ಮಹಾರಾಷ್ಟ್ರ: ಒಂದೇ ದಿನ 32 ಕೋವಿಡ್ ಸೋಂಕಿತರ ಸಾವು

ಹೊಸದಿಲ್ಲಿ, ಎ.30: ಭಾರತದಲ್ಲಿ ಬುಧವಾರ 74 ಮಂದಿ ಕೊರೋನ ವೈರಸ್ ಸೋಂಕಿತರು ಮೃತಪಟ್ಟಿದ್ದು, ಮಹಾರಾಷ್ಟ್ರದಲ್ಲಿ ಗರಿಷ್ಠ ಅಂದರೆ 32 ರೋಗಿಗಳು ಸಾವನ್ನಪ್ಪಿದ್ದಾರೆ. ಇದರಿಂದಾಗಿ ದೇಶದಲ್ಲಿ ಈ ಸಾಂಕ್ರಾಮಿಕಕ್ಕೆ ಬಲಿಯಾದವರ ಸಂಖ್ಯೆ 1,080ನ್ನು ತಲುಪಿದಂತಾಗಿದೆ. ಬುಧವಾರ ದೇಶದಲ್ಲಿ ಒಟ್ಟು 1,635 ಹೊಸ ಪ್ರಕರಣಗಳು ಬೆಳಕಿಗೆ ಬಂದಿದ್ದು, ಇದು ಮಂಗಳವಾರದ ಸಂಖ್ಯೆಗಿಂತ 200ರಷ್ಟು ಕಡಿಮೆ.

ದೇಶದಲ್ಲಿ ಕೊರೋನ ಸೋಂಕಿತರ ಒಟ್ಟು ಸಂಖ್ಯೆ 33,045ಕ್ಕೇರಿದೆ. ಭಾರತದ ಹೆಗ್ಗಳಿಕೆಯೆಂದರೆ ಈ ಪೈಕಿ ಶೇಕಡ 24ರಷ್ಟು ಅಂದರೆ 8,000ಕ್ಕೂ ಅಧಿಕ ರೋಗಿಗಳು ಗುಣಮುಖರಾಗಿದ್ದಾರೆ. ದಿಲ್ಲಿಯಲ್ಲಿ 2 ಸಾವು ಸಂಭವಿಸಿದ್ದರೂ, ಹೊಸ ಪ್ರಕರಣಗಳ ಸಂಖ್ಯೆ ಗಣನೀಯವಾಗಿ ಇಳಿದಿದೆ. ಮಂಗಳವಾರ 206 ಪ್ರಕರಣಗಳು ದೃಢಪಟ್ಟಿದ್ದ ರಾಷ್ಟ್ರರಾಜಧಾನಿಯಲ್ಲಿ ಬುಧವಾರ 125 ಪ್ರಕರಣಗಳಷ್ಟೇ ಕಾಣಿಸಿಕೊಂಡಿವೆ.

ಗುಜರಾತ್‌ನಲ್ಲಿ 16, ಮಧ್ಯಪ್ರದೇಶದಲ್ಲಿ 10, ರಾಜಸ್ಥಾನದಲ್ಲಿ ಮೂರು, ತಮಿಳುನಾಡು ಹಾಗೂ ಬಂಗಾಳದಲ್ಲಿ ತಲಾ 2 ಹಾಗೂ ಕರ್ನಾಟಕದಲ್ಲಿ ಒಂದು ಸಾವು ಬುಧವಾರ ಸಂಭವಿಸಿದೆ. ಮಹಾರಾಷ್ಟ್ರದಲ್ಲಿ ಸತತ ಎರಡನೇ ದಿನ 30ಕ್ಕೂ ಹೆಚ್ಚು ಸಾವು ಸಂಭವಿಸಿದ್ದರೂ, ಹೊಸ ಸೋಂಕು ಪ್ರಕರಣಗಳ ಸಂಖ್ಯೆ ಮಂಗಳವಾರ 729 ಇದ್ದುದು ಬುಧವಾರ 597ಕ್ಕೆ ಇಳಿದಿದೆ. ರಾಜ್ಯದ ಶೇಕಡ 80ರಷ್ಟು ಪ್ರಕರಣಗಳು ದಾಖಲಾಗಿರುವ ಮುಂಬೈನಲ್ಲಿ 475 ಹೊಸ ಪ್ರಕರಣಗಳು ವರದಿಯಾಗಿವೆ.

ಮುಂಬೈನಲ್ಲಿ ಒಟ್ಟು 6,644 ಪ್ರಕರಣಗಳು ದಾಖಲಾಗಿದ್ದು, ಇಡೀ ಮಹಾರಾಷ್ಟ್ರದಲ್ಲಿ ಸೋಂಕಿತರ ಸಂಖ್ಯೆ 10 ಸಾವಿರದ ಸನಿಹದಲ್ಲಿದೆ. ರಾಜ್ಯದಲ್ಲಿ ಸೋಂಕಿತರ ನಿಖರ ಸಂಖ್ಯೆ 9,915. ರಾಜ್ಯದಲ್ಲಿ 432 ಮಂದಿ ಜೀವ ಕಳೆದುಕೊಂಡಿದ್ದು, ಮುಂಬೈ ನಗರದಲ್ಲೇ 270 ಮಂದಿ ಬಲಿಯಾಗಿದ್ದಾರೆ.