ಉಪ್ಪಿನಂಗಡಿ ಕಾಲೇಜಿನ ಸ್ಮಿತಾಗೆ ಬಿಎಸ್ಡಬ್ಲ್ಯೂ ಪದವಿಯಲ್ಲಿ ದ್ವಿತೀಯ ರ್ಯಾಂಕ್
Update: 2022-04-09 23:14 IST
ಉಪ್ಪಿನಂಗಡಿ: ಸರಕಾರಿ ಪ್ರಥಮ ದರ್ಜೆ ಕಾಲೇಜಿನ ಸ್ಮಿತಾ ಎಂಬವರು ಬಿಎಸ್ಡಬ್ಲ್ಯೂ ಪದವಿ ವಿಭಾಗದಲ್ಲಿ ದ್ವಿತೀಯ ರ್ಯಾಂಕ್ ಗಳಿಸುವ ಮೂಲಕ ಉತ್ತಮ ಸಾಧನೆ ತೋರಿದ್ದಾರೆ.
ಬಜತ್ತೂರು ಗ್ರಾಮದ ಬೆದ್ರೋಡಿಯ ಭರತ್ ಮತ್ತು ವಿಮಲಾ ದಂಪತಿಯ ಮಗಳಾಗಿರುವ ಸ್ಮಿತಾ ತನ್ನ ಕಲಿಕೆ ಹಾಗೂ ಕಲಿಕೇತರ ಚಟುವಟಿಕೆಗಳ ಮೂಲಕ ಅಮೇರಿಕಾ ಸಂಸ್ಥೆಯ ಫೆಲೋಶಿಫ್ಗೆ ಈ ಮೊದಲು ಭಾಜನರಾಗಿದ್ದು, ಇದೀಗ ಬಿಎಸ್ಡಬ್ಲ್ಯೂ ಅಂತಿಮ ವರ್ಷದ ಫಲಿತಾಂಶಕ್ಕೆ ಸಂಬಂಧಿಸಿ ರ್ಯಾಂಕ್ ಪಟ್ಟಿಯನ್ನು ಬಿಡುಗಡೆ ಮಾಡಲಾಗಿದ್ದು, ಸ್ಮಿತಾರವರಿಗೆ ದ್ವಿತೀಯ ರ್ಯಾಂಕ್ ಲಭಿಸಿದೆ.
ಪ್ರಸಕ್ತ ತನಗೆ ದೊರೆತ ಅಮೇರಿಕಾ ಸಂಸ್ಥೆಯ ಫೆಲೋಶಿಫ್ ಸಹಕಾರದಿಂದ ಮೈಸೂರಿನಲ್ಲಿ ಎಂಎಸ್ಡಬ್ಲ್ಯೂ ಪದವಿಯನ್ನು ಮಾಡುತ್ತಿರುವ ಈಕೆ, `ತಾನು ರ್ಯಾಂಕ್ ನಿರೀಕ್ಷಿಸಿರಲಿಲ್ಲ. ಮುಖ್ಯವಾಗಿ ಎಸೆಸ್ಸೆಲ್ಸಿ ಯಿಂದ ನಾನು ಬರೆದ ಪರೀಕ್ಷೆಯಲ್ಲೆಲ್ಲಾ ಡಿಸ್ಟಿಂಕ್ಷನ್ ಮಟ್ಟವನ್ನು ಕಾಯ್ದುಕೊಂಡು ತೇರ್ಗಡೆಯಾಗುತ್ತಿದ್ದೆ. ಅಂಕದ ಬಗ್ಗೆ ನಾನು ಯಾವತ್ತೂ ಚಿಂತಿತಳಾಗಿಲ್ಲ. ಕಲಿಯುವ ಹಂಬಲವಿತ್ತು. ಕಾಲೇಜಿನಲ್ಲಿ ನನಗೆ ತುಂಬಾ ಪ್ರೋತ್ಸಾಹ ನೀಡುತ್ತಿದ್ದರು. ಸಮಾಜ ಕಾರ್ಯ ವಿಭಾಗದ ಮುಖ್ಯಸ್ಥರಾದ ನಂದೀಶ್ ವೈ.ಡಿ. ರವರ ಪ್ರೋತ್ಸಾಹ ಈ ರ್ಯಾಂಕ್ ನಲ್ಲಿ ತುಂಬಾ ಪ್ರಭಾವ ಬೀರಿದೆ. ನನಗೆ ರಾತ್ರಿ ವೇಳೆಯ ಪ್ರಶಾಂತತೆಯಲ್ಲಿ ಓದುವುದೆಂದರೆ ಬಲು ಇಷ್ಟ. ಹಾಗಾಗಿ ರಾತ್ರಿ 2, 3 ಗಂಟೆಯ ವರೆಗೆ ಓದುವುದು ನನ್ನ ಅಭ್ಯಾಸ. ಒಟ್ಟಾರೆ ನನಗೆ ದ್ವಿತೀಯ ರ್ಯಾಂಕ್ ಬಂದಿದೆ ಎಂಬ ಸಂದೇಶ ಕೇಳಿ ತುಂಬಾ ಖುಷಿಯಾಗಿದೆ' ಎಂದು ಸ್ಮಿತಾ ಪ್ರತಿಕ್ರಿಯೆ ನೀಡಿದ್ದಾರೆ.