"ಕೋವಿಶೀಲ್ಡ್, ಕೊವ್ಯಾಕ್ಸಿನ್ ಲಸಿಕೆ ಪಡೆದರೂ ಕೊರೋನದ ‘ಡೆಲ್ಟಾ’ ಪ್ರಬೇಧದ ಸೋಂಕು ತಡೆಗಟ್ಟಲು ಅಸಾಧ್ಯ"

ಹೊಸದಿಲ್ಲಿ, ಜೂ. 9: ಕೊವ್ಯಾಕ್ಸಿನ್ ಹಾಗೂ ಕೋವಿಶೀಲ್ಡ್ ಲಸಿಕೆಯ ಎರಡೂ ಡೋಸ್ ಗಳನ್ನು ಪಡೆದರೂ ಭಾರತದಲ್ಲಿ ಕಳೆದ ವರ್ಷ ಅಕ್ಟೋಬರ್ ನಲ್ಲಿ ಮೊದಲ ಬಾರಿಗೆ ಪತ್ತೆಯಾದ ಕೋವಿಡ್-19ನ ‘ಡೆಲ್ಟಾ’ ಪ್ರಭೇದ ಸೋಂಕನ್ನು ತಡೆಯಲು ಸಾಧ್ಯವಿಲ್ಲ ಎಂದು ದಿಲ್ಲಿ ಏಮ್ಸ್ (ಎಐಐಎಂಎಸ್) ಹಾಗೂ ರೋಗ ನಿಯಂತ್ರಣದ ರಾಷ್ಟ್ರೀಯ ಕೇಂದ್ರ (ಎನ್ಸಿಡಿಸಿ) ತನ್ನ ಪ್ರತ್ಯೇಕ ವರದಿಗಳಲ್ಲಿ ಹೇಳಿದೆ. 

ಆದರೆ, ಇಲ್ಲಿ ಗಮನಿಸಬೇಕಾದ ಅಂಶವೆಂದರೆ, ಈ ವರದಿಯನ್ನು ಉನ್ನತ ಸಂಸ್ಥೆಗಳು ಪರಾಮರ್ಶಿಸಿಲ್ಲ. ಆಸ್ಪತ್ರೆಯೊಂದರ ತುರ್ತು ನಿಗಾ ಘಟಕದ ವಾರ್ಡ್ ನಲ್ಲಿ 5ರಿಂದ 7 ದಿನಗಳ ಕಾಲ ತೀವ್ರ ಜ್ವರ ಕಾಣಿಸಿಕೊಂಡ ಕೊರೋನ ರೋಗಲಕ್ಷಣ ಹೊಂದಿದ 63 ಮಂದಿ ರೋಗಿಗಳ ವಿಶ್ಲೇಷಣೆಯನ್ನು ಏಮ್ಸ್-ಐಜಿಐಬಿ (ವಂಶವಾಹಿನಿಶಾಸ್ತ್ರ ಹಾಗೂ ಸಮಗ್ರ ಜೀವಶಾಸ್ತ್ರ ಸಂಸ್ಥೆ)ಯ ಅಧ್ಯಯನವನ್ನು ಈ ವರದಿ ಆಧರಿಸಿದೆ. 63 ಜನರಲ್ಲಿ 53 ಜನರಿಗೆ ಕನಿಷ್ಠ ಒಂದು ಡೋಸ್ ಕೊವ್ಯಾಕ್ಸಿನ್ ನೀಡಲಾಗಿತ್ತು. ಉಳಿದವರಿಗೆ ಕನಿಷ್ಠ ಒಂದು ಡೋಸ್ ಕೋವಿಶೀಲ್ಡ್ ನೀಡಲಾಗಿತ್ತು. ಡೆಲ್ಟಾ ಪ್ರಭೇದ ಕೊರೋನ ಲಸಿಕೆಯ ಒಂದು ಡೋಸ್ ತೆಗೆದುಕೊಂಡ ಶೇ. 76.9 ಜನರಲ್ಲಿ ಹಾಗೂ ಎರಡೂ ಡೋಸ್ ತೆಗೆದುಕೊಂಡ ಶೇ. 60 ಜನರಲ್ಲಿ ಸೋಂಕು ಉಂಟು ಮಾಡಿರುವುದು ಪತ್ತೆಯಾಗಿದೆ. ಕೋವಿಶೀಲ್ಡ್ ಲಸಿಕೆ ತೆಗೆದುಕೊಂಡ ಶೇ. 70.3 ಜನರಲ್ಲಿ ಡೆಲ್ಟಾ ಸೋಂಕಿಗೆ ತುತ್ತಾಗಿದ್ದಾರೆ ಎಂಬುದನ್ನು ಎನ್ಸಿಡಿಸಿ-ಐಜಿಐಬಿಯ ದತ್ತಾಂಶ ತಿಳಿಸಿದೆ. 

ಕೋವಿಶೀಲ್ಡ್ ಹಾಗೂ ಕೊವ್ಯಾಕ್ಸಿನ್ ಲಸಿಕೆ ಪಡೆದುಕೊಂಡವರಲ್ಲಿ ‘ಆಲ್ಫಾ’ ಪ್ರಬೇಧದ ಸೋಂಕು ತಗಲದೇ ಇರುವುದನ್ನು ಎರಡೂ ಅಧ್ಯಯನಗಳ ವರದಿಗಳು ಬಹಿರಂಗಪಡಿಸಿವೆ. ಡೆಲ್ಟಾ ಹಾಗೂ ಆಲ್ಫಾ ಪ್ರಬೇಧದ ವಿರುದ್ಧದ ಲಸಿಕೆಗಳ ರಕ್ಷಣೆಯ ಪ್ರಮಾಣ ಕಡಿಮೆಯಾಗಬಹುದು, ಪ್ರತಿ ಪ್ರಕರಣದಲ್ಲಿ ಸೋಂಕಿನ ತೀವ್ರತೆಯ ಮೇಲೆ ಲಸಿಕೆಗಳು ಯಾವುದೇ ಪರಿಣಾಮ ಉಂಟು ಮಾಡದಿರುವುದು ಕಂಡು ಬಂದಿದೆ ಎಂದು ಎರಡೂ ಅಧ್ಯಯನಗಳು ತಿಳಿಸಿವೆ. ಆದರೆ, ಡೆಲ್ಟಾ ವೈರಸ್ ಅನ್ನು ಕೂಡ ತಟಸ್ಥಗೊಳಿಸುವ ಸಾಮರ್ಥ್ಯವನ್ನು ಭಾರತ ಬಯೋಟೆಕ್ ನ ಕೊವ್ಯಾಕ್ಸಿನ್ ಹೊಂದಿದೆ ಎಂದು ಪುಣೆಯ ಇಂಡಿಯನ್ ಕೌನ್ಸಿಲ್ ಆಫ್ ಮೆಡಿಕಲ್ ರಿಸರ್ಚ್-ನ್ಯಾಷನಲ್ ಇನ್ಸ್ಟಿಟ್ಯೂಟ್ ಆಫ್ ವೈರಾಲಜಿ (ಐಸಿಎಂಆರ್-ಎನ್ಐವಿ)ಯ ಸಂಶೋಧಕರು ಪತ್ತೆ ಮಾಡಿದ್ದಾರೆ.