80 ವರ್ಷ ಮೀರಿದವರಿಗೆ ಕ್ಯಾಬಿನ್ ಲಗೇಜ್‌ಗೆ ಅವಕಾಶವಿಲ್ಲ
Update: 2020-05-12 17:09 GMT
ಹೊಸದಿಲ್ಲಿ: ದೇಶದಲ್ಲಿ ಮಾರ್ಚ್ 25ರಿಂದ ಸ್ಥಗಿತಗೊಂಡಿರುವ ದೇಶಿ ವಿಮಾನಯಾನ ಸೇವೆ ಪುನರಾರಂಭಕ್ಕೆ ಕರಡು ನಿಗದಿತ ಕಾರ್ಯಾಚರಣೆ ವಿಧಿವಿಧಾನ (ಎಸ್‌ಓಪಿ) ಸಿದ್ಧಪಡಿಸಲಾಗಿದ್ದು, ಇದರ ಅನ್ವಯ ವಿಮಾನಯಾನ ಆರಂಭದ ಬಳಿಕ ಸದ್ಯಕ್ಕೆ ಕ್ಯಾಬಿನ್ ಲಗೇಜ್‌ಗೆ ಅವಕಾಶವಿಲ್ಲ ಹಾಗೂ 80 ವರ್ಷ ಮೀರಿದವರು ವಿಮಾನಯಾನ ಕೈಗೊಳ್ಳುವಂತಿಲ್ಲ.
ಮೊದಲ ಹಂತದಲ್ಲಿ ವಾಣಿಜ್ಯ ವಿಮಾನಗಳ ಹಾರಾಟಕ್ಕೆ ಸರ್ಕಾರ ಈ ಮಾರ್ಗಸೂಚಿಯ ಕರಡು ಸಿದ್ಧಪಡಿಸಿದೆ. ನಾಗರಿಕ ವಿಮಾನಯಾನ ಸಚಿವಾಲಯವು ಪ್ರಯಾಣಿಕರು, ವಿಮಾನಯಾನ ಕಂಪನಿಗಳು, ವಿಮಾನ ನಿಲ್ದಾಣ ನಿರ್ವಹಣೆ ಮಾಡುವವರ ಸಭೆಯನ್ನು ಆಯೋಜಿಸಿದ್ದು, ಸಾಮಾಜಿಕ ಅಂತರವನ್ನು ಕಾಪಾಡುವ ನಿಟ್ಟಿನಲ್ಲಿ ಮಧ್ಯದ ಆಸನವನ್ನು ಖಾಲಿ ಬಿಡುವುದು ಕಡ್ಡಾಯ. ಟರ್ಮಿನಲ್ ನಲ್ಲಿ ಗೇಟ್‌ಗಳಲ್ಲಿ ದಟ್ಟಣೆಯನ್ನು ಕಡಿಮೆ ಮಾಡುವ ಉದ್ದೇಶದಿಂದ ಪ್ರಯಾಣಿಕರ ಗುರುತಿನ ಚೀಟಿ ತಪಾಸಣೆ ಇರುವುದಿಲ್ಲ.
ವಿಮಾನಯಾನ ಕ್ಷೇತ್ರದ ಎಲ್ಲ ಹಕ್ಕುದಾರರು ಇದನ್ನು ಪರಾಮರ್ಶಿಸಿ ವಾರದ ಒಳಗಾಗಿ ಸಲ್ಲಿಸುವಂತೆ ಸೂಚಿಸಲಾಗಿದೆ.
ಕರಡು ನಿಯಮಾವಳಿ ಅನ್ವಯ ಮನೆಯಲ್ಲೇ ವೆಬ್ ಚೆಕ್-ಇನ್ ಪೂರ್ಣಗೊಳಿಸಿದ ಬಳಿಕ ಎಲ್ಲ ಪ್ರಯಾಣಿಕರು ವಿಮಾನ ನಿಲ್ದಾಣಕ್ಕೆ ಆಗಮಿಸಬೇಕು. ವಿಮಾನ ನಿಲ್ದಾಣದಲ್ಲಿ ವರದಿ ಮಾಡಿಕೊಳ್ಳುವ ಅವಧಿಯನ್ನು ಎರಡು ಗಂಟೆ ಹೆಚ್ಚಿಸಲಾಗಿದೆ. ಮುಂದಿನ ಆರು ಗಂಟೆಯ ಅವಧಿಯಲ್ಲಿ ಹೊರಡುವ ವಿಮಾನಗಳ ಪ್ರಯಾಣಿಕರನ್ನಷ್ಟೇ ವಿಮಾನ ನಿಲ್ದಾಣದೊಳಕ್ಕೆ ಬಿಡಲಾಗುತ್ತದೆ.
ಕ್ಯಾಬಿನ್ ಲಗೇಜ್ ಒಯ್ಯಲು ಅವಕಾಶವಿಲ್ಲ. ಅಂತೆಯೇ 20 ಕೆ.ಜಿ.ಗಿಂತ ಕಡಿಮೆ ತೂಕದ ಒಂದು ಚೆಕ್ ಇನ್ ಬ್ಯಾಗೇಜ್‌ಗೆ ಮಾತ್ರ ಅವಕಾಶ ಇರುತ್ತದೆ. ವಯಸ್ಸು ಅಥವಾ ದೇಹದ ಉಷ್ಣತೆ ಅಧಿಕ ಇರುವ ಕಾರಣದಿಂದ ವಿಮಾನ ಏರಲು ಅವಕಾಶ ಆಗದಿದ್ದರೆ, ಅಂಥವರು ಯಾವುದೇ ದಂಡ ಇಲ್ಲದೇ ಪ್ರಯಾಣ ದಿನಾಂಕವನ್ನು ಬದಲಿಸಿಕೊಳ್ಳಲು ಅವಕಾಶ ಇರುತ್ತದೆ.
ಎಲ್ಲ ಪ್ರಯಾಣಿಕರು ಆರೋಗ್ಯಸೇತು ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳುವುದು ಕಡ್ಡಾಯ. ಗ್ರೀನ್ ಸ್ಟೇಟಸ್ ಹೊಂದಿರುವವರು ಮಾತ್ರ ವಿಮಾನ ನಿಲ್ದಾಣದೊಳಗೆ ಪ್ರವೇಶಿಸಬಹುದು.
ವಿಮಾನಯಾನ ಕಂಪನಿಗಳು ಚೆಕ್-ಇನ್ ಕೌಂಟರ್‌ಗಳನ್ನು ವಿಮಾನ ಹೊರಡುವ ಮೂರು ಗಂಟೆ ಮೊದಲು ತೆರೆಯಬೇಕು ಹಾಗೂ ವಿಮಾನ ಹೊರಡುವ 60-75 ನಿಮಿಷ ಮುನ್ನ ಮುಚ್ಚಬೇಕು. ವಿಮಾನ ಹೊರಡುವ ಒಂದು ಗಂಟೆ ಮುನ್ನ ವಿಮಾನ ಏರುವ ಪ್ರಕ್ರಿಯೆ ಆರಂಭವಾಗಿ 20 ನಿಮಿಷ ಮೊದಲು ಕೊನೆಗೊಳ್ಳುತ್ತದೆ.