ಪ್ರತೀಕಾರ ಅನಿವಾರ್ಯ: ಟ್ರಂಪ್‌ಗೆ ಇರಾನ್‌ನ ಸರ್ವೋಚ್ಛ ನಾಯಕ ಎಚ್ಚರಿಕೆ

ಟೆಹರಾನ್ (ಇರಾನ್), ಜ. 22: ಅವೆುರಿಕದ ಮಾಜಿ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಆದೇಶದಂತೆ ನಡೆದ ಇರಾನ್ ಸೇನಾಪತಿ ಹತ್ಯೆಗೆ ಪ್ರತೀಕಾರ ತೀರಿಸಲಾಗುವುದು ಎಂದು ಇರಾನ್‌ನ ಪರಮೋಚ್ಛ ನಾಯಕ ಆಯತುಲ್ಲಾ ಅಲಿ ಖಾಮಿನೈ ಕಚೇರಿ ಟ್ವೀಟೊಂದರಲ್ಲಿ ಹೇಳಿದೆ. ಟ್ವೀಟ್‌ನಲ್ಲಿ ಈ ಬರಹದ ಜೊತೆಗೆ, ಯುದ್ಧವಿಮಾನವೊಂದರ ಅಡಿಯಲ್ಲಿ ಗಾಲ್ಫ್ ಆಡುತ್ತಿರುವ ಟ್ರಂಪ್‌ರ ಚಿತ್ರವೊಂದನ್ನೂ ಹಾಕಲಾಗಿದೆ.

2020ರ ಜನವರಿ 3ರಂದು ಇರಾಕ್ ರಾಜಧಾನಿ ಬಗ್ದಾದ್‌ನ ಅಂತರ್‌ರಾಷ್ಟ್ರೀಯ ವಿಮಾನ ನಿಲ್ದಾಣದ ಹೊರಗೆ ನಡೆದ ಡ್ರೋನ್ ದಾಳಿಯಲ್ಲಿ ಇರಾನ್‌ನ ಉನ್ನತ ಸೇನಾಧಿಕಾರಿ ಜನರಲ್ ಖಾಸಿಮ್ ಸುಲೈಮಾನಿ ಮೃತಪಟ್ಟಿದ್ದರು.

ಈ ದಾಳಿಗೆ ಪ್ರತೀಕಾರ ತೀರಿಸದೆ ಬೇರೆ ದಾರಿಯಿಲ್ಲ ಎಂದು ಟ್ವೀಟ್ ಎಚ್ಚರಿಸಿದೆ.

‘‘ಪ್ರತೀಕಾರ ಅನಿವಾರ್ಯ. ಸುಲೈಮಾನಿಯ ಹಂತಕ ಮತ್ತು ಅದಕ್ಕೆ ಆದೇಶ ನೀಡಿದ ವ್ಯಕ್ತಿ ಪ್ರತೀಕಾರವನ್ನು ಎದುರಿಸಲೇ ಬೇಕು. ಪ್ರತೀಕಾರ ಯಾವುದೇ ಕ್ಷಣದಲ್ಲಿ ಸಂಭವಿಸಬಹುದು’’ ಎಂದು ಅದು ಹೇಳಿದೆ.