ಜಮ್ಮು ಕಾಶ್ಮೀರದಲ್ಲಿ ಗ್ರೆನೇಡ್ ದಾಳಿ: 6 ಮಂದಿ ನಾಗರಿಕರಿಗೆ ಗಾಯ

ಜಮ್ಮುಕಾಶ್ಮೀರ, ಆ. 31: ಶ್ರೀನಗರದಿಂದ ಬಾರಮುಲ್ಲಾದತ್ತ ಸೋಮವಾರ ಸಂಚರಿಸುತ್ತಿದ್ದ ಸೇನಾ ಬೆಂಗಾವಲು ಸರಣಿ ವಾಹನಗಳನ್ನು ಗುರಿಯಾಗಿರಿಸಿ ಶಂಕಿತ ಉಗ್ರರು ಎಸೆದ ಗ್ರೆನೇಡ್ ರಸ್ತೆ ಬದಿಯಲ್ಲಿ ಸ್ಫೋಟಗೊಂಡ ಪರಿಣಾಮ 6 ಮಂದಿ ನಾಗರಿಕರು ಗಾಯಗೊಂಡಿದ್ದಾರೆ.

ಬಾರಮುಲ್ಲಾದಿಂದ ಶ್ರೀನಗರದತ್ತ ತೆರಳುತ್ತಿದ್ದ ಸೇನಾ ಸರಣಿ ವಾಹನಗಳ ಮೇಲೆ ಶಂಕಿತ ಭಯೋತ್ಪಾದಕರು ಹ್ಯಾಂಡ್ ಗ್ರೆನೇಡ್ ಎಸೆದಿದ್ದಾರೆ. ಅದು ಕೊನೆಯ ವಾಹನಕ್ಕೂ ತಾಗದೆ, ಕೆಳಗೆ ಬಿದ್ದು ಸ್ಫೋಟಗೊಂಡಿದೆ. ಇದರಿಂದ 6 ಮಂದಿ ನಾಗರಿಕರು ಗಾಯಗೊಂಡಿದ್ದಾರೆ ಎಂದು ಸೇನೆಯ ಹೇಳಿಕೆ ತಿಳಿಸಿದೆ.

ಗಾಯಗೊಂಡವರನ್ನು ಬಾರಮುಲ್ಲಾ ಜಿಲ್ಲಾ ಆಸ್ಪತ್ರೆಗೆ ವರ್ಗಾಯಿಸಿ ಚಿಕಿತ್ಸೆ ನೀಡಲಾಗುತ್ತಿದೆ. ಈ ಪ್ರದೇಶವನ್ನು ಸುತ್ತುವರಿಯಾಗಿದೆ ಹಾಗೂ ಶೋಧ ಕಾರ್ಯಾಚರಣೆ ಪ್ರಗತಿಯಲ್ಲಿ ಎಂದು ಹೇಳಿಕೆ ತಿಳಿಸಿದೆ. ಗ್ರೆನೇಡ್ ದಾಳಿ ಸಂದರ್ಭ ಟ್ರಕ್, ಜೀಪ್‌ಗಳನ್ನು ಸೇನಾ ಸರಣಿ ವಾಹನಗಳು ಸೇತುವ ದಾಟುತ್ತಿರುವುದು ಸಿಸಿಟಿವಿ ದೃಶ್ಯಾವಳಿಗಳು ಕಂಡು ಬಂದಿದೆ. ವೀಡಿಯೊದ ಅಂತ್ಯದಲ್ಲಿ ಸಣ್ಣ ಸ್ಫೋಟ ಹಾಗೂ ಹೊಗೆ ಕಾಣಿಸಿದೆ.