಿಯಲು ಇನ್ನೊಂದು ಪ್ರಶಸ್ತಿಯ ಅಗತ್ಯವಿದೆ. ಈ ಅವಕಾಶಕ್ಕಾಗಿ ಸೆರೆನಾ ದೀರ್ಘ ಸಮಯದಿಂದ ಕಾಯುತ್ತಿದ್ದಾರೆ. ಫ್ರೆಂಚ್ ಓಪನ್ ಟೂರ್ನಿಯನ್ನು ಮೇ 24ರಿಂದ ಸೆಪ್ಟಂಬರ್ 20ಕ್ಕೆ ಮುಂದೂಡುವ ಏಕಪಕ್ಷೀಯ ನಿರ್ಧಾರದಿಂದಾಗಿ ಫ್ರೆಂಚ್ ಟೆನಿಸ್ ಒಕ್ಕೂಟ ತೀವ್ರ ಆಕ್ರೋಶಕ್ಕೆ ಗುರಿಯಾಗಿತ್ತು.